🐲 Хятадын 6 бяцхан луу

POWERED BY

3-р сарын сүүлийн өдрийн мэнд! Саяхан л 2025 он гарч байсан юм сан. Эхний 3 сар нь нүд ирмэхийн зуур өнгөрлөө. Ялангуяа 3-р сар бууз, цэцэг гэсээр дуусав. Үлдсэн сарууддаа идэвх чармайлттай, бүтээмжтэй байхгүй бол горьгүй нь ээ. 💪🍋   

MSE: УУББ дээр анх удаа нүүрсийг индексжүүлсэн үнээр арилжлаа. Тодруулбал, “Эрдэнэс Тавантолгой” ХК-ийн 768 тн коксжих нүүрс арилжигдав. 

FRC: Монголын 6 хамтын хөрөнгө оруулалтын сан, 1 хувийн хөрөнгө оруулалтын сан 2025 оны хөрөнгө оруулалтын сангийн нэгж эрх эзэмшигчдийн ээлжит хурал 4 сарын 20-30-ны өдрүүдэд болно.

BOM: Баасан гаргийн байдлаар Монголбанкны гр алт авах үнэ жилийн өмнөхөөсөө 44% өсөж ₮342 мянга, мөнгөнийх 47.3% өсөж ₮3.6 мянга болжээ.

🔥 8 дахь жилийн хурал

ЛэндМН ББСБ ХК (LEND) өнгөрсөн Бямба гарагт 8 дахь жилдээ хувьцаа эзэмшигчдийн хурлаа зохион байгууллаа. Компани юу танилцуулав? 

🤝 8.6 мянган хүний итгэл

Өнгөрсөн жилийн $LEND-н хувьцаа эзэмшигчдийн хурлын үеэр жижиг хувьцаа эзэмшигчдийнх нь тоо 7.5 мянга байсан бол жилийн дотор 1.1 мянгаар нэмэгджээ. Харин хувьцаа эзэмшигчдийн хуралд нийт саналын эрхтэй хувьцаа эзэмшигчдийн 81.64% нь оролцож, 6 асуудлыг хэлэлцэж, шийдвэрлэв. 

📈 2024 он: Өсөлт үргэлжилсээр

Хурлаар танилцуулсан үр дүнг хуваалцахад, компанийн гэрээт харилцагчдын тоо өмнөх жилээс 9%, цэвэр ашиг 82%, татан төвлөрүүлсэн эх үүсвэр 84%, зээлийн багц 90% тус тус өссөн аж. Нэмээд тэдний нийт хөрөнгө тайлант онд 89.1% өсөж ₮252.4 тэрбумд хүрсэн нь нээлттэй ББСБ-ууд дундаа хамгийн өндөр өсөлт.

• 💪 Хамгийн өсөлттэй хувьцаа: $LEND-н санхүү, үйл ажиллагааны үзүүлэлт сайн байхын сацуу IPO хийсэн цагаасаа хойш хувьцааны үнэ нь байнга өсөж байгаа. 2024 онд л гэхэд 183.5% өссөн. Ийм өсөлттэй ББСБ-ын болоод өөр санхүү, банкны хувьцаа одоогоор байхгүй байна даа.

• 💰 Ногдол ашиг: ЛэндМН ББСБ ХК нь 2024 оны цэвэр ашгийнхаа 30.62% буюу ₮11.1 тэрбумыг ногдол ашиг хэлбэрээр тараахаар шийдвэрлэсэн. Ингэснээр нэгж хувьцаанд ₮15 ногдох бөгөөд өгөөжийг нь 2024 оны хувьцааны дундаж үнээр бодвол 13.6%. Бараг хадгаламжийн хүүгийн өгөөжтэй дүйнэ. 

• 📆 Тов тодорхой: Хамгийн чухал нь компани сүүлийн жилүүдэд ногдол ашгийн төлөлтийн өдрөө тодорхой зарлаж байгаа. Хурлын үеэр ч энэ жил 4 сарын 4-ний өдөр ҮЦТХТ-өөр дамжуулж тараахаа мэдэгдэв. Энэ нь хувьцаа эзэмшигчдэд хөрөнгөө зөв хуваарилах, тооцоололтойгоор хөрөнгө оруулах боломжийг олгож буй. 

🅰 Үйл ажиллагаа: Онц

Түүнчлэн компани 2024 онд бичил, ЖДБ эрхлэгчдэд зориулсан барьцаагүй, 100% дижитал бизнесийн бүтээгдэхүүнийг нэвтрүүлсэн. Үүгээрээ тэд олон улсад үнэлэгдэж Сингапурын Төв Банк & Сингапурын Финтек Холбооноос зохион байгуулдаг Fintech Excellence Awards-н “Financial Inclusivity” төрөлд эцсийн шатанд шалгарсан аж. 

