💰 Амттай бонд

POWERED BY

Өглөөний мэнд ээ! Бид хэд өмнө нь Stories гээд цуврал хийдэг байсныг санаж байна уу? “Хөрөнгө оруулалтын сангаас хэрхэн ашиг хүртэх вэ” гээд нэг дугаар хийж байж. Өглөөний кофегоо уунгаа ЭНД дарж үзээрэй. 🍋

MSE: Говь ХК (GOV), МИК Холдинг ХК (MIK) болон Евроазиа Капитал Холдинг ХК (SUN) ногдол ашиг тараахгүй байх шийдвэр гаргалаа. 

NSO: Төлбөрийн тэнцлийн урсгал данс 2024 оны урьдчилсан  гүйцэтгэлээр  $2.4 тэрбумын алдагдал хүлээв. 

CUS: Энэ оны эхний 1 сарын гадаад худалдааны тэнцэл $46 саяын ашигтай гарлаа.

💰 Бондын хөрөнгө оруулалт

Хөрөнгө оруулагчид маань сүүлийн үед ямар бүтээгдэхүүн сонирхож байна даа? Өнөөдөр бондын хөрөнгө оруулалтын ямар боломж байгааг хүргэе. 

📃 Онцлог зүйл нь юу вэ?

Өнгөрсөн сард ГВУН өмнөх сараасаа 11.24% буурч $4.9 тэрбум болсон. Нэмээд өнгөрсөн оны 6-р сард 5.1% байсан инфляц 9% болж өсөөд байгаа. Өөрөөр хэлбэл, эдийн засгийн гадаад орчин тогтворгүй, инфляц өндөр хэлбэлзэж буй үед бондод хөрөнгө оруулах нь эрсдэл багатай, тогтмол өгөөжтэй хөрөнгө оруулалтын сонголт болдог. Тэгвэл бондын хөрөнгө оруулалтын ямар сонголт байна вэ? 

• 🏛️ Засгийн газрын бонд: Одоогоор ЗГ-ын 4 идэвхтэй бонд байгаа. Хугацаа нь 2026 оны 4-р сараас 2031 оны 7-р сард дуусахаар байгаа юм. Уг 4 бондоос “Монгол 31” бондын өгөөж хамгийн өндөр буюу 6.82% байгаа аж. Гэхдээ ЗГ дахин бонд гаргаж энэ бондуудыг хаах талаар яригдаж буй. 

• 📬 Нээлттэй бондууд: ЗГ-ын бондоос гадна МХБ (MSE) дээр нээлттэй байгаа 10 бонд бий. Үүнээс 7 нь ₮-ийн бонд бөгөөд жилийн дундаж хүү нь 17.5% байна. Харин ТЖТБ ХХК буюу "TML Plastic" үйлдвэрийн $-ын ногоон бондын хүү 10% байгаа юм. 

• 💵 ОУ-ын бондууд: Сүүлийн үед Монголын томоохон компаниуд ОУ-ын зах зээл дээр $-ын бонд гаргах тохиолдол нэмэгдсэн. Голомт банк (GLMT)-ны бондын купон 11% байгаа бол бодит хүлээгдэж буй өгөөж нь 8.22% байгаа юм. 

🤔 Хэнд хандах вэ?

Бондод хөрөнгө оруулахаар сонирхож байгаа хүмүүс ББЗЗ дээрх боломжийг ч судалж үзэх нь зүй. 2022 оноос хойш уг зах зээлд ₮3.1 их наядын бонд бүртгэгдсэнээс 2024 оны байдлаар ₮1.5 их наядын бондын андеррайтерыг Голомт Капитал ҮЦК дангаар хийжээ. Угаас МХБ дээр 52 ҮЦК бүртгэлтэй байгаа ч энэ дундаас Голомт Капитал болон Өлзий энд Ко капитал зэрэг ҮЦК-иуд бондын арилжааг түлхүү хийдэг билээ. 

Эцэст нь… Энэхүү нийтлэлийг ямар нэгэн байдлаар хөрөнгө оруулалтын дохио өгөх биш мэдээлэл хүргэх зорилгоор бичлээ. Хөрөнгө оруулах шийдвэрээ сайн судлаарай лимонууд минь.

