!!️ Сунжирсан ногдол ашиг

POWERED BY

Өглөөний мэнд ээ! Ирэх сараас мөрдөгдөх автобусны шинэ тарифаа мэдсэн үү? Сүхбаатарын талбайгаас Чингис хаан олон улсын нисэх буудал руу том хүн ₮15 мянгаар явах нь байна шүү. 🚌

MNG: Энэ онд орон нутагт нийт ₮295.4 тэрбумын татаас олгоно. 

POL: Тавантолгой Түлш ХХК шахмал түлшний шуудайнд 7 жилийн турш ₮83 тэрбумыг зарцуулсан бөгөөд одоогийн байдлаар шахмал түлшний 52 мянган тн нөөцтэй байна. 

ARD: Ард Менежмент ҮЦК ХХК-ийн удирдаж буй сангийн нийт багцын 82%-ийг дотоодын 25 хувьцаа бүрдүүлжээ.

‼️ Сунжирсан ногдол ашиг

Жил ирэх тусам ногдол ашиг хуваарилах шийдвэр гаргаж байгаа ХК-иудын тоо, үнийн дүн нэмэгдэж байгаа ч нөгөө талдаа ногдол ашгийг хөрөнгө оруулагчдад хуваарилах хугацаа хойшилсоор. Энэ ямар нөлөөтэй вэ? 

🤔 Илүү олон + илүү удаан

2022 онд МХБ (MSE)-д бүртгэлтэй 41 ХК 2021 оны ашгаасаа ногдол ашиг (НА) тараах шийдвэр гаргаж байв. Улмаар тус оны 9-р сарын байдлаар 21 компани НА тараахдаа ногдол ашгийн мэдэгдэл гаргаснаас хойш ашгаа хуваарилах хүртлээ дунджаар 108.2 хоног зарцуулж байв. Харин 2023 онд 43 компани ногдол ашиг (НА) олгохоо зарласан. 

• ⌛ Хоног уртсав: Өнгөрсөн оны 1-р сарын байдлаар тус 43 компанийн ердөө 25 нь ҮЦТХТ-өөр дамжуулан олгосон бөгөөд тэд НА-аа бүртгүүлснээс хойш хуваарилах хүртлээ дунджаар 115 хоног буюу 4 сарыг зарцуулав. Өөрөөр хэлбэл дундаж хугацаа 7 хоногоор уртассан хэрэг. 

• 💭 Ямар хохиролтой вэ? Ногдол ашгийг удаан хүлээх нь инфляцад өртөх, ногдол ашгаараа өөр хөрөнгө оруулалт хийж давхар өгөөж хүртэх боломжийг үгүй хийж байгаа юм. Нэмээд ногдол ашгаа хэзээ орохыг тодорхой мэдэхгүй учир орж ирсэн үед төлөвлөгөөгүйгээр үрэх асуудал үүснэ. Энэ талаар ЭНД дарж уншаарай. 

📊 Том зургаар 

2013-2024 оны хооронд давхардсан тоогоор 386 удаагийн ногдол ашиг тараах шийдвэр гарсан байдаг. Гэхдээ тус шийдвэрийг 78 компани л гаргаж иржээ. Үүнд мэдээж түүхэндээ ганц удаа НА тараасан компани ч багтаж буй. Нийт нээлттэй ХК-иудын 45% л гэсэн үг. Гэхдээ банкнууд нээлттэй болсонтой холбоотойгоор нийт хуваарилагдаж байгаа НА-гийн үнийн дүн нэлээд өссөн. Тодруулбал, 2024 онд нийт ₮974 тэрбумын ногдол ашиг тараах шийдвэр гарсан нь 2023 оныхоос 1.5 дахин 2016 оныхоос 6.7 дахин өндөр дүн. 

Гэхдээ, ногдол ашиг тараахдаа хэзээ тараахыг тодорхой зааж өгөхгүйгээр хэт удааж байгаа нь НА хөшүүрэг болж ажиллахгүй байх нөхцөл үүсгэж буй. Иймээс СЗХ ногдол ашиг тараах эцсийн өдрийг хязгаарлаж, бидний зүгээр “Ногдол ашгийн өдрөө тодорхой зарлая” гэж уриалаад байгаа юм. 

