😖 Бид будилсаар, харин тэд...

POWERED BY

Өглөөний мэнд ээ! Монголчуудын гайхширал дуусахгүй нь ээ. ЗГ-ын бүрэн эрхт төлөөлөгчөөр Ж.Батзандан томилогдож, баялгийн санг баян болгоно гэнэ дээ. Хэлэх үг, бичих үсэг ч алга даа. 😑

CHN: Хятад Америкийн тарифын бодлогыг сөргүүлэн Google (GOOG)-г шалгаж эхлэхийн сацуу нүүрс, шингэрүүлсэн байгалийн хийд нь 15%, газрын тосны экспортод нь 10%-ийн татвар ногдууллаа. 

GOV: 2040 он гэхэд Үндэсний баялгийн санд ₮30 их наядыг төвлөрүүлнэ. 

SVR: Эрдэнэ суварга ХК өнгөрсөн жилийн ашгаасаа нэгж хувьцаанд ₮5-ийн ногдол ашгийг 6 сарын 30-ны дотор хуваарилахаар боллоо.

🤑 $LEND: Цэвэр ашиг +82%

Монголд IPO хийснээсээ хойш амжилттай явж байгаа компани ховор. Тэгвэл үүний эсрэг зүгт их өсөлт, тэлэлтийн замд явж байгаа “ЛэндМН ББСБ” ХК (LEND) 2024 оны тайлангаа танилцууллаа. Юу болсон бол оо? 

📈 Өссөөр, ногоорсоор

“ЛэндМН ББСБ” ХК-ийн 2024 оны голлох санхүүгийн үзүүлэлтүүд бүгд 2023 оныхоос +80% өссөн байгаа юм. Тодруулбал, нийт зээлийн багц нь 89.6% өсөж ₮237.7 тэрбум болсноор хүүгийн орлого нь ч мөн 86.6% нэмэгдэж ₮89.2 тэрбум болжээ. Улмаар цэвэр ашиг нь 82.3% пуужиндаж ₮36.1 тэрбум болжээ. 

• 🔥 Ногдол ашиг айсуй: Компани ТУЗ-ийн ээлжит хурлаараа энэ цэвэр ашгийн 30.62%-ийг ногдол ашиг болгон хуваарилахаар шийдсэн. Тэгэхээр нэгж хувьцаанд ногдох ногдол ашиг нь жилийн өмнөхөөс ₮7-өөр өсөж ₮15 болж байгаа бөгөөд өчигдрийн хаалтын үнээр тооцвол ногдол ашгийн өгөөж нь 9.8% байна. $LEND ногдол ашгаа тодорхой өдөр буюу 4 сарын 4-нд тараах аж. 

• 📌 Илүү их: Түүнчлэн “ЛэндМН ББСБ” ХК-ийн нийт хөрөнгийн дүн тайлант хугацаанд 89.1% өсөж ₮252.3 тэрбумд, татан төвлөрүүлсэн эх үүсвэр нь ч 84.3% нэмэгдэж ₮169.9 тэрбум болсноос цар хүрээ нь хэр тэлснийг харж болно. 

💪 Бизнесийн тэлэлт

Харж байгаачлан тэдний зээлийн багц нэлээд өсжээ. Учир нь тэдний бүртгэлтэй харилцагчдын тоо 10% өсөж 1.3 саяд хүрсэн байна. Хэдий тэдний зээлийн багц 89.6% өссөн ч үүнд эзлэх чанаргүй зээлийн хувь 0.2 нэгж хувиар л нэмэгдэж 4.3% болжээ. Түүнчлэн тус ББСБ-ын зээлийн багцын өсөлтөд бизнесийн зээлийн өсөлт чухал нөлөөтэй. 

• Тодруулбал, тэд 5 минутын дотор бизнесийн зээлийг дансандаа хүлээн авах "Flexi business" хэмээх үйлчилгээг нэвтрүүлснээр 35 мянган удаагийн олголтоор нийт ₮153 тэрбумын бизнесийн зээл олгосон байгаа юм. Үр дүнд нь нийт зээлийн багцын 23%-ийг бизнесийн зээл бүрдүүлж буй. Нийт бизнесийн зээлийн харилцагчдын 65% нь эмэгтэй гэж байгаа. 

