❄️ Нэг л өөр Nvidia

POWERED BY

Өглөөний мэнд! Өнөөдөр нэг сайн, нэг муу мэдээтэй. Сайн мэдээнээс эхэлбэл өнөөдөр Баасан гараг тохиож байна. Харин муу мэдээ гэвэл 2025 оны зуны хамгийн сүүлийн Баасан гараг ажээ. Ирэх Даваа гаргаас эхлэн биднийг олон халуухан мэдээ угтах нь ойлгомжтой. 🔥 

MATD.L: Petro Matad Heron-2 талбайд өрөмдлөгийн туршилтаа эхлүүлж, оны эцэс гэхэд үйлдвэрлэлээ эхлүүлэх төлөвтэй байна. 

AUS: Австралийн Амбан захирагч Саманта Мостин ирэх 9 сарын 4-9-нд Монголд айлчилна. 

DP: АН-ын Үндэсний бодлогын хороо намын даргад нэр дэвшигчдээ бүртгэж, 8 сарын 31-ний дотор даргаа сонгохоор болов.

🗞️ $ADB-н бизнесийн сонин хачин

Өнгөрсөн 7-р сард Ард Кредит ББСБ (ADB) Японы Crowd Credit-тэй $5 саяын санхүүжилтийн хэлцэл байгуулж байсан. Өнгөрсөн 7 хоногт $ADB хэлцлийнхээ эхний санхүүжилт болгон ¥100 саяыг татан төвлөрүүлжээ. 

🆙 Санхүүжилт нэмэгдлээ!

$ADB 2019 онд IPO хийж нээлттэй компани болсон жилдээ Сrowd Credit-с анхны гадаад санхүүжилтээ татаж байв. Тухайн үед одоогийн санхүүжилттэй ижил дүн болох $5 саяыг татаж, эргэн төлөлтөө амжилттай хийснээр дараагийн хамтралаа эхлүүлээд буй. Энэ удаагийн санхүүжилтээр компани санхүүгийн үйлчилгээгээ орон даяар хүртээмжтэй хүргэх, финтек зээл буюу Ард Апп-г сайжруулах зэрэгт зарцуулах аж. 

• 👶🏻 Шинэ бүтээгдэхүүн: Энэ оны эхний хагаст Ард Кредит ББСБ зээлийн сагсандаа шинэ буюу залуу бизнес эрхлэгчдийг дэмжих зээлийг нэмээд буй. Үүн дээр нэмээд цаашид, ЖДҮ болон малчдад олгох санхүүжилтээ нэмэгдүүлэх төлөвлөгөөтэй байгаа. 

• 🛜 Хүртээмжээ нэмнэ: Өөр нэгэн сонирхолтой хамтрал нь өнгөрсөн 5-р сард тэд Монгол Шуудан (MNP)-тай хамтран ухаалаг ПОС системийг ашиглан орон даяар санхүүгийн үйлчилгээгээ хүргэх стратегийн хамтын ажиллагаагаа зарласан бөгөөд ПОС төхөөрөмжөө энэ оны эцэс гэхэд орон даяар бүрэн нэвтрүүлэх аж. 

🤔 Хэтийн төлөв

Ард Кредит ББСБ гадаад санхүүжилт дээрээ Японтой ойрхон ажилладаг. Харин цаашид Хонгконг болон Сингапураас санхүүжилт татахаар ажлаа эрчимжүүлж байгаа сурагтай. Компани гадна, дотноос татсан санхүүжилтийнхээ тодорхой хувийг Ард Апп-н хөгжүүлэлт, сайжруулалтад зарцуулахаа мэдэгдэж ирсэн. Өрсөлдөөний гол зэвсэг болохоор аргагүй биз ээ. 

• 📲 Энэ оны тухайд компани апп дээрээ Монголын анхны хосолсон кредит скорингийн системийг нэвтрүүлж, дебит картаа гаргасан сонинтой байна. $MNP-тэй хамтарч буй төсөл нь тэднийг финтекийн өрсөлдөөнд нэг байтугай шат ахиулах нь лавтай. 

Эцэст нь… Ирэх жил буюу 2026 онд Ард Кредит ББСБ 15 нас хүрнэ. Компани бизнесээ нээлттэй зах зээлд удирдаад хэдийнээ 6 жил болсон байна. Хувьцаа эзэмшигчдэдээ ирэх жил илүү олон сонирхолтой бизнесийн хамтрал, шинэлэг бүтээгдэхүүн дуулгана гэж хүлээж байгаа шүү $ADB.

