⚔ Эдийн засгийн ээдрээтэй дайн

POWERED BY

Morning! Өнөө түгжрэлийг бууруулах дүүжин замын тээврийн ажил эхэлжээ. Үүгээр Яармагаас Хархорин хүртэл зорчих нь. Баригдаж дуусаад, ашиглаж эхэлсний дараа л нээрээ л хийж дээ гэж бодъё доо. Метрог 13 жил хүлээчихээр юунд ч итгэхээ больчихдог юм байна. 😅   

POL: Цагдаагийн байгууллагын хамтын ажиллагааны тухай Монгол Улс болон Бүгд Найрамдах Чех Улс хоорондын хэлэлцээрийг дэмжлээ.  

GLMT: Голомт банк ХК (GLMT)-ийн хувьцаа эзэмшигчдийн ээлжит хурал 2025 оны 4 сарын 17-нд болох нь. 

MSE: Өнгөрсөн 7 хоногт ХААН Банк (KHAN) болон Монголын Хөрөнгийн Бирж (MSE)-ийн хувьцаа хамгийн өндөр дүнгээр арилжаалагдсан бол БиДиСЕК ҮЦК (BDS) хоёрдогч зах зээлийн арилжаанд хамгийн идэвхтэй оролцов.

 ⚔ Эдийн засгийн ээдрээтэй дайн 

Инфляц нь өсөөд бодлогын хүү нь нэмэгдээд энэ улс эх орны маань эдийн засаг юу л болох гээд байна даа, хө. 

💰📉 Буруу нь өсөж, зөв нь буурах

Энэ оны экспортын үнийн дүн жилийн өмнөхөөсөө 19.5% буурч, эсрэгээрээ импорт нь өсөөд гадаад худалдааны ашиг 86.1% буурлаа. Өөрөөр хэлбэл, бидний гаднаас оруулж ирж байгаа мөнгө улам багасаад, гадагшаа өгч байгаа нь өөдөө мацаад байгаа хэрэг. Ингээд ирэхээр гадаад валютын улсын нөөц нь импорт, өрөнд идэгдээд оны эхнээс 11.2% буураад байна.

🔥 Инфляц: Галын дөл өөдөө    

Заа нөгөө талаас, импортын бараа нь тэлээд, дотооддоо цалин, тэтгэвэр, тог ус нь нэмэгдээд ирэхээр өнөө инфляц чинь татаж чангаадаг Монголбанкныхаа хазаараас халиад хурдалж өгч байна. Арга ядаад Монголбанк бодлогын хүүгээ огцом 2 нэгж хувиар нэмэгдүүлж 12%-д хүргээд байгаа нь энэ. Одоо цаашид манай эдийн засаг яах вэ? 

💣 Бодлогын хүүгийн үр дагавар 

Бодлогын хүү 2022-2023 оны өндөр үе рүү буцаж байгаа нь урт хугацаандаа зээлийн хүүг нэмэгдүүлж, хөрөнгө оруулалтыг удаашруулах нөлөөг дагуулж буй. Нэмээд Монголбанк 2027 оноос л инфляцыг 5%-ийн интервалд орж ирнэ гэж төсөөлж байгаа нь тэр хүртэл бодлогын хүү өндөр байхын дохио боллоо. Тэгэхээр ирэх жилүүдэд зэсийн гарцаар л эдийн засаг тэлэх нигууртай үлдлээ.

• Нэмээд хэрэглээний зээлийн өр орлогын харьцааг 50%-д тогтоож, тэтгэврийн зээлийн үлдэх орлогыг амьжиргааны доод түвшнээс дээш байхаар шинэчилсэн нь хэт их зээл аваад байна, одоо жоохон танагтай байна шүү, нөхөөд гэсэн сануулга боллоо доо. 

Эцэст нь… Манай эдийн засаг тун ээдрээтэй нөхцөлд байна. Нүүрсний үнэ унаад, экспортын орлого буураад, инфляц нь өсөөд байхад баахан мега төсөл хэрэгжүүлэх ёстой байдаг. Үүн дээр нэмээд дорвитой гадаадын хөрөнгө оруулалт оруулж ирэх төслүүдээ шахаастай. Тэр мега төслүүдийг дотоодоосоо санхүүжүүлэх боломжгүй нь ойлгомжтой байхад гаднаас хөрөнгө оруулалт татах гэж оролдох нь битгий хэл түлхээд байгаа харагдана. Яана даа, уйлаад яах вэ дээ Должин минь гэдэг шиг л.

♂️♀️ ХЗЗ-ийн шинэ трэнд 

Жендерийн тэгш байдал, эмэгтэй эрэгтэй хүмүүсийн нийгэмд эрх тэгш оролцоотой, статустай байх талаар улс төрийн хүрээнд өргөн попордог. Бизнесүүд ч ингэж попорч болно. Гол нь ямар ашигтай билээ?   

📈 Трэнд: Эрх тэгш 

Өдгөө стратеги, алсын хараанд нь байгаль орчин, нийгэм, засаглал буюу БОНЗ-ын бодлого тусгагдаагүй томоохон корпорац, нээлттэй компани өдрийн од шиг ховор болсон. Том зургаараа энэ нь Норвег, Франц, Герман, Энэтхэг тэргүүтэй орнуудад нээлттэй компаниудын удирдлагын баг болон ТУЗ-д эмэгтэйчүүдийн квот тогтоож, зарим хөрөнгийн биржүүд бүртгэлтэй компаниудаасаа жендерийн олон янз байдлын стандартыг хангасан байх шаардлага нэмэгдэж байгаатай холбоотой. 

