🤔 Цагаан сараар юу хийх үү?

POWERED BY

Битүүний өдрийн мэнд ээ! Ирж буй Модон могой жилээ элгээрээ энх амгалан, төрлөөрөө түвшин сайхан угтаарай. Цагаан сарын амралтын дараа шинэ дугаараар уулзацгаая. Сайхан шинэлээрэй! 🐍🧧 

GOV: АНЭУ болон Бахрейны Хаант Улс хамтран газрын тос, байгалийн хий, эрдэс баялгийн хайгуул, олборлолтын чиглэлд хамтран ажиллаж, эхний ээлжит Монголд $500 саяын хөрөнгө оруулалт хийнэ. 

MSE: Женко тур бюро ХК (JTB) ногдол ашиг хуваарилахгүй байх шийдвэр гаргасан бол Монноос ХК (MNS) нэгж хувьцаанд ₮80-ийн ногдол ашиг хуваарилахаар боллоо. 

MMC: Mongolian Minig Corporation (0975.HK)-н хувьцааны үнэ 1 өдрийн дотор 8.1% унаж HK$6.1-т хүрчээ. 

⁉️ Атар-4 аян ХАА-г дэмжих үү?

Энэ сарын эхнээс Засгийн газар Атар-4 тариалангийн тогтвортой хөгжлийн аяныг эхлүүлэх шийдвэр гаргасан. Үүний нөлөө юу байх вэ? 

🧐 Юунд зориулав?

Уг аяны хүрээнд тариалангийн дэвшилтэт технологийг нэвтрүүлж, хөрс, уур амьсгалын онцлогт тохирсон ашигт таримлыг нутагшуулах, тариалангийн үйлдвэрлэлийг дэмжих гэнэ. Үүний хүрээнд газар тариалан, мал аж ахуй, хүнсний боловсруулах үйлдвэрлэлийн чиглэлд олгох хөнгөлөлттэй зээлийн асуудал яригдаж буй. 

• 💰 ₮800 тэрбум: Уг аяныг арилжааны 10 банк ₮800 тэрбумын хөнгөлөлттэй зээлээр санхүүжүүлэх юм. Нэмээд энэ онд зээлийн хүүгийн дэмжлэг ₮52.8 тэрбумыг улсын төсвөөс, эргэлтийн хөрөнгийн зээлийн хүүгийн 10%-ийг ЗГ-аас тус тус санхүүжүүлэх аж. Нэг талаас энэ нь ААН-үүдийн санхүүгийн дарамтыг бууруулах ч нөгөө талаас хэр үр ашигтай байх вэ гэдэг чухал.

😞 Нөхцөл байдал

2023 онд 7.4%-д дүүлж явсан эдийн засгийн өсөлт 2.5 нэгж хувиар уруудаж 4.9% болоод буй. Үүнд ХАА-н салбарын доройтол ч нэрмээс болсон. Учир нь ХАА-н салбарынх 28.7% буюу хамгийн ихээр буурсан билээ. Нэмээд тус салбарын гадаадын хөрөнгө оруулалт нийт ГШХО-ын 1%-ийг ч эзэлж чадахгүй байгаа. 

• 🫤 Хэр сайжруулах вэ? Одоо өрнөөд байгаа аянууд энэ нөхцөл байдлыг өөрчлөх зорилготой ч хэрэгжүүлж байгаа арга зам нь бодит үр дүнд хүргэх эсэх нь эргэлзээтэй. Атар-4 аяныг л гэхэд 2028 он хүртэл хэрэгжүүлж газар тариалангийн эргэлтийн талбайг 200 мянган га-аар шинээр нэмж ашиглах гэнэ. 

• 📌 Нэмээд гол нэрийн хүнсний ногооны хэрэгцээг 100%, таримал тэжээлийн 70%-ийг дотоодын үйлдвэрлэлээр хангах, эрчимжсэн мал ахуйн суурь тэжээлийн тариалалтыг нэмэгдүүлнэ гээд байгаа. 

Эцэст нь… ХАА-н салбарыг дэмжих бодлого улс төрийн мөчлөгөөр өөрчлөгдөж солигддог. ХХААХҮ-ийн салбарын бараа, үйлчилгээний зардал сүүлийн 10 жилд дунджаар ₮49.6 тэрбум, татаас нь ₮46.6 тэрбум байсан. Уг нь энэ салбарыг огт тоохгүй биш харин ч татаасаар бөмбөгдөж ирсэн ч сүүлийн 10 жилд дорвитой ахиагүй. Харин одоо сайн хянаж, үр дүнтэй ажиллаж ХАА-н салбарыг аврахгүй бол горьгүй нь ээ. 

 🤔 Цагаан сараар юу хийх үү? 

Цагаан сарын амралтыг сунгаж ирэх Лхагва гараг хүртэл амрахаар болчихлоо. Цагаан сарыг төдийлөн өргөн тэмдэглэдэггүй уншигч нартаа хань болоод эдгээр өдрүүдэд үзэж сонирхох, нүд хужирлах урлаг, спортын арга хэмжээнүүдийг хуваалцъя. 

🎬 Кинодъё

Биднийг Цагаан сар гээд бужигнаж байх зуур дэлхийн хамгийн том кино наадмуудын нэг болох 75 дахь удаагийн Берлиний олон улсын кино наадмын аваргууд тодорсон билээ. Энэ жил Алтан баавгайн төлөө 19 кино өрсөлдөж Алтан баавгайгаар Норвег найруулагч Даг Йохан Хаугерудын “Dreams” кино тодорсон бол шүүгчдийн нэрэмжит шагналыг Бразилын найруулагч Габриэль Маскарогийн "The Blue Trail" кино хүртсэн юм. Наадмын онцлох шилдэг 10 кинотой ЭНД дарж танилцаарай. 

