🦉 Тайван нойрс доо Duo!

POWERED BY

Сайхан амрав уу? Цагаан сар айсуй, ЭТТ-н ногдол ашиг айсуй. Ногдол ашгаа бэлнээр авах уу, хадгалах уу гэж асуух юм гэнэ. Ямартай ч дахиад 1072-н ногдол ашиг гээд дахиад мөнгө тараагдах нь. Гэснээс манай сошиал хаягуудыг дагаж байгаа юу? Цаг үеийн шуурхай мэдээг шууд сошиалд оруулдаг шүү. Өнөөдөр л гэхэд ЗГ-ын шинэ бондын мэдээлэл орлоо. 🍋

BANK: Банкнуудын төлж буй татварын хэмжээ 2019 онд татварын өмнөх ашгийн 24%-тай тэнцэж байсан бол 2024 онд 37%-тай тэнцэж байна. 

MSE: Эм Жи Эл Акуа ХК (MGLA) нэгж хувьцаанд ₮7.31, Талх Чихэр ХК (TCK) ₮450, Тэнгэр Даатгал ХК (TGI) ₮67.12, Баянгол Зочид Буудал ХК (BNG) ₮330, Монос Хүнс ХК (MFC) ₮4-ийн ногдол ашгийг тус тус хуваарилна. 

APU: АПУ ХК (APU)-ийн цэвэр ашиг 2024 онд жилийн өмнөхөөсөө 53.3% өсөж ₮192.9 тэрбум боллоо.

🧐 Санхүүгийн асуудал = Барьцаа 

Өнгөрсөн оны байдлаар нийт 2,740 ашигт малтмалын тусгай зөвшөөрөл байгаагийн 7.8% буюу 215 нь банк болон ББСБ-ын барьцаанд байгаа аж. Энэ тоо юу өгүүлнэ вэ? 

📌 Ерөнхий дүр зураг

Одоогоор манай нийт газар нутгийн 4.4%-д ашигт малтмалын тусгай зөвшөөрөл олгогдсон бөгөөд нийт тусгай зөвшөөрлийн 64.2%-ийг ашиглалтын, үлдсэн хэсгийг хайгуулын зөвшөөрөл эзэлж буй. Ашиглалтын зөвшөөрлийн 26.2%-ийг алтны шороон ордны, 17.9%-ийг нүүрсний, 12.7%-ийг жоншны зөвшөөрөл гэх мэтээр бүрдүүлжээ. Энэ бүх зөвшөөрлийн эцэст 2024 онд улсын төсөвт ₮356 тэрбум төвлөрсөн байна. 

• 🧐 Хэн эзэмшиж байна? Ашигт малтмалын нийт тусгай зөвшөөрлийн дийлэнх буюу 79.6%-ийг дотоодын ААН, 15.9%-ийг гадаадын 100% хөрөнгө оруулалттай ААН, үлдсэн 4.5%-ийг гадаадын хамтарсан хөрөнгө оруулалттай ААН эзэмшдэг. Гадаадын 100%-ийн хөрөнгө оруулалттай ААН-ийн дийлэнх нь Хятадынх. 

⛓️ Барьцаа = 215

Цааш нь, Монголд уул уурхайн төслүүдийг эхлүүлэх, өргөжүүлэхэд санхүүжилт хомс. Иймд гол санхүүжүүлэгч нь банк болж байгаа юм. Үүнээс шалтгаалж уурхайн компаниуд лицензээ барьцаалж зээл авах нь түгээмэл болсон хэрэг. Угаас банкны салбарын уул уурхайд олгосон зээл нэмэгдэж өнгөрсөн оны III улирлын байдлаар ₮1.1 их наядыг давсан. Зээлээр санхүүжилтээ шийдлээ ч уул уурхайн салбарт ханшийн хэлбэлзэл, үйл ажиллагааны саатал гарах нь түгээмэл тул чанаргүй зээлийн хувь нь ч өндөр. 

• 🖇️ Еэвэнгийн нөгөө талд: Манайд л болсон хойно зарим компаниуд лицензийг шууд ашиглах бус худалдах, хөрөнгө оруулалт татах хэрэгсэл болгон ашигладаг. Энэ тохиолдолд лицензийн хоёрдогч зах зээл хөгжиж банк, ББСБ-уудын барьцаанд орсон лицензүүдийн зарим нь зээл эргэн төлөгдөхгүй нөхцөлд хураагдаж, дахин худалдаалагдах асуудал гарна.