 🧳 2 сая жуулчинтай Монгол

Энэ 7 хоногт Аялал жуулчлалын 7 хоног тохиож байгаа. Монгол энэ онд 1 сая жуулчин, 2030 онд 2 сая жуулчин хүлээн авах зорилтоо биелүүлэхийн тулд юу хийх билээ? 

🛖📍 Бүсчилж хөгжүүлнэ

Цар тахлын дараа буюу 2023, 2024 онуудад Монголыг зорих жуулчдын тоо урьд хожид байгаагүйгээрээ нэмэгдэж, 651 мянган болон 808.9 мянгад хүрсэн. Улмаар аялал жуулчлалын салбарын орлого 2023 онд анх удаа $1 тэрбумыг давж байсан бол өнгөрсөн жил $1.6 тэрбумыг олсон байдаг. 

Бодит байдал 🆚 Мөрөөдөл

Харин 2030 он гэхэд уг үзүүлэлтийг 2.5 дахин өсгөж 2 сая жуулчин татахын тулд аялал жуулчлалыг төвийн, хойд, өмнө, баруун, зүүн гэхчлэн бүсчилж хөгжүүлэх аж. Цаашлаад, гагц зуны 3 сард хамаг жуулчдаа хүлээн авах бус бусад улиралдаа нэн ялангуяа жуулчид хамгийн бага ирдэг өвлийн аялал жуулчлалыг хөгжүүлнэ. Зорилт нэг иймэрхүү. Одоо бодит байдлаа харъя.

Өнгөрсөн жилийн байдлаар Монгол дэлхийн аялал жуулчлалын хөгжлийн индексэд 119 орноос 85-рт буюу сүүл мушгиж яваа. Бидний хамгийн их оноо алдсан үзүүлэлт нь амралт зугаалгын бус зорилготой аялал жуулчлал, цаашлаад агаар болон газрын дэд бүтцийн сул хөгжил. Өөрөөр бол Монголд жуулчид аялах гэж зорьж л ирэхгүй бол сурах, ажлын шугамаар гэхчлэн өөр зорилгоор ирэхгүй гэсэн үг.

• 🏂 Юутай ч аялах гээд зориод ирж буй жуулчдадаа тархаан татах буюу өвлийн аялал жуулчлалыг нэмэгдүүлэх нь чухал. Гэхдээ бид өвөл “Хөх сувд”, "Улаанбаатар” өвлийн наадмуудыг л зохион байгуулж байна. 

• 🐼 Харин урд хөрш маань өвөлдөө хэдэн саяар нь жуулчин татаад сурчихсан. Өнгөрсөн жилд л гэхэд Харбины мөсний баярын үеэр 600,000 м² талбайг хамарсан мөсөн хотыг сүндэрлүүлж 179 сая жуулчид хүлээн авснаар $33 тэрбум орчим орлого олж байв. Үлгэрийн юм шиг мөсөн хотыг барьчихаар зорьж очихгүй гээд ч яах билээ? 

Эцэст нь… Одоогоос 11 жилийн өмнөхтэй харьцуулахад аялал жуулчлалын салбарын ДНБ дэх өсөлт 4 нэгж хувиар өсөж 7.2%-д хүрээд байна. Салбарын орлогыг 2030 он гэхэд $8 тэрбумд хүргэхийн тулд 1 аялагчийн Монголд зарцуулах дүнг 2 дахин буюу $4,000-д хүргэнэ л гээд байгаа. Гэхдээ хэдий болтол онгон дагшин байгалиараа л нүүрээ тахлах вэ? Монголд мөнгөө үрье гээд ирсэн жуулчдад үзүүлэх үйлчилгээ, худалдах бүтээгдэхүүнээ төрөлжүүлэхгүй бол тэдний мөнгө халаасандаа л үлдэнэ шүү дээ. 

