🦅🇺🇸 Бүргэдийн найраа

POWERED BY

Hey! Бид контентынхоо чанар, сонирхолтой байдлыг улам сайжруулахыг ямагт хичээдэг билээ. Үүнд та бүгдийн санал, сэтгэгдэл хамгаас чухал тул ЭНД дарж 2-3 минутыг зарцуулан уншигчдын судалгааг бөглөж өгнө үү хэмээн хичээнгүйлэн хүсэж байна аа. Гүнээ хүндэтгэсэн, Lemon Press Team! 🍋  

MNG: Өнгөрсөн оны ДНБ 2015 оны зэрэгцүүлэх үнээр 4.9% өсөж ₮32.1 их наяд боллоо. 

TDB: Худалдаа Хөгжлийн Банк ХК (TDB) аудитаар баталгаажсан цэвэр ашгаас ногдол ашиг хуваарилна.  

BDS: БиДиСЕК ҮЦК ХК (BDS) Гүйцэтгэх захирал Б.Лхагвадоржид $6 саяын хэлцэл хийх зөвшөөрөл олголоо.

NSO: Нэг өрхийн дундаж орлогыг 2020 оны зэрэгцүүлэх үнээр тооцоход 2024 оны IV улиралд өмнөх улирлаасаа 1.5% буюу ₮26.3 мянгаар буурч ₮1.76 сая болсон байна. 

📌 ₮2.5 тэрбумын ашигтай тайлан 

МХБ (MSE)-д даатгалын салбараас 5 компани бүртгэлтэй байгаа. Одоогоор 4 компанийнх нь тайлан гарчээ. Энэ дундаас Бодь Даатгал ХК (BODI)-ийн цэвэр ашиг 80.6% өссөн байна. Энэ тайланг задалъя. 

🗺️ Ерөнхий зураглал

Манай даатгалын зах зээл жилээс жилд тэлсээр байгаа. 1.3 сая хүн ямар нэгэн байдлаар даатгалтай болсон гэхээр бидний дунд даатгалын ойлголт харьцангуй сайжирсан харагдана. Энэ утгаараа өнгөрсөн онд энэ салбарын хөрөнгийн хэмжээ 20.2% өсөж ₮662.8 тэрбумд хүрсэн байна. Нийт 20 компанийн 5 нь ХК болсон гэхээр даатгалын салбарын ХЗЗ дэх оролцоо ч өндөр. Бодь Даатгалын хувьд даатгалын болон давхар даатгалын компаниудын нийт хөрөнгөд эзлэх хувь нь 6.2% болж өссөн байна. 

🔻 Зардал буурав

Цаашлаад, Бодь Даатгалын тайлангийн хувьд нийт даатгалын хураамжийн орлого жилийн өмнөхөөсөө 10.7% өсөж ₮32.1 тэрбум болсон ч давхар даатгалын хураамжийн зардал нь 49.5% нэмэгдсэн тул орлого нь цэвэр дүнгээр 0.5% өссөн байгаа юм. Харин нөхөн төлбөрийн цэвэр зардал нь 26.3% буурснаар цэвэр ашиг нь 80.6% буюу ₮1.1 тэрбумаар өсөж ₮2.5 тэрбум болсон хэрэг. 

• 📈 Түүнчлэн компанийн нийт хөрөнгийн хэмжээ өмнөх оноос 25.3% нэмэгдэж ₮40.9 тэрбум болсон бол эздийн өмч нь 15.1% өсжээ. Улмаар ROE буюу эздийн өмчийн өгөөж нь 19.8% болсон аж. Түүнчлэн $BODI-н P/B харьцаа 1.6 байгаа бол P/E нь 7.9 байгаа юм. 

💰 Ногдол ашиг айсуй

Нэмээд $BODI-н ТУЗ өнгөрсөн Баасан гарагт хуралдаж 2024 оны цэвэр ашгаас ногдол ашиг хуваарилахаар шийдвэрлэжээ. Тодруулбал, нэгж хувьцаанд ₮5 буюу нийт ₮1.1 тэрбумын ногдол ашиг хуваарилах нь. Ногдол ашиг авах эрхтэй хувьцаа эзэмшигчдийн жагсаалтыг хувьцаа эзэмшигчдийн ээлжит хурлын бүртгэлийн өдрөөр тогтоож, 4 сарын 30-ны дотор олгох аж. Тэдний ногдол ашгийн өгөөжийг $BODI-н өчигдрийн үнээр тооцоход 5.7% болж байгаа юм. 