• 😞 Ингээд ирэхээр уурхайн эзэмшигчдийн бүтэц өөрчлөгдөх, лицензүүдийн үнэлгээ буурвал банкны хөрөнгийн чанар муудах, шийдэх гэж урт удаан шүүхдээд өндөр зардал гаргах гээд асуудал мундахгүй. Ядаж уул уурхайн лицензийн арилжаа, санхүүжилтийн бодлоготой холбоотой хяналт сулыг хэлэх үү. 

Эцэст нь… Монголын уул уурхайн салбар ханатлаа хөгжсөн юм байхгүй. Бид илүү их хайгуул хийж энэ салбарыг дараагийн түвшинд гаргах хэрэгтэй. Гэтэл 215 зөвшөөрөл барьцаанд байна гэдэг бол санхүүжилт, зах зээл, төрийн байр байдалд хангалттай муу байгааг харуулж байна. Цаашид хөгжье гэвэл бодлого, зохицуулалт, хяналт, санхүүжилт хэрэгтэй байна! 

 🦉 Duo шувуу үхсэн!

Дэлхийн хамгийн алдартай хэл сургалтын апп Duolingo-н алдарт шар шувуу Duo насан эцэслэлээ. Үхлийн шалтгаан нь тодорхойгүй байгаа бөгөөд Tesla (TSLA)-н Cybertruck-т дайруулсан, бүр цаашлаад Squid Game-д оролцож яваад нас барсан гэхчлэн олон таамаглал гарч байна. 

🪦 Үхлээрээ айлгав

Энэ нь компанийн тоглоом шоглоомтой маркетинг байв. Хэрэв та Duolingo ашигладаг бол хэл давтуулах гэж яаж үзэж тарж, үсэрч наалддагийг нь мэдэх биз ээ. Түүний үхлийг компани хэл сургах гэж үглэж, яншаад, аргадаж нэг үзсэн ч хэрэглэгчид нь хэлээ давтахгүй байсантай холбон тайлбарласан бөгөөд хэрэв Duо-г эргүүлэн авчирмаар байвал 50 тэрбум XP цуглуулах даалгавар өгөв. Улмаар хэрэглэгчид нь ч хайрт шувуугаа буцаан авахаар хичээлээ хийж, одоогоор 12 тэрбум XP-г цуглуулжээ. 

• 🆙 Duo шувуу нас барсан сургаар Duolingo-н Android хэрэглэгчдийн тоо дэлхий даяар 25% өссөн бол Android үйлдэлтэй утас дээрх татан авалт 38%, вэб хайлт 58% тус тус өссөн байна. 

• 🕊️ Цаашлаад, Дэлхийн эрүүл мэндийн байгууллага, X, Netflix (NFLX), алдарт дуучин Дуа Липа эмгэнэл илэрхийлсэн нь компанийн хачирхалтай маркетингийг улам алдаршуулах нь тэр. 

🤫 Хагацах болоогүй шүү!

Сонирхолтой нь Duolingo тус мэдэгдлийг Super Bowl-с 3 хоногийн дараа тархаасан бөгөөд хормын дотор Super Bowl-н талаарх мэдээг арчиж, олон нийтийн сүлжээ Duo-р дүүрэх нь тэр. Super Bowl-г ердөө ганцхан TikTok бичлэгээр арчсан гэхээр чамгүй амжилттай маркетинг болсон нь харагдах биз ээ. 

• 💰 Хэр ашиг орлоготой билээ? Duolingo-н сарын идэвхтэй хэрэглэгчийн тоо өнгөрсөн оны II улиралд  анх удаа 100 саяыг давж дээд амжилт тогтоож байсан. Улмаар орлого нь өмнөх оноосоо 38% өсөж $190 саяд хүрч байв. 

• 🌟 Duolingo Монголд ч хөөрхөн алдартай. Өнгөрсөн онд тус апп-ийг ашигладаг хэрэглэгчдийн №1 сонголт нь Англи хэл байсан бол удаалаад Солонгос хэлийг сонирхон сурдаг байх нь. 

