🍼 Угжны хурга

POWERED BY

Hey! Эрхэм хүндэт нийслэлчүүдээ 18:00-21:00 цагаас бусад цагт хог хаяж болохгүй болжээ. Хөгтэй гэх үү, хөгжилтэй гэх үү, зөв гэх үү мэдэхгүй юм. Шөнө хог хаяхгүй гэдэг мухар сүсэгтэй бидэнд бол асуудалтай л шийдвэр байна. Юутай ч өдрийн цагаар хогийн машины ая сонсогдохгүй юм байна. Тэгээд тэвч итгэ хүлээ тэгвэл хог хаях цаг ирнэ. 😂  

ONH: Өндөрхаан ХК (ONH) хаалттай хүрээнд нэмж хувьцаа гарган, Ард Санхүүгийн Нэгдэл ХК (AARD)-нд өгөх ₮25 тэрбумын өглөгийг хувьцаанд хөрвүүлнэ. 

GLMT: Өнөөдөр 11 цагаас Голомт банк ХК-ийн 2024 оны IV улирлын Earnings call болно. 

MRT: Он гарснаас хойш нийт 9.9 сая тн ачаа тээвэр, 11.9 сая зорчигч тээвэрлэжээ.

✨ Шинэ бүтээгдэхүүн

Хөрөнгийн зах зээлд санхүүгийн шинэ бүтээгдэхүүн мэндэллээ. Үнэт цаасны зах зээлд хадгаламжийн сертификатыг арилжих боломжтой болох нь ээ. 

🤔 Яагаад хэрэгтэй вэ? 

Банканд тодорхой хугацаагаар мөнгө байршуулсныг гэрчлэх үнэт цаасыг хадгаламжийн сертификат гэж нэрлээд байгаа. Уг бүтээгдэхүүн нь уламжлалт, буцаан дуудах болон хоёрдогч зах зээлд арилжаалах боломжтой байдаг ч манай банкнууд зөвхөн уламжлалт буюу хөрвөх чадвар багатай, тогтмол хүүгийн түвшинтэй хадгаламжийн сертификат гаргасаар ирсэн.

• 📃 Шийдэл: Үүнийг шийдэхийн тулд Монголбанк 2025 онд төрөөс мөнгөний бодлогын талаар баримтлах үндсэн чиглэлдээ тусгасан юм. Улмаар Санхүүгийн Зохицуулах Хороо үнэт цаасны зах зээлд хадгаламжийн сертификатыг арилжих болон хувьцааны хамтын санхүүжилтийн үйл ажиллагааг эрхлэх зохицуулалтын орчныг бүрдүүлэв. 

💭 Юу өөрчлөгдөх вэ? 

Үнэт цаасны зах зээлд хадгаламжийн сертификатыг арилжаалдаг болсноор хөрвөх чадвар сайтай, үнэт цаас хэлбэртэй хадгаламжийн бүтээгдэхүүн бий болно гэсэн үг. Энэ нь банкны салбараас эх үүсвэр татах дарамтыг бууруулахаас гадна иргэд, хадгаламж эзэмшигчдэд банкаа чөлөөтэй сонгох, хадгаламжаа хоёрдогч зах зээл дээр худалдах боломжийг олгох зэрэг олон давуу талыг бий болгоно.

• 📈 Нэмээд хөрөнгө оруулагчид төгрөгөөр хөрөнгө оруулалт хийдэг болох нь төгрөгийн тогтвортой байдал, дотоодын хөрөнгийн зах зээлийг хөгжүүлэх, ГВУН-ийг хадгалах, нэмэгдүүлэх зэрэг нөлөө үзүүлэх учиртай. 

Эцэст нь… Хөрвөх чадвар багатай манайх шиг зах зээлд иймэрхүү бүтээгдэхүүн хөгжиж эхлэх гэж байгаа нь сайшаалтай. Одоо таниулж, ойлгуулж, идэвхжүүлэх л байна даа. 

🌐👥 LinkedIn-р брэндээ дэлхийд сурталчил

Амжаад оролцоорой! Юунд вэ гэж үү? 200 гаруй улсын 1 тэрбум гишүүнтэй LinkedIn-н Go-Global түнш болох боломж олгох “Building Mongolia's Global Brand with LinkedIn” Zoom вебинар ирэх сарын 6-нд болох гэж байна. 📢

Тус вебинарт оролцсоноор LinkedIn-г ашиглан гадаадад брэндээ сурталчлах зөв стратеги боловсруулах, ОУ-ын зах зээл дээрээс чадварлаг ажиллах хүч татах замаар бизнесийнхээ өсөлтийг дэмжих, мөн технологийн сорилтуудыг хэрхэн даван туулах талаар мэргэжлийн экспертүүдээс зөвлөгөө авах боломж нээгдэх юм байна шүү.

