🔥 94 нас = $1 их наяд

POWERED BY

Амар мэнд үү? 8-р сарын сүүлийн товхимолдоо тавтай морил. Цаг хугацаа харвасан сум шиг гэдэг үгийг наснаасаа олон сонссон ч сүүлийн жилүүдэд үнэхээр биеэрээ мэдэрч байна. Ингээд л намар, тэгээд л өвөл… Юу бодож байна даа? 🤔

MNG: 2023 оны төсөвт санхүүгийн тайлангийн аудит хийхэд ₮151.6 тэрбумын зөрчил илэрчээ. 

GOV: ЗГ болон, Оросын ЗГ хооронд байгуулах “Дулааны III цахилгаан станцын өргөтгөл, шинэчлэлийн төслийн үндсэн зураг төсөл боловсруулах тухай” хэлэлцээрийн төслийг хэлэлцэн дэмжив. 

BOM: Өчигдрийн байдлаар төгрөгийн ханш он гарсаар долларын эсрэг 0.9%, воны эсрэг 4.5%, юанийн эсрэг 1.2% тус тус чангараад байна.

🥒 GAZR-н эргэн тойронд 

МХБ (MSE)-д бүртгэлтэй ХК-иуд энэ сарын турш 2024 оны эхний хагас жилийн тайлангаа олон нийтэд нээлттэй танилцуулж буй. Тэгвэл өнөөдөр Газар Шим Үйлдвэр ХК (GAZR)-ийн үр дүнтэй танилцъя. 

📊 Санхүү = Ногоон

Газар Шим Үйлдвэрийн эхний хагас жилийн санхүүгийн үзүүлэлт тун дажгүй. Тэдний цэвэр борлуулалтын орлого жилийн өмнөхөөсөө 20.8% нэмэгдэж ₮20.9 тэрбумд хүрсэн юм. Улмаар цэвэр ашиг нь 35.1% өсөж ₮5 тэрбумын босгыг давжээ. 

• 🏃‍♂️ Илүү хурдан: Харин МХБ (MSE)-ийн ТОП-20 индекс дэх хүнсний салбарын акулууд нийт ₮126.6 тэрбумын ашигтай ажилласан. Тэдний цэвэр ашиг дунджаар 23.5% өссөн хэрэг. Тэгэхээр Газар Шим Үйлдвэрийн цэвэр ашгийн үйлдвэр салбарын акулуудын дунджаасаа 11.6 нэгж хувиар илүү байгаа юм. 

• 📈 Өсөлт: Түүнчлэн компанийн нийт хөрөнгийн хэмжээ жилийн өмнөхөөсөө 28.7% нэмэгдэж ₮56.5 тэрбумд хүрсэн байна. Нэмээд үндсэн хөрөнгийн үнэ цэн нь дахин  үнэлгээгээр ₮8.6 тэрбумаар нэмэгджээ. 

💭 Юу хийв? 

Тус компани энэ оны хувьцаа эзэмшигчдийн ээлжит хурал дээрээ зах зээлд шинээр бүтээгдэхүүн нэвтрүүлэх, хүчин чадлаа нэмэх төлөвлөгөөгөө хуваалцаж байсан. Тэгвэл энэ оны эхний хагаст тэдний бизнесийн чадамжаа нэмэгдүүлэх, үйл ажиллагаагаа тэлэх ажлын гүйцэтгэл 75%-д хүрчээ. Улмаар нөөшилсөн ногооны үйлдвэрлэл нь 25.3%, Артишок ундаа үйлдвэрлэл нь 41% тус тус өссөн аж. Өөрөөр хэлбэл тэдний борлуулалтын тоо ширхэг 723,760-д хүрч жилийн өмнөхөөсөө 19.4% өсжээ. 

• Ахицтай: Цаашлаад тэд борлуулалтын системээ өөрчилснөөр харилцагч хамралт нь 41% нэмэгдэж борлуулалтын эргэлтийн давтамж нь 4 дахин нэмэгджээ. Тэгэхээр бүтээгдэхүүнүүд нь илүү хүртээмжтэй болсон бололтой. 