🌐👥 LinkedIn-р брэндээ дэлхийд сурталчил

Амжаад оролцоорой! Юунд вэ гэж үү? 200 гаруй улсын 1 тэрбум гишүүнтэй LinkedIn-н Go-Global түнш болох боломж олгох “Building Mongolia's Global Brand with LinkedIn” Zoom вебинар ирэх сарын 6-нд болох гэж байна. 📢

Тус вебинарт оролцсоноор LinkedIn-г ашиглан гадаадад брэндээ сурталчлах зөв стратеги боловсруулах, ОУ-ын зах зээл дээрээс чадварлаг ажиллах хүч татах замаар бизнесийнхээ өсөлтийг дэмжих, мөн технологийн сорилтуудыг хэрхэн даван туулах талаар мэргэжлийн экспертүүдээс зөвлөгөө авах боломж нээгдэх юм байна шүү.

🔮 CEO нарын 2025 оны төсөөлөл

Бөмбөрцгийн CEO нарын дийлэнх буюу 60% нь 2025 онд дэлхийн эдийн засаг сайжрах эерэг төсөөлөлтэй байна. Энэ ч утгаараа 2025 оныг одоо хөдөлж, зоригтой шийдвэр гаргах цаг хугацаа гэж тодорхойлж буй. 

☝️ Тогтворгүй мөчлөг дэх тогтвортой өсөлт

PwC 109 орны 4,701 CEO нарыг хамруулсан ээлжит CEO судалгаагаа танилцуулж, CEO түвшний эрхмүүдийн эдийн засгийн төсөөлөл сүүлийн 2 жилийнхээс мэдэгдэхүйц сайжирсныг харуулав. Цаашлаад, судалгаанд хамрагдсан CEO нарын 42% нь зоригтой шийдвэрүүдийг цаг алдалгүй гаргах хэрэгтэй гэж яаравчлах болсон нь ямар нэгэн томоохон өөрчлөлтгүй, одоогийнхоороо явбал ирэх 10 жилд бизнес нь оршин тогтнох боломжгүй гэх алсын хараатай нь холбогдож буй. 

• 📃 Тэдний хийх зүйлс: Улмаар 5 CEO тутмын 3 нь ажиллах хүчний тоог нэмэгдүүлж, AI-г үргэлжлүүлэн нэвтрүүлэхээр төлөвлөж байгаа аж. 

• 🤖 AI боломж: CEO нар AI-г ажлын байр устгагч бус ирээдүйд шинээр бүтээж чадах ажлын байруудыг онцлохын сацуу компанийнх нь ашигт ажиллагаа, орлогод эергээр нөлөөлнө гэж харж буйгаа хуваалцжээ. Сонирхолтой нь CEO нарын 56% нь AI компанийнх нь ашигт ажиллагааг нэмэгдүүлсэн, 34% нь ашиг нэмэгдэхэд бодитоор нөлөөлсөн хэмээн хариулжээ. 

❗ CEO нар юу хийх хэрэгтэй вэ? 

2025 он удирдлагуудын хувьд магадгүй хамгийн чухал жил. Иймээс ч тэд бизнесийн стратеги цаашлаад орлогын үндсэн сувагтаа AI-г нэвтрүүлэх, шинэ салбарууд руу идэвхтэй өргөжиж, нөөцөө динамикаар дахин хуваарилах, уур амьсгалын эсрэг ногоон санхүүжилт нэмэгдэж байгааг ашиглах чиглэлд онцгой анхаарч байгаа гэнэ шүү. 

• 🔪 2 иртэй хутга: Гэснээс Америк Парисын гэрээнээс гарсан нь тус улс руу олгогдох олон улсын санхүүжилт өөр улсууд руу юүлэгдэх боломжийг үүсгэхийн сацуу нөгөө талд санхүүжилт буурах эрсдэлийг үүсгэх төлөвтэй. 

Эцэст нь… Бизнесийн орчин дахь AI халуурал хэдийнээ эхэлсэн. Уг судалгаанаас харахад ч одоог хүртэл хөдөлж эхлээгүй компаниуд AI-н өрсөлдөөнөөс хэдийнээ хоцорсноо мэдэрч хурдтай шилжих, дасан зохицохыг эрмэлзэж байна. Монголд ч AI халуурал болон ногоон санхүүжилт нэмэгдэж байгаа нь анзаарагдаад л байгаа даа. AI гэхээр л хэт холын гэж харуузай, хэдийнээ хаалга өшиглөөд ороод ирсэн шүү.

