❌ Татвараа төл эсвэл зогс

POWERED BY

Morning! Сүхбаатар дүүрэг дэх шинэ орон сууцны м.кв-н дундаж үнэ сүүлийн 2 жилд яг 59% буюу ₮2 саяар өсөж ₮5.6 сая болоодохлоо. Яана вэ, хүүхээ. Хуримтлуулсан мөнгөө, ухаалгаар зарцуулж, сайн хөрөнгө оруулалт хийхгүй бол горьгүй нь дээ. 🧐

MSE: Монноос ХК (MNS) 2024 оны цэвэр ашгаасаа нэгж хувьцаанд ₮80 буюу нийт ₮28 саяын ногдол ашгийг 5 сарын 31-ний дотор олгох нь. 

UB: Нийслэлийн ₮500 тэрбумын бондын санхүүжилтийн зарцуулалт 93%-д хүрчээ. Одоо Туул-1 коллектор, үерийн шугамд зарцуулах ₮35 тэрбумын гүйцэтгэл үлдэв. 

US: Америкийн 2-р сарын инфляц 2.8%-тай гарч өмнөх сараасаа 0.2 нэгж хувь, 2023 оны мөн үеэс 3.2 нэгж хувиар тус тус саарлаа.  

❌ Татвараа төл эсвэл зогс

Монгол Улс цахим мөрийтэй тоглоомын эсрэг идэвхтэй тэмцэж байна. Энэ төрлийн зөвшөөрөл авсан этгээдүүд чинь бүр татвараа ч төлдөггүй юм байна, нөхөөд! 

⁉️ Юу болов оо? 

Өмнө нь 1xbet-тэй холбоотой 25 домэйн болон өөр 9 вэбсайтыг хааж, цахим орчинд мөрийтэй тоглоомыг сурталчилдаг 100 гаруй хаяг, группүүдийг хаах хүсэлт явуулсан. Энэ удаад бүр ноцтой. Цахимаар төлбөрт таавар, бооцоот тоглоомын үйл ажиллагаа эрхэлдэг ААН-үүд орлогын албан татвараас гадна, ₮36 саяын онцгой албан татвар төлөх ёстой. 

• 🔊 Ил нэрс: Гэтэл 2022-2023 онд тусгай зөвшөөрөл авч MELBET, MNBET, SCOREBET гэсэн платформуудаар дамжуулж үйл ажиллагаа эрхэлдэг 3 ХХК зөвшөөрөл авснаасаа хойш хүний урамд 1 ч удаа татвар төлөөгүй буюу нийт ₮3.4 тэрбумыг төлөөгүй ажээ.   

• 🛑 Тусгай Зөвшөөрөл: “Улаан Шугам”: Иймд татварын шалтгаанаар ЗГХЭГ-аас тус компаниудын тусгай зөвшөөрлийг түдгэлзүүлэх саналыг хүргүүлээд буй. Манай татварын хууль үйлчлэх ёстой газраа үйлчилж чадахгүй байна уу даа. 

🇲🇳 Хэдэн мянган Монгол

Дээрх 3 платформын өнгөрсөн сарын хандалтыг харвал нийт дүнгээрээ 93 мянгыг давжээ. Зөвхөн өнгөрсөн сарынх шүү, жил биш. Эндээс MELBET-н статистикийг нарийн харвал нийт платформын хандалт 100% Монголоос бөгөөд хандагсдын 57.26% нь эрэгтэй, 42.74% нь эмэгтэй, хамгийн их ханддаг насны бүлэг нь 25-34 насныхан байна. Эндээс нээрээ л залуучуудын дунд цахим мөрийтэй тоглоом газар авсан нь харагдаж байгаа биз? 

Эцэст нь… Бид цахим бооцоот, мөрийтэй тоглоом, казино зэргийг оруулна, хориглоно гэж талцахаасаа илүү хамгийн түрүүнд зохицуулалт, хууль эрх зүйн орчин, татварын асуудлаа нэг тийш болгочихмоор байна.

Ирээдүйн ур чадвар 👉🏻 2030

Хүн төрөлхтний хөдөлмөр эрхлэлт аж үйлдвэржилт, дижиталжилт, одоо AI гэхчлэн хувьсан өөрчлөгдсөөр хөдөлмөрийн зах зээл 3.0 эрин хаяанд ирээд байна. Тэгэхээр AI шилжилтийн энэ мөчлөгт ажиллаж, амьдарч буй бид хөдөлмөрийн зах зээлийг хэрхэн харах хэрэгтэй вэ? 

👆🏻 Нэмэгдэх 👇🏻 буурах ажлын байр

Ердөө тавхан жилийн дараа хөдөлмөрийн зах зээлд 170 сая ажлын байр шинээр бий болж, 92 сая ажлын байр AI, автоматжуулалттай холбоотойгоор орлуулагдана. Энд ногоон шилжилт ч нөлөөтэй.

• 👍🏻 Бэлэн байя: Улмаар хөдөлмөрийн зах зээлд AI болон машин сургалтын мэргэжилтнүүд, Big Data, сэргээгдэх эрчим хүч, тогтвортой байдлын зөвлөх, кибер, финтек, автомат тээврийн хэрэгслийн тэргүүтэй мэргэжилтнүүд моодонд орохоор байна. 