• 🛒 Сагсаа нэмнэ: Түүнчлэн компани шинээр майонез, кетчуп, хүүхдийн нухаш, халуун ногоотой соус болон паста соус зэргийг үйлдвэрлэхээр зорьж буй. Тэгвэл эдгээрийн үйлдвэрлэлд гарахаас өмнөх бэлтгэл ажлууд хангагдсан байна. Удахгүй шинэ төрлийн бүтээгдэхүүнтэй золгох нь дээ. 

Эцэст нь… Компани цаашид ч рэбрэндинг хийх замаар цар хүрээгээ тэлэхээр төлөвлөж буй. Нэмээд нийт ашгийн 30%-иас доошгүй хэсгийг ногдол ашиг болгож тараах бодлого баримталж байгаа тул Газар Шим Үйлдвэр тэлэх тусам хөрөнгө оруулагчдынх нь хүртэх өгөөж нэмэгдэх нь дээ. 

🤑 NVDA: Өсөлтийн % 3 оронгоос буухгүй!

Чипийн од Nvidia (NVDA) ээлжит галзуу өсөлттэй улирлын тайлангаа танилцууллаа. Танилцъя даа одоо. 

🎈 Түүхэн дээд улирлын ашиг

Өнгөрсөн II улиралд компанийн орлого өнгөрсөн оны мөн үеэс 122% өсөж $30 тэрбумд хүрэв. Орлого нь пуужиндсан тул ашиг нь ч 168% өсөж $16.6 тэрбумд хүрээд буй. Бизнесийн салбараар нь харахад дата төвийнх нь улирлын орлого 154%-ийн өсөлттэйгөөр $26.3 тэрбумын орлого авчирсан бөгөөд энэ нь нийт орлогын 88%-ийг бүрдүүлж буй: 

• 🤖 Гол бизнес: Apple (AAPL)-н орлогын сагсыг iPhone, Samsung (005930.KS)-нхыг гар утас, компьютер, таблет давамгайлдаг шиг тэдний хувьд дата төв нь сүү сайтай саалийн үнээ нь гэсэн үг. 

• 😏 Атаархтал: Ашиг, орлоготой компани тул ажилчдадаа өндөр цалин урамшуулал өгдөг нь лавтай. Гол нь Google (GOOG), Apple гээд технологийн томчуудад ажиллаж буй хүмүүс бусад компанийн цалинг төдийлөн ойшоохгүй ч Nvidia-нх тэднийг атаархах хэмжээтэй. Тухайлбал, Nvidia-д $3 саяын хөрөнгөтэй жирийн ажилтан байна гээд төсөөлдөө. Галзуу^2.

👀 Цаашдын төлөвлөгөө

Nvdia-н үүсгэн байгуулагч, Гүйцэтгэх захирал Женсен Хуан Hopper-н эрэлт хүчтэй хэвээр байгаа бөгөөд Blackwell-нх ч цаашид хүчирхэгжих төлөвтэй байгаагаа мэдэгдсэн. Сонирхуулахад, тус чипийн эрэлт дата төвийнх нь орлогод гол нөлөө үзүүлсэн байдаг. Тус 2 чипээс гадна компанийн хамгийн эрэлттэй чип нь H100 бөгөөд үүнийг хиймэл оюун ухаан сургахад түгээмэл ашигладаг. 

• 🫨 Үйл явдал: Цаашлаад компани $15.4 тэрбумын үнэ бүхий хувьцааг халаасалж байсан төдийгүй одоо ахиад $50 тэрбумын дүн бүхий хувьцааг эргүүлэн худалдаж авахаар төлөвлөж байгаа гэнэ. Гэснээс Nvidia 2024 оны 10-р сарын 3-нд нэгж хувьцаанд $0.01-ын ногдол ашиг олгох аж. 

• 👩‍💻 AI платформ: Түүнчлэн тэд өнгөрсөн улиралд өөрийн Blackwell хиймэл оюун ухааны платформын туршилтын хувилбарыг хувьцаа эзэмшигчид рүүгээ явуулсан бөгөөд  ирэх улиралд тэд орлогоо $32.5 тэрбумд хүргэх тооцоолол гаргасан нь ч шинээр туршиж буй бүтээгдэхүүнүүдтэй нь холбоотой аж. 

