🤑 Ашгаар дүүрэн ҮЦК-иуд

POWERED BY

Могой жилийн мэнд ээ! Сар шинэдээ сайхан шинэлж, алт мөнгө их хураав уу? Энэ жил хөрөнгө оруулалт нь өгөөжтэй, хадгаламж нь арвин, ажил хөдөлмөр нь бүтэмжтэй байхыг ерөөе өө! Та бүхэн өнөөдөр товхимлынхоо 999 дэх дугаарыг уншиж байгаа шүү. Аз ёндоо нь гийх биз ээ. Хурай^2. 🐍🪙🥂

UB: Сэлбэ дэд төвийн талбайд иргэдийн газрыг чөлөөлж, нөхөн олговрын гэрээ байгуулж эхэлжээ. Уг төсөлд нийслэлийн $500 саяын бондын санхүүжилт зарцуулагдаж буй. 

US: Америк Канад болон Мексикээс орж ирэх бараа бүтээгдэхүүнд 25%-ийн татвар ногдуулж эхэллээ. 

OTC: Өнгөрсөн 7 хоногт биржийн бус зах зээлд ₮81.3 тэрбумын болон $163.6 мянгын арилжаа хийгдэв. Үүнээс анхдагч зах зээлд ₮29 тэрбумын арилжаа хийгджээ.

🤑 Ашгаар дүүрэн ҮЦК-иуд 

Та бүхэн ямар ҮЦК-иар дамжуулж арилжаанд оролцож байна вэ? Өнөөдөр МХБ (MSE)-д бүртгэлтэй ҮЦК-иудын 2024 оны үр дүнг шинжье. 

📊 52/28: ₮370 тэрбум

Нийт 52 ҮЦК-иас 28 нь тайлангаа ирүүлжээ. Тэд өнгөрсөн онд ₮370 тэрбумын хөрөнгийг удирдаж ажилласан юм. Улмаар үйл ажиллагааны орлого нь нийтдээ ₮40 тэрбумд хүрч, цэвэр дүнгээр нийтдээ ₮16.8 тэрбумын ашигтай ажиллажээ. Тэгвэл тэдгээрийн арилжааны хувьд, 

• 📈 ₮719 тэрбумын арилжаа: ҮЦК-иуд 2024 онд хувьцаа, ХОС-гийн анхдагч болон хоёрдогч зах зээл дээр нийт ₮719 тэрбумын арилжаа хийв. Өнгөрсөн оны хувьд IPO-н давлагаа харьцангуй тайван байсан тул уг дүнгийн 90.3%-ийг хоёрдогч зах зээлийн арилжаа бүрдүүлсэн аж. Харин нийт хоёрдогч зах зээлийн арилжааны 29.5%-ийг БиДиСЕК ҮЦК (BDS) дангаараа хийжээ.  

• 💰 Бонд түүгч: Харин бонд, ХБҮЦ-ны анхдагч зах зээлийн арилжаа нийтдээ ₮1.6 их наядад хүрсэн нь 2024 он бондын жил байсныг илтгэнэ. Уг арилжааны 49.2% ийг мөн л $BDS хийсэн байна. Улмаар тэдний цэвэр ашиг тайлант онд 5.6 дахин өссөн. Эсрэгээрээ бонд, ХБҮЦ-ны ₮451 тэрбумын хоёрдогч зах зээлийн арилжаанд Голомт Капитал ҮЦК хамгийн идэвхтэй байжээ. 

🤑 Цойлогч = ₮12.8 тэрбум

Цаашлаад, ҮЦК-иудын нийт ашгийн 76%-ийг Голомт Капитал ҮЦК-ийн ашиг бүрдүүлсэн билээ. 2023 онд Ти Ди Би Секьюритис ҮЦК ашгаараа цойлж байсан бол 2024 онд ашиг нь 31.1% буурсан аж. Түүнчлэн Гүүдсек ҮЦК-ийн ашиг хамгийн ихээр буюу 748% өсөв. 2024 оны цойлогч Голомт Капитал ҮЦК-ийн хувьд бондын хоёрдогч зах зээлийн арилжаа болон ББЗЗ дээр хамгийн идэвхтэй байж 2022 оноос хойш бүртгэгдсэн ₮3.1 их наядын бондын 48.4%-ийнх нь андеррайтераар ажиллажээ. 

