📉 Төгрөг тээр доор

POWERED BY

Hey! Урин цаг наашлаад л нар эрт мандаж, орой жаргаад гоё байна даа. Илүү сэргэг, хөнгөн болоод ч байх шиг. Дархлаагаа сайн дэмжээд, илүү бүтээмжтэй ажиллахын төлөө. 🥂

NSO: Даваа гаргийн байдлаар Улаанбаатарт гол нэрийн зарим барааны үнэ өмнөх сараас 3.2% өсөв. 

UB: Нийслэлд хэрэгжүүлэх дэд бүтцийн төслүүдэд Азийн Хөжлийн Банктай хамтын ажиллагаагаа өргөжүүлнэ. 

MRT: Автотээврээр зорчигчдын тоо оны эхнээс өссөн дүнгээр 20.5 саяд хүрч жилийн өмнөхөөс 6.9% өсжээ.

‼️ Төгрөг сулрав

Энэ өвөл Монголчууд баахан л аяллаа. Төгрөгийн ханшийн сулрал мэдэгдэв үү? Сүүлийн 3 жилийн хугацаанд иенээс бусад бүх гол валют төгрөгийн эсрэг чангараад байна. 

📌 Дундаж чангарал = 8.1%

Америкийн $, Хятадын ¥, Оросын ₽, Солонгосын ₩, Японы ¥ болон € зэрэг гол 6 валют сүүлийн 3 жилийн хугацаанд төгрөгийн эсрэг дунджаар 8.1% чангарлаа. Энэ дундаас зөвхөн иен төгрөгийн эсрэг 6.8% суларсан гэхээр үлдсэн 5 валютын чангарал дунджаар 11.1% болж байгаа юм. 

• 🔺 Аажим аажмаар: $-н хөдөлгөөнийг харвал 2023 оны сүүлээс 2024 оны 9-р сар хүртэл харьцангуй тогтвортой буюу $1=₮3,380 орчимд байсан ч үүнээс хойг аажмаар төгрөгийн эсрэг чангарч $1=₮3,4603-ийг даваад байна. 

• 📉 Ганцын хувьд: Харин иений хувьд Японы Төв Банк эдийн засгийн өсөлтийг дэмжих зорилгоор бодлогын хүүгээ удаан хугацаанд хасах түвшинд хадгалснаас үүдэн Япон болон Америкийн мөнгөний бодлогын ялгаа гаарч ханш нь суларсан ч энэ он гарснаас хойш эргээд төгрөгийн эсрэг багаар чангарч байгаа дүр зураг ажиглагдаж байна. 

😞 Бидний нөхцөл байдал

Төгрөгийн ханш бусад валютын эсрэг хүчтэй байхын тулд валютын нөөц нэмэгдэж, инфляцыг хянаж, гадаад худалдааны тэнцвэрийг хадгалах, макро эдийн засгийн тогтвортой байдлыг хангах шаардлагатай. Гэтэл манай ГВУН өмнөх сараасаа 11.2% буурсан, инфляц жилийн өмнөхөөсөө 2 нэгж хувиар нэмэгдсэн байдалтай байна. 

• 🖇️ Хэцүүдэл: Гал дээр тос гэгчээр Трамп дахин сонгогдсоноосоо хойш манай гол худалдан авагч Хятадад халтай байгаа. Тэднээс импортлох бараа, бүтээгдэхүүнийхээ татварыг нэмээд л. Энэ дүр зураг Хятадын эдийн засгийн өсөлт, гадаад худалдааг сааруулахаар байгаа тул манай уул уурхайн бүтээгдэхүүний эрэлт буурах, төгрөгийн ханшид дарамт учрах эрсдэлтэй байна. 

Эцэст нь… 2023 онд уул уурхайн салбар сэргэж, төгрөгийн ханш ч чангарч байлаа. Харин энэ жилийн хувьд нөхцөл байдал тийм ч таатай биш байна. Ядахад манай урсгал тэнцэл тогтмол алдагдал хүлээгээд байдаг. Инфляцаа дараад, төсөв, урсгал дансныхаа алдагдлыг хазаарлахгүй бол Америк, Хятадын тэнгэр ч эвгүй л байгаа даа. 

💸 Аваргын аварга хөрөнгө оруулалт 

Apple (AAPL) Америкт түүхэн дэх хамгийн өндөр буюу $500 тэрбумын хөрөнгө оруулалт хийхээ зарлалаа. 

🤝 Жинхэнэ төр хувийн хэвшлийн түншлэл

Уг хөрөнгө оруулалтаар гагц компанид бус Америкийн эдийн засагт асар их дэм болсон томоохон үйлдвэрийг бий болгох юм. Тодруулбал, Техасын Хьюстонд шинэ дэвшилтэт үйлдвэр байгуулж, Apple Intelligence буюу өөрийн хиймэл оюун ухааны системийг дэмжих сервер, силикон чипүүдийг үйлдвэрлэх аж. Цаашлаад 2017 онд үүсгэн байгуулсан дэвшилтэт технологи үйлдвэрлэлийн сангийнхаа хөрөнгийг 2 нугалж $10 тэрбумд хүргэх гэхчлэн тоймгүй ажлууд хийх нь. 

• 🗺️ Том зургаар нь харахад л, Apple Америкт хэдийнээ 24 сликон чипийн үйлдвэр байгуулж 2.9 сая ажлын байрыг бий болгочихсон. Харин ирэх жил тус үйлдвэр ашиглалтад орсноор 20 мянган ажлын байрыг шинээр бий болгох аж. 

• 🤑 Цаашлаад, Apple-н улсдаа төлдөг татварыг харахад шууд ухаан алдаж унахаар буюу сүүлийн 5 жилд $75 тэрбумыг, гагц 2024 онд гэхэд $19 тэрбумыг төлсөн байдаг.

⛱️ Зах зээлийн өнгө 

Та бидний мэдэж байгаачлан чип үйлдвэрлэл тал дээр Хятад гол тоглогч. Харин нөгөө талд Apple Америкаас гаднах чип үйлдвэрлэлээ дотооддоо хураахаар хичээж байгаа. Ингэснээр тэд M1, M2 гэхчлэн чип загварчлалын онцгой гоц авьяасаа бүрэн төгөлдөржүүлэхийн сацуу Трампын тарифын бодлогыг ч тойрон гарах боломж бүрдэх юм. 

• Хөрсөн дээрээ буух уу? Анхаарч харах чухал асуудал нь одоогоор Apple-н ханган нийлүүлэлтийн ердөө 10% нь л Америкт үлдсэн 90% нь Азийн орнуудад байгаа явдал.   

Эцэст нь… Санаж байгаа бол 2 жилийн өмнө Apple гол үйлдвэрлэлээ Хятадаас Энэтхэг рүү шилжүүлж, Хятадаас хамааралтай байдлаа багасгах оролдлого хийж байсан. Харин энэ удаад жинхэнэ утгаараа хамаарлаа бууруулах маш том алхмыг хийлээ. Хэдий тус төлөвлөгөө бодит үр дүн гаргатлаа 4-ээс дээш жил шаардагдах магадлал өндөр байгаа ч ганцхан компани улсынхаа эдийн засагт $500 тэрбумын бүтээн байгуулалтыг хийх чадамжтай байгаа нь гайхалтай.

Бяцхан кейс задлан. 💡

• Асуудал: … компани хэрэглэгчдийн орлогын хэмжээ, зардал, хадгаламж, хөрөнгө оруулалтын боломж, өр төлбөрийн төлөвлөгөөг харгалзан санхүүгийн төлөвлөгөө боловсруулж, ирээдүйн зорилгод нь нийцсэн зөвлөгөө өгдөг платформтой. Тус платформ нь эхэндээ хөөрхөн хандалттай байсан ч, шинэ хэрэглэгчид хэрхэн татах тал дээр арга мухардах болов. 

• Шийдэл: Компани Testimonial & Case Studies стратеги ашиглан тууштай хэрэглэгчдийн бодит туршлагыг өгүүлсэн контент бүтээж цацах болов. Үүнийгээ мөн маркетингийн ажлууддаа ч тусгаж эхэлжээ.

Тус компанийн баримталсан стратеги бизнесийн хөгжилд нь хэр өгөөжөө өгөх бол? Санал, бодлоо хуваалцаарай! 😉

🙂‍↔️💞 Царайлаг ихрүүд 

Дууслаа шүү! Юу вэ гэж үү? Цагаан сарын ширээний гол чимэг Тэрэлж, Сэлэнгэ брэндийн 100% ургамлын хандмал ундаа хаа сайгүй багц багцаараа зарагдаж буй сурагтай. 😎

Хөөрхөн төрхтэй атлаа гоё амттай, сэргээх үйлчилгээтэй эмийн ургамлын ундаа амсаж байв уу?