• 💡 Жишээ нь, Өмнөд Африкийн Йоханнесбургийн хөрөнгийн бирж (JSE) нээлттэй компаниудаас жендерийн олон янз байдлын бодлого байхыг шаарддаг бол Nasdaq (^IXIC) удирдах зөвлөлдөө дор хаяж 1 эмэгтэй эсвэл цөөн ч гэсэн эмэгтэйчүүдийн төлөөлөлтэй байлгахаар шахдаг гэнэ. 

• 😍 Сонирхолтой индекс: 2022 онд Европын хамгийн том хөрөнгийн бирж болох Euronext дэлхийн анхны жендерийн тэгш байдлын индексүүдийг гаргаж байв. Улмаар жилийн дотор Euronext-н компаниудын ТУЗ-ийн бүрэлдэхүүн дэх хүйсийн тэгш байдал мэдэгдэхүйц сайжирсан гэдэг.  

🤑 Сонирхолтой бонд 

Тэртээ 12 жилийн өмнө Олон Улсын Санхүүгийн Корпораци (ОУСК) анхлан  эмэгтэйчүүд рүү чиглэсэн бонд гаргаж, $165 саяыг татан төвлөрүүлж байсан бол 2023 онд дэлхий даяар тус чиглэлийн бондоор $14.5 тэрбумын санхүүжилт босгосон байна. 

• 📊 Институт хөрөнгө оруулагчид нийгэм дэх нөлөөллөө чухалчлахын хэрээр жендерийн бондын эрэлттэй болох нь ээ. Бондоор тогтохгүй уг чиглэлд хөрөнгө оруулалт, зээл олширч байгааг өнгөрсөн онд Монгол компаниуд ЕСБХБ, АХБ, ОУСК зэрэг олон улсын байгууллагуудаас овоо санхүүжилт татсанаас харж болно. 

Гэснээс, 2024 онд Исланд 3.4%-ийн тогтмол хүүтэй, 3 жилийн хугацаатай жендерийн бонд гаргаж, 50 саяыг татан төвлөрүүлсэн анхны улс болно байна. Зах зээлд ногоон болон нийгмийн бондууд харьцангуй танил болсон гэх утгаараа араас нь цоо шинэ бүтээгдэхүүн хүч түрэн орж ирэх нь байна шүү. Монгол 3 жилийн өмнө ногоон бондтой танилцаж, ар араасаа маш амжилттай бондууд гарсан. Хэзээ жендерийн бонд гаргах бол? Сонирхолтой.

Excel дээр нүд эрээлжлэм аварга том өгөгдөл дунд төөрөөд байна уу? Тэгвэл хаана яваагаа тод томруунаар харах арга зааж өгье. 👇🏻

• Үүний тулд ажлын хуудасны дээрх цэсүүдээс View➡️Show➡️Focus Cell-г сонгоод болох нь. Өнгө нь таалагдахгүй бол цааш Focus Cell Color-руу очоорой. 

Гэснээс дээрх тохиргоог цаашдаа Alt + W + E + F товчлолоор хийгээд явбал амар шүү. ЭНД дарж бичлэгээр үзээрэй.

🍋 Канадын шинэ Ерөнхий сайдаар Марк Карни 85.9%-ийн саналаар сонгогдлоо. Тэрээр 2008 оны дэлхийн ЭЗ-ийн хямралын үед Канадын Төв банкны Ерөнхийлөгчөөр ажиллаж, тус улсыг хүнд нөхцөл байдлаас амжилттай гаргаж чадсан туршлагатай. Энэ удаа ард иргэдийнхээ итгэлийг Дональд Трамптай хийх худалдааны дайнд ялна гэж нүүр бардам амлаж уг сэнтийд заларлаа. 

🍋 Мега төслүүдийг хэрэгжүүлэхэд 8 хуулийн 22 заалтад өөрчлөлт оруулна. Эхний ээлжид Төрийн болон орон нутгийн өмчийн хөрөнгөөр бараа ажил, үйлчилгээ, худалдан авах тухай хуульд ₮1 тэрбум хүртэлх бараа, ажил, үйлчилгээг “Цахим дэлгүүр”-ээс худалдан авах, ингэхдээ хүний оролцоог багасгаж, AI нэвтрүүлэхээр тусгажээ. 

🍋 Blackstone (BX) BREDS V сандаа $8 тэрбумыг татан төвлөрүүлж дуусав. Тус сан нь дэлхий даяар хөдлөх болон ҮХХ-ийн төслүүдэд хөрөнгө оруулахаас гадна корпорацуудад хөнгөлөлттэй зээл олгох зорилготой аж. Одоогоор Blackstone-н Blackstone Real Estate Debt Strategies нэгж дэлхий даяар 170 гаруй мэргэжилтэнтэй $77 тэрбумын хөрөнгө удирддаг. 

🍋 Активист хөрөнгө оруулагч Mantle Ridge Cognizant (CTSH)-д $1 тэрбумын хөрөнгө оруулна. Ингэхдээ Mantle Ridge нь $CTSH-н ТУЗ-д өөрчлөлт оруулах төлөвлөгөө байхгүй ч, тэдний ашигт ажиллагааг сайжруулахыг зорьж буй. Эргэн харвал, $CTSH-н үйл ажиллагааны ашиг өнгөрсөн онд 2023 оноос 7.5% өсөж $2.8 тэрбум болсон байна.

• ✨ Samsung 16 охин компанидаа шинэ ажлын байр зарлажээ. (KoreaTimes)

• 🏙️ Ипотекийн зээл олгох боломжтой орон сууцны судалгаа авч байна гэнэ ээ. (ХББОСЯ)

• 🫡 Санхүүгийн сахилга бат 1-т шүү! (NYT)

• 🏭 Ердөө 36 компани дэлхийн нийт хүлэмжийн хийн тэн хагасыг ялгаруулдаг. (FinancialTimes)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