Эцэст нь… Зах зээл идэвхжиж, арилжаа арвижиж, ХК-иуд болон жижиг хөрөнгө оруулагчдын тоо нэмэгдэхийн хэрээр ҮЦК-иудын талбарт өрсөлдөөн ширүүсэж, улам л урагшилж байна. Одоо харин уул уурхайн бирж дээр ҮЦК-иудын оролцох эрхийг нээж, илүү өргөн цар хүрээтэй болгомоор байгаа юм даа.  

🍚 Тусч Япон

Цагаан сарын үеэр Гадаад харилцааны сайд Япон Улсад айлчлаад ирсэн. Үр дүнд нь бид Японы буцалтгүй тусламжаар 2 төсөл хэрэгжүүлэхээр болов. 

🐽 Өгөөд л байвал аваад л байя

Тодруулбал, тус улсын буцалтгүй тусламжаар ¥270 саяыг бохир усны шугам сүлжээний засвар, үйлчилгээний тоног төхөөрөмж, машин механизмд, ¥275 саяыг агаарын бохирдол хэмжих төхөөрөмж нийлүүлэх төслүүдийг хэрэгжүүлэхээр болжээ.

• 💸 Зээл өгнө: Үүний сацуу 2017 онд Монгол ОУ-ын Валютын сангийн хөтөлбөрт хамрагдсантай холбоотойгоор зогсоосон иений хөнгөлөлттэй зээлийг эргэн сэргээхээр болоод буй. Үр дүнд нь Чингис хаан олон улсын нисэх буудлын өргөтгөлийн ажлыг тус улсын  хөнгөлөлттэй зээлээр хэрэгжүүлэх аж. 

🔫 Батлан хамгаалах дэмжлэг

Цаашлаад, оны өмнөхөн Япон манайд батлан хамгаалахын тоног төхөөрөмж, технологи шилжүүлэхээр болж батлан хамгаалах салбар дахь түншлэлээ зузаатгах сонирхолтой байгаагаа харуулаад авсан. Дан ганц Монголоор тогтохгүй Филиппин, Бангладеш, Малайз, Фижи тэргүүтэй орнуудын батлан хамгаалах салбарт ч туслалцаа үзүүлж байгаа.

• 🤨 Шалтгаан: Энэ нь Токиогийн 2023 онд Энэтхэг-Номхон далайн бүсийг чөлөөт, нээлттэй болгох стратегийн хүрээнд хийгдэж буй. Үүний нэг илрэл нь саяхан Монголын армид ¥1.3 тэрбумын өртөг бүхий агаарын хяналтын радарын систем нийлүүлэх шийдвэр.

👐 Төдийгөөс өдийг хүртэл

Тус улс ардчилсан замаар алхах сонголт хийсэн Монголыг 1991 оноос эхлэн хөгжлийн албан ёсны тусламждаа хамруулж, 2022 оны байдлаар $3.3 тэрбум давах дүнгээр тусалж, дэмжсэн байдаг.

• 🔎 Тодруулбал, буцалтгүй тусламжаар ¥120.4 тэрбум, техникийн хамтын ажиллагаагаар ¥55.7 тэрбум, хөнгөлөлттэй зээлээр ¥182.4 тэрбумыг тус тус олгожээ. Буцалтгүй тусламжийн гол суваг болох “Өвсний үндэс” хөтөлбөр энэ жил нэлээн өргөжиж байгаагаас харахад тус дүн нэлээн нэмэгдэх буй за. Харин шууд хөрөнгө оруулалт нь 2011-2023 оны хооронд $1.4 тэрбум. 

Эцэст нь… Хамгийн том хандивлагч улсынхаа буянд бид Нарны гүүр, Хөшигийн хөндийн шинэ нисэх, Анагаахын шинэ сургууль, Япон Монголын төв гэхчлэн олон ч бүтээн байгуулалтыг барьж байгуулан ашиглаж байна. Буян нь дэлгэрсэн сайхан гуравдагч хөршийнхөө хөрөнгө оруулалтыг зээл, тусламжтай нь жишин харахад даанч бага юм. Өөрөөр бол тэдний нүдээр бид тусалж дэмжээд байхад гэмгүй ч хамт бизнес хийх чадалтай улс биш гэдэг нь харамсалтай. Бидний ичгэвтэр нүцгэн үнэн энэ ажээ.

₮522 тэрбум
Монголчууд жилд дунджаар ₮522 тэрбумаар ундаа авч уудаг. 
210 л
Нөгөө талд жилд дунджаар 210 сая литр чихэрлэг ундаа худалдаалагддаг аж. 
Л тутамд ₮500
Улмаар 2027 оноос 100 мл тутамд 5 граммаас дээш чихэр, сахар орлуулагч агуулсан ундаанд литр тутамд ₮500 ногдуулдаг болж байгаа шүү. 

🍋 Европын Холбоо Трампын эсрэг хөдөлж эхэллээ. Европын Комиссын Ерөнхийлөгч Урсула фон дер Лейен ЕХ-г зэвсэглэх $840 тэрбумын төлөвлөгөөг танилцуулж, төсвийн зардлаа 4% нэмэгдүүлэхээ мэдэгдэв. Улмаар гишүүн орнуудын батлан хамгаалах зардлыг эрс нэмэгдүүлэхийн сацуу тус салбарт €150 саяын зээл, хөрөнгө оруулалт хийнэ гэнэ дээ. 

🍋 Хятад нүүрснээс ангижрах боломж Баян-Овоо ордод нуугдаж байгаа. Хятадын геологичид Өвөр Монголын Баян-Овоо ордоос 1 сая тн тори олборлох боломжтой талаар цуурч байна. Энэ нь Хятадыг 60,000 жил цахилгаанаар хангах дайны дүн төдийгүй уранаас 200 дахин их эрчим хүч үйлдвэрлэх хүчин чадалтай ашигт малтмал аж. 

🍋 Европын Сэргээн Босголт Хөгжлийн Банк болон Ногоон Уур Амьсгалын Сан (GCF)-гаас ХААН Банк (KHAN)-д $80 саяын барьцаагүй зээл олгоно. Үүний $60 саяыг ЕСБХБ, $20 саяыг GCF санхүүжүүлэх бөгөөд тус зээл нь уур амьсгалын өөрчлөлтийн нөлөөг бууруулах, дасан зохицох технологи, үйлчилгээг дэмжих зорилготой.

🍋 Хятад эдийн засгийг өсөлтөө 5%-д хүргэх зорилт тавьснаар Хонконгийн биржид бүртгэлтэй компаниудын хувьцаа 3% өсөв. Өчигдөр 14 дэх удаагийн Бүх Хятадын Ардын Төлөөлөгчдийн Их Хурлын 3 дахь чуулган нээлтээ хийж төсвийн зардлыг ДНБ-ий 4%-д, батлан хамгаалах зардлаа 7.2% гэхчлэн өсгөхөө зарлалаа. Гол агуулга нь Хятад Америкийн тарифын дарамтаас үл хамааран эдийн засгаа үргэлжлүүлэн өсгөх итгэлтэй байгаа явдал.

• 🪙 Үндэсний баялгийн сан: Хэрэлдэх биш хэлэлцэх цаг. (iToim)

• 🗣️ Трампын Конгрессын нэгдсэн хурал дээр тавьсан илтгэлээс анхаарах ёстой 6 зүйл. (NYTimes)

• 💥 Сөнөсөн оддын галзуурал. (NASA)

• 😖 Насны намрыг угтсан нойргүй шөнүүд. (NewsMax)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан
Graphics by: Ц.Цэлмэг