Эцэст нь… $LEND-г салбартаа болон хөрөнгийн зах зээлд үлгэр жишээ ажиллаж байгаатай маргах хүн ховор биз ээ. Тэд энэ онд ч эдийн засгийн өсөлтийг хурдасгах, бизнес эрхлэлтийг дэмжих, санхүүгийн хүртээмжийг нэмэгдүүлэхэд чиглэж ажиллах нь ээ. 

♻️ MCS Coca-Cola 3R Booth

MCS Coca-Cola өнөөдрөөс эхлэн Тогтвортой хөгжлийн тайлангаа анх удаа биетээр буюу “MCS Coca-Cola 3R Booth”-р танилцуулна. 📢

• MCS Coca-Cola 3R Booth-р зочилсноор 3R концепцийн танилцуулгууд, хуванцар дахин боловсруулж хийсэн (rPET) үзүүлэнтэй танилцах нь. Цаашлаад ундааны бөглөөгөөр хийсэн ширээ сандалд сууж canvas дээр бүтээл хийж үзэх, Plinko тоглоом тоглож rPET бүтээгдэхүүний бэлэг хожих гэхчлэн хэсэгхэн хугацааг сонирхолтой, өгөөжтэй байдлаар өнгөрөөх нь ээ.

Мартсанаас, ангилж цуглуулсан хуванцраа аваад очоорой. Авчирсан тоогоор rPET бүтээгдэхүүний бэлэгтэй шүү.

📍 Хаана: Шангри-Ла төвийн I давхарт
🗓️ Хэзээ: 4 сарын 4 хүртэл

🐲 Хятадын 6 бяцхан луу

Alibaba (BABA) болон Tencent (TCEHY)-н залгамж халаа, магад тэднийг даван гарах дараагийн үеийн технологийн салбарын бяцхан луу нар Ханжоу мужид өдөр өдрөөр бойжиж байна. 

• Америкийн технологийн 7 титаныг “Гайхамшигт 7” гэдэг шиг зах зээлийг доргиож буй тэдгээр компаниудыг "6 бяцхан луу" хэмээн нэрийддэг аж. 

🤔 Тэд хэн билээ? 

Уг 6 компани дотор өнгөрсөн 1-р сард дэлхий дахиныг донсолгож, Цахиурын хөндийг улаанаар нь эргэлдүүлсэн DeepSeek AI, видео тоглоом хөгжүүлэгч Game Science, Unitree болон DeepRobotics роботын компаниуд, Neuralink-н өрсөлдөгч BrainCo, орон зайн тагнуулын ManyCore компаниуд багтаж буй. 

• ⭐ Тэдэн дундаас зах зээлийн үнэлгээ, олон улсын зах зээл дэх нэр хүндээрээ DeepSeek AI хамгийн алдартай нь. Ямар сайндаа дуулиан шуугиан тарьсан DeepSeek-R1 хэлний загвараа танилцуулснаас 7 хоногийн дотор Microsoft (MSFT), Nvidia (NVDA), Alibaba, Huawei, Tencent, Baidu (BIDU) тэргүүтэй томчууд бүгд DeepSeek-тэй хамтран ажиллахаар болж буйгаа зарлаж байх вэ. 

Бусад 5 луугийн хувьд Хятадаас бусад оронд төдийлөн сайн танигдаагүй. Гэсэн ч дотооддоо хийж, бүтээсэн ажлууд нь галзуу. Тухайлбал, Unitree гэхэд 4 хөлт болон хүн дүрст роботын чиглэлд мэргэшсэн компани бөгөөд өнгөрсөн Хятадын хаврын баярын гала тоглолт дээр ардын бүжиг бүжиглэсэн нь анхаарлыг нэлээдгүй татав.

• 💡 Цаашлаад, BrainCo гэхэд Илон Маскийн Neuralink-н дараагаар бичигдэх $200 саяын санхүүжилт татсан дэлхийн 2 дахь тархи болон компьютер хоорондын интерфэйс хөгжүүлж буй компани бол Manycore Tech сард дунджаар 77.8 сая идэвхтэй хэрэглэгчтэй, дэлхийн хамгийн том интерактив 3D өгөгдлийн чадавхтай компани аж.   

😲 Дараагийн Цахиурын хөндий Ханжоу 

Сонирхолтой давхцал нь тэд бүгд Ханжоу мужаас төрөн гарсан компаниуд. Энэ нь зүгээр ч нэг давхцал биш бөгөөд хятадууд өөрсдөө ч Ханжоу муж бусдаас юугаараа онцгой болоод дэвшилтэт технологийн амжилттай компаниудыг бойжуулж байгаа талаар таамаг дэвшүүлэх болжээ. Товчоор бол тус муж нь инновацад ээлтэй, бусад мужтайгаа харьцуулахад төрийн дарамт шахалт, хүнд суртал багатай байдаг аж. 

