🔍 Биднийг наадамлаж байх зуур...

POWERED BY

Сайхан наадав уу? Хаагуур аялж, амрав даа? Одоо бидэнд энэ жил бүх нийтээр амрах 3 өдөр л үлдсэн шүү. Хагас жилийнхээ ядаргааг наадмын амралтаараа тайлаад авсан юм чинь ажил, амьдралдаа мааарш! 💪

MNG: МИАТ ТӨХК Улаанбаатар-Хо Ши Мин-Улаанбаатар чиглэлд 2024 оны IV улиралд шууд нислэг үйлдэж эхлэхээр төлөвлөж байна.

CHN: Хятадын эдийн засаг энэ оны II улиралд өнгөрсөн оны мөн үетэй харьцуулахад 4.7% өсжээ. 

OTC: Биржийн бус зах зээл дээр өнгөрсөн 7 хоногт нийт ₮29.3 тэрбумын болон $3.51 саяын арилжаа хийгдэв. Үүний ₮22.8 тэрбум болон $3.5 сая нь анхдагч зах зээл дээр арилжигдлаа. 

🔍 Биднийг наадамдаж байх зуур…

Зээ, өнгөрсөн 7 хоногт та биднийг наадамдаж байх зуур юу, юу болж өнгөрснийг товч тоймлоё. 

🏛  Шинэ Засгийн газар

Өнгөрсөн Мягмар гарагт УИХ-ын Анхдугаар чуулганы нэгдсэн хуралдаан эхэлж маргааш өглөө нь ч үргэлжилсэн юм. Улмаар МАН, АН, ХҮН нам хамтарсан Засгийн газар байгуулж, шинэ сайдуудыг томиллоо.

• 14 ➡ 16: Ерөнхий сайд Л.Оюун-Эрдэнийн ЗГ 3 Шадар сайд, 16 яамны сайд, 4 яамгүй сайд томилж нийтдээ 23 сайдтай боллоо. Өмнө нь Монгол Улс 14 яамтай байсан бол одоо 16 яамтай болж зарим яамны нэр, чиг үүрэгт өөрчлөлт орж байна.

• 1 ➡ 15: Засгийн газрын шинэ бүрэлдэхүүнийг харвал, 23 сайдаас ганцхан сайд нь л өмнөх 4 жилийн ажлаа үргэлжлүүлэхээр болов. Энэ бол Сангийн сайд Б.Жавхлан. Харин Ч.Номин сайдын хувьд өмнө нь Соёлын сайд байсан бол одоо Соёл, спорт, аялал жуулчлал, залуучуудын яамны сайд боллоо. 

• Шинэхэн: Нийт 16 яамны 9-ийнх нь нэршил, чиг үүрэг хэдийнээ танил, үлдсэн 7-гийн хувьд шинэ нэршилтэйгээс гадна чиг үүрэг нь өөрчлөгджээ. Жишээ нь хуучны БОАЖЯ Байгаль орчин, уур амьсгалын өөрчлөлтийн яам болж, УУХҮЯ маань Аж үйлдвэр, эрдэс баялгийн яам болоод буй. Өөр ч бас бус өөрчлөлтүүд бий. Тогтоох нь дээ. 😅

👑 Хааны айлчлал

Цаашлаад өчигдөр Бутаны хааны Монголд хийсэн айлчлал өндөрлөв. Айлчлалын үеэр харилцаа, хамтын ажиллагааг эдийн засгийн агуулгаар баяжуулах, ХАА, эрүүл мэнд, соёл, боловсрол, аялал жуулчлал зэрэг тэргүүлэх салбарт хамтран ажиллахаар тохирч 6 санамж бичиг байгуулсан аж. Бутаны хааны хувьд наадмын нээлт үзээд, хөдөөгөөр хүртэл аялаад амжжээ. 

