🇲🇳 3 жилийн зэс олборлолтыг 1 жилд

POWERED BY

Morning! Хөрөнгийн зах зээлийн хувьд 2024 он ногоон бондоор амьсгалсан жил байсан бол энэ жил нэлээд сонин содон үйл явдлаар дүүрэн байх нь. Богд Банк хаалттай ХК болоод л, ойрын хугацаанд 1 сонирхолтой IPO ч хийгдэх нь ээ. Товхимолтойгоо ойр байгаарай. 🍋 

FRC: СЗХ-ны ээлжит хуралдаанаар хөрөнгийн зах зээлд хадгаламжийн сертификат болон хувьцааны хамтын санхүүжилтийн үйл ажиллагааг нэвтрүүлэх зохицуулалтын орчныг хэлэлцэж шийдвэрлэлээ.

BOM: Өнгөрсөн онд Монгол Улсын аялал жуулчлалын салбар $1 тэрбумын алдагдалтай ажиллав.  

MSE: Говь (GOV)-ийн ТУЗ-ийн даргаар Ц.Баатарсайхан томилогдлоо. 

MNG: Өнгөрсөн онд төлбөрийн тэнцэл урьдчилсан гүйцэтгэлээр $622 саяын ашигтай гарав. Энэ нь 2023 оныхоос 55% буурсан үзүүлэлт.

Оюу толгойн өсөлт 🆚 Дараагийн асуулт

“Оюу толгой” ХХК 2024 онд нийт 214.8 мянган тн зэс үйлдвэрлэлээ. Ингэснээр тэд 2015-2016 онд тогтоож байсан амжилтаа эвдээд байна. 

💥 Тэсрэлтийн эхлэл

Оюу толгойн гүний уурхай ирэх сард 2 нас хүрнэ. Гүний уурхайн нээлтээс хойш Оюу толгойн зэсийн үйлдвэрлэл эрчимтэй нэмэгдэж буй. Тодруулбал, өнгөрсөн онд үйлдвэрлэсэн нийт баяжмал дахь зэсийн хэмжээ 2022 оныхоос 66.5%, 2023 оныхоос 27.8% нэмэгдээд байна. Уг нь бол 27.8% биш 40% нэмэгдэнэ гэж тооцоолж байсан юм. 

• 💭 Гэхдээ 2024 оны IV улирлын зэсийн үйлдвэрлэл бусад 3 улирлаасаа тасархай өндөр буюу 66 мянган тн-г давсан аж. 2023 оны мөн үеэс бол 63% нэмэгдсэн хэрэг. Угаас өнгөрсөн оны 10-р сард хүдрийг 1,300 м-н гүнээс гадарга руу тээвэрлэх дамжуурга ажиллаж эхэлснээр үйлдвэрлэл нь 33% өссөн аж. 

• 🚀 Цаашид ч зэсийн үйлдвэрлэл улам өргөжиж 2028-2036 онд 500 мянган тн зэс олборлох зорилготой. Өөрөөр хэлбэл сүүлийн 3 жилийн зэсийн олборлолтыг 1 жилд хийнэ гэсэн үг. Энэ хүрээнд баяжуулах үйлдвэрийн ажил ч урагшилж энэ оны II улирал хүртэл үе шаттайгаар ашиглалтад орох төлөвтэй буй.

‼️ Дараагийн том төсөл юу байх вэ?

Юутай ч Оюу толгойн үйл ажиллагаа тасралтгүй хэвийн үргэлжилж байгаа бол нөгөө талд манай эдийн засагт том хүч өгдөг нүүрсний үнэ 2022 оны дээд цэгээсээ 72.1% унаад байгаа. Улмаар нүүрсний экспортын биет хэмжээ жилээс жилд нэмэгдэж байгаа ч орлого нь буурах трэндтэй байгаа хэрэг. Цаашдаа ч нүүрсний үнэ унах, Хятадын нүүрсний хэрэглээ буурах нигууртай байгаа тул манай эдийн засгийн түлхүү зэсийн орлого дээр тулгуурлах нь. 

• Мэдээж 2036 он хүртэл Оюу толгойн зэсийн үйлдвэрлэлийн оргил үеийн ачаар эдийн засагт доголдол үүсэхгүй байж болох ч үүний дараа яах вэ гэдэг бол том асуудал. Уг нь бид хайгуулын ажлыг эрчимжүүлж бусад түүхий эдийн ордыг нээж ирээдүйд ирэх эрсдэлийг хаах ёстой ч дараагийн Оюу толгой хаана, хэзээ бий болох вэ гэдэг асуулт хэвээр байгаа нь харамсалтай. 

💚 $1 их наядын ногоон зах зээл

2025 оны байдлаар тогтвортой хөгжлийн санхүүжилтийн чиглэлд 24,000 гаруй бонд 4,800 гаруй зээл зах зээлд тус тус гарсан байна. 

• 👀 Илүү олон: Улмаар уг чиглэлийн бондын хэмжээ сүүлийн 2 жил дараалан өссөөр 2024 онд $1 их наядад хүрч нийт бондын 11%-ийг бүрдүүллээ. 

🏆 Тэргүүн магнайд “Ногоон бонд”

Тогтвортой хөгжлийн санхүүжилт дор нийгмийн, тогтвортой, ногоон эдгээрийн холимог гэхчлэн олон нэршилтэй бонд багтдаг. Энэ дундаа “Ногоон бонд” хамгийн эрэлттэй бүтээгдэхүүн байсаар ирсэн бөгөөд өнгөрсөн онд нийт $618 тэрбум, өөрөөр хэлбэл нийт санхүүжилтийн 60%-ийг татжээ. Харин нөгөө талд “Тогтвортой бонд”-уудын нийт зах зээлд эзлэх хувь 18% болж анх удаа “Нийгмийн бонд”-уудыг давав.  

• 🍼 Бяцхан тоглогчид: Бусад бондуудтай харьцуулахад “Шилжилтийн” буюу , “Тогтвортой хөгжлийн зорилттой нийцсэн бонд”-ууд маш бага буюу 5% хүрэхгүй хувийг бүрдүүлдэг. 

• ⤴️ Өсөх трэнд: Энэ чиглэлд Японы ЗГ түрүүлж алхан өнгөрсөн онд анх удаа хүлэмжийн хийн ялгаруулалтаа багасгах зорилгоор “Шилжилтийн бонд” гаргаж, ирэх 10 жилд нийт ¥150 их наяд буюу $1 их наядын дүн бүхий бондуудыг үе шаттайгаар гаргахаар болсон.

🔮 2025 оны төлөв: Тогтвортой өсөлт

Энэ онд тогтвортой санхүүжилтийн зах зээл 2024 онтой харьцуулахад огцом тэлэхгүй ч тогтвортой өсөх төлөвтэй байна. Улс орнуудын инфляц буурч, өр багасахын хэрээр тогтвортой санхүүжилт сайнаар бодоход $1.3 их наяд, муугаар бодоход $834 тэрбум хүрнэ гэгдэж буй.

• 👀 Эрсдэл: 2024 оны сүүлчээс Европын Холбоонд “Ногоон бондын стандарт” мөрдөгдөж эхэлсэн. Уг стандарт бондын орлогын 85%-иас доошгүй хэсгийг ЕХ-ны Ногоон таксонимийн шалгуурт нийцсэн төсөл санхүүжүүлэх, байгаль орчны 6 зорилтын аль нэгэнд нь хувь нэмрээ оруулах гэхчлэн хатуу заалт агуулсан нь бонд гаргалт агшихад нөлөөлөх эрсдэлтэй. 

• 👱‍♂️Цаашлаад, Трампын Парисын гэрээнээс гарсан явдал ирэх 4 жилд Америкийн ногоон санхүүжилтэд хэрхэн нөлөөлөх нь тодорхойгүй байгаа. 

Харин Монголын хувьд 2023 онд дотоодын зах зээлд анхны ногоон бондоо өлгийдөн авч байсантай харьцуулахад 2024 онд 4 ногоон, нийгмийн бонд зах зээлд гарч мэдэгдэхүйц өссөн. Нөгөө талд арилжааны банкнууд тус онд ₮1.3 их наядын ногоон зээл олгож нийт зээлийн багцын 3.7%-ийг ногооруулав. 

Эцэст нь… Улс орнуудын тогтвортой хөгжлийн зорилтыг дагаад санхүүжилт ч сайн нэмэгдэж байна. Гол нь ЕХ, Америкийн хатуу зохицуулалт, тодорхойгүй байдал гэхчлэн их гүрнүүдийн бодлогын орчин хатуураад ирэхээр л хэцүүдчих гээд байх юм. 

Excel дээр олон хуудас дээрх мэдээллүүдийг динамикаар татаж, мастер хуудас үүсгэх арга хуваалцъя. Нэг анхаарах зүйл нь, тухайн хуудаснууд дээрх мэдээллүүд ижил бүтэцтэй байх хэрэгтэй шүү. Жишээ нь: Жилийн болон улирлын тайлан. 

• Нэн ойлгомжтой: Эхлээд бүх хуудсанд байх B3 нүдний мэдээллүүдийг нэгтгэе. Ингэхдээ шинэ хуудас үүсгээд, аль нэг нүдэнд эхний болон сүүлийн хуудасны мэдээллийг оруулна. Жишээ нь: =SUM ('Y1:Y10'!B3) гэж бичвэл Y1-Y10 хүртэлх бүх хуудасны B3 нүдний мэдээллийг нэгтгэх юм. Бичлэгээр үзэхийг хүсвэл ЭНД дараарай. 😉

🫂 Өмнөд Солонгос дахь нөмөр түшиг

Өмнөд Солонгос дахь Монголчууддаа таатай мэдээтэй! Тус улсын Стратеги, Сангийн яамны албан ёсны зөвшөөрөлтэй үйл ажиллагаа явуулдаг GME Finance-с ₩2 саяас ₩20 сая хүртэл дүнгээр зээл авч болох нь ээ. 📢

• ☝️ 1 нөхцөлтэй: Тодруулбал, Өмнөд Солонгост албан ёсоор ажилладаг E-9, E-10, E-7, E-1, E-3, F-2, F-5, F-6, F-4 ангиллын визтэй бол визний хугацаа болон цалингийн дундажтай уялдуулсан дүнгээр жилийн 20%, сарын 1.6%-ийн хүүтэй зээл авч болох нь.

• 🫷 Гэхдээ: Зээлээ урьдчилж төлөөд богино хугацаанд хаавал тэр хэмжээгээрээ хүү нь бага тооцогдох аж.

• 🫴 Санаа зоволтгүй: Визний хугацаа нь бага үлдсэн жил бүр сунгагддаг E-7, F-2, F-6 ангиллын, мөн 1 жил 10 сарын сунгалтаа хийлгэж амжаагүй Е-9 ангиллын визтэй бол сунгалтаа хийлгээд зээлийн хүсэлтээ гаргах боломжтой юм байна шүү.

📞 Холбогдох: 010-3384-6864: 1811-2946~2 эсвэл ЭНД дарж онлайнаар тэндхийн аль ч хотоос зээлийн хүсэлтээ илгээгээрэй.

🍋 Дубай $100 саяын харшуудаар Европ, Ази болон Америкийн баячуудыг татна. Тодруулбал, өнгөрсөн жил Дубайд $10 саяас дээш үнэтэй 435 харш борлуулагдаж, Нью-Йорк, Хонконгийг ардаа орхин үл хөдлөх хөрөнгийн салбарт тэргүүлээд буй. Тэгвэл энэ жил Арабын Нэгдсэн Эмират руу 6,700 саятан ирж суурьших сургаар тус хотын үл хөдлөхийн магнатууд $60-$120 саяын үнэтэй 100 хүртэлх харш барихаар зэхэж буй.

🍋 Meta (META)-н хувьцааны үнэ өнгөрсөн баасан гараг хүртэл 10 өдөр дараалан, нийт 13% өсөж $689.18 болов. Эргэн харвал, 2015 оны 9-р сард тус компанийн хувьцаа хамгийн олон өдөр буюу 11 өдөр дараалан өсөж байв. Түүнчлэн 2023 онд 2 дахин, өнгөрсөн жил 65% өсөөд буй. Тэгвэл энэ сард Meta-н хувьцааны үнэ 18% өсөх таамаглалтай байгаа юм. 

🍋 ЦХИХХЯ Монгол Улсын AI бэлэн байдлыг үнэлж үндэсний стратеги боловсруулахад НҮБ-ын Хөгжлийн хөтөлбөртэй хамтарна. Хамтын ажиллагааны хүрээнд байгаль экологи, цөлжилт, ойжуулалт тэргүүтэй тогтвортой хөгжлийн зорилтуудын хэрэгжилтийг AI ашиглан богино хугацаанд хангах аж. Гэснээс, одоогоор Монгол Улсын эрүүл мэндийн салбарт AI-д ашиглагдах өгөгдөл хамгийн их цугларсан байгаа гэнэ.

🍋 Өмнөд Солонгосын нэг хүнд ногдох ДНБ өнгөрсөн онд өмнөх жилээсээ 1.28% өсөж $36 мянга болов. Хэдий энэ дүн 2021 оныхоос $2 мянгаар буурсан ч сүүлийн 4 жилд уг үзүүлэлтээр Япон, Тайванийг тэргүүлсээр буй. Учир нь Японы нэг хүнд ногдох ДНБ л гэхэд 2021 оныхоос $8 мянгаар буурчээ.

• 🧭 Голомт Банк “Дэлхийн жишигт нийцсэн” банк болно. (TheCEOMagazine)

• 🏆 Кендрик Ламар 67 дахь удаагийн Grammy Awards-н 5 төрөлд тэргүүлэв. (BBC)

• 🏙️ Хөгжим сонсонгоо 202 хотын гудамжаар аялах боломж. (CityHop)

• 🔍 OpenAI-н судлаачийн түвшинд ажиллах чадвартай загвар бэлэн боллоо. (OpenAI)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