• 🇲🇳 Өнгөрсөн 5 жилд Монголчуудын ирээдүйд итгэх итгэл 14.8% буурчээ. (SICA)

• 🪖 Мао Зэдунээс хойших хамгийн том зэвсэгт хүчний цэвэрлэгээг Ши Жиньпин эхлүүлэв. (Bloomberg)

• 🎓 Дэлхийн хамгийн чинээлэг хүмүүсийг төлөвшүүлсэн ТОП-10 их сургууль. (BusinessBulls)

• 🥩 Чанартай махны үр дүнд Өвөр Монголын малчдын жилийн орлого ¥120-180 мянгад хүрэх болжээ. (ChinaDaily)

🐢 $NVDA: Өсөлттэй ч хурд удаашрав

Дэлхийн хамгийн өндөр үнэлгээтэй Nvidia (NVDA)-н орлого өнгөрсөн улиралд $46.7 тэрбумд хүрч дахин нэг дээд амжилт тогтоолоо. Гэвч 2023 оноос хойш улирал бүр айхтар амжилтыг тогтоож ирсэн боловч энэ удаад нэг л өөр байв.  

❤️‍🔥 Рекорд давтагдав

$NVDA-н өнгөрсөн улирлын орлого I-р улирлаас 6%, өмнөх оны мөн үеэс 56% өсжээ. Үүнд Blackwell дата төвийн орлого 17% нэмэгдсэн нь жинтэй нөлөө үзүүлсэн бол нөгөө талаар AI-д чиглэсэн H20 чипийн борлуулалт тарифын маргааны улмаас Хятадад хязгаарлагдсан орлогод сөргөөр нөлөөлсөн аж. Цаашлаад компанийн цэвэр ашиг мөн үеэс 59% ихэсэн $26.4 тэрбумд хүрч нэгж хувьцаанд ногдох ашиг (EPS) $1.05 болжээ. 

• 🗣️ Захирлын үг: Санхүүгийн тайлангийн дараа $NVDA-н CEO Женсен Хуанг хэлэхдээ ярилцлагадаа Америкийн технологийн компаниудын бүтээгдэхүүн, үйлчилгээ дэлхий даяар хэрэглэгддэг байх ёстой, технологийн компаниуд Хятадын зах зээлийн гадна байж болохгүй гэсэн санааг онцолсон аж. 

🔦 Нэг л өөр улирал

Өнгөрсөн улирал нь 2023 оны дундаас эхлэн AI-н эрэлт нэмэгдсэнээс хойш $NVDA-н орлого мөн үеэс улиралд 50%-иас дээш өссөн 9 дахь улирал болсон. Гэхдээ тус улиралд орлого 56% нэмэгдсэн нь сүүлийн 2 жил дахь хамгийн тааруу үзүүлэлт аж. Компанийн зүгээс III-р улиралд $54 тэрбумын орлого олохоор төлөвлөж буйгаа зарласан нь цаашид орлогын өсөлт удаашрах дохио гэж дүгнэгдэж байна.  

🔮 Ирээдүй хэр бол

Ирэх хугацаанд AI-н эрэлт өндөр байх нь тодорхой, мөн технологийн бусад томчууд AI-д суурилсан бүтээгдэхүүн, үйлчилгээ хөгжүүлэхэд харамгүй хөрөнгө оруулалт хийхээ амласан. Мөн саяхан $NVDA Хятад руу экспортлох чипийн орлогын 15%-ийг Америкийн ЗГ-тай хуваалцах онцгой гэрээ байгуулж чадсан аж. Тэгэхээр III-р улиралд компанийн орлого шинжээчдийн таамгийг эвдэх магадал тун өндөр гэнэ. 

Цаашид… $NVDA-н орлого өсөх нь тодорхой, ашиг нэмэгдэх нь баараггүй. Гагцхүү өмнөх улирлуудын галзуу өсөлтөө хадгалж үлдэх үү гэдэг хөрөнгө оруулагчдын анхаарлыг татаж байна даа. 🫣 

💡 Таавар таацгаая. 

… нь компанийн урт хугацааны өсөлт, өрсөлдөх чадварыг тодорхойлж, удирдлагад ямар чиглэлд хөрөнгө оруулах, аль зах зээлд өрсөлдөхөө төлөвлөхөд ашиглагддаг стратегийн үзүүлэлт юм.

