🎁 Хувьцаа бэлгэлье

POWERED BY

Morning! Өнөөдөр Олон улсын аз жаргалын өдөр тохиож байна. Бид өдөр тутмынхаа ажил, стресст дарагдаад жижиг ч гэсэн жаргалтай мөчүүдээ анзаарахгүй өнгөрөөх нь их. Өнөөдөр зүгээр л тэнгэр рүү хараад тайван, жаргалтай өнгөрч буй бүхнийг анзаараарай. 🫂  

MSE: Уул уурхайн бүтээгдэхүүний биржийн арилжааны журам болон арилжааны төлбөр тооцооны журмыг тус тус 2026 оны 4 сарын 1-ний өдөр хүртэл үйл ажиллагаандаа дагаж мөрдүүлэхийг зөвшөөрлөө.   

MNG: Ерөнхий сайд Эрдэнэс Монгол нэгдэлд  ойрын хугацаанд улсын валютын нөөцийг $1 тэрбумаар нэмэгдүүлэх чиглэл өгөв. 

FRC: Санхүүгийн Зохицуулах Хорооноос МХБ (MSE)-д “Нүүрсний форвард гэрээг дахин арилжаалах журам"-ыг үйл ажиллагаандаа дагаж мөрдүүлэхийг зөвшөөрчээ. 

TUM: Түмэн Шувуут ХК ирэх 5 сарын 1-нээс эхлэн 12 сарын 31-ныг хүртэл ₮1 тэрбум хүртэлх үнийн дүнгээр хувьцаагаа халаасална.

 🔥 Шинэ бүтээгдэхүүн айсуй

Тун удахгүй хөрөнгийн зах зээлд тэр дундаа Улаанбаатар Үнэт Цаасны Бирж (UBX) дээр хөрөнгөөр баталгаажсан үнэт цаас (ХБҮЦ) гаргах гэж байна. Анхаарлаа нааш нь. 

✊ Тог, тог: Хэн бэ? 

Өнгөрсөн оны 9-р сараас хойш олон нийтэд нээлттэй арилжаалагдах ХБҮЦ гараагүй билээ. Тэгвэл энэ оны анхны ХБҮЦ-ыг Жи Эс Би Актив ТЗК гаргах гэж буй. Тэдний тухайд Жи Эс Би Капитал ББСБ-ын тусгай зориулалтын охин компани бөгөөд үйл ажиллагааны бүртгэл нь ХБҮЦ гаргах ажээ. Уг ББСБ нь 15 жилийн турш үйл ажиллагаа явуулж буй. Нарийндаа бол,

• 🧐 Удам судар: Жи Эс Би Капитал ББСБ нь Монголын хамгийн том ААН-ийн нэг Шунхлай Холдинг ХХК-ийн 100%-ийн хөрөнгө оруулалттай бөгөөд Швейцарын Enabling Qapital сангаас Монголын анхны ОУ-ын санхүүжилтийн эх үүсвэрийг татаж байжээ. Түүнчлэн тус ББСБ нь 2020 онд MicroFinanza Rating S.R.L. агентлагаас хамгийн өндөр буюу “BBB” үнэлгээг авсан гэнэ. 

• 🧮 Санхүү рүү нь өнгийе, хө: Харин цар хүрээний хувьд, 2024 оны IV улирлын цэвэр зээлийн багц нь жилийн өмнөхөөсөө 54.4% өсөж ₮246 тэрбумд хүрчээ. Нэмээд зохистой харьцаа үзүүлэлтүүд нь шалгуур хангаснаас гадна төлбөр түргэн гүйцэтгэх чадварын үзүүлэлт нь л гэхэд 8%+ байх ёстойгоос 27.6% байгаа аж.

🪄 Ямар ид шидтэй ХБҮЦ вэ?

Уг ХБҮЦ-ны андеррайтераар Ти Ди Би Секьюритис ҮЦК ажиллаж байгаа бөгөөд анхдагч зах зээлийн арилжаа нь 3 сарын 26-нд UBX дээр эхлэхээр байгаа юм. Нөхцөлийн хувьд, Жи Эс Би ХБҮЦ нь 24 сарын хугацаатай, жилийн 18% хүүтэй бөгөөд олон нийтэд ₮100,000-ийн нэгж үнэ санал болгож ₮25 тэрбумыг татан төвлөрүүлэх гэнэ. 

• 📌 Онцлог: ​​Жи Эс Би ХБҮЦ 100%-ийн хэвийн төлөлттэй зээлээр баталгаажсанаас гадна хүүгийн хувьд банкны салбарын 2 жилийн хугацаатай хадгаламжийн дундаж хүүтэй харьцуулахад ойролцоогоор 5.5 нэгж хувь өндөр аж. 

Ямартай ч дуу шуугиан багатай байсан ХБҮЦ-ны бүтээгдэхүүнд чимээ орох нь. Харин та сайн судалж шийдвэрээ гаргаад дэлгэрэнгүй мэдээллийг Ти Ди Би Секьюритис ҮЦК-иас авч болох нь байна шүү. 

🆕 ЕСБХБХ хөрөнгө оруулалтын стратеги

Европын Сэргээн Босголт Хөгжлийн Банк (ЕСБХБ) 2025-2029 онд технологи, медиа, харилцаа холбооны салбарт хийгдэх хөрөнгө оруулалтын стратегиа баталлаа. 

🪴 Ихэр шилжилт: Ногоон + Дижитал

Ирэх 10 жилд шинээр бүтээгдэх эдийн засгийн үр ашгийн 70% гаруйг дижитал технологид суурилсан бизнес модельтой бизнесүүд бүтээнэ гэх тооцоолол бий. Иймийн тулд ирэх 4 жилд ЕСБХБ үйл ажиллагаа явуулдаг 39 оронд хэрхэн дижитал дэд бүтцийн өргөжилт, бизнесийн дижиталжилт, кибер аюулгүй байдал, хувийн хэвшлийн өсөлт буюу инновацлаг ногоон, хүртээмжтэй төслүүдийг анхаарч ажиллахаа танилцуулаад буй.  

🧧 Хөрөнгө оруулалтын хэмжээ

ЕСБХБ 2020-2024 онд тус 3 салбар руу чиглэсэн хөрөнгө оруулалтын стратегиараа нийт 95 төсөлд €1.7 тэрбумын санхүүжилт олгосны 92% нь хувийн хэвшилд олгогдсон байдаг. Санхүүжилтийг нь задлан харвал дижитал дэд бүтцийн өргөжилтөд дийлэнх буюу €1.3 тэрбумыг, харин үлдсэн €421 саяар нь финтек, боловсролын чиглэл дэх технологийн компаниуд болон цахим худалдааны компаниудыг санхүүжүүлжээ. 

🚨 Монголын боломж

Харин шинэ стратегийн санхүүжилт өмнөхөөсөө нэмэгдэх төлөвтэй байгаа. Тэгэхээр Монголын хувьд өргөн зурвас болон 5G нэвтрүүлэх чиглэлд санхүүжилт татахаас эхлээд том хэмжээний дата төв байгуулах эргээд уг дата төвийн эрчим хүчийг сэргээгдэх эрчим хүчээр хангах чиглэлд санхүүжилт татах боломж их. 

• 🤗 Нэн ялангуяа ЕСБХБ хос шилжилт буюу ногоон, дижитал шилжилтийг санхүүжүүлэх сонирхолтой байгаагаас нь харахад дата төв, AI болон харилцаа холбооны сүлжээний эрчим хүчийг нар, салхины эрчим хүчээр шийдсэн төсөл байвал санхүүжилт нь бэлэн л юм байна. 