Энд нэмэхэд, Бодь Даатгал 2024 онд Монголын Иргэний Агаарын тээврийн дотоодын даатгагчаар хамтран ажиллаж эхэлсэн аж. Мөн вэбсайтаа шинэчилж ХУР, ДАН системийн холболт болон тээврийн хэрэгсэл эзэмшигчийн мэдээллийг автоматаар татах, EBarimt мэйлээр очих зэрэг олон үйлдлийг хялбаршуулжээ. Байгууллагын болон хувь хүний даатгалын компаниа сонгохдоо ядаж нээлттэй компаниудынх нь санхүүгийн нөхцөл байдал, туршлагыг нь энэ мэт судалж, харьцуулж сонговол дээр юм байна шүү. 

🕊️✌🏻 Украины хувь заяа Саудын Арабын тэнгэрт 

Трамп Ерөнхийлөгч болоод нэн тэргүүнд Украины хямралыг дуусгана гэж ам гарч байсан. Түүний үг хий хоосон биш гэдгийг харуулж Путинтай утас цохиод 7 хүрэхгүй хоногийн дотор уулзалт товлож, Дэд Ерөнхийлөгч, Үндэсний аюулгүй байдлын зөвлөх нараа Саудын Араб руу илгээлээ.  

🙂‍↔️ Хэлэлцээрийн меню

Трампын гал зогсоох хэлэлцээрт Украин болон Европын Холбоо багтаагүйн улмаас өчигдөр хаа сайгүй л шуурхай зарлаж гүйлдэв. Одоогоор яригдаж буй Путинд найр тавих саналууд Украины 3 жил улсынхаа төлөө тэмцсэн тэмцлийг үнэгүйдүүлэх эрсдэлтэй. 

• 🦅 Бүргэдийн найраа: Тодруулбал, Украин НАТО-н гишүүн болохгүй, газар нутгаасаа бага зэргийг Орост өгөхөд гэмгүй, цаашлаад Орост буцаад Их 7-гийн бүлэг орох хаалгыг нээх гэхчлэн ой тойнд буумгүй явган яриа яригдаж буй. 

• Юун дураараа юм! Юутай ч Украин өөрсдийг нь оролцуулаагүй ямар ч шийдвэрийг хүлээн зөвшөөрөхгүй гэдгээ илэрхийлсэн бол Америк хэлэлцээрийн агуулга ахисан түвшинд хүрвэл Украин, Европыг оролцуулахаа мэдэгдэв. Ахисан түвшин гэдэг нь тун удахгүй Путинтай биечлэн уулзахыг хэлээд байх шиг. 

🤔 Бүр том эрх ашиг

Олон улсын харилцаанд гал зогсоох санаачилга гаргаж буй гуравдагч тал хэзээ ч сахиусан тэнгэр байдаггүй. Америкийн хувьд ч Украины газрын ховор элемент (ГХЭ)-ийг чөлөөтэй авах боломжийг идэвхтэй эрэлхийлж байгаа. ГХЭ-ийн талбар дахь Хятадын хамаарлаа багасгаж, үнэтэй ч гэсэн ирээдүйд ГХЭ боловсруулалтыг дотооддоо төвлөрүүлэхийн тулд нөөц нь тасалдахгүй байх учиртай. 

• 🦹🏻 Тиймээс ч Трамп Америкийн Украинд олгосон дэмжлэгийн хариуд $500 тэрбумтай дүйх ГХЭ авахыг шаардсан төдийгүй чухал ашигт малтмалынх нь 50%-ийг эзэмших санал тавьсан гэх яриа гараад байгаа. 

Хямралыг дуусгахад бэлэн байгаа гэж Америк, Орос бие биедээ талархаад л. Нөгөө талд Украин хууртагдсан мэдрэмж авч байгаагаа илэрхийлсээр. Америк өнгөрсөн хугацаанд Украины хамгийн том туслагч байсан ч төсөв данхайлгасан гэж Трамп үүнийг зогсоосон. Мөн бүргэд, баавгай нэг талдаа гарч дэвж, савардаад эхэлбэл Украинд энх тайван тогтохдоо л тогтоно гэдэг агуулга яваад байх шиг. 

Үүнээс бидний авах ёстой сургамж нь жижиг улсын эрх ашиг хэзээ ч их гүрнийхийг давахгүй гэдэг. Аз болоод ашиг сонирхол нь 1 шугамд байвал шүхэр дор нь хоргодно, үгүй бол томчуудын учраа олох өргөл барьц болоод дуусна. 

Excel дээр текстүүдийг тэмдэгтүүдээс ялгаж авах Textbefore, Textafter томьёог сурцгаая. 👇

• Жишээ нь, A2 нүдэнд Lemon-Cherry-Orange текст байя. Энэ тохиолдолд дараагийн нүдэнд A2-ийн үгсийг голын зураасгүй авах шаардлага үүсэх юм. Бичээд авч болох ч, том өгөгдлийн хувьд төвөгтэй. 

• Textbefore: Үүгээр “-” тэмдэгтийн өмнөх текстийг ялгаж авахад ашиглана. Жишээ нь, A3 нүдэнд =TEXTBEFORE(A2, " ", 1) гэж бичвэл Lemon-той болно.

• Textafter: Аан харин энэ нь эсрэгээрээ. =TEXTAFTER(A2, " ", 1) гэж бичвэл буюу Orange-той болох нь ээ. 

За тэгээд аль алинд нь сүүлийн тоог нь өөрчлөөд ашиглаад байх нь дээ. 

🍋 Apple (AAPL) Хятадад худалдаалагдах iPhone-доо DeepSeek-V3-г давсан чадамжтай гэгдэх Alibaba (BABA)-н AI ашиглана. Өнгөрсөн оны IV улиралд Apple-н Хятад дахь борлуулалтын орлого 11% буурч $18.5 тэрбум болсноор уг зах зээлийн 15%-ийг эзлэх болсон бол Vivo-нх 17%, Huawei-нх 16% болжээ. Уг хэлэлцээрийн дараа буюу өнгөрсөн Пүрэв гарагт Alibaba-н хувьцааны үнэ 9.2% өсөж HK$124.3 болоод байв. 

🍋 Гашуунсухайт-Ганцмод хил дамнасан төмөр зам жилд экспортлох нүүрсний хэмжээг 2 нугалж 165 сая тн болгоно. Улмаар нүүрсний борлуулалтын орлого жилд $1.5 тэрбумаар нэмэгдэж нэг хүнд ногдох ДНБ-ий хэмжээ $10,000-д хүрэх юм гэнэ. Өөрөөр хэлбэл Монгол Улсын нийт хүн амын орлогын албан татварын дүнгээс 2 дахин их нэмэлт орлого олох нь дээ. 

🍋 Ажиллах хүчний оролцооны түвшин 2024 оны эцэст өмнөх жилээсээ 1.7 нэгж хувиар нэмэгдэж 62.2% боллоо. Нийт 1.4 сая ажиллах хүчний 94.9%-ийг ажиллагч, 5.3%-ийг ажилгүй иргэн бүрдүүлж буй. Харин ажил хийх хүсэлтэй ч хайхгүй байгаа 10.9 мянган хүн байгаа аж. Улмаар хөдөлмөр эрхлэлтийн түвшин 0.7 нэгж хувиар өсөж 58.9% болжээ.

🍋 Баруун бүсийн аймгийн болон сумын төвүүдийг хилийн боомттой нь авто замаар бүрэн холбоно. Энэ хүрээнд энэ оны улсын төсөвт Завханы Улиастай хотын III цэцэрлэгийн өргөтгөл болон дулааны станцын хөрөнгө оруулалтуудыг тусгаснаас гадна Сонгино, Түдэвтэй сумын уулзвараас Арцсуурь боомт хүртэлх 159.5 км авто замын бүтээн байгуулалтыг эхлүүлэх нь. 

• 🐈‍⬛ Эгдүү хүргэм хэдэн зуун муурыг хамруулсан үзэсгэлэн. (English.News)

• 👨‍⚖️ Аргентины Ерөнхийлөгч үнэхээр луйврын схемийг сурталчилсан уу? (CNN)

• ⛓ 5 тивийг хамран 50 мянган км үргэлжлэх хамгийн том далайн доорх кабелийн төсөл. (TechCrunch)

• 🚨 AI ашиглах тутам шүүмжлэлт сэтгэлгээ мууддаг гэнэ ээ. (Gizmodo)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