🌏 Наадамдаагүй дэлхийд 

Харин дэлхий дахины хувьд Доналд Трамп чихэндээ буудуулж олны анхаарлыг татав. Бямба гарагт сонгуулийн жагсаалын үеэр болсон уг хэргийг Холбооны эрх баригчид шалгаж байгаа аж. Харин энэ явдлаас үүдэн Израилын Ерөнхий сайд Бенжамин Нетаньяху болон дэлхийн еврей нийгэмлэгүүд Трампын төлөө залбирч байгаа бололтой. Учир нь Трампын мөрийн хөтөлбөрийн X бүлэгт Израил бол Америкийг гадаад харилцааны хувьд дэмжих цорын ганц улс байх болно гэдгийг тусгасан аж. 

Заа онцлох зүйлс нэг иймэрхүү байна. Цаашид эвслийн ЗГ маань яаж ажиллах нь сонирхолтой байна даа.

🏆 Испанийн 4 дэх ялалт

Европын хөлбөмбөгийн аварга шалгаруулах тэмцээн (ЕАШТ)-ий финалын тоглолтод Испанийн баг Английн багийг 2:1 харьцаатай буулган авснаар испаничууд 4 дэх удаагаа Евро бүсийн аваргаар тодорлоо. 

🔥 Ялагдашгүй Армада

ЕАШТ-ий түүхэнд Испанийн шигшээ баг 4 удаа аваргалсан мэдээний хажуугаар тус багийн тоглогч 17 настай Ламин Ямаль хамгийн залуудаа ЕАШТ-д түрүүлсэн тоглогч боллоо гээд гол усаар шаагилдаж байна. Юутай ч энэ удаагийн тэмцээний шагналын сан €331 сая байсан бөгөөд нийт €222 сая нь тэмцээнд оролцсон 23 улсын багт тэнцүү хэмжээгээр ногдох юм.

🪄 Евро 2024 & Эдийн засгийн богино холболт

Цаашлаад сар гаруйн хугацаанд өрнөсөн 17 дахь удаагийн ЕАШТ Берлиний Олимпын цэнгэлдэх хүрээлэнд зохион байгуулагдаж тус хугацаанд Германыг 600 мянга гаруй жуулчин зорьжээ. Тэдгээр жуулчид Германд 1 л хоноход 1.5 саяыг зарцуулна гэж тооцвол 1 сарын хугацаанд $1 тэрбумыг Германы эдийн засагт оруулахаар байгаа юм. Өнгөрсөн онд ДНБ нь 0.3% буурч хэцүүдэж байсан улсын хувьд бол хөөрхөн сэргэлт шүү. 

• 🆙 Орлого нэмэгдсэн хө: Гэснээс Евро 2024-н албан ёсны ивээн тэтгэгчдийн нэг болох Хятадын томоохон ТВ үйлдвэрлэгч Hisense-н Герман дахь борлуулалт тоглолтын өдрүүдээр цойлсон төдийгүй орлого нь 6-р сарын сүүлээр өмнөх оноосоо 53% өссөн сурагтай. 

• 🍻 Бөөндөө илүү сонирхолтой: За тэгээд тоглолтыг хажуугаас нь үзэхээр Германыг зорьсон жуулчдаас гадна дэлхий даяар Евро 2024-г гэр бүлээрээ, найз нөхдөөрөө, хөлбөмбөгийн хорхойтнуудаараа хамтдаа цуглаж хаа сайгүй л хөл хөдөлгөөнтэй үзсэн сэн. Хэдий Английн баг сүүлийн тэмцээнд ялагдал хүлээсэн ч улсынх нь эдийн засаг өнгөрсөн 4 долоо хоногт цэцэглэж $4 тэрбумын орлого олжээ. Хөлбөмбөгийн фанатуудын сүр хүч юм уу даа. 

Эцэст нь… Удахгүй буюу 7 сарын 26-нд Олимп Парис хотод эхлэх гэж байна. Олимп зохион байгуулах улсын хувьд гадаад, дотоодоос жуулчид татах, тоглолтын эргэн тойрон дахь жижиг бизнесүүд хүний хөлд дарагдахаас эхлээд богино хугацаанд овоо бужигнана. Ганц хөлбөмбөгийн гэлтгүй Тэйлор Свифтийн аялан тоглолтоор зөвхөн Америкийн эдийн засагт л гэхэд $4.6 тэрбум эргэлдэх боломжтой гэхээр үзвэр үйлчилгээ, спортын тоглолтууд богино хугацаанд эдийн засгийг цэцэглүүлж байна даа.

Уншигчид маань хэр хурдан шивж чаддаг вэ? Ер нь хэмжиж үзсэн үү? 🤔

Дундаж хүн минутанд 38-40 үг буюу 190-200 тэмдэгт бичдэг бол мэргэжлийн бичээчдийнх дунджаар 65-75 үг байдаг аж. Тоглоом тоглонгоо минутад хэдэн үг бичиж байгаагаа тогтоохын сацуу бичих хурдаа нэмэгдүүлэхье гэж бодож байвал Nitro Type гээд вэбсайтыг танд танилцуулж байна. ✨

Туршаад үзээрэй. Хаа сайгүй л нэгэн хэвийн уйтгартай зүйлсийг тоглоомын аргаар илүү сонирхолтой болгож суралцдаг болсон цаг шүү дээ. Бумаа минь…

🍋 Өнгөрсөн Баасан гарагт Германы ЗГ $223.8 саяын дүн бүхий 3,846 ширхэг Биткойн зарж арилжаанаас гарав. Германы ЗГ Coinbase (COIN), Kraken, Bitstamp зэрэг биржээр дамжуулан $2 тэрбум гаруй үнийн дүнтэй Биткойныг сар орчмын өмнөөс арилжаалж эхэлсэн юм. Тэд нийт 50  мянган ширхэг Биткойн эзэмшдэг байсан бөгөөд эзэмшиж байсан бүх Биткойноо зарсан байна.

🍋 Дэлхийн хүн амын тоо 2080 оны дундуур дээд цэгтээ буюу 10.3 тэрбумд хүрнэ. Орос, Хятад тэргүүтэй 63 улс, бүс нутагт хүн амынх нь тоо энэ оноос өмнө дээд цэгтээ хүрээд буй. Харин Бразил, Индонез зэрэг бусад 48 улс, бүс нутагт хүн амынх нь тоо 2054 он гэхэд хамгийн өндөр түвшинд хүрэх төлөвтэй байгаа аж.

🍋 ESL Challenger League-н Азийн бүсийн 48 дахь удаагийн тэмцээнд Монголын 6 баг оролцож байна. Тодруулбал, ESL Pro League-н эрх олгодог тус тэмцээнд ATOX Esports, Clutch Gaming, The QUBE Esports, Nomads, The Huns Esports, IHC Esports багууд оролцож буй. Тус тэмцээн 10 сарын 20 хүртэл үргэлжлэх юм. 

🍋 Энэ жил дотоодын аялал жуулчлалаас ₮860 орчим тэрбумыг эдийн засгийн эргэлтэд оруулах төлөвтэй байна. Тодруулбал, 7-р сард 1-1.2 сая аялагч орон нутгийг зорих ба нийт аялагчдын 24.7% нь аялалдаа ₮1-₮1.2 саяыг, 15% нь ₮1.3-₮1.5 саяыг, 13% нь ₮2.5 саяас дээш мөнгөн дүн зарцуулах төлөвтэй байгаа гэнэ.

• Сонирхууштай: Доналд Трампын халдлагад хөрөнгө оруулагчид хэрхэн хандав? (Investing)

• Уншууштай: Хөрөнгийн зах зээлийн идэвхжил ба уул уурхайн бүтээгдэхүүний бирж. (MSE) 

• Мэндчилгээ: Америкт аж төрж буй монголчууд манай нийгмийн чухал хэсэг. (President)

• Мэдэгдэл: Монгол-Бутаны хамтарсан мэдэгдэл. (MFA)

🍋 Sharing is Caring!

Товхимлын маань дотоод гадаадын бизнес, эдийн засаг, хөрөнгө оруулалт гээд сүүлийн үеийн мэдээ, мэдээллээс хоцорч байгаа ажлын хамтрагч, найзуудаа доорх Unique Referral холбоосоор уриад referrals оноо цуглуулж Lemon Press-н мерчийн эзэн болоорой.

Unique Referral: https://lemonpressnewsletter.beehiiv.com/subscribe?ref=PLACEHOLDER

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Батчимэг
Graphics by: Ч.Батцэрэн