🏆 Оскартай өдөр 

Шинийн 2 буюу Ням гарагт 97 дахь удаагийн Оскарын шагнал гардуулах ёслол Улаанбаатарын цагаар 08:00-11:00 хооронд зохион байгуулагдана. Өнгөрсөн онд Box Office-г доргиосон олон кино нээлтээ хийсэн гэх утгаараа нэлээн үзээтэй болох төлөвтэй байгаа. Онцлох зүйл нь академийн аварга шалгаруулах ёслолын түүхэнд 50 жилийн дараа “Wicked” болон “Emilia Pérez” гэсэн 2 мюзикл нэр дэвшсэн явдал.

• 🎶 Тус 2 мюзиклийн хамт “The Brutalist” хамгийн олон төрөлд нэр дэвшсэн бүтээлээр тодроод буй.   

🦾 Үзээтэй тэмцээнүүд

eSport сонирхогчид маань 2 сарын 20-ноос 3 сарын 2-ны хооронд Банконгт Valorant Masters зохион байгуулагдаж байгааг мэдэж байгаа биз дээ? Тоглолтоо Twitch.TV болон VALORANT Champions Tour сувгаас үзэх боломжтой шүү. Цаашлаад, NBA-н улирлын тоглолтууд ч үргэлжилж байгаа тул эдгээр амралтын өдрүүдэд сагсанбөмбөгийн хорхойтнууд минь Лэйкерс, Чикаго Буллс, Детройт Пистонс тэргүүтэй багуудын тоглолттой байх нь шүү. 

Юутай ч энэ жил үндэсний хамгийн том баяраараа 5 хоног амарч байгаа. Пүрэв гарагт нийтээрээ ажилдаа орох учраас ирэх 7 хоногт бол бүтэн л амарч, баярлаж өнгөрөөх бололтой. За тэгээд жинхэнээсээ 3 сарын 10-нд ажилдаа орцгоох нь байна шүү. 

💡 Таавар таацгаая

… нь хөрөнгийн биржид бүртгэлтэй хувьцааг хөрөнгө оруулагчид брокерын зуучлалыг алгасан өөр хоорондоо шууд арилжих үйл явц юм. Тэр юу вэ? Таасан бол хариултаа бидэнд илгээгээрэй. 😉

🍋 Жолооч зөрчил үйлдсэний улмаас 335 ББСБ-д 17,664 удаагийн ₮439 саяын торгууль ногдуулжээ. Түүнчлэн 98 мөнгөн зээлийн үйл ажиллагаа эрхлэгчдийг 13,515 удаа нийт ₮327 саяар торгосон байна. Учир нь ББСБ-ын зээлээр тээврийн хэрэгсэл худалдан авсан тохиолдолд тухайн ББСБ нь АТҮТ-д эзэмшигчээр бүртгэгдэж жолоочийн гаргасан зөрчилд хариуцлага хүлээдэг юмсанж.

🍋 Америкийн ХАА-н яам $1 тэрбумаар шувууны томуутай тэмцэж, өндөгний үнийг бууруулна. Үүний тэн хагасыг биологийн аюулгүй байдлыг хангахад зарцуулах бол ХАА-н тариаланчдад санхүүгийн дэмжлэг үзүүлэх хөтөлбөрт $400 сая, үлдсэн $100 саяыг вакцины болон эмийн судалгаа явуулахад зориулах аж. За тэгээд болохоо байхад тэд өндөг импортолж эхлэх юм гэнэ дээ.

🍋 ₮5,000-ийн хураамж төлдөг болсноос хойш Улаанбаатараас гарах орон нутгийн дугаартай тээврийн хэрэгслийн тоо нэмэгдэв. Тодруулбал, өнгөрсөн 9-р сард орон нутгийн дугаартай 114 мянган тээврийн хэрэгсэл Улаанбаатар руу орсон бол үүнээс 2 дахин бага буюу 57 мянга нь буцаж гарч байв. Уг зохицуулалт хэрэгжиж эхэлсэн дараа сараас нь гарч явсан тоо өмнөх сараасаа 2 нугарч, цаашид сар бүр өсжээ. 

🍋 Nvidia (NVDA)-н орлого өнгөрсөн онд 2023 оноос 114% өсөж $130.5 тэрбум болжээ. Харин өнгөрсөн оны IV улиралд III улирлаас 12%, 2023 оны мөн үеэс 78% их буюу $39.3 тэрбумыг олсон аж. Задлан харвал, аль ч хугацаанд орлогын 90%-ийг дата төв, 6%-ийг тоглоомын болон AI компьютерын борлуулалт, 1.2%-ийг программ хангамж, үлдсэн хувийг автомашин болон робот технологийн орлого бүрдүүлсэн байна. 

• 📜 Цагаан сарын идээ засах уламжлал болон битүүлэх ёсыг тайлбарлажээ. (Ubn)

• 👀 Үйлдвэрийн ажилчдыг тагнах шийдэл боловсруулсан стартап гэнэ үү? (INC)

• 💎 Компанийнхаа үнэлгээг $1 саяас $1 тэрбум болгож чадсан 100 эрхмийн алтан зөвлөгөө. (Entrepreneur)

• 💣 Арай гэж нэгийг нь намжааж байтал илүү түрэмгий нь өндөлзөж эхлэв. (Tass)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