🗣️ Чөтгөрийн шивнээ

POWERED BY

Шинэ 7 хоногийн мэнд! НӨАТ-ын буцаан олголтоо аваад удаагүй байтал худалдан авалтын үнийн дүнгээс хамаарч шатлалтай олгох талаар яриад эхэлжээ. Татварын хуулиудад орох өөрчлөлтүүдийг анхаарч харахгүй бол ч… 🤔 

BDS: БиДиСек ҮЦК ХК (BDS) Сингапурт салбартай болно. 

MNG: Улаанбаатарын камерын хяналтад АI технологи нэвтрүүлжээ. 

OTC: Өнгөрсөн 7 хоногт биржийн бус зах зээлд ₮78.8 тэрбумын болон $500 мянгын арилжаа хийгдэв. Нийт төгрөгийн арилжааны 35.9%-ийг анхдагч зах зээлийн арилжаа бүрдүүлэв.

 🔥 М банкны гал гаргасан жил

Бид арилжааны банкнуудын тайланг ээлж дараатайгаар хүргэж байгаа билээ. Энэ удаад салбар дундаа хамгийн залуу банк болох М банкны үр дүнг хүргэе. Тэдний нийт хөрөнгийн хэмжээ ₮1.7 их наяд болсон шүү. Юу болоод байна вэ?

🚀 Бүх үзүүлэлт үржигдэв

М банкны бүх санхүүгийн үзүүлэлт 2024 онд маш сайн өсжээ. Нийт хөрөнгийн хэмжээ нь л гэхэд жилийн өмнөхөөсөө 2.7 дахин, 2022 оныхоос 7.1 дахин нэмэгдсэн байгаа юм. Цаашлаад, харилцах хадгаламжийн хэмжээ нь нийлбэр дүнгээрээ 2022 оныхоосоо 14.6 дахин өсөж ₮1 их наядыг давсан байна. Үүний хүрээнд мэдээж нийт олгосон зээл нь ч 8.9 дахин пуужиндаж ₮829.6 тэрбумд хүрчээ. Гэхдээ чанаргүй зээлийн цэвэр зээлд эзлэх хувь нь 1.2 нэгжээр буурч 2.7% болжээ. 

• 🫨 Яаж вэ? Тэд Монголын анхны дижитал банк гэдэг брэндингийн дор үүсгэн байгуулагдаад 2 жил 3 сарын нүүрийг л үзэж буй. Жижиглэнгийн (retail) банкны чиглэлд төвлөрч буй тэд гаднын томоохон банкнуудын жишгээр харилцагчийн суурь баазыг бий болгоход түлхүү анхаарч шинэлэг урамшуулал, шинэ бүтээгдэхүүн санал болгож байгаа. 

• Өндөр зардал ➡️ Алдагдал: Тэд энэ хэмжээний эх үүсвэр, харилцагчдыг татахын тулд их хэмжээний маркетинг, урамшууллын зардал гаргаж буй. Нэмээд дижитал банк гэдэг утгаараа IT-н зардал ч мундахгүйгээс гадна M loyalty хөтөлбөрийн хүрээнд олгосон урамшуулал нь ₮2 тэрбумд хүрсэн гэхээр яалт ч үгүй өндөр зардал гаргажээ. Улмаар тэд 2024 онд ₮7.7 тэрбумын алдагдал хүлээсэн. 

• 🤑 Ашиг руу: Өөрөөр хэлбэл, М банкны алдагдал 2022 оныхоос ₮2 тэрбумаар буурсан ч 2023 оныхоос ₮4.9 тэрбумаар өссөн хэрэг. Гэхдээ тэд их хэмжээний зардал гаргасны эцэст цар хүрээгээ тэлснээр 2024 оны 12-р сард сарын үзүүлэлтээр ашигтай гарч эхэлсэн аж. Тэгэхээр тэдний энэ оны I улирлын тайлан ногоон өнгөтэй гарах нь дээ. 

Эцэст нь… 2024 он бол банкны салбарын шинэ тоглогчийн хувьд тэлэлтийн жил байжээ. 2 жил гаруйн хугацаанд 460 мянган харилцагчтай, ₮1.7 их наядын нийт хөрөнгөтэй болно гэдэг бол чамгүй үзүүлэлт. Заа тэгээд I улиралд анхны ашигтай тайлангаар уулзах нь дээ. 

🗣️ Чөтгөрийн шивнээ

Одоогоос 1 жил 5 сарын өмнө Nike (NKE)-н түүхэн дэх хамгийн хар өдөр тохиож 1 өдрийн дотор зах зээлийн үнэлгээ нь 32% буюу $28 тэрбумаар буурч байв. Энэ нь буруу бодлого хэрэгжүүлснээс болж борлуулалт нь буурсантай холбоотой. 