Бяцхан кейс задлан. 💡

• Асуудал: … компани гэрийн тэжээвэр амьтдын хоол хүнс борлуулахаас гадна хэд хэдэн өдөр өнжүүлэх ажиллуулдаг. Тэдний бүтээгдэхүүнүүд хэдийн байнгын хэрэглэгчидтэй болсон ч, өдөр өнжүүлэх нь төдийлөн хэрэглэгчдээ тогтооход бэрх байв. 

• Шийдэл: Компани Cross-Selling стратеги баримталж өдөр өнжүүлэх байрууд дээрээ бүтээгдэхүүнүүдээ байршуулав. Түүнчлэн амьтдын тоглоомыг илүү өнгөлөг болгон төрөлжүүлж, шагналын сантай тэмцээн ч тогтмол зохион байгуулах болов. 

Тус компанийн баримталсан стратеги бизнесийн хөгжилд нь хэр өгөөжөө өгөх бол? Санал, бодлоо хуваалцаарай! 😉

🍋 Eli Lilly (LLY) $6.5 тэрбумын бонд гаргаж 38%-иар нь Scorpion Therapeutics-с хорт хавдрын эм худалдаж авна. Тус бонд нь хамгийн уртдаа 40 жилийн хугацаанд эргэн төлөгдөх 6 хэсгээс бүрдэх бөгөөд Америкийн ЗГ-н бондуудын хүүгээс өндөр буюу 2.05% хүүтэй байх юм. Сонирхуулахад, өнөө STX-478 хорт хавдрын эм нь бүх төрлийн хорт хавдрын 14%-д гардаг гений өсөлтийг дарангуйлдаг гэнэ. 

🍋 СЕХ нээлттэй засгийн түншлэлийн улс төрийн намын санхүүжилтийн ил тод байдлыг хангах сорилтод нэгдэв. Тус сорилтод нэгдсэнээр СЕХ 2027 он хүртэл намуудын санхүүгийн тайланг цахим хэлбэрээр хүлээн авч, тэдгээрийн орлого, зарлага тэргүүтэй мэдээллийг олон нийтэд ил тод мэдээлэх платформыг хөгжүүлэх аж. Түүнчлэн СЕХ-ны 8 ажилтан аудитын тайлан хянах сургалтад хамрагдах нь. 

🍋 Tesla (TSLA)-н хувьцааны үнэ өнгөрсөн 12-р сараас хойш 27% буурч $350 болов. Үүнд тэдний Герман дахь борлуулалт 59% буурч, 2021 оноос хойших хамгийн доод түвшинд хүрсэн бол Хятадад өмнөх оны мөн үетэй харьцуулахад 11.5% буурсан нь голлон нөлөөлж. Харин нийт хөрөнгийнх нь 60%-ийг Tesla-н хувьцаа бүрдүүлдэг Илон Маскын хөрөнгө ойролцоогоор 10% буурч $397.4 тэрбум болжээ. 

🍋 Монгол Улс Tier IV түвшний стандарт шаардлага хангасан ногоон дата төв байгуулна. Улмаар төвөөс гарах ашиглагдахгүй дулааныг дулаан дамжуулагчаар төвлөрсөн дулааны шугам сүлжээнд нийлүүлэн дулааны тогтвортой байдлыг хангах нь. Цаашлаад их өгөгдлийг найдвартай хадгалах боломжтой болсноор ОУ-ын ТОП технологийн компаниудын бүтээгдэхүүнүүдийг Монголд байршуулах боломж бүрдэх аж.  

•  🏴 OpenAI-н удирдлагыг $97.4 тэрбумаар авах Илон Маскын саналд Сэм Альтман егөөтэй хариу барив. (NYT)

• 🫅 Америкийн хөрөнгийн зах зээлийн 80%-ийг 55-аас дээш насныхан эзэмшдэг гэнэ. (Nasdaq)

• 📢 Монголбанк үл хөдлөх хөрөнгийн нээлттэй дуудлага худалдаа зарлажээ. (MongolBank)

• 🚨 Дэлхийн гол цөмийн хэлбэр гажиж, соронзон орны үйл ажиллагаа алдагдах нөхцөл үүссэн үү? (BBC)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