🔉 Олимпын сонин сайхан

POWERED BY

Өглөөний мэнд ээ! Дотооддоо аялахаар төлөвлөж байгаа хүмүүс байна уу? МИАТ ТӨХК  Улаанбаатар - Ховд -Улаанбаатар чиглэлд ирэх сарын 10, 17, 24-ний өдрүүдэд нэмэлт нислэг үйлдэхээр болжээ. Эртхэн төлөвлөөд явахад гэмгүй биз ээ. ✈️

POL: Ирэх сарын 2-4-ний өдрүүдэд Швейцарын Ерөнхийлөгч Виола Амхерд Монголд төрийн айлчлал хийнэ. 

BOM: Арилжааны банкнууд өнгөрсөн онд нийт ₮800.5 тэрбумын ногоон зээл олгосны 33.8% нь эмэгтэй зээлдэгчдэд олгогджээ. 

MSE: Өчигдрийн арилжаагаар Улсын Их Дэлгүүр (UID)-ийн хувьцааны үнэ 14.96%, Инновэйшн инвестмент (QPAY)-ийнх 12.81% тус тус өссөн байна. 

OTC: Биржийн бус зах зээл дээр өнгөрсөн 7 хоногт нийт ₮43.7 тэрбумын арилжаа хийгдсэний ₮26.2 тэрбум нь анхдагч зах зээл дээр арилжигдлаа.

🔮 ТНБД-ын айлчлалын гүнд 

Америкийн Төрийн нарийн бичгийн дарга (ТНБД) Энтони Блинкений Азийн 6 орноор хийх 10 хоногийн айлчлалын цуваа ирэх Пүрэв гарагт Монголд айлчилснаар өндөрлөх гэж байна. 

📜 37 жилд 5 ТНБД

Энэ нь түүний Энэтхэг-Номхон далайн бүс нутгийн орнуудад хийж байгаа 18 дахь удаагийн айлчлал бөгөөд 7 сарын 25-наас эхэлж 8 сарын 3-нд дуусаж буй. Улмаар Энтони Блинкен Америк, Монголын дипломат харилцаа тогтоосон 37 жилийн хугацаанд Монголд айлчлал хийсэн 6 дахь ТНБД болж байна. 2020 онд ТНБД Майк Помпео Монголд айлчлахаа мэдэгдэж байсан ч Ерөнхийлөгч асан Дональд Трамп Ковид-19-ийн халдвараар эмнэлэгт хэвтсэн тул Өмнөд Солонгос болон Монголыг албан айлчлалаасаа хасаж байсан билээ. 

• 🤌 Айлчлалаас хүлээгдэж буй үр дүн: Өнгөрсөн 7 хоногт Гадаад хэргийн сайд Америкт айлчлах үеэрээ Монгол болон Америкийн анхдугаар Иж бүрэн стратегийн яриа хэлэлцээ хийж хамтарсан мэдэгдэл гаргасан. Түүний Монгол дахь айлчлалаар тус яриа хэлэлцээрийг биежүүлэх хамтын ажиллагааны санамж бичгүүдийг үзэглэх хүлээлттэй байгаа. 

◀️ Жилийн дотор юу өөрчлөгдөв? 

Өнгөрсөн жилийн өдийд Ерөнхий сайд Америкт айлчилж одоогийн Америкийн Ерөнхийлөгчийн сонгуульд хүч үзэх гэж буй Камала Харристай уулзаж байв. Тус үеэр 2 орон сансар судлал, цахим хөгжил, эрдэс баялаг, тээвэр логистикийн салбарт хамтын ажиллагаагаа эхлүүлж буйгаа мэдэгдэж байсан. 

• 🎠 Жил тойроход: Тэгвэл тус уулзалтаас хойш 1 жилийн хугацаанд, МИАТ ТӨХК Америк руу шууд нислэг үйлдэх 2 онгоцоо хүлээн авсан, Google (GOOG) болон ЦХХХЯ-ны хамтын ажиллагаа эрчтэй өргөжсөн, технологийн хэд маань ч өнгөрсөн 2-р сард Америкт айлчилж 8 компани Цахиурын хөндийд оффистой болсон зэрэг олон үйл явдал болж өнгөрсөн байна. 

• 🌌 Цаашлаад, 2 орны сансрын уудам дахь хамтын ажиллагаа ч бодит ажил болж 2027 он гэхэд Монгол, Франц, Америк хамтран Монголын хиймэл дагуулыг сансарт хөөргөхөөр болсон. 

