🙃 Шатлалтай НӨАТ

POWERED BY

Hey! МАН-ынхан гишүүдээ оноогоор үнэлэх журмыг баталж, эсрэг байр суурьтай гишүүд оноо ч үгүй, дахиж дэвшүүлэх ч үгүй болох талаар хэлэлцэх гэж байна. Тэгэхээр уг бүлгийн гишүүд бие биеэ дэмждэг л байх ёстой болж байгаа юм. Д.Энхтүвшин гишүүн шиг төсөв шүүмжлээд гарч ирэх хүн дахиж олдохгүй нь дээ. Энэ улс эх орон, улс төр нь юу л болоод байна даа. 🤔 

MNG: Оны эхний 2 сард НДС-гаас зарцуулсан зардал жилийн өмнөхөөсөө 162.4% өсөж ₮967 тэрбумд хүрэв. Үүнд тэтгэврийн даатгалын сангийн зарлага хамгийн ихээр буюу ₮179.9 тэрбумаар өсжээ. 

GOV: Төрийн аудитын байгууллага ЗГ-ын 2024 оны жилийн төлөвлөгөөнд тусгагдсан эрчим хүчний салбарын эдийн засгийн үр ашгийг нэмэгдүүлэх хөтөлбөр болон авлигын гэмт хэргийг бууруулах зорилтыг 100% биелсэн гэж дүгнэжээ. 

UBTZ: Улаанбаатар төмөр зам ХНН он гарснаас хойш 135.9 мянган тн ачаа боловсруулсан байна.

🧶 Бөөрөнхий шинэчлэл

Хаврын чуулганы гол хэлэлцэх хуулиудын чухлын жагсаалтад татварын багц хуулийн шинэчлэл байгаа. Яг юуг нь шинэчлэх билээ? 

🧐 Юутай ч шинэчилнэ, гэхдээ бөөрөнхий

Хамтарсан ЗГ татвар, нийгмийн даатгалын багц хуулийн өөрчлөлтийг иргэн, ААН-үүдийн саналд үндэслэн боловсруулж, УИХ-д өргөн барихаар ажиллаж буй. Энэ талаар Даваа гарагт хэлэлцсэн юм. Ингэхдээ татварын шинэчлэлийн хүрээнд бизнесийн идэвхжилийг ₮1.6 их наядаар нэмэгдүүлнэ гээд байгаа. Арга зам нь, 

• 📊 Шатлалтай НӨАТ: Татварыг шинэчлэхдээ бизнес эрхлэхэд ээлтэй, ажлын байр бий болгоход чиглэсэн бөгөөд татварын зардлыг бууруулахыг чухалчилсан гэнэ. Энэ дундаа уул уурхайн бус салбарын бизнес эрхлэгчдийг дэмжиж НӨАТ-ыг шаталсан хэлбэрт шилжүүлэх аж. Өөр нарийн мэдээлэл одоохондоо алга даа. 

• 🧮 Татаас өгье: Нэмээд, манайхан ер нь нэг салбар, нэг бизнесийг дэмжих болохоороо салбарын орчныг сайжруулахаас илүүтэй хөнгөлөлттэй зээл, татаас ярих дуртай. Энэ эрчээрээ татварын шинэчлэлийн үр дүнд иргэн, өрхийн орлогыг хамгаалах, хөдөлмөр эрхлэлтийг дэмжихэд ₮2.4 их наядын татварын хөнгөлөлт олгох юм. 

🪄 Тодоос тодорхой хүсэл

Нөгөө талаас ААН-үүд татварын шинэчлэлийн хүрээнд маш тодорхой зүйл хүсэж буй. Энд НӨАТ-ыг 5% болгож бууруулах, НӨАТ төлөгч болох босгыг ₮400 сая болгож багасгах, татварын бааз суурийг нэмэгдүүлэх, ААНОАТ-ын шаталсан хувь хэмжээг байхгүй болгох, эсвэл босгыг өндөрсгөх гэх мэт. Гэвч одоогоор энэ өөрчлөлтүүдийг хуульд тусгах үгүй нь тодорхойгүй. 

🔻 Нөгөө талын нөхцөл

Эсрэг талд татвараар босдог төсөв бидэнд бий. Өнгөрсөн оны энэ үед ашигтай гарч байсан төсвийн тэнцэл одоо хэдийн ₮565.8 тэрбумын алдагдал хүлээчхээд байгаа. Хэрэв татварын хувь хэмжээнд том өөрчлөлт оруулбал төсөвт тодотголын асуудал яригдана. Гэхдээ эрх баригчид маань орлогын цоорхойгоо алтаар нөхөх төлөвлөгөөтэй байгаа бололтой. 

Эцэст нь… Татварын хуулийг нэг мөр шинэчилж байгаа бол дорвитой, нарийн заалтуудыг тусгаж өгөх нь чухал байна. Нөгөө талаас төсвийн бүтэц, ачаалал зэргээ ч тооцоолох нь зүй. Ямартай ч УИХ-д юу өргөн барихыг нь харж л байя даа.   

🤝🌐 Trade Finance Forum 2025 

Худалдаа, Хөгжлийн Банк (TDB)-наас 3 дахь жилдээ зохион байгуулж буй “Худалдааны санхүүжилтийн форум” энэ жил “Тогтвортой хөгжилд хамтдаа” уриан дор зохион байгуулагдах гэж байна. 📢

Энэ удаагийн форумаар төслийн санхүүжилтийн сорилтууд ба шийдлүүд, эрчим хүчний эх үүсвэрийн төрөлжилт, ногоон худалдааны санхүүжилт, тогтвортой нийлүүлэлтийн сүлжээний санхүүжилт гэхчлэн тун чиг өгөөжтэй сэдвүүдээр олон талт илтгэл, хэлэлцүүлгүүд өрнөхийн сацуу оролцогчдод туршлага, мэдлэг хуваалцах  арга хэмжээнүүд болох аж.

📍 Хаана: Shangri-La Ball Room
🗓️ Хэзээ: 3 сарын 28-нд

 🐷 2007 оны алтан гахай жилтнүүд

Альфа үеийнхнийг балчир гэж басахааргүй болсон байна шүү, цаана чинь. Эдгээр балчир үеийнхний дунд ямар брэнд хамгийн алдартай байдаг гэж бодно? 

• 🤔 Нээрээ юу билээ? Өдгөө альфа үеийнхний хамгийн ахмад нь 15 настай, хамгийн балчир нь 1 настай буюу эхнээсээ өөрийн гэсэн ертөнцтэй өсвөр настнууд болоод эхэлжээ. Харин тавхан жилийн дараа тэд дэлхийн нийт ажиллах хүчний 11%-ийг бүрдүүлж эхэлнэ. 

🫧 Тэдний онцлог

Америкийн хүн амын 13.5% буюу 46 сая нь альфа үеийнхэн. Харин Монголын нийт хүн амын 24%-ийг бүрдүүлдэг. Өөрөөр бол балчир хэмээн басаж болохооргүй асар их хэрэглэгчид. Бусад үеийнхнээс ялгаатай нь альфа үеийнхэн мэдээ орсон цагаасаа л техник, технологиор хүрээлүүлж өссөн. Тэр тусмаа цар тахлаас хойш 12-15 насны хүүхдүүдийн цахим худалдан авалт 39% өссөн гэж байгаа. 

• 😳 Хамгийн сонирхолтой нь цар тахлаас хойш тус үеийнхний цахим орчинд өнгөрөөх цаг багассан буюу хичээлээ тараад найзуудтайгаа уулздаг хүүхдүүдийн тоо нэмэгдэж, оронд нь видео тоглоом тоглодог хүүхдүүдийн тоо буурсан л гэнэ. Эргээд голын чулуугаар тоглох нь тэдний  хувьд шинэ туршлага болох гээд байна уу даа. 🤣

⚡ Тэдний хандлага

Түүнчлэн TikTok, Facebook, Instagram гэхчлэн сошиал платформуудыг энтертайнмент зорилгоор ашиглахаас илүүтэй худалдан авалтын хөтөч болгон ашиглах нь нэмэгдэж байгаа аж. 

• 🏅 Спортын брэндүүдийг онцлон харахад, 2023 оноос тус үеийнхний дундах  Under Armour (UA)-н нэр хүнд 22%, Nike (NKE) болон New Balance-нх 18%, Adidas (ADS.DE)-нх 14% гэхчлэн өсжээ. 

Эцэст нь… 2010 оноос хойш төрсөн хүүхэд болон дүүтэй бол ямар хувцас өмсөх дуртай, онцлох брэнд байна уу, ямар тоглоом, амттанд дуртай гээд өөрсдийн үеийнхэнтэй харьцуулж болох асуултуудыг асуугаад үзээрэй. Нөгөө талд бизнесийнхэн маань ирээдүйн борлуулалтаа бодож тус үеийнхэн рүү дөхөж байхгүй бол горьгүй нь шүү.

Бяцхан кейс задлан 💡

• Асуудал: … компани хэд хэдэн цайны газар ажиллуулахын хажуугаар түргэн хоолны бизнес эрхэлдэг. Тэд нэг газраа олон жил ажиллаж буй тул тогтмол үйлчлүүлэгчидтэй ч, дорвитойхон орлого олохгүй байв. 

• Шийдэл: Компани зах зээлийн боломжоо харгалзан, завгүй хүмүүст зориулсан “Lazy cooking” нэрээр хүнсний стандартуудад нийцсэн хагас боловсруулсан бэлэн хоол гаргаж, сүлжээ дэлгүүрүүдээр борлуулах болжээ.

Тус компанийн шийдэл бизнесийг нь өсгөж чадах болов уу? Санал бодлоо хуваалцаарай. 😉

💸🫴🏻 Арыг чинь даая

Хэлж биш хийсэж ирдэг дээ! Санхүүгийн байдал улаанаараа эргэж байтал гэнэтийн төлбөр тооцоонд унавал хаашаа хандах вэ? М банк ₮200,000-₮480,000 хүртэлх үнийн дүнтэй М кредит пэй зээлийн бүтээгдэхүүн гаргажээ. 📢

Ямар гээч гайхамшиг вэ? 

• ☝🏻 Гялс: Банканд ирэх шаардлагагүй, М банкны апп-аараа ороод л зээлийн эрхээ тооцуулах нь.

• 🫂 Ялгалгүй тусалъя: Ингэхдээ 18 нас хүрсэн, хугацаа хэтэрсэн зээлийн түүхгүй байхад л болоо. НДШ төлдөггүй гээд санаа зовох шаардлагагүй.

• 😎 Хүссэнээрээ: За тэгээд аль ч дүнгээр авсан хамгийн багадаа 10%-тай дүйцэх дүнгээс эхлээд 12 сар хүртэл хуваан төлөх нь ээ. 

Гэснээс М банкаар төлөх төлбөр тооцоо, Qpay болон M hub цэс дээрх хэрэглээний төлбөртөө ашиглах боломжтой юм байна шүү.

🍋 Монгол Улс 1990-2005 онд 300 мянга гаруй төрөлт алджээ. Иймд ЗГ-аас хүн амын бодлогоо сайжруулах ажлын хэсэг байгуулж хүчин төгөлдөр үйлчилж буй 800 гаруй хуульд хүн амын өсөлтийг дэмжсэн хууль байгаа эсэх, хэрхэн сайжруулж болох тал дээр судалж буй гэнэ. Цаашлаад нийгмийн халамжийн багц хуулиудыг хамгааллын бодлого, хөдөлмөр эрхлэлтийг дэмжсэн бодлого руу чиглүүлэн өөрчлөх юм гэнэ дээ.

🍋 Hyundai (HYMTF) Америкт $21 тэрбумын хөрөнгө оруулалт хийнэ. Эхний ээлжид Америкт $5.8 тэрбумаар төмөрлөгийн үйлдвэр барьж, цаашдаа ханган нийлүүлэлтийн сүлжээгээ тэлэх нь. Нөгөө талд ихэнх бүтээгдэхүүнээ гаднын орнуудад үйлдвэрлэдэг Apple (AAPL) Хятадын сэргээгдэх эрчим хүчний салбарт $99 саяын хөрөнгө оруулахаар зэхэж байгаа. Технологийн аваргууд худалдааны дайнаас ангижрах гэж чардайж байна даа.  

🍋 Тээвэр хөгжлийн банк картын системийн аюулгүй байдлын PCI-DSS стандартыг нэвтрүүлэв. Тус стандартыг гаргагч PCI Security Standard Council-г American Express (AXP), Discover Financial Services (DFS), JCB International, Mastercard Worldwide (MA), Visa International (V) зэрэг гол 5 төлбөрийн систем хамтран байгуулсан бөгөөд дансны мэдээллийн аюулгүй байдлыг хангах, хамгаалах стандартуудыг тасралтгүй хөгжүүлдэг аж.  

🍋 Xiaomi (1810.HK) шинээр хувьцаа нэмж гарган $5.5 тэрбумыг татан төвлөрүүллээ. Ингэхдээ 800 сая ширхэг хувьцааг тус бүр нь HK$53.25-оор гаргажээ. Үүнээс гадна сүүлийн үед хамгийн өндөр өсөлттэй байгаа хувьцаануудыг багтаасан Hang Seng (^HSI) индекс 2023 онд 13.8% буураад байсан ч өнгөрсөн онд 17.7% өссөнөөр Хонконгийн ХЗЗ-ийг өнгөлж эхэллээ.

• 🔬 Гайхамшиг! AI хорт хавдрыг 99% нарийвчлалтай илрүүлдэг болсон гэнэ. (BGR)

• 🎓 Словакт сурчхаад ирэх үү? (БоловсролынЯам)

• 🌌 Бод доо, бид ертөнцийн ердөө 5%-ийг л судалсан байна. (CFA) 

• 🏙️ “Ногоон-Улаанбаатар орон сууц төсөл” ажлын байр зарлажээ. (Ulaanbaatar)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