Эцэст нь… Ашиг, орлоготой тайлангийн араас компанийн хувьцаа 2.1% унасныг гайхаад хайтал Blackwell-н дизайны алдаанаас болж үйлдвэрлэлээ 3 сараар хойшлуулж магадгүй гэх мэдээлэл гарсантай холбоотой байжээ. Юутай ч бөөн өсөлт, төгрөгөөр тоолж барахгүй ашиг орлоготой компанийн өнгөрсөн улирал нэг иймэрхүү. Одоо ч тэдний талаар түүхэн дээд гэж бичих нь утгагүй мэт. Хаашдаа ирэх улиралд өөр нэгэн дээд амжилт эвдэгдэхээс хойш… 🙄 

🧩 Хөгжилтэй тааврын цаг. Тоосгон барилгыг барьж дуусгахад хэдэн тоосго хэрэгтэй вэ? 

Таасан бол хариултаа бидэнд илгээгээрэй. ✌️

🚀 “Пуужин Баяраа” тоглолт айсуй

Зиак Rokit Bay-н фэнүүд байна уу? “Пуужин Баяраа” тоглолт болоход тун бага хугацаа үлдсэн байна шүү! 🔜

Энэ удаагийн тоглолтоор залуу артистууд болох 113, Trishna болон Алтан хавчаар, Хайр минь билээ чи, Рашаантын 18, Чамайг Үгүйлнэ дуунуудаараа хэдийнээ танигдсан Хонх хамтлаг тэргүүтэй онцгой зочин артистууд уран бүтээлээ толилуулах гэж буй. Гайхалтай хамтрал биш гэж үү?

• 💯 Өөр: Тоглолтын зохион байгуулагчид тайзны дуу дүрс, гэрэлтүүлгийг шинэ түвшинд өндөр чанартай шийдэж өгснөөрөө онцлогтой болох юм.

За тэгээд, тоглолтын тасалбараа аваад нэг өдрийг зугаатай өнгөрүүлээрэй. Тасалбар дууссан тохиолдолд тоглолт болох өдөр нэвтрэх хаалган дээр зарагдахгүй юм байна шүү.

🗓️ Хэзээ: 9 сарын 14
📍 Хаана: Төв Цэнгэлдэх Хүрээлэн

🍋 Нийслэлийн газар зохион байгуулалтын албанаас Газрын эрхийн дахин дуудлага худалдааг зарлажээ. Тодруулбал, тус дахин дуудлага худалдаагаар архитектор төлөвлөлтийн даалгавартай 12 байршилд газар эзэмших, ашиглах эрхтэй болох юм.

🍋 Монголын Lambda Global ХХК Google For Startup-с $25,000 хөрөнгө оруулалт авлаа. Ийнхүү хиймэл оюун ухаан дээр суурилсан тус компани нь тэрбум $-ын үнэлгээтэй болох замналаа эхлүүлж байна. Сонирхуулахад, хиймэл оюун ухааныг ашиглахын тулд маш их зардал гаргадаг юм байна шүү. 

🍋 Үерийн улмаас эвдэрсэн замын эвдрэлийг засварлахаар ЗГ-ын нөөц сангаас  ₮4.9 тэрбумыг гаргана. Цаашид улсын чанартай авто зам, замын байгууламжид байгалийн гэнэтийн хүчин зүйлсээс шалтгаалан үүссэн эвдрэлийг засварлах, урьдчилан сэргийлэхэд шаардлагатай зардлыг Улсын авто замын сангаас бүрэн санхүүжүүлэх боломжийг судалж байгаа аж.

🍋 Монгол болон Беларусийн ЗГ хоорондын Жолоодох эрхийн үнэмлэхийг харилцан зөвшөөрөх, солилцох тухай хэлэлцээрийг батлав. Талууд өнгөрсөн 3-р сард тус хэлэлцээрт гарын үсэг зурж байсан бөгөөд ийн 5 сарын дараа ЗГ-аас батлаад буй.

• Боломж: Хиймэл оюун ухаанд суурилсан компанийн удирдагчдадаа зориулсан Google-н гэнэтийн бэлэг. (LinkedIn)

• Бахархал: Хяргас нуур олон улсын дурангаар Гректэй жишигджээ. (CNN)

• Хялбар:  Зурган дахь объектыг AI ашиглан устгах Apple-н шинэ функц. (TC)

• Оролцоо: ХААН банкнаас зохион байгуулж буй бизнес эрхлэгч эмэгтэйчүүдийг дэмжих хөтөлбөр. (KhanBank)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ч.Батцэрэн