Эцэст нь… Шинэчлэн баталсан стратеги нь өмнөх 4 жилийн стратегийнхаа алдаа, оноог дэнсэлж дижитал дэд бүтцэд голлон анхаарахаас гадна кибер аюулгүй байдал, ногоон эдийн засгийн уялдаа холбоо, санхүүгийн хөшүүргийг илүү сайжруулах байдлаар хэрэгжинэ. Өнгөрсөн онд Монголын технологи болон банкны салбарынхан тус банкнаас амжилттай санхүүжилтүүд татаж чадсан. Ирэх 4 жилд ЕСБХБ санхүүжилтээ нэмэгдүүлэх нь байна шүү. Анхаарч байвал…

₮30 гаруй тэрбум
Хөдөлмөр эрхлэлтийг дэмжих сан иргэд, ААН-ээс ₮30 гаруй тэрбумын авлагатай байна.
2013 он
Үүний 56% буюу ₮17 тэрбумаар тэртээ 2013 онд Оёдлын нэгдсэн холбоог санхүүжүүлжээ. 
3 жил
Тус сангаас бизнесүүдэд олгосон санхүүжилтийн эргэн төлөлт 3 жилийн хугацаатай байдаг аж. 

🍋 Meta (META)-н AI загвар Llama 1 тэрбум таталттай боллоо. Эргэн харвал, 2023 онд гарсан тус бүтээгдэхүүн жилийн дотор 350 сая, өнгөрсөн оны сүүлээр энэ амжилтаа 1.8 нугалж 650 сая таталттай болсон. Тэгвэл үүний хамгийн том хэрэглэгчид нь Spotify (SPOT), Fynopsis болон Стэнфорд, Оксфорд, Кембриж тэргүүтэй ТОП их сургуулиуд юм.

🍋 Нийслэл өрхүүдэд хийн эсвэл цахилгаан халаагуур тавьж, хэрэглээний зардлаас ₮100 мянгыг хөнгөлнө. Уг арга хэмжээнд ирэх өвлийн халаалтын улирлаас өмнө утааны голомт бүсүүдийн 50 мянга орчим айл өрхийг гэр, байшингийнхаа дулаан алдалтыг бууруулсан тохиолдолд хамруулах аж. Гэснээс энэ ажлыг Нийслэлээс гадна бүх яамдууд хамтарч хийх гэнэ.

🍋 Xiaomi (XIACF)-н өнгөрсөн оны IV улирлын цэвэр ашиг 2023 оны мөн үеэс 90% өсөж $1.24 тэрбум болжээ. Тус дүнг хувьцааны ногдол ашиг тараасны дараах дүнгээр тооцвол 70% нэмэгдэж $1.16 тэрбум болжээ. Харин бүтэн жилийн дүнгээр 35% өсөж $3.3 тэрбум болсон байна. Тэгвэл энэ амжилтын цаана тэдний гар утасны бизнесийн орлого 16% өсөж $7.18 тэрбумд хүрчээ.

🍋 “Төр, хувийн хэвшлийн түншлэл төв” МҮХАҮТ-тай хамтран бизнесүүдэд хуулийн таатай орчин бүрдүүлнэ. Энэ хүрээнд хөрөнгө оруулалтын орчныг сайжруулах, бизнесийн орчинд тулгарч буй бэрхшээлийг арилгах, бизнес эрхлэлтийг хялбарчлах, хувийн хэвшлийн салбарыг бэхжүүлэх тэргүүтэй ажлуудыг хийх нь. 

•  🎨 Паспорт яагаад гоё загвартай байж болохгүй гэж? (HypeBeast)

• 🪟 Төрийн байгууллагуудын 36% нь мэдээллээ ил тод болгоод байна. (MNB)

• ☀️ Ikea нойрсож буй Оксфордын гудамжийг сэрээнэ. (TheGuardian)

• 📆 Тайландад визгүй зорчих хугацаа 2 дахин хумигджээ. (BangkokPost)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