🙎‍♂️ Ангарагийн тэрбумтан ордонд

Илон Маск Америкийн ЗГ-ыг бүтээмжтэй, үр ашигтай ажиллах чиглэлд хийх ажлуудаа зарлаад эхэллээ. 

Масктай өнгөрөөсөн 14 хоногт 

Өнгөрсөн Даваа гарагт Илон Маск 1 жилийн хугацаанд 130 хүртэл хоног ажиллах боломжтой төрийн тусгай албан хаагчаар томилогдсоноо мэдэгдсэн. Өөрөөр бол, хагас цагаар Төрийн бүтээмж, үр ашгийн яам (DOGE)-г удирдана. Улмаар удаан, залхуу, бүтээмжгүй ажилладаг төрийн үйл ажиллагааг ашигт ажиллагаа руу шилжүүлэхээр DOGE-н ажилчдыг 7 хоногт 120 цаг ажиллуулж, төсвөөс $1 их наядын таналт хийх ажээ. 

Түүний тэргүүн эрэмбийн ажлуудад Америкийн хүмүүнлэгийн тусламжийг бүрэн зогсоох ажил багтсан. Трамп хэдийнээ Америкийн бусад оронд үзүүлэх туслалцааг царцаасан хэдий ч Маск бүр мөсөн алга болгохоор шийдсэн бололтой. 

• 🙈 Өөрсдөдөө тусал! Тодруулбал, тэрбээр Америкийн 120 гаруй оронд хүмүүнлэгийн болон хөгжлийн тусламж дамжих гол суваг болох ОУ-ын хөгжлийн агентлаг (USAID)-ийг татан буулгахаа мэдэгдсэн. 

• 🙅 Одоо болно! Америк жилдээ төсвөөсөө 1% хүрэхгүй хувийг хүмүүнлэг, хөгжлийн тусламжид зарцуулдаг гэх ч 2012-2022 онд нийт $640 тэрбумыг тусламж болгон илгээсэн байдаг. Уг дүнгээр бол  дэлхийн хамгийн өглөгч улс гэгддэг тул одоо тийм хайр байхгүй л гэж байгаа хэрэг. 

👀 Монголын хувьд 

2019 оноос USAID Монголын жижиг, дунд бизнесүүд рүү чиглэсэн “BEST” хөтөлбөрийг 5 жилийн хугацаатай хэрэгжүүлж, $100.4 саяыг олгож байв. Харин 1990 оноос хойш гээд харвал $377 сая орчим санхүүжилт өгсөн гэдэг. Уг нь “BEST” хөтөлбөрийн II шатыг энэ жилээс эхлүүлж, $10 саяын санхүүжилт олгоно гэгдэж байсан ч худлаа боллоо доо. 

• 🍼 Угжны хурга: Энэ нь мэдээж бидэнд муу мэдээ. Өнгөрсөн оны байдлаар гаднын зээл, тусламжаар 130 төслийг ₮1.8 их наядаар санхүүжүүлнэ гээд улсын төсөвт тусгаж байсан. Үүнд Америкийн $334 тэрбумын санхүүжилт ч багтаж байгаа. Одоо тусламжаа танаад эхэлсэн юм чинь цаашлаад зээл олголтоо ч чангаруулж магадгүй. Гэтэл бид төсвийн алдагдалдаа зодуулсаар… 

Эцэст нь… Илон Маскийг SpaceX болон Tesla (TSLA)-н үе үеийн ажилчид харгис, хагас цэрэгжилтийн  удирдлагын арга барилтай, ажлынхаа төлөө мятаршгүй зүтгэдэг нэгэн гэлцдэг. Үүгээр ч зогсохгүй бүтээмжгүй, шалтаг тоочсон ажилчдаа ямар сайхан харилцаатай байсан ч шууд хөсөр хаядаг зантай. Ах Монголын ЗГ-ын хүнд суртлын эсрэг ажилласан бол тэнд байгаа хүмүүсийн хэд нь ажилдаа үлдэх байсан бол? Бодууштай… 

Бяцхан кейс задлан. 💡

• Асуудал: … компани зөөврийн компьютерын үүргэвч үйлдвэрлэдэг. Тэдний үүргэвчнүүд загвар, чанарын хувьд ТОП брэндүүдтэй өрсөлдөхүйц байгаа ч, хэрэглэгчдийн дийлэнх нөгөө л янзаараа ТОП брэндүүдийн үүргэвчийг худалдан авсаар л байв. 

• Шийдэл: Компани бүтээгдэхүүн хөгжүүлэлтдээ ондоошил бий болгож, зөөврийн компьютерын үүргэвчний “царай муутай” дүр төрхтэй нийтлэг ойлголтыг эвдэв. Ингэхдээ тэд тус бүтээгдэхүүний хэрэглэгчдийн загварын сонирхлыг судлах замаар брэндингээ цоо шинээр тодорхойлж, цаашлаад брэндийнхээ онцлогийг шингээсэн үүргэвчнүүд үйлдвэрлэх болжээ.

Тус компанийн баримталсан стратеги бизнесийн хөгжилд нь хэр өгөөжөө өгөх бол? Санал, бодлоо хуваалцаарай! 😉

🍋 Америк Украинд цаашид үзүүлэх цэргийн тусламжийнхаа хариуд газрын ховор элемент авах баталгаа шаардав. Тодруулбал, Америк 2022 оноос хойш Украинд нийт $175 тэрбумын тусламж үзүүлээд буй. Одоогоор тогтоогдоод байгаа дэлхийн нийт газрын ховор элементийн нөөцийн дийлэнх буюу 40% нь Хятадад байгаа бол 2%-ийг л Америк эзэмшдэг. Хэдийгээр Европ ТОП-10-т жагсахгүй ч, Украинд 17 газрын ховор элементийн 9 нь бий. 

🍋 FIBO CLOUD Silkroad Innovation Hub-тай хамтран Төв Азийн AI дэд бүтэц хөгжүүлнэ. Энэ хүрээнд Азербайжан, Гүрж, Казахстан, Кыргызстан, Монгол, Тажикстан, Туркменистан, Турк, болон Узбекистаныг Nvidia (NVDA)-н технологиор хангах аж. Сонирхуулахад, Silkroad Innovation Hub нь Цахиурын хөндийн 17 компанид $40 сая гаруйн хөрөнгө оруулсан гэнэ.

🍋 Salesforce (CRM) ажилчдынхаа 1.3%-ийг цомхотгож, AI-н талаар мэдлэгтэй ажилчдыг татна. Одоогоор компани 73 мянга орчим ажилтантай бөгөөд шинээр орох ажилтнууд нь Salesforce-н AI шийдлүүдийг сурталчлах, борлуулах чиглэлд ажиллах юм. Salesforce ч гэлтгүй энэ онд Meta (META) ажилчдынхаа 5%, Microsoft (MSFT) 1%-г цомхотгохоо мэдэгдээд буй. 

🍋 Энэтхэг орлогын албан татвараас чөлөөлөх босгыг 1.8 дахин нэмэв. Ийнхүү жилийн 8.5 мянгын орлоготой Энэтхэгчүүд орлогын албан татвараас бүрэн чөлөөлөгддөг байсан бол энэ босго нь $14.8 мянга боллоо. Үүнтэй зэрэгцэн тус улсын автомашин, хэрэглээний бараа, хүнсний хүргэлтийн компаниудын хувьцааны үнэ ч өсжээ. Гэснээс, Энэтхэгийн нийт хүн амын 1.6% буюу 22.4 сая нь л орлогын албан татвар төлдөг гэнэ.

• 🌪️ Уур амьсгалын өөрчлөлт ирэх 30 жилд Америкийн үл хөдлөх хөрөнгийн салбарт $1.4 их наядын хохирол учруулна. (Axios)

• 🏍️ Бээжинд $60-оор түгжрэлд гацсан иргэнийг мотоциклтой авч, автомашиныг нь зорьсон газарт нь хүргэдэг гэнэ. (EntrepreneurshipQuote)

• 🧠 Хүний тархинаас илэрсэн бичил хуванцарууд зөнөх өвчний гол шалтгаан уу? (TheGuardian)

• 🎧 Amazon дээр Валентины өдрийг тохиолдуулан AirPods 4 урьд өмнө байгаагүйгээрээ хямдарна. (Yahoo!Tech) 

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг