🇰🇿🇲🇳 Ижил замаар ялгаатай хурдаар

POWERED BY

Morning! Заа маргааш НӨАТ-ын сугалааны тохиролтой шүү. Гэснээс 2024 онд бид ₮6.5 их наядын НӨАТ төлж байсан бол энэ онд ₮7.7 их наядыг төлнө. Ядаж сугалаандаа азтан болчихвол тийм ээ? 🥲 

MSE: ТЖТБ ХХК-ийн Ногоон бондын хөтөлбөрийн 2 транчийн анхдагч зах зээлийн арилжаа 12 сарын 20-ны өдрөөс 26-ны хооронд явагдана. 

MLG: Монложистикс Холдинг ХК (MLG) Хятадын Тяньжинд охин компаниа байгуулж, хөрөнгө оруулна.

UBX: Анд Энерги ХК (AND) Эрдэнэт Үйлдвэрийн гэрээний ажлыг гүйцэтгэх зорилгоор ХХБ (TDB)-наас гэрээ барьцаалж ₮500 саяын зээл авна.

NSO: Улсын төсвийн тэнцвэржүүлсэн орлого 11-р сарын урьдчилсан гүйцэтгэлээр өнгөрсөн оны мөн үеэс 26% өсөж ₮26 их наяд, зарлага нь 31.7% өсөж ₮24.7 их наядад хүрснээр ₮1.4 их наядын ашигтай гарлаа.  

💰 2025: Ипотекийн санхүүжилт нэмэгдэнэ

Өнгөрсөн сард Үндэсний баялгийн сан, орон сууцжуулалтын Үндэсний хорооны анхдугаар хурал болсон. Ер нь энэ хороо ямар зорилготой, яах гээд байгаа билээ?

💭 Юу хийх хороо вэ? 

Товчоор бол уг хороо Үндэсний баялгийн сангийн Хуримтлалын сангаар дамжуулан иргэдийг орон сууцжуулах зорилтыг бодит болгох үүрэг хүлээсэн. Үүний хүрээнд ирэх оны эхний сарын дотор ипотекийн зээлийн санхүүжилтийн тогтолцоог шинэчилж, эх үүсвэрийг нэмэгдүүлэх төлөвлөгөө гаргах, амины орон сууцанд ипотекийн зээл олгох нөхцөл бүрдүүлэх зэрэг ажлуудыг биелүүлэх даалгавар авсан хэрэг. 

🏠 714 мянган өрхийн хэрэгцээ

Одоогоор ипотекийн зээл авагсдын тоо 121 мянгыг давсан ч улсын хэмжээнд 714 мянган өрх инженерийн дэд бүтэцгүй байшин хороолол, гэрт амьдарч буй. Тиймээс Засгийн газар 2025 онд ипотекийн зээлийн эх үүсвэрийг ₮1.2 их наядад хүргэж, ер нь л ипотекийн зээл олголтыг нэмэгдүүлнэ гээд байгаа юм. 

• 🪙 Хуримтлалын сангаас: Энэ онд хуримтлалын санд ₮499.5 тэрбумыг төвлөрүүлж Монголбанк орон сууцны ипотекийн зээлийн эх үүсвэрт зориулж арилжааны 9 банканд хуваарилж 5.3 мянган иргэнийг ипотекийн зээлд хамруулсан гэнэ. Харин ирэх онд Хуримтлалын санд ₮507.1 тэрбумыг төвлөрүүлэхээр шийдвэрлэсэн аж. 

🤔 Нэгийг бодож, хоёрыг тунгаая

Нэг талаас ипотекийн зээл нь шийдэгдээгүй, хүлээгдэж байгаа мянга мянган өргөдөл байгаа ч нөгөө талаас ипотекийн зээлийн эрэлт нэмэгдэхийн хэрээр орон сууцны үнэ тэнгэрт хадаж буй. Одоогийн байдлаар орон сууцны үнэ иргэдийн орлоготой харьцуулахад 2-2.5 дахин үнэтэй байгаа. Цаашид ипотекийн зээлийн санхүүжилтийг нэмэх тусам энэ харьцаа улам холдох магадлалтай гэсэн үг. Тэгэхээр бидэнд санхүүжилтийг нэмэхээс гадна бодлогын зохицуулалт дутагдаж байна. 

🦋 Казакстаны өөрчлөлт

Хаа нэгтээ “Монгол ардчилсан замаар алхсан гучхан жилийн түүхтэй, дөнгөж төлөвших зам дээрээ яваа” гэхчлэн одоо тулгарч буй бүхий л асуудлыг зөвтгөх үгсийг сонсож байсан л биз дээ? Гэтэл яг бидэн шиг ардчиллын туршлагатай, газарзүй, геополитик, хөрш орны дарамттай улс арай өөрөөр хөгжөөд байх юм…

🕴️👔 Казакстаны шинэ түүхийг бичсэн 2 Ерөнхийлөгч  

Казакстаныг 28 жил удирдсан Н.Назарбаев 2012 онд улсаа 2050 он гэхэд ТОП-30 хөгжилтэй орны нэг болох “Казакстан-2050” урт хугацааны хөгжлийн стратеги дэвшүүлж, Хятад шиг хөгжлийн төлөвлөгөөгөө 5, 5 жилээр гаргаж байв. Тус стратегийн цөм нь гагц байгалийн хий, газрын тосны экспортод тулгуурласан нь 2008 болон 2015 оны дэлхийн эдийн засгийн хямралд хүчтэй өртөж Казакстаны эдийн засагт том хохирол учруулж байв. 

Н.Назарбаевыг 2019 онд суудлаас нь түлхэн унагаснаас хойших 4 жилд Казакстаны ДНБ, авлигын индекс болон дэлхийн өрсөлдөх чадварын индексэд эзлэх байр дажгүй урагшилсан. Үүний цаана,  

• 🖥️ Цахим: ДНБ-ий өсөлтийн ард К.Токаевын ЗГ эдийн засгаа төрөлжүүлэхэд анхаарч ХАА, боловсруулах үйлдвэрлэл, технологи зэрэг салбаруудыг дэмжин, “Digital Kazakhstan” хөтөлбөрийн хүрээнд инновацын төслүүдийг санхүүжүүлж, технологийн дэд бүтцээ сайжруулах болов.

• 💸 Цаашлаад хөрөнгө оруулалт татах чиглэлд тэд хөрөнгө оруулагчдын эрхийг хамгаалахаар Астанагийн олон улсын санхүүгийн төвийг байгуулахаас эхлээд эдийн засгийн чухал бүсүүдээ дэмжих бүсчилсэн татварын хөнгөлөлт олгох гэхчлэн дорвитой хэд хэдэн бодлого хэрэгжүүлсэн байна. Үр дүнд нь 2019-2023 онд гаднын хөрөнгө оруулалттай 185 төслөөр нийт $26 тэрбумыг татжээ.

Казакстаны хөрөнгө оруулалт татаж буй томоохон салбар бол финтек. Санаж байвал энэ оны эхээр тус улсын 2 дахь томоохон банк Kaspi (KSPI) тус улсаас анхдагч болж Nasdaq (^IXIC) дээр бүртгэлтэй болсон. Үүгээр ч тогтохгүй сүүлийн жилүүдэд финтек хурдацтай хөгжиж байгаа тул бэлэн мөнгөөр төлбөр тооцоо хийх нь ч эрс багасаж байгаа аж. 

🙃 Ижил замаар ялгаатай хурдаар

Хэдий нэг нь авторитар нөгөөх нь ардчилсан улс ч Монгол Казакстантай гагц газарзүйн байршлаасаа гадна хэрэгжүүлж буй бодлого буюу “Алсын хараа 2050”, “Цахим Монгол” тэргүүтэй төстэй олон бодлоготой. Одоо хөрөнгө оруулалт хэрхэн татаж байгаагаас нь суралцвал яадаг юм? 

Эцэст нь… Казакстаны өөрчлөлт хэн нэг гайхалтай хүн гарч ирээд л бүх асуудлыг нь шийдсэн хэрэг биш. Сайтар харах юм бол урт хугацааны хөгжлийн бодлогоо том зургаараа хадгалсан. Уг нь улс төрийн залгамж халаа гэдэг зүйл тогтвортой байх ёстой ч Монголд 4, 4 жилээр өөрчлөгддөг нь харамсалтай.  

Excel дээр аливаа ажлын эцсийн хугацааг автоматаар харуулах тохиргоо хийж сурцгаая. 👇

• Эхлээд эцсийн хугацааны огноог харуулсан нүднүүдийг сонгоно. Жишээ нь: B2:B4.

• Дараа нь Home ➡️ Conditional Formatting ➡️ New Rule ➡️ Use a Formula тохиргоог хийгээрэй.

• Үүний дараа шинэ баганад =IF(B2 - TODAY() <= 0, "EXPIRED", IF(B2 - TODAY() <= 7, "EXPIRING SOON", "OK")) байдлаар томьёог оруулаад доош чирэхэд болох нь.

• Эцэст нь Format цэсийн  Fill хэсгээс өнгийг нь сонгоорой. Хэрэг болох биз ээ. 🍋

💰 Ариглан гамнаж, ашигтай хадгал

Ариг банкны зарласан ₮100 саяын эзэн болох хадгаламжийн урамшуулалт аяны супер азтан тодроход 1 сар хүрэхгүй хугацаа үлдлээ. 📢 Аянд нэгдэхэд одоо ч оройтоогүй тул анхаарлаа нааш нь. 

• ✅ Хэрхэн оролцох вэ? Тус банканд 6 сараас дээш хугацаатай хадгаламж нээлгэх, орлого нэмэх болон хадгаламжийн хугацаагаа сунгасан тохиолдолд ₮50 мянга тутамд 1 сугалааны эрхтэй болох нь. Түүнчлэн төрсөн өдрөөрөө “Аянд оролцох эрхтэй хугацаатай хадгаламжийн данс тус бүрдээ” 5 ш сугалааны эрх авах нь ээ.

• ✨ Хоцроогүй: Гэснээс үлдсэн хугацаанд хугацаатай хадгаламж дээрээ орлого нэмсэнээр 12-р сарын урамшууллын эзэн болохоос гадна супер азтан болох боломжоо улам нэмэгдүүлэх аж. 

За тэгээд Ариг банканд хугацаатай хадгаламж нээгээд тус гайхалтай урамшуулалт аянд оролцоорой. ₮100 саяын эзэн болчих ч юм бил үү? 🤭

📆 Үргэлжлэх хугацаа: 12 сарын 31-нийг дуустал

🍋 Монложистикс Групп экспортын тээвэрт шаардлагатай эхний ээлжийн вагонуудаа хүлээж авлаа. Тэд 2023 онд IPO хийхдээ ₮10.9 тэрбумын санхүүжилтийнхээ дийлэнх хувийг вагон худалдан авахад зарцуулахаа мэдэгдсэн. Тэгвэл уг төлөвлөгөө биеллээ олсноор уул уурхайн бүтээгдэхүүнийг олон улс руу илүү шуурхайгаар тээвэрлэх, борлуулалтын орлого нь нэмэгдэх зэрэг үр дагавар гарахаар байна. 

🍋 Эм Жи Эл Акуа ХК (MGLA) өөрийн 100% эзэмшлийн охин компаниа Өмнөговь аймагт байгуулна. Тус компани 2028 он гэхэд савласан цэвэр усны зах зээлийн 50%-ийг эзлэх зорилттой байгаа. Охин компани байгуулж байгаа нь тус зорилтод түлхэц болох биз ээ. Сонирхуулахад, тэдний хувьцааны үнэ IPO-н дараа буюу хоёрдогч зах зээл дээр ₮162-₮191-ийн хооронд хэлбэлзсэн байна. 

🍋 Өмнөд Солонгосын Dongkoo Bio&Pharma-с ОУ-ын чанарын шаардлага хангасан 5 нэр төрлийн эм импортлон, худалдаалж эхлэв. Энэ хүрээнд Дапапрозин, Спонекс, Клопина болон Авалтаны 2 төрлийг ЭМД-ын хөнгөлөлттэй олгох нөхцөлөөр худалдаалж буй аж. Нэг ёсондоо эдгээр эмийн эх үүсвэрт эргэлзэх шаардлага гарахгүй болж байгаа гэнэ. 

🍋 Google (GOOG)-н Sycamore квантын компьютер 47 жилийн тооцооллыг 200 секундэд гүйцэтгэж дээд амжилт тогтоолоо. Өөрөөр хэлбэл энэ нь дэлхийн хамгийн хурдан тооцоолол хийх чадвартай Frontier-г 241 сая дахин их тооцооллын хүчин чадлаараа гүйцэж байгаа юм. Ийнхүү квантын технологийн хурд хүч тэлэхийн хэрээр цаг хугацаа хэмнэх аргууд ч нэмэгдэхээр байна даа. 

• 🍏 Илүү нимгэн, боломжийн үнэтэй, эвхэгддэг iPhone-ууд ирэх жилүүдэд айлчлан ирэх нь ээ. (AppleMust)

• 🏠 Амины орон сууцны мэдээллийн төв нээлтээ хийх гэж байгаа гэнэ. (ХББОСЯ)

• 🧠 AI төгс биш байгаагийн гол шалтгаан нь хүний үүсгэсэн өгөгдөл хангалттай түвшинд ашиглагддаггүйтэй холбоотой. (VentureBeat)

• 🔫 Ирэх жил нээлтээ хийх киноны жагсаалтад John Wick-н түүх багтжээ. (Wealth)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