🔥 Capsule Is a Go

POWERED BY

Өглөөний мэнд ээ! Өнөөдөр дэлхийн бүтээмжийн өдөр тохиож байна. Бүтээмжтэй ажилладаг, ажлыг умалзуулдаг хамтран ажиллагч нартаа баярын мэнд хүргээрэй. За тэгээд өнөөдөр ажлыг бол харин ч нэг нугалдаг юм байгаа биз дээ? 😎

JPN: Иений ханш сүүлийн 34 жилийн доод түвшинд байснаар 5-р сард Японы экспорт 13.5% нэмэгджээ. 

UB: Улаанбаатар бондыг энэ онд багтаан гаргах болсонтой холбоотойгоор нийслэлийн 2024 оны төсөвт өөрчлөлт оруулах тогтоолын төслийг батлав. 

MSE: Гранд системс ХХК-ийн үнэт цаасны анхдагч зах зээлийн арилжааг нээх цан цохих ёслол боллоо. 

Сонгуулийн эргэн тойронд юу болоод байна? Товчхон танилцацгаая. 

• Цагдаагийн байгууллага сонгуультай холбоотой гэмт хэрэг, зөрчлийг тусгайлан бүртгэх программыг үйл ажиллагаандаа нэвтрүүлсэн. (iKon)

• Сонгуультай холбоотой гэмт хэрэг, зөрчлийн 63.9%-ийг илт худал мэдээлэл тараах зөрчил эзэлж байгаа тул ЦЕГ-аас сонгуультай холбоотой илт худал, хууль бус мэдээллийг Мета (META)-д хүргүүлж байгаа аж. (GoGo)

• УИХ-д нэр дэвшигчид хүүхэд хамгааллын сэдвээр мэтгэлцлээ. Тэд юу хэлэв? (TengerTV)

• Сонгогчдын нэрийн жагсаалтыг 3 хоногийн дараа эцэслэж, хэсгийн хороодод хүргүүлнэ. (m-election)

🔎 Сонгуулийн зардлыг шинжье

Энэ оны улсын төсвөөс УИХ-ын сонгуульд ₮39 тэрбумыг зарцуулахаар тусгасан. Харин 2024 оны УИХ-ын ээлжит сонгуульд нэр дэвшигчийн нийт зардал ₮1.5 тэрбумаас дээшгүй, нам эвслийн зардлын дээд хэмжээ ₮645 сая байхаар Үндэсний аудитын газраас тогтоож өгчээ. Тэгвэл аль тойрогт нэр дэвшигч хамгийн их болон бага мөнгө зарцуулахаар байна вэ? 

⚖️ Xамгийн их ба бага 

Томсгосон тойргоор явагдах сонгуулийн зардал нь нэр дэвшигчдийн хувьд хэр олон эсвэл цөөн хүн амтай тойрогт дэвшиж буйгаас шалтгаалж байгаа. Тухайлбал, 

• 13 тойрог дотроо орон нутгийн хувьд 2-р тойрог буюу Говь-Алтай, Завхан, Увс, Ховдыг нэгтгэсэн тойрогт нэр дэвшигчээс гарах зардлын хэмжээг хамгийн их буюу ₮1.5 тэрбумаар тогтоосон байна. 

• Харин нийслэлийн тойргуудын хувьд нэр дэвшигчээс гарах зардлын дээд хэмжээ 8-р тойрог буюу Баянзүрх дүүрэг, 12-р тойрог буюу Хан-Уул дүүрэгт хамгийн их байгаа бол 10-р тойрог буюу Сүхбаатар, Чингэлтэй дүүргүүдийг нэгтгэсэн тойрогт хамгийн багаар тусгасан байна даа. 

🧐 Гэснээс

Сонгуульд нэр дэвшигчид хуульд заасны дагуу хандивын дансаа нээж сошиал орчинд нээлттэй зарласан. Сонирхуулахад, зарим залуу нэр дэвшигчид чаллэнж зарлаж хандиваа босгож буй бол туршлагатай нэр дэвшигчид мөнгөө асуудалгүй л босгож буй бололтой. Гол нь сонгуулийн сурталчилгааны өдрүүд шувтрах тийшээ хандаж байхад хэдий хэмжээний хандив цугласнаа танилцуулж буй хүн тун ховор. Нөгөөтээгүүр хандивтай хандивгүй бэл бэнчингээрээ сурталчилгаагаа хийж яваа хүмүүс нэлээдгүй бий. 

Эцэст нь… Тойрог томсохын хэрээр сонгуулийн болоод нэр дэвшигчдийн зардал ч нэмэгдэж буй нь ойлгомжтой. Гэхдээ ард түмний хандиваар мөнгөө босгоод сонгогдсон хүмүүс эргээд ард түмнийхээ төлөө хэр их юм хийж чадах бол? 🤔

🔥 Capsule Is a Go

Монголын анхны гэх тодотголтой капсул зочид буудал үүд хаалгаа нээжээ. Сонирхоцгооё. 