Үйл явдлын өрнөл

2020 онд зөвлөх үйлчилгээний тэргүүлэгч компани Bain & Company-д 23 жил ажилласан Жон Донахо Nike-н CEO-р томилогдож компанид борлуулалтын тоо, статистикт тулгуурласан бодлогуудыг хэрэгжүүлж эхэлсэн байдаг. 

• ☝️ Тухайлбал, уламжлалт бүтээгдэхүүний төрлөө гүйлт, сагсан бөмбөг, хөлбөмбөг гэх ерөнхий ангиллаас эрэгтэй, эмэгтэй, хүүдийн буюу нас, хүйсээр нь ангилж, бүтээгдэхүүнээ нэрийн дэлгүүрүүдээр бус вэбсайтаас шууд захиалах маркетингийг хүчтэй хэрэгжүүлж байв. 

• ❗ Уг бодлого цар тахалтай давхацсан гэх утгаараа байгаа сайн онож борлуулалт нь ч өсөж байв. Гол нь нөгөө талд тэд урт хугацааны түнш Macy’s, Foot Locker-той хамтрахаа больж, тус дэлгүүрүүдийн тавиурт Nike-н бүтээгдэхүүн бус өрсөлдөгчдийнх нь бүтээгдэхүүн харагдах болов.

Тус бодлого дан ганц өрсөлдөгчдөдөө байраа тавьж өгснөөс гадна бүтээгдэхүүний хүртээмжид ч нөлөөлсөн гэдэг. 

🤔 Сургамж 

Гэсэн ч эдгээрээс илүү Жон Донахогийн хамгийн том алдаа нь брэнд болон хэрэглэгчийн хоорондох сэтгэлзүйн холбоог үл тоосон явдал. Өөрөөр бол Nike-н хэрэглэгчдэдээ өгдөг боломжгүйг боломжтой болгох урам зоригийг дутуу үнэлсэн хэрэг. 

• 👈 Эргэн санавал, Nike-г хэрэглэдэг ч бай, үгүй ч бай хүн бүрийн толгойд “Just do it” гэх уриа үг нь хадаатай байдаг. Ердөө энэ гуравхан үг компанийн орлогыг 3 жилийн дотор $877 тэрбумаас $9 тэрбум болгохын сацуу дэлхийн алдартай брэнд болгосон түүхтэй. Анхнаасаа ингэж танигдсан брэндийн борлуулалтыг тоонд тулгуурлаж өсгөнө гэдэг амаргүй даваа. 

• 🌚 Алдаа л биз! Засчихъя: Улмаар Nike алдаагаа ухаарч, тус брэндийг 32 жил босголцсон Эллиот Хиллийг CEO томилж, өнгөрсөн Парисын олимпын үеэр “Winning Isn’t for Everyone | Am I a Bad Person” компанит ажлыг амжилттай хэрэгжүүлэв.  

Үүнээс харахад, спорт брэндийн хэрэглэгчдэд өмсөж хувцас нь бус тус хувцсыг өмсөх зорилго нь илүү чухал байдаг бололтой. Яг үнэндээ бэлтгэлийн заал руу Nike-н пүүз биш “Just Do It” гэх уриа үг нь л хөтлөөд байгаа шүү дээ. Энэ бол зах зээлийн ширүүн өрсөлдөөнд брэндүүд хэрэглэгчтэйгээ яагаад сэтгэлзүйн холбоо тогтоох ёстой, түүнийгээ усалж, тордоод хадгалах ёстойг харуулсан жишээ юм уу даа. 

Харилцаа холбоо, мэдээллийн технологийн салбарт 27 мянга гаруй ажиллах хүчний эрэлт тулгарчээ. Энэ дундаа хиймэл оюун ухаан, өгөгдөл, дрон болон кибер аюулгүй байдлын мэргэжилтнүүд хамгийн эрэлттэй байгаа аж. Нөхцөл байдалтай дэлгэрэнгүй танилцах уу?

• 🫂 1 хүнтэй компани юм уу? Өдгөө тус салбарын 12,754 компанид нийт 12 мянга гаруй хүн ажилладаг гэнэ.

• 🍰 Энтертайнмент давуу: Үүний 23% нь үүрэн холбоо, 15% нь мэдээлэл холбооны сүлжээ, 10% нь кабель шугам, цамхаг угсралтын салбарт ажилладаг бол үлдсэн нь 52% нь өргөн нэвтрүүлгийн телевиз, олон суваг дамжуулах үйлчилгээ, шуудангийн сүлжээ үйлчилгээгээр ажилладаг аж.

🫂 Өмнөд Солонгос дахь нөмөр түшиг

Өмнөд Солонгос дахь Монголчууддаа таатай мэдээтэй! Тус улсын Стратеги, Сангийн яамны албан ёсны зөвшөөрөлтэй үйл ажиллагаа явуулдаг GME Finance-с ₩2 саяас ₩20 сая хүртэл дүнгээр зээл авч болох нь ээ. 📢

• ☝️ 1 нөхцөлтэй: Тодруулбал, Өмнөд Солонгост албан ёсоор ажилладаг E-9, E-10, E-7, E-1, E-3, F-2, F-5, F-6, F-4 ангиллын визтэй бол визний хугацаа болон цалингийн дундажтай уялдуулсан дүнгээр жилийн 20%, сарын 1.6%-ийн хүүтэй зээл авч болох нь.

• 🫷 Гэхдээ: Зээлээ урьдчилж төлөөд богино хугацаанд хаавал тэр хэмжээгээрээ хүү нь бага тооцогдох аж.

• 🫴 Санаа зоволтгүй: Визний хугацаа нь бага үлдсэн жил бүр сунгагддаг E-7, F-2, F-6 ангиллын, мөн 1 жил 10 сарын сунгалтаа хийлгэж амжаагүй Е-9 ангиллын визтэй бол сунгалтаа хийлгээд зээлийн хүсэлтээ гаргах боломжтой юм байна шүү.

📞 Холбогдох: 010-3384-6864: 1811-2946~2 эсвэл ЭНД дарж онлайнаар тэндхийн аль ч хотоос зээлийн хүсэлтээ илгээгээрэй.

🍋 OpenAI $40 тэрбумын санхүүжилт босгож $340 тэрбумын үнэлгээтэй болохоор хэлэлцэж байна. Өнгөрсөн 10 жилд OpenAI нийт 50 хөрөнгө оруулагчдаас 10 үе шатаар $17.9 тэрбумын санхүүжилт босгож $157 тэрбумын зах зээлийн үнэлгээтэй болоод буй. Тэгвэл уг санхүүжилтийн 36%-63%-ийг Softbank (SFTBY) тэргүүлэх төлөвтэй байгаа аж.

🍋 “Оюу толгой” ХХК өнгөрсөн оны IV улиралд Монгол Улсад нийт ₮1.7 их наядыг зарцуулжээ. Үүний 74% нь дотоодын ААН, бусад байгууллагуудад төлсөн төлбөр, 19% нь улс, орон нутгийн төсөвт шууд төлсөн төлбөрүүд, үлдсэн 7% нь цалин аж. Сонирхуулахад, тус компани мөн хугацаанд өмнөх улирлаасаа 32.6% их буюу 66.3 тн зэс үйлдвэрлэсэн байна.

🍋 Apple (AAPL) нийт 1 тэрбум хэрэглэгчидтэй болов. Үүнд Apple TV+, Apple Music тэргүүтэй компаниудын хэрэглэгчид, мөн Netflix (NFLX), Spotify (SPOT) тэргүүтэй App Store-р дамжин хэрэглэгчдийн тоо багтжээ. Харин тэдний үйлчилгээний орлого өнгөрсөн оны IV улиралд 2023 оныхоос 14% өсөж $26.3 тэрбум болсон аж. Сонирхуулахад, Apple дамжин өнгөрөгсдөөсөө жилд 15%-30%-ийн шимтгэл авдаг гэнэ. 

🍋 Aspire Mining (AKM.AX) өнгөрсөн оны IV улиралд “Овоот” төслийн бүтээн байгуулалтад $600 мянгыг зарцуулжээ. Түүнчлэн компани мөн хугацаанд үйл ажиллагаандаа $514 мянгыг зарцуулснаар бэлэн мөнгө болон түүнтэй адилтгах хөрөнгийн нөөц $13.6 сая болов. Гэснээс тус компани нүүрс ачих, бэлтгэх төв, Эрдэнэтийн төмөр замын терминалын төсөлдөө нээлттэй тендер зарласан байна. 

• 📶 Wifi долгионыг барьж, цахилгаан эрчим хүч болгон хувиргах төхөөрөмж. (Financian)

• ✅ PISA боловсролын бодит байдал дээрх хэрэгжилтийг үнэлэх нь дээ. (MOE)

• 🛰️ iOS 18.3 Starlink-н хиймэл дагуулын сүлжээнд нэвтэрнэ. (HypeBeast)

• 🌲 Япон эмч нар өвчтөний оношноос хамааран “Forest Bathing” эмчилгээ бичиж өгдөг гэнэ. (Emerging)

• Даваа: Хятадад Хаврын баяр тохиож байгаа тул биржүүд амарна. 

• Мягмар: Төлбөрийн тэнцлийн сарын статистик гарна. 

• Лхагва: Чипийн акул Arm болон Qualcomm-н ээлжит санхүүгийн тайлан танилцуулагдана.

• Пүрэв: Араас нь эм үйлдвэрлэлийн луугар Eli Lily, AstraZeneca нар тайлангаа тайлагнана. 

• Баасан: Оросын ДНБ-ий үзүүлэлт танилцуулагдах нь ээ.

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