• 🥶 Харин нөгөө талд банкны теллер, кассчин, бичиг хэргийн болон захиргааны холбогдолтой ажлын байрнууд хэцүүдэх нь байна шүү. 

Хүн 🆚 AI 🆚Хүн болон AI

Ерөнхий трэндээс гадна муухайгаар хэлэхэд хиймэл оюун ухаан ажлын байран дээрээ цаг нөхцөөж, зай бөглөдөг хүмүүсийн орон зайг нэлээн багасгана. Энэ нь гагц доод, дунд албан тушаалтнуудыг л яриад байгаа хэрэг бус удирдах түвшинд ч хамаатай. Ядрахгүй, өлсөхгүй, гомдоллохгүйгээр 24/7 ажилладаг CEO туршиж байгаа компаниуд хэр олон билээ?

• 🗒️ Судалгааны хамгийн онцлох хэсэг нь 2030 он гэхэд AI болон хүн, хүн-машин гэх чиглэлд ажлын байр, орон тоо тэнцүү хуваагдана хэмээх таамаглал. Тэр тусмаа эрүүл мэнд, боловсрол, инженерчлэл тэргүүтэй олон ажлын байрыг AI-р орлуулахын оронд харин ч нэмэгдүүлэх аж. 

🔁 Дахин програмчилж байна…  

Цаашлаад, дэлхийн нийт ажиллах хүчний 59%-ийг дахин сургах хэрэгтэй төдийгүй одоо үнэлэгдэж байгаа ур чадваруудын 39% нь хуучрах гэнэ. Тиймээс өгч буй зөвлөгөө нь хүмүүс аналитик чадвар, манлайлал, уян хатан байдал, авхаалж самбаа гэхчлэн роботоос илүүрхэж болох чадваруудаа дахин програмчилж, дараагийн түвшинд гаргах явдал. 

Эцэст нь… Ажил олгогч талаасаа ч ажилтан талаасаа ч нэгийг бодож, хоёрыг тунгаахгүй бол ч манай өнөө яам, ордон, хороо хавийн ааштай эгч нарын арга барил үлэг гүрвэл болж хувирах нь дээ.

💡 Таавар таацгаая

… нь хотуудтай ч байшингүй, ой модтой ч ширхэг модгүй, голуудтай ч усгүй. Тэр юу вэ? Таасан бол хариултаа бидэнд илгээгээрэй. 😉

🍋 ХХААХҮ-ийн судалгаа хөгжлийн төв Өмнөд Солонгосын “Жи Эй Ти Си” ХХК-тай хамтран стартапуудыг дэмжинэ. Түүнчлэн хүлэмжийн аж ахуйн чиглэлээр зөвлөгөө, судалгаа, сургалт, семинар зохион байгуулах, инкубатор төвүүдийг дэмжих нь. Угтаа хүлэмжийн нарийн ногоо, жимс, жимсгэнэ, гоёл чимэглэлийн мод, бут тариалж ургуулах, таримлын нэр төрөл нэмэгдүүлэх зорилготой гэнэ. 

🍋 FIBO CLOUD Узбекистанд үүлэн технологи экспортлох сувгаа нэмэв. Энэ хүрээнд компани тэндхийн Tier-3 түвшний 2 дата төвийг 5 болгох, цаашлаад бүс нутгийн дижитал маркетплэйс нэвтрүүлэх зорилготой Uztelecom JSC-тай хамтын ажиллагааны гэрээ үзэглэв. Ийнхүү Монголын технологийн компаниудад тус улсын компаниудтай төлбөр тооцоо хялбараар хийх давуу талууд үүсэх эхлэл тавигдах нь ээ. 

🍋 Багануурын батарей хуримтлуурын станц төвийн системд 18,364 МВт.ц эрчим хүч нийлүүлээд байна. Энэ нь өнгөрсөн сартай харьцуулахад ойролцоогоор 30% өссөн дүн буюу 5 аймгийн цахилгааны хэрэглээг хангах хэмжээ аж. Улмаар өдөрт дунджаар 25,000 өрхийг оргил ачааллын үед цахилгааны хязгаарлалтаас сэргийлж байгаа гэнэ. 

🍋 Япон 2030 он хүртэл будааны экспортын хэмжээгээ 8 нугалж 350 мянган тн-д хүргэнэ. Үүнээс $623 саяыг олох боломжтой. Томоор харвал энэ нь Японы ЗГ хүнсний экспортынхоо орлогыг 2030 он хүртэл ойролцоогоор 3.3 нугалж $37 болгохоор зорьж буйн нэгээхэн хэсэг юм. Мөн дотоодынхоо хүнсний дутагдлаа ч энэ далимаар нөхөөд авах ажээ. 

• 🔏 Meta юу нуухыг оролдоно вэ? (NYT)

• 🗣️ 2 иртэй хутганы дууль. (ГБХНХЯ)

• ⌛ Ухаалаг цаг моодноос гарсан уу? (TechRadar)

• 💎 Тансаг зэрэглэлийн брэндийн ертөнц дэх хов живээс. (TheImpression)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