✈️ Жуулчдад зориулав

UBPod 32 хүн хүлээн авах хүчин чадалтай капсул зочид буудлыг нээсэн бөгөөд ганцаараа аялж буй аялагчдаас эхлээд 2, 4, 8 хүн хоноглох боломжтой өрөөний зохион байгуулалттай аж. Түүнчлэн 1 болон 2 хүний өрөөнүүд нь сансрын хөлгийг санагдуулам шийдэлтэй харагдсан нь хөөрхөн шинэлэг харагдуулж байв. 🛸

• Сонирхуулахад, Encanto Sport Complex-д ч бас өдрөөр унтаж амрах боломжтой капсул зочид буудлын үйлчилгээ байдаг шүү. 

🤔 Яагаад капсул зочид буудал гэж? 

Капсул зочид буудал хямд өртөгтэйн дээр нэмээд ганцаараа аялж яваа жуулчдад нэлээн тохиромжтой зочид буудал гэдгээрээ бусдаасаа онцгойрдог. Дэлхийн анхны капсул зочид буудал 1979 онд Осака хотод нээгдэж дэлхий дахинд Япон Улс капсул зочид буудлыг танилцуулж байв. Түүнээс хойш тус төрлийн зочид буудлын бизнес загвар дэлхий даяар эрчээ авч жуулчдын ТОП сонголтын нэг болоод буй. 

• Шинэлэг: Капсул зочид буудлыг зорьж буй аялагчд дан ганц хоноглох гэхээсээ илүү сонирхож очдог нь цөөнгүй байдаг учраас зарим нисэх буудал хажуудаа тус төрлийн зочид буудалтай байх нь ч бий. 

Эцэст нь… Өнгөрсөн онд Монголд ирсэн жуулчдын тоо түүхэн дээд түвшинд хүрч энэ жил ч амжилтаа хадгалах, ахиулах өндөр хүлээлттэй байгаа. Жуулчдыг татах, Монголоос таатай сэтгэгдэлтэй буцахад хоноглох газраас эхлээд үзэж сонирхох зүйл олон, үдлэх газар нь аятай, тавтай байх гээд ер нь л арвин сонголттой байх зайлшгүй хэрэгтэй. Юутай ч Монголд капсул зочид буудлууд нэмэгдэж байгаа нь аялал жуулчлалын салбарт дуулдаж болох чихэнд чимэгтэй мэдээнүүдийн нэг юм шүү. 

🏆 Түүхэн ялалт

NBA-н 18 удаагийн аварга
Өнгөрсөн Даваа гарагт Бостон Селтикс баг NBA-н финалын 5 дахь тоглолтод Даллас Маверикс багийг 106:88 харьцаатай хожиж NBA-н түүхэн дэх хамгийн олон буюу 18 дахь цомын эзэд боллоо. 
16 жил 
Тэд хамгийн сүүлд 2008 онд NBA-н аварга болсноос хойш 16 жилийн дараа ийнхүү аваргын цомоо эргүүлэн авав. 
1 сая хүн 
Тус үйл явдлыг тохиолдуулан маргааш Бостон хот өөрийн бэлгэ тэмдэг болсон нугасны завьтай баярын жагсаал хийх төдийгүй 1 сая гаруй хүн цуглах төлөвтэй байна.

💎 Монголын анхны цэвэр металл карт

Олон улсын жишигт нийцсэн хувийн банкны үйлчилгээг үзүүлж байгаа Тээвэр хөгжлийн банк тогтвортой хөгжлийг дэмжсэн дэвшилтэт шийдэл бүхий санхүүгийн үйлчилгээг харилцагчдадаа хүргэхээр ажиллаж буй. Харин энэ удаа тэд Монголд анхлан технологийн шинэлэг шийдэл бүхий цэвэр металл хийцлэлтэй өндөр зэрэглэлийн “Billionaire” картыг нэвтрүүлжээ.

Уг тусгайлан урласан цэвэр металл карт нь амьдралын хэв маяг, нэр төрийн тань  илэрхийлэл болох юм. Металл картын төрлүүдээс дурдвал,

• Billionaire Gold

• Billionaire Platinum

• Billionaire Premium

• Billionaire Diamond

🔗 Картын дэлгэрэнгүй мэдээллийг ЭНД дарж аваарай.

🍋 Nvidia (NVDA) дэлхийн хамгийн өндөр үнэлгээтэй компани болов. Саяхан л зах зээлийн үнэлгээгээрээ Apple (AAPL)-г давж байсан тэд энэ удаад $3.3 их наядын үнэлгээтэйгээр өмнөх аварга Microsoft (MSFT)-н урд гишгэх болов. 8 жилийн өмнө хувьцааны үнэ нь $1-т чүү ай хүрдэг байсан компани галзуу хурдаар тэлнэ гэж хэн санах билээ? 