Эцэст нь… Америк, Монголын харилцаа шинээр тодорхойлсон салбаруудад эрчтэй өргөжиж байгаа. Гэснээс өнгөрсөн жил Монголын ноолууран бүтээгдэхүүнийг Америкт татваргүй нийлүүлэх “Гуравдагч хөршийн худалдааг дэмжих тухай хууль”-ийг 4 дэх удаагаа Конгрессын Төлөөлөгчдийн танхимд өргөн бариад ахиад л уначихсан. Тус хуулийн төсөл дэмжигдвэл Монголын гуравдагч хөрштэйгөө хийх худалдаанд асар их ахиц гарах нь дамжиггүй юм сан.

🏆 Олимпын эргэн тойронд…

Долоон тивийн анхаарлын төвд буй олимпын наадмын гал гарсан тоглолтууд үргэлжилсээр. Улсынхаа тамирчдыг даган баярлаж, гуниглаж, бахархаж, харамсаж буй эдгээр өдрүүдэд олимпын наадмын эргэн тойронд юу болж буйг тоймлоё. 

🏅 Өнгө ээлжилсээр

Олимпын наадмын 2 дахь өдрийн байдлаар Япон 4 алт, 2 мөнгө, 1 хүрэл буюу нийт 7 медаль авч медалийн чанараар тэргүүлж буй бол Австрали 4 алт, 2 мөнгөн медаль авснаар удаалж буй. Цаашилбал, олимпыг зохион байгуулагч Франц 3 алт, 3 мөнгө, 2 хүрэл буюу 8 медаль авснаар 4-р байрт жагсаж буй бол Монгол 1 мөнгөн медаль авснаар Косово, Фижи, Польш, Тунистай адил 16-р байранд эрэмбэлэгдэж байна. 

🤩 Медаль авахад юу болдог вэ? 

Гэснээс олимпын наадмаас медаль хүртсэн тамирчид мөнгөн шагнал, медаль, алдар хүндийг хүртэхийн зэрэгцээ зарим орны ЗГ, эсвэл Олимпын хороо нь тамирчдынхаа хөдөлмөрийг үнэлэн шагнаж урамшуулдаг. Жишээлбэл, 

• 💰 Под хийтэл урамшуулдаг орнууд: Хонконг алтан медаль хүртсэн тамирчдаа $768 мянгаар, мөнгөн медальт тамирчдаа $380 мянгаар урамшуулах болсноор бусад орныг тэргүүлж байна. Удаах байруудад орсон Израил $275 мянгыг, Серби $218 мянгыг, Малайз $214 мянгыг урамшуулал болгож олгох гэнэ. Харин бийлэгжүү Америк алтан медальт тамирчдаа $37,500-оор урамшуулдаг аж. 

• 🇲🇳 Монголын хувьд: ЗГ-ын 2014 онд батлагдсан тогтоолын дагуу олимпоос алтан медаль хүртсэн тамирчдад ₮120 сая, мөнгөн медальтанд ₮60 сая, хүрэл медальтанд ₮30 саяыг, дасгалжуулагчдад энэхүү шагналын 50%-тай тэнцэх хэмжээний мөнгөн урамшууллыг олгохоор шийдвэрлэжээ. Нэмээд алтан медаль хүртсэн тамирчинд насан туршид нь сар бүр ₮4 сая, мөнгөн медальтанд ₮3 сая, хүрэл медальтанд ₮2 саяын урамшууллыг тус тус олгож буй. 

• 💁‍♀️ Сонирхуулахад, Малайз, Болгар зэрэг орнууд ч алтан медаль хүртсэн тамирчдадаа насан туршид нь сар бүр $1,000-ын урамшуулал олгодог бол Чили, Косово, Литвагийн хувьд үүнтэй тэнцүү хэмжээний урамшууллыг 4 жилийн хугацаанд олгодог гэнэ. 

• 🏳️ Түрүүлээд дэмжчихсэн: Нөгөөтээгүүр Норвег, Исланд, Швед зэрэг орон мөнгөн урамшуулал олгодоггүй ч тамирчдадаа олимпын өмнө бэлтгэл сургуулилтад шаардлагатай дэмжлэг туслалцааг үзүүлдэг аж. 