👏 Зах зээлд ч амжилттай

$LEND-н IPO үнэ ₮25 байсан бол одоо ₮152.29 болж 6.1 дахин өссөн. Угаас өнгөрсөн онд л гэхэд тус хувьцаа 169.4% өсөж ТОП-уудын өсөлтийн 2-рт жагссан. Энэ ч утгаараа жижиг хувьцаа эзэмшигчдийн тоо нь ч тогтмол нэмэгдэж буй. Тэдний хувьцаа хөрөнгийн зах зээл  дээр амжилттай байгаад зогсохгүй компани ББЗЗ-д хаалттай хүрээнд 2 удаагийн нийт ₮20 тэрбумын бондыг татан төвлөрүүлжээ. Нэг ч гэсэн засаглал сайтай, IPO-нхөө араас амжилттай явж байгаа жишиг компани байгаад баярлах юм даа. 

 😖 Биднийг будилж байх зуур

Биднийг газрын ховор элементийн төслөө явуулна, явуулахгүй гээд жагсаж цуглаж байх хооронд энэ зах зээл дээр бөөн бужигнаан болж байна даа. 

🤨 Тусыг түүхий эдээр 

Америкийн Ерөнхийлөгч Дональд Трамп Украинд үзүүлсэн $300 тэрбум орчмын санхүүгийн дэмжлэгийнхээ хариуд тус улсаас газрын ховор элемент болон бусад нөөцийг нь импортлохыг хүсэж байгаагаа илэрхийлжээ. 

• 💭 Яагаад? Америк одоогоор нэг л газрын ховор элемент (ГХЭ)-ийн уурхайтай байгаа. Гэтэл уг элемент эрчим хүчний шилжилт, гар утас гэх мэтийн бүх дэвшилтэт технологи, цахилгаан автомашинд хүртэл ашиглагдаж байгаа чухал нөөц. Нөгөө талд газрын ховор элементийнх нь зах зээлийн овгор нь Хятад. Ингээд л асуудал тодорхой байгаа юм. 

• 📌 Товчхондоо: Тусалсныхаа хариуд ГХЭ нийлүүл гээд байгаа нь Хятадын хамаарлыг бууруулах гэж л тэр. Америк 2024 оны байдлаар газрын ховор элементийн хэрэгцээнийхээ 80%-ийг Хятад, Малайз, Япон, Эстони зэрэг улсаас хангаж байгаа тул үүнийгээ Украинаар төрөлжүүлэх гэж байгаа хэрэг. Угаас Украинд уран, лити, титан зэрэг ашигт малтмалын томоохон ордууд бий. 

• 🇨🇳 Хятадын давамгайлал: Америк Хятадаас холдох гээд байгаа нь Хятад ГХЭ-ийн талбарт хэт давамгай байгаа. Тус улс дэлхийн ховор металлын боловсруулалтын 85%-ийг дангаараа гүйцэтгэж байгаа гэхээр бусад улсууд Хятадаас хэт хамааралтай байгаа гэсэн үг. Тэд ч үүнийгээ мэдэрч энэ давуу талаа геополитикийн хэрэгсэл болгон ашиглах хандлагатай байдаг. 

🇲🇳 Монголын нөхцөл байдал

Манайх ойролцоогоор 6 ордын 3.1 сая тн-н нөөцтэй. Үүгээрээ дэлхийд эхний 15-д орно. Уг нь бол Засгийн газрын 2024-2028 онд баримтлах бодлогын 3.3.1.7-д “Газрын ховор элемент боловсруулах үйлдвэрийн төслүүдийг бодлогоор дэмжинэ” гэсэн байдаг. Гэтэл бодит байдал дээр ганц хайгуул хийж урагшилж байсан ГХЭ-ийн төслөө зогсоочихсон. 

