🪙 Крипто самурай Нью-Йоркт

POWERED BY

Шинэ 7 хоногийн мэнд ээ! Google map-д Монголын авто зам, түүний дагуух үйлчилгээний байгууламжууд, түүхэн дурсгалт газрууд, төлбөр авах цэг, амрах цэгийн 360 мэдээллийг оруулсан гэнэ ээ. Гадна дотнын найзууддаа харуулаарай. 🗺️

BOM: Монголбанк бодлогын хүүг 10%-д хэвээр хадгалах шийдвэр гаргалаа. Түүнчлэн арилжааны банкнуудын ₮-ийн болон гадаад валютын заавал байлгах нөөцийн хувь хэмжээг 1 нэгж хувиар тус тус нэмэгдүүлэв. 

EU: Европын Төв банк бодлогын хүүгээ 25 суурь нэгжээр бууруулж 3% болгосон нь энэ жилийн 4 дэх бууралт боллоо. 

MNG: Багануурын 50МВт/200МВт.ц хүчин чадалтай батарей хуримтлуурын станц бүрэн хүчин чадлаараа ажиллаж төвийн системд эрчим хүч нийлүүлж эхлэв. Ингэснээр нийслэлийн хэмжээнд нийт ачааллын 3%-ийг хангах юм. 

OTC: Өнгөрсөн 7 хоногт биржийн бус зах зээлд ₮51 тэрбумын болон $30.5 мянгын арилжаа хийгдэв. Үүнээс анхдагч зах зээлд ₮21 тэрбумын арилжаа хийгдлээ.

 ❌ Монгол зорилго: Хөрөнгө оруулагчдаа үргээх!!!

Гадаад өр өнгөрсөн жилийн мөн үеэс 7.2% өсөж $35.6 тэрбумд хүрээдэх лээ. Өр л нэмэгдээд байх юм гаднаас орж ирж байгаа хөрөнгө оруулалт яав, ийв? 

🏃🏃‍➡️ Хөрөнгө оруулагч улс солигдсон!

Он гарснаас хойш эхний 9 сард Монгол руу чиглэсэн гадаадын шууд хөрөнгө оруулалт (ГШХО) 26% өсөж $2.9 тэрбумд хүрээд буй. Хөрөнгө оруулагч орнуудын динамикийн хувьд, 2020 болон 2021 онд Канад нийт ГШХО-ын 50% гаруйг эзэлдэг байсан бол 2022 онд Нидерланд 66.2%, 2023 онд 38.3%, харин энэ оны III улирлын байдлаар 46.6%-ийг бүрдүүлэх болов. Канад болон Нидерландын хөрөнгө оруулалт татарч байх зуур Их Британи, Сингапурын хөрөнгө оруулалт өнгөрсөн оны багцад мэдэгдэхүйц томорсон.

• ☝️ Хамгийн сонирхолтой нь 2024 оны I улиралд бусад гэх ангилалд багтдаг орнуудын ГШХО нийт дүнгийн 96.7%-ийг эзэлсэн явдал. Ямар, ямар орнууд байсан гэдэг нь сонирхолтой. 

• ⛏️ Аль салбар руу? Монголд уул уурхайгаас өөр хөрөнгө оруулалт татдаг салбар байхгүй гэдгийг тус салбар тогтмол нийт ГШХО-ын 80% гаруйг, зарим онуудад 90%-ийг ч бүрдүүлж байснаас харагдана. 

• 🔎 Өр үү, хөрөнгө оруулалт уу? Зөвхөн III улиралд л гэхэд ГШХО-ын орох урсгал $830 сая байсан бол гарах урсгал нь $289 сая байв. Ингэснээр цэвэр дүнгээр $541 саяын ГШХО л орж ирсэн гэсэн үг. Учир нь том зургаараа ГШХО-ын үлдэгдлийн 51% буюу $16.7 сая нь зээлийн эх үүсвэр, 49%-ийг хувь нийлүүлсэн хөрөнгө оруулалт бүрдүүлж байгаа.   

Төв Азийнхан анхаарлын төвд

Казакстан 2029 он гэхэд $150 тэрбумын ГШХО татах бадрангуй зорилттой. Ингэхдээ технологи, сэргээгдэх эрчим хүчний салбар руугаа ихээхэн хөрөнгө оруулалт татахаар төлөвлөжээ. Өнгөрсөн жилд л гэхэд тус улсад гадаадын хөрөнгө оруулалттай төслийн тоо өмнөх жилээсээ 132% өсөж 65 болсон байна. Энэ дунд $1 тэрбумаас дээш хөрөнгө оруулалттай 3 төсөл байгаа бөгөөд гол хөрөнгө оруулагчид нь Герман, Хятад. 

• Цаашилбал, 2019-2023 онд гаднын хөрөнгө оруулалттай 185 төслөөр нийт $26 тэрбумыг татаад буй. Тус улс нь геополитик төдийгүй газарзүйн байршил, ашигт малтмалаас ихээхэн хамааралтай байдал гэхчлэн Монголтой хамгийн ойр жишээ. Айлын хүүхэд гэсэн шиг атаархтал өөрчлөгдөж байгаа даа. 

Эцэст нь… Харин бид бол хууль, эрх зүйн орчноороо хөрөнгө оруулагчдыг орж ирэхээс нь өмнө цаашлаад нэг удаа хөрөнгө оруулаад л “Дахиж л Монголд хөрөнгө оруулахгүй юм шүү” гээд хашраагаад үддэг. Бусад нь болгоод байхад бид л болдоггүй нь юм байна. 

 🇯🇵 Японы крипто бирж дэлхийд

Крипто самурай Нью-Йоркийг эзэллээ. Юу гэсэн үг вэ гэж үү? Японы криптовалютын бирж Coincheck NASDAQ дээр бүртгэлтэй боллоо. 

• 🪙 Coincheck: NASDAQ дээр IPO хийсэн Coincheck Group (CNCK) нь "Coincheck" крипто биржийг эзэмшдэг. Coincheck нь 2012 онд үүсгэн байгуулагдсан Японы тэргүүлэх криптовалютын платформ бөгөөд криптовалют худалдах, худалдан авах, хадгалах, NFT худалдаа зэрэг үйлчилгээ үзүүлдэг. 

🏆 Японы анхны крипто ялалт

Coincheck Америкт бүртгэлтэй Японы анхны крипто бирж болж шинэ түүх эхлүүлж буй. Тэдний түүхээс сөхвөл, 2018 онд тохиосон хакерын халдлага Coincheck-н нэр хүндийг ихээхэн өөрчилсөн. Энэ үеэр ойролцоогоор $530 саяын криптовалют алдагдсан нь дэлхийн криптовалютын салбар дахь хамгийн том хохирлуудын нэг болсон. Уг үйл явдлаас 3 сарын дараа санхүүгийн ертөнцөд томоохон байр суурь эзэлдэг Японы онлайн брокер Monex Group (8698.T) Coincheck-г $33.6 саяар худалдан авсан аж. 

• 📌 Эргэлтийн цэг: Улмаар Coincheck шинэчлэгдэж Америк болон Япон дахь криптовалютын зах зээлд бизнесээ өргөжүүлэхээр ажиллаж байна. Coincheck дэлхийн шилдэг 20 криптовалют биржийн жагсаалтад тогтмол ордог гэдэг утгаараа 2.15 сая хэрэглэгчтэй болоод буй. 

🔍 Цаад наад учир

Coincheck нь Thunder Bridge Capital (THCPW) компанитай нэгдэж NASDAQ дээр гарсан хэрэг. Уг нэгдэх үйл явц 2022 онд эхэлсэн ч SEC-н ил тод байдлын шаардлага нэмэгдсэний улмаас удааширсан аж. Энэ бүхний эцэст Coincheck анхны үнэлгээгээр ойролцоогоор $1.3 тэрбумын зах зээлийн үнэлгээтэйгээр бүртгэгдээд байна. Coincheck-н NASDAQ-д бүртгүүлэх зорилго нь олон улсын хөрөнгө оруулагчдыг татах явдал байв. 

• Өнгөрсөн 🆚 Ирээдүй: Coincheck-г хакердсаны дараа Японы Санхүүгийн Үйлчилгээний Агентлаг (FSA) тус компанид шалгалт хийж нэлээд түүртүүлж байв. Харин тэд одоо Америкийн бирж дээр гаргаснаар зах зээлийн нөхцөл байдал, ирээдүйн хөгжилд нийцүүлэн бүтээгдэхүүн, үйлчилгээнийхээ баазыг өргөжүүлэх боломжтой болж байна. 

🇲🇳 Суралцах нь

Бид энэ түүхээс олон зүйл суралцах боломжтой. Coincheck-н хакерын халдлагын дараах эрс шинэчлэл нь зөв менежмент, стратеги төлөвлөгөөний чухлыг харуулсан сайн жишээ. Монголын криптовалютын зах зээл ч мөн эрсдэлийг зөв удирдаж, олон улсын стандартын дагуу ил тод байдлыг хангах замаар хөгжих боломжтой. Гэтэл манайд өмнө нь сөхөгдсөн хэргүүдийн шийдвэр нь ч тодорхойгүй, яасан нь мэдэгдэхгүй нөхцөл байдалтай байна. 

Монгол орны нийт газар нутгийн 8.28%-ийг ойн сан эзэлдэг гэнэ. Тэдгээрийг насны бүлгээр нь ангилан харцгаая. 👀

• Болц гүйцсэн хөгшин ой 14.1%: Үүнд шинэс 79.3%, нарс 5%, харин хуш 8.9,

• Болц гүйцэж яваа ой мөн 14.1%: Харин энэ бүлэгт гацуур 0.2%, жодоо 0.01%, харин хус 6% байгаа бол,

• Дунд насны ой 11.49%: Улиас 0.17%, улиангар 0.05%, мөн хайлаас 0.006% байна.

• Залуу ой 0.57%: Түүнчлэн бургас 0.25%, тоорой 0.005%, заг 0.15% байгаа юм. 

✨ Монгол бартендер дэлхийд өрсөлдлөө

“Heineken Global Draught Championship 2024” тэмцээний финалын шатанд Монгол Улсаа төлөөлөн “976 Ulaanbaatar” рестораны бартендер Наранбилэгт шалгарч V байр эзэлжээ. 👏

Тус тэмцээнийг дээд зэргийн шар айргийн брэнд Heineken 2013 оноос Задгай шар айргийг төгс аягалж, үйлчлэх дэлхийн аварга бартендер шалгаруулах зорилготой жил бүр зохион байгуулж буй.

• 🔝 Өрсөлдөөнтэй: Тэмцээний финалын шат Heineken-н өлгий нутаг Нидерландын Амстердамд болсон бөгөөд Монгол, Швед, Хорват, Энэтхэг зэрэг дэлхийн өнцөг булан бүрээс ирсэн ТОП бартендерууд өрсөлджээ.

• 🏆 Сорилттой: Үүнд бартендеруудын шар айргийн төгс аягалалтыг нийт 5 үндсэн шалгуур үзүүлэлтээр 3 үе шаттай шалгаруулсан аж.

Гэснээс АПУ ХК (APU) уг тэмцээнд ирэх онд ч шилдэг бартендеруудыг бэлтгэн өрсөлдүүлэх юм байна шүү. Stay tuned!

🍋 Harvard OpenAI болон Microsoft (MSFT)-н санхүүжилтээр AI сургалтын нээлттэй өгөгдлийн сан гаргана. Тус өгөгдлийн санд Google Books төслийн хүрээнд сканердсан, зохиогчийн эрхийн хамгаалалтгүй болсон 1 сая гаруй ном байрших аж. Ийнхүү AI хөгжүүлэгч жижиг стартапууд болон бие даасан судлаачид өндөр чанартай, боловсруулсан өгөгдлийн мэдээллийг үнэгүй ашиглах боломжтой болох нь.

🍋 Asahi Shuzo 100 мл сакэг ¥100 саяар зарахаар төлөвлөж байна. Тодруулбал тэд сансарт исэлтийн үйл явц хэрхэн өрнөдгийг судлах зорилгоор Олон Улсын Сансрын Станц (ISS)-ийн сансрын тусгай орчинд саке исгэх туршилт хийх аж. Хэрэв туршилт амжилттай болбол компани уг шинэ тогтоосон үнээр нийт ¥2 тэрбумыг олох төлөвтэй байгаа гэнэ. 

🍋 Mongolia Energy (MOAEY) ирэх оны 1 сарын 1-нээс Бермудийн хувьцааны бүртгэл, шилжүүлэг хариуцдаг агентаа өөрчилнө. Энэ хүрээнд компани Appleby Global Corporate Services-г гол хувьцааны бүртгэл болон шилжүүлгийн агентаараа сонгож буй. Мөн тэд Хонконгийн салбар дахь уг үүргийг Tricor Investor Services Limited-д шилжүүлсэн байна. 

🍋 Ирэх оны төсвөөс боловсролын салбарын 190 төсөл арга хэмжээг ₮472.7 тэрбумаар санхүүжүүлнэ. Уг төсөл арга хэмжээнүүд угтаа ₮1.3 их наядын өртөгтэй аж. Тэдгээрээс онцолбол, 39,670 хүүхдийн суудалтай 79 сургууль, 9,435 хүүхдийн ортой 60 цэцэрлэг гэх мэт багтаж буй. Цаашлаад хүүхдийн хоолны зардалд ₮31.4 тэрбумыг төсөвлөжээ. 

👔 Уул уурхай ба хүний нөөц

Уул уурхайн салбарт карьераа өсгөх, мэргэших сонирхолтой хүмүүс байна уу? Энэ удаад тус салбарын компаниуд ажилчдадаа яаж анхаарч, халамжилдаг талаар хүргэе. 

📈 Карьер + хөгжил

Уул уурхайн салбар нь Монголын эдийн засгийн гол тулгуур бөгөөд энд ажиллах хүсэлтэй залуусын тоо жилээс жилд нэмэгдэж байна. Угаас уул уурхайн салбарын дундаж цалин улсын дунджаас даруй 107% өндөр. Гэхдээ энэ салбар өндөр цалингаас гадна ажиллах орчны таатай нөхцөл, карьер өсгөх, мэргэжлийн хувьд тогтвортой хөгжих боломжоор хангадаг. 

📃 Бодит жишээ

Үйл ажиллагаа, менежмент, инновацаараа тэргүүлэгч “Оюу толгой” ХХК-д одоогоор 20 мянга орчим хүн ажилладаг бөгөөд нийт ажиллах хүчнийх нь 97.2%-ийг монгол иргэн бүрдүүлж буй. Мөн Рио Тинтогийн Монгол дахь салбарт 250 орчим Монголчууд ажилладаг. Оюу толгой компани ажилчдынхаа мэргэжлийн хөгжил, аюулгүй байдалд ихээхэн ач холбогдол өгдөг тул энэ оны III улиралд л гэхэд нийт 172,015 хүн/цагийн сургалтад ажилтнуудаа хамруулан ур чадварыг нь өсгөжээ.

• 🧑‍🏫👩‍🏫 Хөтөлбөрүүд: Тэд ажилчдаа хөгжүүлэхээс гадна Залуусын хөгжлийн, Шинэ төгсөгчийн хөгжлийн зэрэг 5 чиглэлийн хөтөлбөрийг тогтмол хэрэгжүүлдэг. Тэдний боловсролын чиглэлийн тэтгэлэг, хөтөлбөрт 2010 оноос хойш 2,052 оюутан сурагч, Карьер хөгжлийн хөтөлбөрт 2013 оноос хойш 1,589 сургагч хамрагдсан аж. Тэгэхээр томоохон компаниуд ажилчдаа ч хөгжүүлэн халамжилж, уул уурхайн салбарын шинэхэн мэргэжилтнүүдийг ч хөгжүүлдэг байх нь ээ. 

За тэгээд, уул уурхайн салбарын том компанид карьераа өсгөхөөр зорьж байгаа бол өөрөөсөө шаардах ур чадвараа нэмэгдүүлээд нээлттэй ажлын байруудыг сайн харж байгаарай. Оюу толгойн ажлын зар л гэхэд ЭНД байршдаг шүү.

•  📺 YouTube TV ирэх 1-р сараас эхлэн багцын үнээ сар бүр $10-оор нэмнэ гэнэ. (AwfulAnnouncing)

• 🏍️ “Dakar Rally 2025”-д Монгол Улсаас мотоциклын төрөлд өрсөлдөнө. (БТСУХ)

• 💰 Apple-г IPO+д $10 мянгаар хөрөнгө оруулагсад өдгөө $32.7 саятай байх нь. (Yahoo!Finance)

• 🔎 Илон Маск 2017 онд анх OpenAI-д ашгийн төлөө бүтэц санал болгож байж. (OpenAI)

• Даваа: Хятадын өнгөрсөн сарын ажилгүйдлийн тайлан танилцуулагдана.

• Мягмар: Америкийн ЗГ-ын 20 жилийн хугацаатай бондын дуудлага худалдаа эхэлнэ. 

• Лхагва: 11-р сарын банкнуудын нэгдсэн балансын тайлан гарна.

• Пүрэв: Араас нь банкнуудын харилцах, хадгаламжийн үлдэгдэл зарлагдана.

• Баасан: Эцэст нь банкнуудын зээлийн тайлантай танилцах нь дээ.

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг