🏧 ТОП банкнуудын нөлөө

POWERED BY

Happy Monday! Кофе уунгаа товхимлоо уншдаг хэр их хүн байна даа? Кофенд дурлагсдын хувьд E = mc^2 бол Energy = Milk x Coffee^2 гэсэн утгатай шүү. 🤪 Борголоо уугаад ажлаа эрч хүчтэйгээр умалзуулаарай. 

BOM: Монголбанк бодлогын хүүг 13% хэвээр үлдээв.

GOV: ЗГ Хөрөнгө оруулалтын тухай хуулийн шинэчилсэн найруулгын төслийг УИХ-д өргөн мэдүүллээ.

OTC: Биржийн бус зах зээл дээр өнгөрсөн 7 хоногт нийт ₮18.3 тэрбумын арилжаа хийгдсэний ₮3.7 тэрбум нь анхдагч зах зээл дээр арилжигдав.

🏧 ТОП банкнуудын нөлөө

Өнгөрсөн оны эхний хагаст ₮4.8 их наяд байсан хөрөнгийн зах зээл (ХЗЗ)-ийн үнэлгээ ТОП-5 банкны IPO-н дараа 2.3 дахин өсөж ₮11.1 их наяд болов.

ТОП-5 ба түүх

Системийн нөлөө бүхий банкнуудын IPO-н ХЗЗ-д бичсэн түүхийг сөхвөл,

• Бүхний анхаарал IPO дээр: ТОП банкнууд IPO хийх тутамд IPO-д оролцогчид болон захиалгын дүнгийн дээд амжилт шинэчлэгдэж байв. Улмаар тэдний IPO-д нийт 71,255 хөрөнгө оруулагчаас ₮725.5 тэрбумын захиалга ирсэн нь татан төвлөрүүлсэн дүнгээс 63.6% илүүрхсэн юм.

• Үнэлгээ 🆙: ТОП-5 банкны ЗЗ-ийн үнэлгээ IPO хийх үеэр ₮5.7 их наяд байсан бол одоо тухайн үеэс 1.2% өссөн байна. Акулууд дундаа ХААН Банк (KHAN) болон ХХБ (TDB)-ны үнэлгээ өсөж бусдынх нь буурчээ. Тодруулбал, ХААН Банкны хувьцааны үнэ IPO ханшаас хамгийн ихээр буюу 18.2% өссөн бол Голомт банк (GLMT)-ных 28% буурсан аж.

IPO нөлөө

ТОП-5 банк IPO хийснээр, ДНБ-д харьцуулсан ХЗЗ-ийн үнэлгээ ТОП банкнуудын IPO эхлэхээс өмнө буюу 2022 оны II улиралд 11.3% байсан бол одоо 21% болжээ.

• Хоёрдогч ЗЗ идэвхжив: Түүнчлэн өнгөрсөн сард хийгдсэн нийт үнэт цаасны хоёрдогч зах зээлийн гүйлгээний дүн жилийн өмнөхөөсөө 3.7 дахин өсөж ₮22.6 тэрбумд хүрсэн аж.

• Илүү олон: Мөн нийт 5%-иас бага хувьцаа эзэмшигчдийн тоо жилийн өмнөхөөсөө 22.8% өсөж 539 мянга болоод байна.

Эцэст нь… Юутай ч банкны системийн шинэчлэл ХЗЗ-ийг дараагийн түвшинд аваачиж нэлээд идэвхжүүллээ. Одоо араас нь тээвэр логистикийн компани IPO хийх сурагтай. Тэгэхээр ХЗЗ-ийн үнэлгээ улам л томрох нь дээ.

🆙 Дээшээ хар даа! Батлан хамгаалахын зардал

Өнгөрсөн онд дэлхийн батлан хамгаалах салбарын зардал 3.7% өсөж $2.2 их наяд болсноор түүхэн дээд түвшинд хүрлээ.

Аюулгүй гэх баталгаагүй

2000 онд дэлхийн батлан хамгаалах салбарын нийт зардлын 63%-ийг 15 улс эзэлдэг байсан бол 2022 онд энэ тоо 82% болов. Үүнээс Америк, Хятад, Орос гэсэн ердөө 3 улсын батлан хамгаалахын зардал 63%-ийг нь бүрдүүлж буйгаас харахад энэ салбарын зардал аль хэдийн нэг тал руугаа хэлбийж, ялгаа нь улам гүнзгийрч байгаа нь ил аж.

• Луу ба Шонхор: Түүнчлэн сүүлийн 10 жилд Хятадын батлан хамгаалахын салбарын зардал бусадтай харьцуулахад үлэмж буюу 64% нэмэгдсэн ч адил хугацаанд 2.7% өссөн Америктай харьцуулахад 3 дахин бага байсаар. Энэ нь ч аргагүй бөгөөд өнгөрсөн онд Америк ДНБ-ийнхээ 3.7%-тай тэнцэх дүнг батлан хамгаалах салбартаа төсөвлөсөн. Харин Хятадынх 1.7% байжээ.

Дайны уршиг

Дэлхийн цэргийн зардал тасралтгүй өсөж байгаагийн зэрэгцээ Европ ч сүүлийн 30 жилд байгаагүй их хэмжээний мөнгийг батлан хамгаалах салбар руугаа урсгах болов. Улмаар Төв болон Баруун Европын цэргийн зардал хүйтэн дайны үеийг давах хэмжээ буюу $345 тэрбумд хүрчээ. Энэ нь мэдээж Оросын түрэмгийлэлтэй шууд холбоотой. Тэгвэл дайны халуун цэгт буй орнуудын өнгөрсөн жилийн цэргийн зардлыг задлан харвал, Европ 13%, Украин 640%, Орос 9.2% тус тус өсгөөд буй.

Энэ өсөлтөд голлон нөлөөлсөн Орос л гэхэд өнгөрсөн онд ДНБ-ийнхээ 4.1%-тай тэнцэх хөрөнгийг батлан хамгаалах салбартаа зарцуулж тэр ч байтугай уг зардлыг нэмэгдүүлэхээр $100 тэрбумын зээл авсан аж. Мөн энэ амралтын өдрүүдээр Орост зэвсэгт бослого гарч В.Путин хүртэл мэдэгдэл хийж хэсэг шуугиад авлаа. Хаа сайгүй Орос Украины дайн дуусахыг хүсэж байгаа ч Орос зээл аваад ч болов дайнаа санхүүжүүлсээр байдаг. 🤔

Эцэст нь… Дэлхийн батлан хамгаалах салбарын зардал нэмэгдэж байгаа нь энх цагт ч улс орнууд бие биедээ итгэлгүй байгааг харуулж буй. Хэрэв дайн эцэс болохгүй бол тус зардал ирэх жилүүдэд ч нэмэгдэхийг үгүйсгэх аргагүй ээ.

Он гарсаар нүүрсний үнэ 60.5% унаж $115 болжээ. Тэгвэл сүүлийн 10 жилд, жил бүрийн 6-р сард нүүрсний үнэ хэд байв?

• 2013: $57.3

• 2014: $61.6

• 2015: $41.4

• 2016: $40

• 2017: $54

• 2018: $61

• 2019: $55

• 2020: $45

• 2021: $108

• 2022: $330

• 2023: $115

🤖 Технологийн дэд бүтцийн шийдэл - VXRAIL

Компанийнхаа технологийн шийдэлд хувьсал хийхэд бэлэн үү? 🤓

Тийм бол танай компанийн мэдээллийн технологийн орчныг өөрчлөх VxRail нэгдсэн дэд бүтцийн систем (HCI)-г танилцуулж байна.

