👹 Тас хар сүүдэртэй мангас

POWERED BY

Morning! Энэ жилийн цагаан сар шинийн нэгэнгүй нэмээд амралтын өдөр тохиож байгаа. Тэгвэл Лхагва гарагт ЗГ ээлжит хуралдаанаараа цагаан сарын амралтын зохицуулалтыг хэлэлцэх гэнэ дээ. Энэ жил ер нь цагаан сар ч гэлтгүй ихэнх олон нийтийн амралтын өдөр Бямба, Нямд таарч байгаа. Март-8 ч Бямба гарагт. Азгүй жил гэх үү, бүтээмжтэй жил гэх үү? 😅 

MSE: Монгол Алт ХК (ERS) 2024 оны цэвэр ашгаасаа нэгж хувьцаанд ₮370, Монголын Цахилгаан Холбоо ХК (MCH) ₮1, Тахько ХК (TAH) ₮108-ийн ногдол ашгийг тус тус хуваарилна. 

BOM: Монголын худалдан авалтын менежерийн ерөнхий индексийн утга 2024 оны IV улиралд өмнөх улирлаас 2.5 нэгж хувиар буурсан ч сүүлийн 9 улирал дараалан тэлэлтийн мужид хадгалагдав. 

MFC: Монос Хүнс ХК-ийн (MFC) хувьцаа эзэмшигчдийн хурал 4 сарын 9-ний 10 цагт болно.

😋 Хүнсний акулуудын ашиг

МХБ (MSE)-ийн ТОП-5 хүнсний луугаруудад хэдийн хөрөнгө оруулалт хийсэн 82 мянган хөрөнгө оруулагч болон тэднийг шохоорхож байгаа уншигчид анхаарлаа хандуулаарай. Тэдний 2024 оны үр дүнг базаж харъя. 

🤑 Нүд булаам ашиг

АПУ (APU), Сүү (SUU), Түмэн Шувуут (TUM), Газар Шим Үйлдвэр (GAZR), Монос Хүнс (MFC) гэсэн 5 хүнсний компанийн цэвэр ашиг 2024 онд дунджаар 23% өсөж нийт ₮234.1 тэрбумыг олсон байна. Арга ч үгүй биз ээ тэд өнгөрсөн онд нийтдээ ₮1.4 их наядын хөрөнгө удирдсан нь өмнөх жилээсээ дунджаар 14% өссөн дүн. 

• 👑 Түмний тэргүүн: Энэ дундаас АПУ ХК-ийн нийт хөрөнгө нийлбэр дүнгийн 74.5%-ийн дангаараа бүрдүүлж байгаа. Тэдний хувьд 2023 оныг тааруухан үдсэн. Тодруулбал, борлуулалтын өртөг болон зардал нь өссөнөөр цэвэр ашиг нь 7.5% буурч байв. Харин 2024 онд борлуулалт нь 20.5%, хүүгийн орлого нь 121.7% тус тус өссөнөөр цэвэр ашиг нь 53.2% өслөө. 

• 🤔 ROE өндөр ч P/E бага: Цаашлаад Монос Хүнс ХК-ийнхаас бусдынх нь хөрөнгө өссөн аж. Түүнчлэн өөрийн хөрөнгийн өгөөж буюу ROE нь дунджаар 21.1% байна. Энэ дүн 15%-иас дээш байвал ашигт ажиллагаа өндөр, хөрөнгө оруулалтын үр өгөөж сайн байгааг илтгэдэг. Гэхдээ P/E нь дунджаар 7.6 буюу зах зээлийн үнэлгээ тийм ч өндөр биш байгаа юм. 

📈 Зах зээлийн хувьд

Ерөнхийдөө бол манай ТОП-20 компани банк санхүү болон хүнс гэсэн 2 салбарын төлөөллөөс бүрдэх хандлагатай болсон. Харин энэ жилийн хувьд санхүүгийн салбарынхан зонхилж Газар Шим Үйлдвэр ХК болон Монос Хүнс ХК сагснаас хасагдсан. Тэгвэл хасагдсан $MFC-н зах зээлийн үнэлгээ 2024 онд 11.1% буурчээ. 

• 📊 Сагсанд үлдэгсдийн хувьд: Шунхлай Групп бүх ажилтандаа АПУ ХК-ийн хувьцаа олгосон. Эргээгээд $APU-н зах зээлийн үнэлгээ 2024 онд 17.3% унасан бол энэ он гарснаас хойш үргэлжлүүлэн ₮5 тэрбумаар буураад байна. Харин $SUU-н зах зээлийн үнэлгээ 2024 онд хамгийн ихээр буюу 27.4%, араас нь $TUM-нх 16.9% тус тус өсжээ. 

Эцэст нь… Хүнсний акулуудын нөхцөл байдал нэг иймэрхүү байна даа. Хэрэв энэ салбарын төлөөллүүдэд хөрөнгө оруулахаар төлөвлөж байгаа бол санхүүгийн нөхцөл байдал болон харьцаа үзүүлэлтүүдийг нь сайн хянаж, харьцуулж үзээрэй гэж зөвлөе. 

👹 Тас хар сүүдэртэй мангас

Ойрын 1xbet цахим ертөнцийг шуугиулж байна даа. 1xbet-р дамжиж Монголоос жил бүр Орос руу $500 сая урсдаг гэнэ үү? 

😬 Юу хийв? 

Монголд цахим мөрийтэй тоглоом тахал шиг тархаж байгаа талаар сүүлийн жилүүдэд идэвхтэй ярьж, одоо ЗГ уг шинэ төрлийн тахлын эсрэг хөдөлж эхлэв. 

• Тас! -9: Тодруулбал, 1xbet-тэй холбоотой 25 домэйн болон өөр 9 вэбсайтыг хааж, цахим орчинд мөрийтэй тоглоомыг сурталчилдаг 100 гаруй хаяг, группүүдийг хаалгуулахаар Meta (META)-руу хүсэлт явуулжээ. Ер нь л бүгдийг нь хаана гээд байгаа. Гэхдээ хаасан 9 нь сураггүй л санагдаад байна.

• Таслан зогсоох = Хаана: Цаашлаад, Зөвшөөрлийн тухай хуульд өөрчлөлт оруулж хориглох арга хэмжээ авах бололтой. Өөрөөр бол зөвшөөрөл авч төлбөрт таавар, бооцоот тоглоомын үйл ажиллагаа явуулах хориотой болно. 

🦹🏻‍♂️ Тэд аргаа олно!

Хуулиар хориглосон ч мөрийтэй тоглоом зохион байгуулагчид домэйнээ солих, цаашлаад хэрэглэгчид нь сүргээрээ VPN ашигладаг болох гэхчлэн улам далд болох эрсдэлтэй. Тухайлбал, Хятадад онлайн мөрийтэй тоглоом тогловол өндөр торгуультай, хорих ялтай ч цахим мөрийтэй тоглоом тоглосоор л  байна. Харин ч олон хүмүүс Макао болон оффшор платформ руу нүүдэлсэн гэдэг. Одоо хил дамнасан цахим мөрийтэй тоглоомын зохицуулалтыг хатууруулах талаар ярьж байгаа. 

• 🇷🇺 Мөн 2014 онд Орос 1xbet-н эсрэг арга хэмжээ авч, домэйнийг нь хаах, үүсгэн байгуулагчдынх нь нэгт 3 жилийн хорих ял ногдуулсан ч одоо болтол тус улсад өөр нэрээр, сүүдэрт үйл ажиллагаа явуулдаг. Мөн хуулиар хориотой болсны улмаас эрх баригчидтай холбоо, сүлбээтэй болсон гэх яриа ч бий. 

🤔 Зохицуулах уу, хорих уу? 

3 жилийн өмнө Монгол Улс казинотой болох талаар яригдаж, давхар Бооцоот таавар, хонжворт сугалааны тухай хуулийн төслийг хэлэлцэж байсан. Хуулийн төсөлд тусгагдсан чухал заалт нь бооцоот таавар эрхлэх бол ₮1 тэрбум, хонжворт сугалаа бол ₮500 мянгын өөрийн хөрөнгөтэй байх, Монголд өөрийн сервертэй байх талаар тусгасан байв.  

• 🤔 Тас хориогүй бусад улсын хувьд, Австралид оффшор мөрийтэй тоглоомуудыг хориглож, дотоодын лицензтэй ААН-үүдийг хатуу зохицуулалттай ажиллуулдаг бол Их Британи лиценз нэмээд ашгаас нь 21%-ийн татвар авах гэхчлэн зохицуулж байна. 

Эцэст нь… Одоо ЗГ цахим мөрийтэй тоглоомын эсрэг дайн зарлах уу, аль эсвэл 3 жилийн өмнө ярьж байснаараа зохицуулалттай болгох уу гэдэг нь сонирхолтой. Уг нь бидэнд тас хорьсон улсуудын жишээнээс эхлээд хагас хорьж, хатуу зохицуулалттай болгосон гээд харж болох олон л жишээ байна даа.  

Excel дээр томьёо ашиглалгүй өгөгдлүүдийн нийлбэрийг харах арга сурцгаая. 👇

• Үүний тулд A баганад 10, 15, 30 өгөгдлүүд доош цуварсан байна гэж төсөөлье. 

• Алхам 1️⃣: A1 нүд дээр дарсан чигтээ Ctrl товчоо дарж A2, A3 нүднүүд дээр товшоорой. 

• Алхам 2️⃣: Ингээд доор байрлах “Status Bar” хэсэгт нийлбэрийг автоматаар харуулна. Жишээ нь: Sum: 55 гэж харагдах юм. 

Харин бусад тооцооллыг Алхам 1️⃣-ийн араас баруун товшоод "Customize Status Bar" цэсэд байрлах "Average", "Count", "Numerical Count" гэхчлэн сонголтуудаас хараарай.

🍋 Германы шинэ канцлераар Христийн ардчилсан намын дарга Фридрих Мерц сонгогдлоо. Тус нам нь нийт сонгогчдын 28.6% буюу харьцангуй олонхын санал авч, Бундестагт 208 суудалтай болсон бол хэт барууны нам 152, Социал-демократ нам 120 суудалтай болж буй. Тэгвэл энэхүү Германы ээлжит бус парламентын сонгуулиар сүүлийн 35 жилийн хугацаанд хамгийн олон буюу нийт сонгогчдын 83.5% нь оролцсон байна.

🍋 Alibaba (BABA)-н цэвэр ашиг өнгөрсөн оны III улиралд 2023 оны мөн үеэс 333% өсөж $6.71 тэрбум хүрэв. Харин үйл ажиллагааны орлого нь мөн хугацаанд 83% өсөж $5.65 тэрбум болсон байна. Үүнд онлайн худалдааны AIDC-н бизнесийн орлого нь 32% өсөж $5.17 тэрбум болсон бол үүлэн тооцооллын Cloud Intelligence Group-н орлого 13% өсөж $4.35 тэрбумыг олсон нь голлон нөлөөлж.

🍋 М-Си-Эс Групп 2024 онд нийт ₮4.5 их наядын худалдан авалт хийжээ. Үүнээс дотоодын 5,817 ААН болон 2,534 хувь хүнээс ₮3.1 их наядын бараа, ажил үйлчилгээ худалдан авсан аж. Түүнчлэн Монгол Улсад үйл ажиллагаа явуулж буй ААН-үүдийн 5.3% буюу ойролцоогоор 5,700 гаруй компанитай худалдан авалтын чиглэлээр хамтран ажилласан байна.

🍋 Berkshire Hathaway (BRK-A)-н цэвэр ашиг өнгөрсөн оны IV улиралд 2023 оны мөн үеэс 7.5% буурч 89 тэрбум болов. Тайлант хугацаанд тэдний ХО-ын багцын нийт 38.2%-ийг эзэлдэг $AAPL-н хувьцааны үнэ 10%, $BAC-н 16% буурсан нь нөлөөлжээ. Эсрэгээрээ $BRK-A-н үйл ажиллагааны орлого нь 71% өсөж $14.5 тэрбум хүрч дээд амжилт тогтоосон бол даатгалын бизнесүүдийнх нь орлого нь 66% өсөж $9 тэрбум болжээ. 

• ✍️ Илон Маскын намтрын зохиогч түүний 110-аас дээш IQ-г үгүйсгэв. (Benzinga)

• 🫂 Сурагчдын сэтгэл зүйн эрүүл мэндийг дэмжихэд AI ашиглаад эхэлж. (TechCrunch)

• 🥊 Технологийн луугаруудыг нь хаздаг ЕХ-ны хуулиудыг Америк хараандаа авлаа. (Reuters)

• ✨ ТОП брэндүүд номыг тансаг байдлын илэрхийлэл болгон зар сурталчилгаандаа ашиглах болов. (WSJ)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