🍋 Европын Холбооны орнуудаас Финланд анх удаа уран олборлож эхэллээ. Тодруулбал, Финландын уул уурхайн Terrafame компани Соткамо дахь олборлолтын талбайдаа ураны олборлолтыг эхлүүлсэн бөгөөд 2026 он гэхэд жилд 200 орчим тн уран олборлоно гэж тооцоолжээ. Тус компани олборлосон уранаа гадаадад боловсруулж, дараа нь цөмийн эрчим хүч үйлдвэрлэхэд ашиглах аж.    

🍋 М банк Монголын анхны дахин боловсруулсан пластик бүхий байгальд ээлтэй виза картыг хэрэглээнд нэвтрүүлжээ. Дэлхий даяар жилд 6 тэрбум орчим хуванцар карт үйлдвэрлэгддэг бөгөөд тус төрлийн карт CO2-г асар их ялгаруулж байдаг аж. Харин дахин боловсруулсан карт хэрэглэж хэвшсэнээр CO2-н ялгаруулалтыг жилд 161 тн-оор, хуванцар хог хаягдлыг 73 тн-оор бууруулах боломжтой юм. 

🍋 Монголбанк Дэлхийн алтны зөвлөлөөс баталсан “Лондонгийн зарчмууд” олон улсын багц зарчимд нэгдэв. Уг зарчим нь төв банкнуудын бичил уурхайчдаас алт худалдан авах үйл ажиллагааг албан ёсны болгож, хариуцлагатай бичил уурхайг дэмжих, албан ёсны нийлүүлэлтийн сүлжээнд оруулахад туслах зорилготой юм.

🦁 Каннын арслангууд

Өнгөрсөн Даваа гарагт 71 дэх удаагийн маркетинг, зар сурталчилгаа, креатив салбарынхны хамгийн том наадам болох Cannes Lions International Festival of Creativity эхэлсэн билээ. Үүнтэй холбоотойгоор наадмын эргэн тойрон дахь сонин хачнаас хуваалцъя. 

✨ Онцлог 

1954 оноос хойш Францын Канн хотноо жил бүр зохион байгуулагдах болсон тус арга хэмжээ энэ жил уламжлалт хэвлэл мэдээллийн хэрэгслээс хиймэл оюун ухаан (AI)-р ажилладаг стриминг платформууд руу чиглэж буй.

Цаашлаад, арга хэмжээний сонирхолтой тоон мэдээллээс дурдахад, 

• 🤵🏻‍♀️🤵🏻 Оролцогчид: 90 орны 12,000 мянган зочид 

• 🙌🏼 Илгээсэн бүтээлийн тоо: 26,753 

• 🏆 Шагнал: Үндсэн 20 гаруй төрөлд шалгарсан бүтээлүүд алтан, мөнгөн, хүрэл арслангийн эзэн болдог бөгөөд Дижитал гар урлал төрөлд Apple (AAPL)-н VisionOS мөнгөн арслангийн цомыг аваад буй. Наадмын 2 дахь өдрийн ялагчдаар ямар бүтээл тодорсныг эндээс дэлгэрүүлж хараарай. 

Эцэст нь… Cannes Lions International Festival of Creativity маргааш дуусна. $250 тэрбумаар үнэлэгдэх болсон креатив салбарын чиг хандлага хаашаа чиглэж байна, ямар шинэлэг санаа, инновац трэнд болж буйтай хамгийн ойроос танилцах сонирхолтой арга хэмжээ юм шүү. 

• Хэрэг: Сенат Элизабет Уоррен Холбооны нөөцийн сангийн дарга Жером Пауэллыг ажлаа зөв хийхийг шаардав. (Quartz)

• Үзэсгэлэн: Чех дэх монголчууд “Чингис хаан” олон улсын үзэсгэлэнг үзэх боломжтой болох нь ээ. (ChinggisMuseum)

• Ашиггүй: Apple жилийн өмнөхөн гаргаж байсан одоо аваад дараа төлөх боломжтой зээлийн үйлчилгээгээ зогсооно гэнэ ээ. (TheVerge)

• Хууль: Хагас сая цагаачдын Америкийн иргэншилтэй болох алтан тасалбар. (APNews)

🍋 Sharing is Caring!

Товхимлын маань дотоод гадаадын бизнес, эдийн засаг, хөрөнгө оруулалт гээд сүүлийн үеийн мэдээ, мэдээллээс хоцорч байгаа ажлын хамтрагч, найзуудаа доорх Unique Referral холбоосоор уриад referrals оноо цуглуулж Lemon Press-н мерчийн эзэн болоорой.

Unique Referral: https://lemonpressnewsletter.beehiiv.com/subscribe?ref=PLACEHOLDER

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Батчимэг
Graphics by: Ч.Батцэрэн