Ямар үзүүлэлт гэж бодож байна? Хариугаа бидэнд илгээгээрэй! 😎

🤑 PayOn: Хэрэглээ бүрд тохирох хялбар зээл

Гар утсаараа хэзээ ч, хаанаас ч ₮5 сая хүртэлх зээл авах боломжтой талаар дуулсан уу? PayOn хэрэглэгчдэдээ зээлийн төлөлтөө өөрийн орлоготой уялдуулан хамгийн ихдээ 30 сар хүртэлх хугацаагаар тохируулан сонгох  боломжийг санал болгоод буй. 

🤔 Яагаад PayOn гэж? 

• Салбар орох шаардлагагүйгээр Ekyc ашиглан гар утсаараа баталгаажуулалт хийгээд л гэрээ бэлэн. 

• Автомашин, барьцаат, лизинг, худалдан авалт, орон сууц барьцаалсан болон бизнесийн зээл гэхчлэн 1 апп-аас бүх төрлийн зээл авах боломжтой.

• Мөн TreeOn цэсийг идэвхжүүлбэл алхах бүртээ оноо цуглуулан виртуал мод тарих бөгөөд виртиул модыг тань таны өмнөөс бодит амьдралд тарьж өгнө гэж байгаа. 

PayOn хэрэглэгчдийнхээ яаралтай үед баталгаат санхүүгийн эх үүсвэр байхаар бүх төрлийн зээлийн эргэн төлөлтөө уян хатан, шуурхайн болгож байгаа юм байна. Эрсдэлээ тооцож, ухаалаг ашиглах нь хамгийн чухал хэсэг нь шүү. 

🌐 Вэб: tavanbogdfinance.com
 📞 Холбоо барих: 7533-1111

🍋 JD.com (JD) Сингапурт $1 тэрбумын үнэлгээтэй оруулалтын сан байгуулна. Хятадын цахим худалдааны аваргуудын нэг $JD үл хөдлөх хөрөнгө оруулалтын нэгжээрээ дамжуулж хоёр компанитай хамтран Сингапурт үл хөдлөх хөрөнгийн хөрөнгө оруулалтын сан (REIT) байгуулахаар төлөвлөжээ. Тус сангийн хувьд ирэх оноос эхлэн Сингапурын хөрөнгийн биржид бүртгүүлж магадгүй аж.

🍋 Хувийн 157 сургуульд нийт ₮38 тэрбумын хувьсах зардал олгоно. Энэ хичээлийн жилд ЗГ-аас 189 хувийн сургуулиас 166-д нь хувьсах зардлын санхүүжилт олгохоор тооцсон бөгөөд гэрээ дүгнэсэн тайлангаас үндэслэн 157 сургуульд санхүүжилт өгөх аж. Боловсролын яамны мэдээллээр хувьсах зардлын санхүүжилт нь тодорхой хэмжээнд хувийн сургуулийн төлбөрийг өсгөхгүй байхад чиглэдэг гэнэ. 

🍋 NATO-н гишүүн орнуудын дунд шинээр батлагдсан батлан хамгаалахын төсвийн зорилтыг ердөө 3 улс л хангажээ. Одоогийн байдлаар ДНБ-ий 3.5%-ийг батлан хамгаалах салбарт зарцуулж буй улсууд Польш, Литва, Латви аж. Хамгийн том нөлөө бүхий Америк энэ жил батлан хамгаалахын төсвөө ДНБ-ий 3.2%-д барихаар зорьсон бол Германы тухайд тодорхой мэдэгдэл гараагүй байна. 

🍋 2004-2025 онуудад давхардсан тоогоор Монгол 38.5 мянган иргэнээ Өмнөд Солонгосыг хөдөлмөр эрхлүүлэхээр илгээжээ. Тус улсад гэрээт ажилтан илгээх, хүлээн авах асуудлаар Өмнөд Солонгосын Үйлдвэрчний эвлэлийн холбооны төлөөлөгчид Монголд хүрэлцэн ирсэн бөгөөд цалин хөлсний, хөдөлмөрийн харилцаа, нийгмийн хамгааллыг сайжруулахын тулд хоёр талын хамтын ажиллагаа онцгой ач холбогдолтойг онцолсон аж.

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин, Б.Эсүхэй
Graphics by: Ц. Цэлмэг