Эцэст нь… Урд зүгийнхний хөгжил ч гүйцэгдэхгүй болж байна даа. Барууны орнууд шиг нээлттэй мэдээлдэггүй болохоор дотооддоо ямар галзуу технологи хөгжүүлж, хэр түвшинд явж байгааг нь таамаглахад ч бэрх юм.  

1,500 гаруй эрдэмтэн судлаачдын төлөөлөлтэйгөөр боловсруулсан гэгдээд буй  “Алсын хараа-2050” хэрэгжиж эхлээд 5 жилийн нүүрийг үзэх гэж байна. Үүнийг угтан гаргасан үр дүнгээ танилцуулжээ. Цухасхан сонирхъё. 

• Үндэсний нэгдмэл үнэт зүйл зорилтын хүрээнд: Зөөлөн хүчний бодлогын индекс 14 байраар урагшилж, 

• Амьдралын чанар ба дундаж давхарга зорилтын хүрээнд: Төрийн өмчит уул уурхайн компаниудаас ₮495.6 тэрбумыг Хуримтлалын санд төвлөрүүлж 5,000 орчим иргэний ипотекийн зээлийг санхүүжүүлсэн байна.

🍋 Stora Хятадын ТОП худалдааны платформуудын нэг JD.com (JD)-г албан ёсны эрхтэйгээр Монголд нэвтрүүлжээ. Онцолбол, $JD нь өнгөрсөн оны байдлаар “Fortune Global 500”-д 5 байр ахиж 47-д, тэдний араас Хятад дахь өрсөлдөгчдөөс нь Alibaba (BABA) 70-т жагсаж буй. Харин Хятадын онлайн худалдааны зах зээлийн 27.2%-ийг баздаг аж. 

🍋 Bank of America (BAC)-д ирүүлсэн ипотекийн зээлийн хүсэлтийн тоо энэ оны I улиралд 80% өсөв. Тодруулбал, Америкийн 10 жилийн хугацаатай бондын өгөөж 2023 оны 6-р сараас хойш анх удаа хамгийн бага түвшинд буюу 3.6%-д хүрснээр 30 жилийн ипотекийн зээлийн хүүг өнгөрсөн 10-р сарын эхээр 7%-6.1% болгон бууруулсан нь нөлөөлж. Энэ далимаар UWM Holdings (UWMC) $28-$35 тэрбумын ипотекийн зээл гаргахаар болжээ.

🍋 БГД-ийн 20-р хороонд 340 Гкал дулаан, 300 МВт цахилгаан үйлдвэрлэх хүчин чадалтай ТЭЦ-5 ДЦС барина. Хүчин чадлын хэмжээ нь 5 шар, 21-р хороолол, Хилчин хотхон, Баянхошуу, 3, 4-р хороолол, 1-р хорооллыг дулаанаар хангах дайтай. Ямар өртгөөр, хэзээ баригдах нь тодорхой болоогүй ч ашиглалтад орсноор агаарын бохирдол буурч, утаанд агуулагдах хорт хийн 99% шүүгдэж, тог тасардаггүй болох юм байна.

🍋 IFRC болон CIDCA хамтран Монголын уур амьсгалын эрсдэлийг бууруулна. Энэ хүрээнд тэд 2 жилийн хугацаанд Монголын уур амьсгалын өөрчлөлтийн өндөр эрсдэлтэй 4 аймагт эрт сэрэмжлүүлэх, арга хэмжээ авах тогтолцоо байгуулах, малын уур амьсгалын гамшгийг даван туулах чадварыг нэмэгдүүлэх, иргэдийн орлогыг төрөлжүүлэх сургалт явуулах тэргүүтэй 20 мянган иргэдийн амьдралд нөлөөлөх ажлуудыг хийх нь.

• 🏖️ Google Maps-д Скрийншотоо оруулаад аяллаа төлөвлө. (TheVerge)

• ✈️ Оюутнууд зуны амралтаараа Истанбулд судалгаа, шинжилгээ хийх боломж. (БоловсролынЯам)

• 📞 iPhone автоматаар WhatsApp-р дуудлага, мессеж ирэх тохиргоотой болжээ. (MacRumors)

• 💡 AI ашиглан хэрэглэгчдийн тоогоо тэлэх боломжтой юу? (HBR)

• Даваа: Сэндли ББСБ ХК болон Хөнгөн бетон ХК-ийн хувьцаа эзэмшигчдийн ээлжит хурал болно. 

• Мягмар: Оросын өнгөрсөн сарын ДНБ-ий үзүүлэлт танилцуулагдана. 

• Лхагва: Үргэлжлээд Америк гадаад худалдааны үзүүлэлтээ танилцуулна. 

• Пүрэв: Богд Банк хаалттай ХК мөн хувьцаа эзэмшигчдийн ээлжит хурлаа хийх юм байна. 

• Баасан: Монголбанк төлбөрийн тэнцлийн сарын статистикаа танилцуулна.

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