Энэ нь мэдээллийн технологийн дэд бүтцийн суурь нэгжүүд болох компьютер, хадгалах төхөөрөмж болон тэдгээрийн суурилуулалт, удирдлага, хяналтыг хялбаршуулсан цогц технологи аж.

VxRail-н тусламжтайгаар,

• Үйл ажиллагааны зардлыг 47% бууруулах,

• Технологийн дэд бүтцийн багийн үр ашгийг 60% хүртэл нэмэгдүүлэх,

• Гэнэтийн сул зогсолтыг 88% бууруулах,

• Бүх программ хангамж, төхөөрөмжид Single point of support дэмжлэг үзүүлэх зэрэг олон давуу талыг бий болгох боломжтой гэнэ.

🔗 Дэлгэрэнгүй мэдээллийг ЭНД дарж аваарай.

🔹API-н хураамжийн маргаанаас болж Reddit-н борлуулалтын өсөлт саарав. Энэ оны эхэнд компани хэрэглэгчдээсээ хураамж авдаг болно хэмээн зарласнаар хэрэглэгчид болон модераторуудын эсэргүүцэлтэй тулгарсан юм. Улмаар Reddit-н үнэлгээ $10 тэрбумаар буураад байна.

🔹Энэ Баасан гарагт МХБ (МХБ) ХК-ийн хувьцаа эзэмшигчдийн ээлжит бус хурал болно. Хуралдаанаар дүрмийн нэмэлт өөрчлөлт, хяналтын зөвлөлийн ажиллах журмыг хэлэлцэж батлахаас гадна хяналтын зөвлөлийн болон ТУЗ-ийн гишүүдийг сонгох аж. Сонирхуулахад, МХБ-ийн хувьцааны үнэ IPO-н үнээсээ 43.9% өсөж ₮143.9 болоод буй.

🔹Bitcoin (BTC)-н үнэ сүүлийн 1 жилийн дээд түвшиндээ хүрлээ. Тодруулбал, дэлхийн хамгийн том хөрөнгө оруулалтын компани болох BlackRock (BLK) Америкт Биткойны биржийн арилжааны сан (ETF)-тай болох хүсэлтээ SEC-д гаргасны дараа Биткойны үнэ $31,000-ыг давсан аж.

🔹УБТЗ-ын дүрмийн санг ₮167 тэрбумаар нэмэгдүүлэв. Тодруулбал, “Орос-Монголын хамтарсан Улаанбаатар төмөр зам"-ыг байгуулах тухай хэлэлцээрт нэмэлт оруулах протоколыг үзэглэсэн юм. Ингэснээр олон жил яригдсан МОН П1, П2 зээлийн хугацаа хэтэрсэн өр төлбөрийг дуусгавар болгох асуудлыг шийдвэрлэлээ.

• Бизнес: Алдартнуудын эхлүүлж байсан хамгийн хачин бизнесүүд. (TheThings)

• Сонирх: 2023 онд орон сууцны үнэ хамгийн их унаж буй 10 хот. (RealEstate)

• Унш: Рианна Savage X Fenty компанийн CEO-н албан тушаалаасаа буулаа. (TheHollywoodreporter)

• Мэд: Gen Z санхүүгийн ирээдүйгээ хэрхэн харж байна вэ? (VisualCapitalist)

• Даваа: Дэлхийн экспортыг дэмжих чуулга уулзалт эхэлнэ.

• Мягмар: Өмнөд Солонгос хэрэглэгчийн итгэлийн индексээ танилцуулна.

• Лхагва: Micron (MU)-н ээлжит улирлын тайлан гарна.

• Пүрэв: Үргэлжлүүлэн Nike (NKE) тайлангаа танилцуулах нь.

• Баасан: Өмнөд Солонгосын гадаад худалдааны тэнцэл зарлагдана.

Хамтран ажиллах | Ажлын байр | Редакцын бодлого

Editor: Э.Золбаяр
Writers: С.Ангирмаа, М.Хулан, А.Пүрэвжаргал
Graphics by: О.Баасандорж