😶‍🌫️ Abibas-н зах зээл хэр том бэ?

POWERED BY

Hey! Хөрөнгийн зах зээл тайланд дарагдаад л, эхнээсээ ногдол ашгийн шийдвэрүүд гараад эхэллээ. Ихэнх компаниуд ногдол ашгийн шийдвэрээ гаргаад дуусмагц бид хэнийх нь хэдэн хувийн өгөөжтэй байсан, хэн нь ногдол ашгийн өдрөө тодорхой зарласан гээд тоймлоод явна. Харин та аль ХК-ийн ногдол ашгийг хамгийн их хүлээж байна вэ? 🧐

BOM: 2024 оны IV улиралд том банкнууд ААН-ийн зээлийн шалгууртаа өөрчлөлт оруулаагүй бол иргэдийн зээлийн шалгуураа бага зэрэг сулруулжээ. 

MSE: Эм Эн Ди (DLH) ногдол ашиг хуваарилахгүй байхаар шийдвэрлэв. 

QPAY: Инновэйшн Инвестмент ХК 2024 оны ашгийнхаа 73.8% буюу ₮7.4 тэрбумыг ногдол ашиг болгон нэгж хувьцаанд ₮20-өөр тооцож хуваарилна.

🎙️ Б.Ганбаяр: Нээлттэй компаниуд хувьцаа эзэмшигчидтэйгээ хаалттай юм шиг харьцдаг

Бид нийгэмд мэргэжилтнүүдийн дуу хоолойг хүргэхийг зорьдог билээ. Энэ удаад хөрөнгө оруулалт, санхүүгийн боловсрол олгох зорилготой openmindMSE-н үүсгэн байгуулагч Б.Ганбаярын “Нээлттэй компаниудын жижиг хөрөнгө оруулагчид руу чиглэсэн бодлого, зохицуулалтын орчны төгөлдөржилт”-ийн талаарх нийтлэлийг хүргэж байна. Тухлан сууж уншина уу! 

ХЗЗ-ийн одоогийн эрх зүй, зохицуулалтын орчны түвшин

Компанийн тухай хуулийн “алдарт 1%” гэдэг заалтыг өөрчилж илүү уян хатан болгох шаардлагатай. Тухайн компанийн 1% гэж заах нь эдийн засгийн үнэлгээгээр нь бодоход жижиг хувьцаа эзэмшигч нарыг тус компанийн хувьцаа эзэмшигч биш гэсэн давхар утгыг илэрхийлж байгаа тул хувь гэдэг үгийг ширхэг болгон өөрчлөх зайлшгүй шаардлагатай. Яг энэ заалтаас бол УИД ХК-ны жижиг хувьцаа эзэмшигчдийн өмнөө СЗХ шүүхэд хандаж ялалт байгуулсан жишээ байгаа. Гэвч СЗХ байнга жижиг хувьцаа эзэмшигчдийн өмнөөс шүүхэд хандаад байх нь зөв үү, буруу юу гэдэг асуудал үүсэж байгаа юм.

📈 $MLG: Ачаа, ашиг өсөв

Тайлангийн үе үргэлжилж байна. Энэ удаа Монложистикс Холдинг ХК (MLG)-ийн 2024 оны үр дүнтэй танилцъя. Цар хүрээ нь тэлж ашиг нь ч өсжээ. Анхаарлаа нааш нь. 👇

🚚 Шинэ дээд амжилт: 1.1 сая тн

Монложистикс 2024 онд цар хүрээгээ тэлж Төв Азийн Зам ХХК-ийн 51%-ийг өөртөө нэгтгэсэн. Улмаар группийн нийт ачаа тээвэр 2024 онд 1.1 сая тн-г давав. Энэ дундаа импортын ачаа тээврийн хэмжээ 25.1% буюу улсынхаас даруй 15 нэгж хувиар илүү өсжээ. Нэмээд Төв Азийн Зам ХХК-ийн нэгдэлтэй холбоотойгоор Монложистикс Холдингийн борлуулалтын орлого 15%-20%, хүлээгдэж буй цэвэр ашиг 10%-15% нэмэгдэх хүлээлт үүссэн билээ. Тэгвэл энэ хүлээлт биеллээ олжээ. 

• 🆙 Өсөлт^2: Тэдний 2024 оны борлуулалтын орлого жилийн өмнөхөөсөө 40.8% өсөж ₮296.3 болсон аж. Тэгэхээр тус группийн орлогын өсөлт улсын тээврийн салбарынхаас 5.8 дахин өндөр байгаа хэрэг. Улмаар цэвэр ашиг нь 22.6% нэмэгдэж ₮10.3 тэрбум болжээ. Түүнчлэн нийт хөрөнгийн хэмжээ нь ч 59.7% тэлж ₮92 тэрбумд хүрсэн байна. 

📌 Онцлох тээвэр

Цаашлаад, Монложистикс Холдингийн 2024 оны үйл ажиллагааны тэлэлтийг харвал, экспортын тээврээ өргөжүүлэхээр Оросоос эхний ээлжийн вагонуудаа амжилттай хүлээн аваад буй. Тус группийн 2023 онд шинээр байгуулсан Монложистикс Экүйпментс ХХК нь 50 хагас вагон худалдан авч, төмөр замын баазаа өргөжүүлэхээр ажиллаж байгаа аж. 

• ✈️ $MLG агаарт: Түүнчлэн Монложистикс Групп агаарын тээврийн салбарт үйл ажиллагаагаа тэлэх стратегийн хүрээнд Монложистикс Экспресс ХХК-ийг байгуулсан. Тус компани нь агаарын тээврийн сүлжээг өргөжүүлж, ОУ-ын зах зээлд өрсөлдөхүйц логистикийн цогц үйлчилгээг үзүүлэх юм. 

• 📦 Онцлох тээвэр: Монложистикс Ворлдвайд ХХК-ийн онцлох тээврээс дурдахад өнгөрсөн оны 11-р сараас эхлэн Улаанбаатарын ус хангамжийн Баруун эх үүсвэрийг шинээр байгуулах төслийн ачааг тээвэрлэж байгаа гэнэ. Нэмээд Дубай хотоос Улаанбаатар хотноо тээвэр хийсэн гэж байгаа. 

Эцэст нь… 2024 он олон компанийн хувьд тэлэлт, өсөлтийн жил байлаа. Үүний нэг нь ялт ч үгүй Монложистикс групп байв. Шинээр байгуулсан компаниудыг нь харахад энэ жил илүү том хүрээнд үр дүнтэй ажиллах нь дээ. 

 😶‍🌫️ Abibas-н зах зээл хэр том бэ?

Дэлхийн алдартай брэндүүдийг дуурайлган үйлдвэрлэж буй Хятадын зах зээлд хэр хэмжээний мөнгө эргэлддэг гэж бодож байна? 

Adidas 🆚 Abibas

Америк хэдэнтээ Хятадыг хуурамч болон оюуны өмчийн хулгайн үйлдвэрлэлээрээ дэлхийд тэргүүлдэг хэмээсээр ирсэн. Энэ нь ч оргүй үг биш бөгөөд Adidas (ADS.DE)-г Abibas болгон үйлдвэрлэж буй энэ зах зээлийн хэмжээ $600 тэрбумыг хол давна. Хятад ийн хуурамч бүтээгдэхүүн үйлдвэрлэлээрээ дэлхийд монопол болсон нь Дэн Сяопиний 1978 онд хийсэн эдийн засгийн шинэчлэлтэй холбоотой. 

• ⭕ Улмаар барууны орнуудад нээлттэй болсон Хятадын хямд ажиллах хүчид нь татагдаж 1990 оноос дэлхий алдартай брэндүүд Хятадад масс үйлдвэрлэлээ эрчтэй эхлүүлж байв. Үр дүнд нь үйлдвэрлэл эрчимжиж, эдийн засаг сэргэхтэй зэрэгцэн тус брэндүүдийн дуураймал бүтээгдэхүүн борооны дараах мөөг шиг л олширсон байдаг.

💥 Их тэсрэлт 

Хятадын дуураймал, хуурамч бараа бүтээгдэхүүн үйлдвэрлэл 1980-аад онд $30 тэрбум орчим байсан бол 2021 он гэхэд $600 тэрбум болж, дэлхийн худалдааны ойролцоогоор 2.1%, хуурамч бүтээгдэхүүний 80%-ийг эзлэх болов. Түүнчлэн 2023 онд Америкийн Гааль болон хилийн хамгаалалтын албаны хураасан хуурамч барааны 90% гаруй нь Хятад бараа, бүтээгдэхүүн байсан гэдэг. 

• 🦻 Хятад энэ асуудлыг тоодоггүй биш тоодог. Ялангуяа сүүлийн жилүүдэд оюуны өмчийн эрх, хуурамч бараа худалдах, үйлдвэрлэх гэмт хэргийн эсрэг шалгалтаа нэмэгдүүлж байгаа ч цахим худалдааны эринд борлуулалтын суваг TikTok, Taoboa, Pinduoduo руу нүүчихсэн нь асуудлыг улам хүндрүүлж буй. 

• 🤔 Үүнээс гадна Хятадад үйлдвэрлэсэн хуурамч бараа эцсийн хэрэглэгчдээ хүрэхийн өмнө Хонконгоор дамжиж тээвэрлэгддэг нь гарал үүслийг нь тодруулахад хэцүү болгодог. Ядаж байхад үйлдвэрлэл нь шат ахиуд жинхэнэ үү, хуурамч уу гэдгийг ялгахын аргагүй болсныг хэлэх үү… 

Эцэст нь, Хятад цаас шиг нимгэн материалтай, болхи оёдолтой чанаргүй бараа бүтээгдэхүүн үйлдвэрлэдэг! Мөн чанартай, тансаг зэрэглэлийн брэндийн бүтээгдэхүүн ч үйлдвэрлэж байна. Өдгөө тус улсад зөвхөн тансаг зэрэглэлийн гээд шүүгээд харахад 300 гаруй брэндийн үйлдвэрлэл байгаа. Нөгөө талд бид тэднийг хог үйлдвэрлэдэг хэмээн шүүмжилж, шоолдог хэр нь бараа, бүтээгдэхүүнийг нь хэрэглээд хэдэн зуун жилийг үдлээ дээ.

Excel дээрх томьёог тэмдэгт ашиглан нэг нүдэнд хадгалах арга зааж өгье. 👇

• Бүх тоог 100-д хуваах томьёо хэрэгтэй гэж бодъё. Энэ тохиолдолд A1/100 гэж нэг нэгээр нь бичих төвөгтэй шүү дээ.

• Харин 100-г аль нэг нүдэнд (Жишээ нь B1)-т бичээд A1/B1 томьёо үүсгээд доош хуулахад A2/B2, A3/B3 гэх мэтээр өөрчлөгдөнө. 

Энэ тохиолдолд $-г ашиглан $B$1 болгосноор A1/$B$1-с доош хуулахад $B$1-н утга өөрчлөгдөхгүй B1-т хадгалагдах нь ээ. Бичлэгээр үзэхийг хүсвэл ЭНД дараарай. 😉

🍋 Япон Америк дахь хөрөнгө оруулалтаа 28% нэмэгдүүлж $1 их наяд болгоно. Товчхондоо Япон Nippon Steel (5401.T) U.S. Steel (X)-г худалдан авах төлөвлөгөөг бүрэн эзэмших хэлбэрээс хөрөнгө оруулалт руу чиглүүлж, Америкийн шингэрүүлсэн байгалийн хийн импортын хэмжээг нэмэгдүүлэх, хариуд нь эхний ээлжид Америкт Toyota Motor (TM), Isuzu Motors (ISUZY)-н үйлдвэрүүдийг байгуулах санал тавив. 

🍋 ЦХИХХЯ E-Mongolia дээр AI-д суурилсан төрийн үйлчилгээний агент бий болгоно. Эхний ээлжид 4 мянга орчим төрийн үйлчилгээний цахим хаягуудыг Gov.mn төрийн нэгдсэн цахим хуудсанд нэгтгэх бөгөөд одоогоор аймаг болон яамнуудын мэдээллийг нэгтгэж эхлээд байгаа аж. Үүнээс гадна усны тоолуурын заалтыг өөрөө мэдээлэл дамжуулдаг болгох юм гэнэ. 

🍋 МҮХАҮТ болон Узбекистаны худалдаа, АҮ-ийн танхим Улаанбаатар, Ташкентад худалдаа, ЭЗ-ийн төлөөлөгчийн газар байгуулна. Улмаар дэд бүтэц, тээвэр, логистик, ХАА, хөнгөн үйлдвэрийн чиглэлд хамтран ажиллах, нөөц боломжоо харилцан ашиглаж, худалдааны саад тотгорыг багасгах нь. Гэснээс Узбекистан өнгөрсөн жил 2023 оноос 15.8% их буюу 2 сая тн жимс экспортолж $1.5 тэрбумын орлого олжээ.

🍋 Франц AI салбартаа $113 тэрбумын хөрөнгө оруулна. Энэ хүрээнд Арабын Нэгдсэн Эмиратын хөрөнгө оруулалтын сан тус улсад $32-$54 тэрбумаар дата төвүүдийн хотхон байгуулах бол Америкийн Brookfield Asset Management (BAM) ирэх 5 жилд мөн тус чиглэлээр Францад ойролцоогоор $21.3 тэрбумын хөрөнгө оруулах аж. Түүнчлэн Францын Orange SA (ORA.PA), Thales SA (HO.PA) тус санхүүжилтэд оролцох сурагтай.

⚡⛏️ Уул уурхай ба эрчим хүчний шинэ эрин

Дэлхийн уул уурхайн тэргүүлэгчдийн нэг Rio Tinto (RIO) 2018 оноос хойш нүүрстөрөгчийн ялгарлаа 15%-иар бууруулсан бөгөөд 2030 он гэхэд 50%-иар багасгах зорилт тавиад байна. Яаж вэ? 

⚡ Сэргээгдэх эрчим хүч рүү

Өнгөрсөн онд Rio Tinto компани 2.2 ГВт-н салхин болон нарны эрчим хүчний гэрээ байгуулсан нь тэдний Гладстон дахь үйл ажиллагааг цэвэр эрчим хүч рүү шилжүүлэх томоохон алхам болов. Үр дүнд нь нүүрстөрөгчийн ялгарлыг жилд 5 сая тн-оор бууруулах аж. Үүнээс гадна дизель түлшнээс татгалзах чиглэлд Борон уурхайн туршлага дээрээ тулгуурлан Кенекотт зэсийн уурхайдаа 2024 оноос эхлэн био дизель түлш ашиглаж эхэлжээ. Ингэснээр жилд 450,000 тонн CO₂e хэмнэх боломжтой болж байгаа юм. 

• 💪 Олны хүчээр: Түүнчлэн Rio Tinto гангийн салбарт нүүрс хүчлийн хийн ялгарлыг бууруулах зорилгынхоо хүрээнд Хятадын Baowu Steel-с гадна BHP (BHP) болон BlueScope-той хамтран BioIron технологийг нэвтрүүлж буй. Энэ нь гангийн үйлдвэрлэлийн ялгарлыг 95%-иар бууруулах боломжтой аж.

📌 Монголын жишиг

Rio Tinto-н нөлөөгөөр Оюу толгой уурхай ч эрчим хүчний шинэ шийдэлд ихээхэн анхаарч буй. Уг уурхайд энэ онд багтаан 8 ширхэг цахилгаан ачааны машин болон батарейг нь сольдог цахилгаан өөрөө буулгагч машины технологийг турших юм.

Эцэст нь… Биднийг утаагаа шийдэж чадахгүй хэдэн жилийг үдэж байхад дэлхий нийт сэргээгдэх эрчим хүч рүү давамгайлж томоохон уул уурхайн компаниуд ч энэ чиглэлд том хувь нэмэр оруулж байна даа.

• 🌪️ 2024 онд Америкт болсон хар шуурганууд Disney-н паркуудад нийт $120 саяын хохирол учруулж. (FoxWeather)

• 📝 СЗХ-ны Зөвшөөрлийн цахим системээр илгээсэн өргөдлийн төлөвийн түүх харах заавар. (FRC)

• 🧵 Он удаан эдлэгдэх өндөр чанартай хэр нь байгальд хурдан задардаг материал гэнэ үү? (TechCrunch)

• 🎲 ТОП бизнес эрхлэгчид Америкаас төрдгийн нууц нь тус улсын эрсдэлтэй хөрөнгө оруулалтын систем. (NYTEvents)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