🤝 Ивээн тэтгэнэ

Сонирхуулахад, Парисын Олимпын наадмыг 150 гаруй хэвлэл мэдээллийн байгууллагад шууд дамжуулах эрхийг олгож ойролцоогоор €750 саяын орлого олжээ. Энэ удаагийн олимпын наадмыг Монголд албан ёсны эрхтэйгээр Central TV болон Premier Sports Network хамтран шууд дамжуулж буй бөгөөд М банк, Неткапитал Санхүүгийн Групп, Энержи Ресурс, PC Mall, Unitel, MCS Coca-Cola, Toyota Top Motors зэрэг компаниуд ивээн тэтгэж хамтран ажиллаж байгаа аж. 

Эцэст нь… Олимпын наадам эхлээд хэдхэн хонож буй хэдий ч үзэгчдийг суудлаас нь өндөлзүүлсэн тоглолтууд ар араасаа өрнөсөөр байна. Ямартай ч баг, тамирчдаа амжилтаа ахиулахыг нь дэмжин хүлээж дээлийн захыг нь мушгих л үлдлээ. 

Имэйлээ эмх цэгцтэй байлгах нь ажлын бүтээмжийг нэмэгдүүлж, стресс бууруулах нигууртай байдаг даа? Тэгвэл энэ удаад хэрхэн имэйлээ хийхээр төлөвлөж байгаа ажлын жагсаалт руугаа оруулж болох талаар зааж өгье. 

Та ердөө хэрэгтэй имэйлээ онгойлгоод Tasks хэсэг рүү чирч аваачихад л болно. Ингэснээр имэйлийн агуулга “My Tasks” хэсэгт автоматаар хадгалагдаж та зөвхөн хугацаа, нэмэлт тайлбарыг нь нэмж оруулаад л болох юм шүү. 😉

Илүү энгийнээр гэвэл ЭНД дарж видео хэлбэрээр үзээрэй. 

🍋 Хамгийн олон жижиг хувьцаа эзэмшигчтэй Женко Тур Бюро ХК (JTB) энэ оны эхний хагаст ₮316.7 саяын цэвэр ашигтай ажиллалаа. Өнгөрсөн жилийн эхний хагаст ₮285.7 саяын алдагдалтай ажиллаж байсан тэдний борлуулалтын орлого 17.8% өсөж ₮1.7 тэрбумд хүрснээр ашигтай ажилласан нь энэ. Цэвэр ашгийн хувь нь 18.6% байгаа хэрэг. 

🍋 Ерөнхийлөгч У.Хүрэлсүх Францын Ерөнхийлөгч Эммануэл Макронтой уулзлаа. Талууд 2 орны нийгэм, ЭЗ-ийн нөхцөл байдал, харилцаа, хамтын ажиллагааны төсөл, арга хэмжээнүүд, ОУ-ын харилцан сонирхсон асуудлаар ярилцаж, уул уурхай, цэвэр эрчим хүч, харилцаа холбооны салбар дахь хамтын ажиллагааг тэлэх, хөрөнгө оруулалтыг эрчимжүүлэхээр тохиролцжээ.

🍋 2022 онд хувьцааны үнийн өсөлтөөрөө тэргүүлж байсан Гутал ХК (GTL)-ийн эхний хагас жилийн цэвэр ашиг жилийн өмнөхөөсөө 15.9% нэмэгдэж ₮1.9 тэрбумд хүрэв. Учир нь тэдний түрээсийн орлого 8.2% нэмэгдсэн бол хүүгийн орлого нь огцом буюу 92 дахин нэмэгдэж ₮87.3 саяд болжээ. 

🍋 “The MongolZ” баг “CS2”-ийн "Skyesports" тэмцээнд II байр эзэлж $70 мянгын шагнал хүртлээ. Уг тэмцээн нь Энэтхэгийн Мумбай хотноо болсон бөгөөд нийт $300 мянгын шагналын сантай байсан аж. Одоогоор “The MongolZ” баг HLTV-н CS-н зэрэглэлийн системд чансаагаараа дэлхийд 12-т эрэмбэлэгдэж буй.

• Ярилцлага: Швейцар, Монголын харилцаа, хамтын ажиллагааны шинэ үе эхэлж байна. (GoGo)

• Унш: Өмнөд Солонгос Монголтой эрчим хүч, эрдэс баялгийн салбарт хамтын ажиллагаагаа өргөжүүлэх хэрэгтэй. (KoreaHerald)

• Танилц: Америкийн Ерөнхийлөгчийн сонгууль болоход 99 хоног үлдэв. (BusinessInsider)

• Сонирх: Олимпын наадмаас хасагдаж байсан 13 орон. (Aljazeera)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Батчимэг
Graphics by: Ч.Батцэрэн