🅰️ Онцгой хүсэмжит бизнес

POWERED BY

Cheers to 50 years! 🎉 Билл Гейтс, Пол Аллен нар 1975 онд Microsoft-г анх байгуулахдаа компьютерыг хүн бүрд хүртээмжтэй болгохыг зорьж байсан. Үүнээс хойш хэдийн 50 жил өнгөрч тэдний бүтээгдэхүүн бидний өдөр тутмын амьдралын салшгүй нэг хэсэг болжээ. Харин дараагийн 50 жилд юу болох бол? 

FRC: 2024 онд бүртгэлтэй 12 виртуал хөрөнгийн үйлчилгээ үзүүлэгч дээр арилжаалагдаж буй дотоодын 42 виртуал хөрөнгийн зах зээлийн нийт үнэлгээ жилийн өмнөхөөсөө 6.8% өсөж ₮258.3 тэрбум төгрөг болжээ.

POL: Авлигатай тэмцэх газрын даргаар З.Дашдавааг улируулан томилохоор боллоо. 

CUS: Он гарснаас хойш экспортолсон нүүрсний биет хэмжээ 16.3 сая буюу өмнөх жилийн мөн үеэс 10.5% буураад байна.
 

💰 ЗГҮЦ арилжаа: Сард ₮20 тэрбум 

Өчигдөр Монголын Хөрөнгийн Бирж ХК (MSE)-иас Засгийн газрын дотоодын үнэт цаасны арилжааны мэдээг гаргасан. Энэ арилжаа яаж явагдах вэ?

⏳ Түүх сөхье

Анх 2012 онд өмнө Засгийн газрын дотоод үнэт цаас (ЗГҮЦ)-ыг Монголбанкаар дамжуулан арилжаалдаг байв. Үүний дараа 2015 онд буюу одоогоос 10 жилийн өмнө ЗГҮЦ-ны тодорхой хэсгийг биржээр дамжуулан арилжаалж эхэлсэн байдаг. Үүнээс хойш тус оны 3-р сарын байдлаар МХБ нийт ₮80 тэрбумын ЗГҮЦ-ыг арилжаалснаар өдрийн дундаж арилжааны дүн нь ₮10-₮20 саяас ₮1.5 тэрбум болтлоо өсөж байжээ. Харин 2017 онд ЗГҮЦ-ны нээлттэй арилжааг зогсоосон байдаг. 

🧮 8 жилийн дараа: Улирлын ₮60 тэрбум

Хөрөнгийн зах зээлд дээрх он жилүүд шиг идэвх сэргэлт авч ирэхээр ЗГҮЦ-ны дотоодын арилжааг энэ сарын 16-наас сэргээж байгаа. Энэ нь хөрөнгө оруулагчдад хөрвөх чадвар сайтай санхүүгийн хэрэгсэл санал болгох, зах зээлийн суурь хүүг тогтоох зорилгыг давхар агуулж буй. Арилжааны тухайд, энэ улирлын 4-6 сарын хооронд сар тутамд ₮5 тэрбумын 4 удаагийн арилжаа зохион байгуулж нийтдээ ₮60 тэрбумын арилжаа явагдана. 

• 📆 Онцлог: Хугацааны хувьд сарын дунд үеэр 1 өдөрт 2 удаа, сарын сүүлээр 1 өдөрт 2 удаа байх юм. Харин үнэт цаасны төрөл нь хямдруулалтай болон купонтой гэж хуваагдах бөгөөд хямдруулалтай ҮЦ-ны хугацаа богино буюу 26-52 хоног байх нь ээ. 

• 🔍 Ямар өөрчлөлт гарах вэ? Ингэснээр үнэт цаасны зах зээл идэвхжиж бусад компаниудын үнэт цаас гаргах сонирхол нэмэгдэх, хүүгээ ЗГҮЦ-ны жишиг хүүгээр гаргах, хөрөнгө оруулагчид бусад үнэт цаасыг сонгохдоо ЗГҮЦ-ны өгөөжтэй харьцуулж үнэлгээ, эрсдэлийг тодорхойлох зэрэг боломжууд үүснэ. 

• 📌 Хамгийн чухал нь өмнө нь ЗГҮЦ-ыг ихэвчлэн арилжааны банкнууд авч байсан бол энэ удаад хувь хүмүүс, хөрөнгө оруулалтын сангууд оролцох, хүүгийн түвшин, арилжааны явцыг ил тод харах боломжтой болж байна. Угаас одоогоос 10 жилийн өмнө уг арилжааг зогсоогоогүй байх үед банкууд ₮2.2 их наядын ЗГҮЦ эзэмшиж байсан билээ. 

Эцэст нь… Муутай ч сайнтай ч ЗГҮЦ-ны дотоодын арилжаа зөв голдиролдоо орох нь. Одоо оролцоо, өгөөж, нөлөө нь ямар байх нь уу гэдэг сонирхолтой байна даа. 

• ✒️ Сонгуулийн үеэр иргэдийн сонгох, сонгогдох эрх хэрхэн зөрчигддөг вэ? (ХЭҮК)

• 👑 Шинээр төрсөн $-н тэрбумтнуудын 70% нь өвлөж биш, өөрийн хүчээр хөрөнгөө босгож. (Forbes)

• 🔍 Эгийн голын УЦС-ын байгаль орчны нарийвчилсан нөлөөллийн үнэлгээг ₮8 тэрбумаар хийлгэх нь. (GOV)

• 🙎🏻‍♂️ Илон Маск үүрэгт ажлаасаа шантрав уу? (TheGuardian)

🅰️ Онцгой хүсэмжит бизнес

Amazon (AMZN), AppLovin болон OnlyFans-н үүсгэн байгуулагч Тим Стокли нар TikTok-г Америкт хориглогдохоос өмнө санд мэнд худалдан авах санал тавилаа. Сүүлийн боломж, сүүлийн нэр дэвшигчид…

Дайраа 🆚 дайлаан

Доналд Трампын TikTok-г Америкт хориглох хуулийн хэрэгжилтийг 75 хоног хойшлуулснаар Илон Маск, MrBeast, Oracle (ORCL), Microsoft (MSFT) тэргүүтэй нөлөө бүхий хүмүүс TikTok-г ангуучлах болсон. Үүнээс ил болсон үнийн санал нь Microsoft $40 тэрбум, MrBeast ба түүний нөхөд $20 тэрбум гаруй, шарк Кевин О’Лири $20 тэрбумыг санал болгож буй. Харин шинэ саналуудын хувьд, 

• 📝 Хэрэв Amazon TikTok-г худалдан авбал Хятадын оронд Америкийн иргэдийн датаг өөрийн үүлэн технологи болох AWS-д хадгалах гэнэ. Үүнээс гадна мэдээж TikTok Shop-н худалдааны урсгалыг ашиглахаар төлөвлөж буй. 

• 🤔 Харин Тим Стокли TikTok-г худалдаж авбал өөрийн контент бүтээгчдэд зориулсан Zoop-тэй нэгтгэх магадлал маш өндөр. Тэрбээр дангаар TikTok-г худалдан авах санал гаргаагүй буюу Hedera крипто сүлжээг удирддаг хөрөнгө оруулалтын Hbar Foundation-тай хамтран гаргасан юм. 

Цаашлаад, гар утасны технологийн AppLovin худалдан авах саналдаа казиногийн магнат Стив Виннийг татан оролцуулахаар ярилцсан сурагтай. Угаас хэр баргийн аавын хүүгийн барах хэлцэл биш учраас томчууд нь өндөр дүнгээр дуугарч, арай жижгүүд нь нэр хүндтэй бизнесменүүдийг татан оролцуулж байна даа.

😚 Хэрэглэгчдээ өгөөч

Эхэндээ тус платформыг худалдан авах санал гаргагсдыг технологи болон AI, энтертайнмент болон сошиал медиа гэж 2 хувааж байсан бол одоо цахим худалдаа, криптовалют болж өргөжөөд байна. 

• 🔝 Тэдний гол зорилго нь TikTok-н 170 сая хэрэглэгчийн бааз болон зар сурталчилгаа, худалдаа наймааны төвлөрөл. Хэдийнээ бүрдчихсэн энэ том баазыг AI сургахаас эхлээд яаж л бол яаж ашиглана. Авахгүй алдчихвал хайран. 

Эцэст нь… Эрх баригчид тус асуудлыг цааш сунжруулалгүй 4 сарын 5-нд шийдвэрлэхийг хүсэж байгаа ч хуулиараа ByteDance TikTok-н 20%-иас дээш эзэмшилтэй байх боломжгүй. Энэ бол дан ганц ByteDance-н гарах эсвэл зарах сонголт бус Хятадын асуудал учраас нэлээн үзээтэй л өрнөж байна.

💡 Таавар таацгаая

… нь үргэлж өөдөө өгсдөг ч, хэзээ ч буцаж буудаггүй. Тэр юу вэ? Таасан бол хариултаа бидэнд илгээгээрэй. 😉

🍋 Америк импортын бүх бараанд 10%-ийн суурь татвар ногдууллаа. Үүнд Монгол, Их Британи, Австрали гэхчлэн 100 гаруй орноос гадна Антарктид хавийн оцон шувуунаас өөр сүүтгэнэх амьтангүй арлууд ч хүртэл өртсөн байна. Тэгвэл хамгийн их импортын татвар ногдуулсан нь Камбожид 49%, Хятадад 34% тэр ч бүү хэл Америктай сүүлийн үед бизнес, хөрөнгө оруулалтын салбаруудад зуз байгаа Японд 24% байна. 

🍋 Нийслэлийн 18 байршилд олон түвшний уулзвар, 9,000 м авто зам, 4,500 м нүхэн гарц барина. Нэр дурдагдсан байршлууд нь Баруун 4 зам, Саппоро, 32-ын тойрог, ГХЯ, Төв шуудан, Зүүн 4 зам гэхчлэн байна. Улмаар замын хөдөлгөөний дундаж хурд 7.1 % нэмэгдэх тооцоолол хийж дээ. Ойрын үед нийслэлд хэрэгжих зам засвар, бүтээн байгуулалтын ажлуудын төлөвлөгөө ихээр ил болж байна шүү. Сайн нүдлээд аваарай.

🍋 Siemens (SIE.DE) Dotmatics-г $5.1 тэрбумаар худалдан авна. Энэ хэлцэл нь Siemens-н амьдралын шинжлэх ухааны салбарын хөрөнгө оруулалт, судалгаа, үйл ажиллагааны багц хөгжүүлэхэд амин чухал нөлөөтэй бөгөөд үйлдвэрлэлийн программ хангамжийн нийт боломжит зах зээлийг нь $11 тэрбумаар тэлэх хөшүүрэг болох юм. Гэснээс Siemens өнгөрсөн 7 хоногт Altair (ALTR)-г $10.6 тэрбумаар худалдан авсан. 

🍋 Цахилгаан скүүтер, дугуй жолоодон замын хөдөлгөөнд оролцогчийн үүрэг, хориглох зүйлсийг хуульчилна. Тодруулбал, эдгээр тээврийн хэрэгслийн ангиллыг шинээр тодорхойлж, жолоодох насны хязгаар, тээврийн хэрэгслийн техникийн дээд хурд, зорчихыг зөвшөөрсөн замыг тодорхой болгох нь. Түүнчлэн эдгээрийг жолоодон замын хөдөлгөөнд оролцогч жолоочийн үүрэг, хориглох зүйлсийг хуульчлах нь ээ. 

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