76.2 мянга
Сүүлийн 10 жил Монгол Улсын ажиллах хүчний эрэлт 52 мянгаас 95 мянгын хооронд хэлбэлзэж, дунджаар 76.2 мянга болсон байна.
9.8%
Тэгвэл тус үзүүлэлт энэ жил 9.8% өсөж 83.7 мянга болжээ. 
2
Сонирхуулахад, 1 жилд үүсэх ажиллах хүчний эрэлтийн 3 ажлын байр тутмын 2 нь оны эхний хагаст бий болох хандлагатай байдаг гэнэ.

🍋 ЗГ махны үнийг тогтворжуулах зорилгоор 6 сарын 1 хүртэл махны экспортыг хязгаарлав. Энэ хугацаанд 10 мянган тн мах бэлтгэж дотоодын зах зээлд нийлүүлэхээр төлөвлөсөн бөгөөд ААН-үүд үүнд экспортлохоор бэлтгэсэн махныхаа 10%-ийг дотоодын зах зээлд нийлүүлэх шаардлагатай аж. Цаашлаад энэ онд нийт малын 10% буюу 6 сая орчмыг дотоодын зах зээлд, 5% буюу 36 сая орчмыг экспортлох нь. 

🍋 Spotify (SPOT) өнгөрсөн жил 2023 оноос 10% их буюу $10 тэрбумыг хөгжмийн салбарынханд төлжээ. Энэ нь компанийн үйл ажиллагаа эхлүүлснээс хойших 19 жилд төлсөн дүнгийн 17% юм. Нэг талаар Amazon Music $8.8, Apple Music $6.2, YouTube $4.8-ыг 1,000 үзэлт тутамд төлдөг бол Spotify-нх $3 гэнэ. Гэхдээ Spotify-г дэлхийн нийт төлбөртэй аудио платформ хэрэглэгчдийн тэн хагас буюу 252 сая нь тогтмол хэрэглэдэг.

🍋 Казакстан НӨАТ-ыг 12%-иас 20% болгож нэмэх төлөвтэй байна. Уг хуулийг ирэх сарын дунд гэхэд эцэслэн баталж, 6-р сараас эхлэн үе шаттайгаар хэрэгжүүлэх аж. Улмаар Казакстан НӨАТ-ын хэмжээгээрээ Төв Азид тэргүүлж, дэлхийд 23-т бичигдэх нь. Сонирхуулахад, Төв Азийн орнуудаас Гүрж хамгийн өндөр буюу 18%-ийн НӨАТ авдаг бол Киргизстан болон Узбекстан хамгийн бага буюу 12%-ийн НӨАТ авдаг аж. 

🍋 Helion SoftBank (SFTBY)-с $425 саяын венчурын санхүүжилт татаж, $5.25 тэрбум үнэлгээтэй болов. Санхүүжилтийг цөмийн нэгдлийн эрчим хүчнээс цахилгаан эрчим хүч үйлдвэрлэхэд зориулах ба цаашлаад Microsoft (MSFT)-д 2028 оноос цахилгаан эрчим хүч нийлүүлэх нь. Сонирхуулахад, тус стартап 2014 оноос хойш Sam Altman, Techstars тэргүүтэй хөрөнгө оруулагчдаас нийт $198 саяын санхүүжилт татжээ.

• 🚦 Хамгийн их замын түгжрэлтэй 20 хотын 12 нь Азийнх. (Economist)

• 💎 VR, AR технологиуд 2030 он гэхэд дэлхийн ЭЗ-т $1.79 их наядын нэмүү өртөг бий болгоно. (HBR)

• 💼 Америкийн бизнес аяллын салбар ДНБ-нийх нь 2%-ийг бүрдүүлдэг гэнэ. (TravelPerk)

• 🖼️ 2031 оноос Луврын музейд тусад нь төлбөр төлж Мона Лиза зургийг үздэг болох нь. (BBC)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа 
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