Эцэст нь… Уг нь бол бүх улс л ГХЭ-ийн талбар дахь Хятадын хамаарлыг бууруулмаар байгаа. Ямар сайндаа Их Британи хүртэл манайхаас ГХЭ импортлох сонирхолтой байгаагаа илэрхийлэх вэ дээ. Бид яг энэ үеийг ашиглаж зөвхөн нүүрс, зэсийн олборлолтод тулгуурлах биш уул уурхайн салбарт шинэ төрлийн төслүүдийг хөгжүүлж, зах зээлийн трэндээсээ хоцормооргүй л байгаа юм даа. 

 💡 Таавар таацгаая. 

… нь банкнууд зээлэх, зээлдүүлэх, үнэт цаас авах, зарах гэх мэтээр хоорондоо хэлцэл хийж, богино хугацааны нөөцийн хэрэгцээгээ хангаж буй сүлжээг хэлнэ. Тэр юу вэ? Таасан бол хариултаа бидэнд илгээгээрэй. 😉

🍋 Пенсильванд 100 мянга буюу $40,000-ын дүн бүхий органик өндөг хулгайлагдав. Өнгөрсөн оны сүүлээр Америкт шувууны томуунаас үүдэн сая, сая тахиаг устгаж, өндөгний үнэ $4.1-т хүрч байв. Энэ нь 2023 онд түүхэн дээд буюу $4.8-т хүрч байснаас $0.7-р буурсан дүн юм. Юмны үнэ тэнгэрт хадвал өндөг дээрэмдэх нь энүүхэнд юм даа. 

🍋 Өмнөд Солонгос $23.4 тэрбумаар стратегийн аж үйлдвэрлэлийн сан байгуулна. Энэ нь одоогоор тус улсад хэрэгжиж буй чип үйлдвэрлэлийг дэмжих хөрөнгө оруулалтын хөтөлбөрөөс 2 дахин өндөр дүн юм. Улмаар тус сан нь Өмнөд Солонгосын Хөгжлийн Банканд харьяатайгаар EV, батарей үйлдвэрлэл, биотехнологийн салбарт хөнгөлөлттэй зээл олгох аж.

🍋 Нийслэл Skyral-тай хамтран их өгөгдөлд суурилсан загварчлалаар инженерийн болон нийтийн тээврийн төлөвлөлт хийнэ. Үүгээр трамвайны I шугамын өртөөний байршил болон түгжрэлийн хэмжээг бууруулах зорилгоор тойрог хурдны замын маршрутыг төлөвлөх нь. Цаашлаад гар утасны хөдөлгөөнд суурилан AI зорчих маршрутад дүгнэлт хийж, хамгийн боломжит загварчлалуудыг гаргаж өгөх юм гэнэ дээ. 

🍋 Австрали, Америк, Өмнөд Солонгос Deepseek-г төрийн албан тушаалтнууд хэрэглэхийг хориглолоо. Тэдний араас Ирланд, Франц ч тус платформыг тандаж байгаа сурагтай. Юутай ч Австрали Deepseek-г Хятад гаралтайд нь бус, үндэсний аюулгүй байдалдаа зовниж л хориглосон гэнэ. Гэтэл нөгөө талд OpenAI Өмнөд Солонгосын Kakao-тай хамтран тус улсын зах зээлд зориулсан AI бүтээгдэхүүн хөгжүүлэхээр умалзуулж яваа. 

• 🏘️ Ногоон орон сууцны төсөлд ажлын байр зарлажээ. (Ulaanbaatar)

• 🪜 Болгар, Румын 13 жил хүлээсний эцэст Шенгений бүсэд нэгдэв. (CNN) 

• 🚫 Өмнөд Солонгост онгоцны гар тээшний саванд зөөврийн цэнэглэгч авч явахыг хориглолоо. (Independent)

• 🛫 United Airlines 5 сарын 1-нээс 7 хоногт 3 удаа Монгол руу нислэг үйлдэнэ. (AeroRoutes)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