• 🧑‍⚕️ Эмчилнэ: Сэлэнгэ нь чихэр өвс, ганга өвс, нохойн хошуу, шилмүүс зэрэг эмийн ургамлуудыг цогцлоожээ. Тэд дархлаа болон цусны эргэлтийг сайжруулах, ядаргаа тайлах, хордлого тайлах гэхчлэн 9 зүйлийн ид шидтэй. 

• ➕ Анагаана: Харин Тэрэлжийн гол орц нь 400 жилийн түүхтэй алтангагнуур, ганга өвс болон цээний үндэс юм. Эдгээр нь дотоод эрхтнүүдийн үйл ажиллагааг сайжруулж мэдрэлийн системийг тайвшруулах, биеийг тамиржуулах гэхчлэн мөн л аливаа өвчнийг хамж шимээд эдгээдгээрээ онцлог. 

За тэгээд цагаан сараар эдгээр хөөрхөн төрсөн үндэсний ундаагаар ширээгээ өнгөлөөрэй. 🫶

🍋 Нийгмийн даатгалын сангийн чөлөөт үлдэгдэл болох ₮700 тэрбумыг арилжааны банкнуудад хадгаламж хэлбэрээр байршуулна. Угаас сангийн чөлөөт үлдэгдлийг санхүүгийн хэрэгсэлд оруулах 4 төрлийн нэг нь арилжааны банканд байршуулах явдал билээ. Байршуулах дүнгийн жилийн хүүгийн хэмжээг 11.4%-иас багагүй байхаар тогтоожээ. Улмаар НДС-гийн хөрөнгө ₮80 орчим тэрбумаар нэмэгдэх юм гэнэ.

🍋 Дарханы Төмөрлөгийн үйлдвэр өнгөрсөн онд ₮292.2 тэрбумын орлого олж ₮49.5 тэрбумын ашигтай ажиллав. Тус үйлдвэр нь жилд 30 мянган тн ган цувимал бүтээгдэхүүн, 2.5 сая тн төмрийн хүдрийн баяжмал үйлдвэрлэдэг бөгөөд улсын төсөвт ₮54.7 тэрбумыг төвлөрүүлсэн аж. Цаашлаад үүнийг түшиглэсэн гангийн үйлдвэр ашиглалтад орсноор жилд 1 саяас дээш тн ган үйлдвэрлэж, $700-$800 саяыг дотооддоо шингээж эхлэх нь.

🍋 Elixir Energy (EXR.AX) Монгол дахь сэргээгдэх эрчим хүчний төслийнхөө 51%-ийг Gobi Terra-д шилжүүллээ. Улмаар төслийн үйл ажиллагааг хариуцах болон сэргээгдэх эрчим хүчний хөрөнгө эзэмших зорилготой хамтарсан 2 компани байгуулжээ. Үүнд Gobi Terra төслийн эцсийн хөрөнгө оруулалтын шийдвэр гарах хүртэл бүх зардлыг $EXR.AX-н өмнөөс хариуцах бол $EXR.AX Австралийн Grandis байгалийн хийн төсөлдөө төвлөрөх аж.

🍋 УИХ-ын дарга Д.Амарбаясгалан Хятадад айлчилж байна. Тэрбээр Хятадын Ардын Төлөөлөгчдийн Их Хурлын Байнгын хороон дарга Жао Лөжитэй уулзаж хоёр улсын хууль тогтоох байгууллага хоорондын хамтын ажиллагааг хөгжүүлэх, УИХ дахь Парламентын найрамдлын бүлгийн үйл ажиллагааг өргөжүүлэх талаар хэлэлцэх гэнэ. 

• 🏔️ Саудын Арабд 2.6 км-н өндөрт байрлах, Нью-Йоркоос 33 дахин том цанын бааз. (ManOfMany)

• 🅿️ Зөвшөөрөлгүй үйл ажиллагаа явуулдаг төлбөртэй зогсоолуудын газрыг чөлөөлнө гэнэ дээ. (Ulaanbaatar)

• 🏰 Walt Disney-н ээлжит гайхалтай санаа: Walt’s Hideout. (SFGate)

• 📤 Gmail-н давхар баталгаажуулах кодыг мессежээр авах боломжгүй боллоо. (Engadget) 

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