Эцэст нь… Сүүлийн үед маркетингийн тулаан оргилдоо хүрч зарим талаараа ёс зүйгээс гажууд, өвөрмөц, хурц шийдлүүд олон харагдах боллоо. Duolingo-н хувьд хэл сураач ээ, гээд урамшуулж нэг үзээд, уйлж, уурлаж, сүрдүүлэх гэхчлэн олон аргаар үзсээр эцэст нь хэл сурахгүй бол үхлээ шүү л гэж байна. Гэхдээ маркетингаа тоглоомтой, хошин байдлаар хийсэн болохоор хүнд сэдэвтэй ч амжилттай хэрэгжих шиг.  

 10 ордод
Монголд 106.7 сая тн цайрын баялаг, 10 ордод 2.18 сая тн цайрын нөөц бүртгэгджээ. 
100-150 мянган тн
Өдгөө цайрын орд болон цайр агуулсан холимог металлын ордын 5 төсөл 100-150 мянган тн цайрын баяжмал үйлдвэрлэн экспортлоод буй.
17 төсөл
Үүнээс гадна техник, ЭЗ-ийн үндэслэл хийгдсэн боловч ашиглалтын үйл ажиллагаа эхлээгүй цайр агуулсан бүтээгдэхүүн гаргах 17 төсөл байгаа аж.

🍋 Pershing Square (PSHZF) Howard Hughes Holdings (HHH)-н 10 сая ширхэг хувьцааг $900 саяар авах санал тавив. Угтаа өнгөрсөн сард $1 тэрбумаар тус компанийн 61%-69%-ийг эзэмших санал тавьж байв. Хэрэв одоогийн хэлцэл бүтвэл, тэдний Howard Hughes дахь эзэмшил 37.6%-48% болж өсөх бөгөөд жил бүр нийт үнэлгээнийх нь 1.5%-тай тэнцэх дүнг удирдлагын болон стратегийн зөвлөх үйлчилгээний төлбөр болгож авах нь. 

🍋 Азийн Хөгжлийн Банк 2034 он хүртэл 1 жилийн санхүүжилтийн хэмжээгээ 50% нэмж $36 тэрбум болгоно. Санхүүжилтийн 50% хүртэлх дүнг уур амьсгалын өөрчлөлттэй холбоотой төслүүд, харин 20%-27% буюу $13 тэрбум хүртэлх дүнг голчлон дижитал шилжилт хийж буй хувийн хэвшлийнхэн хүртэх нь. Ингэхдээ санхүүжилтийн үр дүнг тухайн жилийн турш хянаж, бүс нутгийн шинэ шаардлага, тэргүүлэх чиглэлтэй уялдуулан сайжруулах аж.

🍋 Монгол Улс НҮБ-ын ХХААБ-тай хамтран доройтсон газрыг нөхөн сэргээж, экосистемийн үйл ажиллагааг сайжруулна. Энэ хүрээнд 23,800 га бэлчээр болон ойг нөхөн сэргээж, 634,000 га газрын байгаль орчны менежментийг сайжруулах аж. Улмаар 10,000 гаруй иргэдэд нөлөөлөхүйц буюу 1.72 сая тн CO2-эквивалент ялгаруулалтыг бууруулах юм гэнэ. 

🍋 Хятадын компаниуд нэгдэн нийлэх хэлцлийн дүн өнгөрсөн оны IV улирлаас 78.5% өсөж $129 тэрбумд хүрэв. Үүнд өнгөрсөн оны 9-р сард хэрэгжүүлсэн дотоодын компаниудын нэгдэл, худалдан авалтыг хөнгөвчлөх, дэмжихэд чиглэсэн бодлого болон Америкийн Хятадад тавьсан импортын татвар нөлөөлж. Үүнээс өмнө нийт хэлцлийн дүн 2020 оноос 45% буурч $249 тэрбум болоод байжээ. 

• ♟️ xAI Grok 3 загвараа гаргасныхаа дараа Premium+ үйлчилгээнийхээ төлбөрийг 2 нугалав. (TechCrunch)

• 💡 Ой тогтоолтоо сайжруулах 2-7-30 дүрэм. (INC)

• 🎮 "Pokémon Go"-н бүтээгчид видео тоглоомын бизнесээ Саудын Арабд $3.5 тэрбумаар зарна. (Yahoo!Finance)

• 🫗 USAID-н санхүүжилтийг царцааснаар 12,700 гаруй америкчууд ажлын байргүй хоцров. (BusinessInsider)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