💥 $100 их наядын өр

POWERED BY

Шинэ 7 хоногийн мэнд ээ! Өнөө дулаан хувцаснуудаа далд хийчихсэн үү? Арай эрт байна шүү, 26-ныг хүртэл ихэнх нутгаар цасан болон шороон шуурга шуурч, хүйтрэх нь. Хамаг хувцсаа нимгэлэхээс илүү хаврын олон аашийг олоод, ханиад томуу хүрчихгүйхэн шиг байх нь чухал шүү. 😅  

FRC: ББСБ-аас олгох хэрэглээний зээлийн бүтээгдэхүүнд тооцох өр, орлогын харьцаа болон суудлын автомашин худалдан авах хэрэглээний зээлийн зээл, үнэлгээний харьцаа 60%-иас хэтрэхгүй байхаар тогтоов.  

JSC: ХК-иудын компанийн засаглалын кодексийн хэрэгжилтийн дундаж үнэлгээ жилийн өмнөхөөсөө 14.1 нэгж хувиар сайжирч 79.1% боллоо. 

MCE: Хөдөө аж ахуйн биржээр өнгөрсөн сард ₮22.9 тэрбумын түүхий эд арилжаалагдсан бөгөөд дуудлага худалдаагаа үрийн буудай арилжиж байгаа аж. 

 🔍 Үл хөдлөх хөрөнгийн зах зээлийг тольдъё

Үл хөдлөх хөрөнгийн салбарт хөрөнгө оруулах гэж байгаа уншигчид маань анхаарлаа нааш нь. Ямар боломж, ямар өгөөж өгч байгааг хэлээд өгье. 

• 📌 Судалгаа: Инвескор Проперти ХХК Улаанбаатар хотын “Үл хөдлөх хөрөнгийн зах зээл жилийн тайлан 2024-2025”-ыг гаргажээ. Тэдний тухайд 2017 оноос хойш үл хөдлөх хөрөнгийн цогц менежментийн үйлчилгээ үзүүлж буй. 

💡 Хөрөнгө оруулалтын шинэ боломж: Хаус зах зээл

Манай хотын хаусны зах зээл сүүлийн жилүүдэд хурдацтай хөгжиж буй. Шалтгаан нь маш энгийн. Хотын төвийн үнэтэй орон сууц, бохирдол, түгжрэлээс зайлсхийж илүү тав тухтай амьдрах орчинг хайж байгаа хүмүүс хотын захын хаус, вилла хотхонуудыг илүүд үзэх болжээ. Улмаар 2024 онд  хаусны борлуулалт 14% өссөн, түрээсийн өгөөж 7.7% хүрсэн аж. Хотын захын дэд бүтцийн төслүүд өргөжиж байгаа нь ч үүнд түлхэц болсон хэрэг. 

• 📈 Үнэ өснө: Өнгөрсөн жилийн эцсээр харвал, Улаанбаатарт нийт 5,840 айлын хаус төсөл хэрэгжсэний 44% нь ашиглалтад орсон бөгөөд хаусны м.кв-н дундаж үнэ жилийн өмнөхөөсөө 11.2% өсөж ₮5.23 сая болсон аж. Энэ онд ч хаусны эрэлтийн өсөлт, нийлүүлэлтийн бууралтаас хамаарч үнэ нь 5%-8% өсөхөөр байгаа юм. 

• 🧐 Хаана? Ямар? Хаусны нийлүүлэлт дүүрэг болон зэрэглэлээрээ өөр. Жишээ нь Хан-Уул дүүрэгт хамгийн их хаус нийлүүлэгдэж байгаа бол зэрэглэлийн хувьд дундаж зэрэглэлийн хауснуудын нийлүүлэлт хамгийн өндөр байна. 

🏢 Өөр боломж: Үйлчилгээт орон сууц

Өнгөрсөн оны байдлаар Улаанбаатарын 9 үйлчилгээт орон сууцны төслүүдийн түрээсийн өгөөж дунджаар 9.6% байгаа юм. Энэ дундаас Shangri-la Residence хамгийн өндөр буюу 12.6%-тай гарсан байна. Харин эдгээрийн м.кв-н дундаж үнэ ₮10 сая, түрээсийн үнэ ₮78 мянга аж. 

Эцэст нь… Мэдээж энэ боломжууд дээр нэмээд бид бүгдийн мэдэж байгаагаар орон сууцны м.кв-н дундаж үнэ өнгөрсөн жилийн хугацаанд 14.6%, оффис талбайн дундаж үнэ 6.9% өссөн гээд энэ салбарын өсөлт үргэлжилсээр. Угаас манай улсын 1 хүнд ногдох орон сууцны талбай 6.42 м.кв буюу НҮБ-ийн стандартаас 4.7 дахин байгаа нь орон сууцжих хэрэгцээ өндөртэйг харуулж байгаа юм. Тэгэхээр энэ салбарын өсөлт цаашид ч үргэлжлэхээр байна даа. 

Дэлгэрэнгүй уншихыг хүсвэл ЭНД дараарай.

🙇🏻 Миний эх орон импортын эх орон 

Өнгөрсөн Пүрэв гарагт Евразийн эдийн засгийн комиссын худалдааны сайд Андрей Слепнев болон Эдийн засаг хөгжлийн сайд Л.Гантөмөр нар уулзаж Монгол Улс тус холбоонд нэгдэх асуудлыг эцэслэлээ. 

🤫 Үзэглэх л үлдэж

Товчхондоо Монгол Улсын ЕАЭЗХ-той хийх түр чөлөөт худалдааны хэлэлцээр (ЧХХ)-т саад болж байсан асуудлуудыг нарийвчлан хэлэлцэж, эцэслэсэн байна. Улмаар ирэх өдрүүдэд бидний тус холбоотой ЧХХ  хийх гэсэн 8 жилийн оролдлого албажих нь дээ.

• 🤔 Асуудал гээд байгаа нь: Өнгөрсөн 12-р сард дотоодын үйлдвэрлэгчид болон бизнес, МХАҮТ хамтран тус хэлэлцээрийн агуулга, бүтээгдэхүүний жагсаалт тодорхойгүй, яаруу, сандруу хэлэлцээр хийхийг эсэргүүцэж, ЗГ ч түр хойшлуулаад байсан. Энэ удаад хэлэлцээр байгуулахад тулгамдсан бүх асуудлыг шийдсэн гэх ч яг юуг нь засаж янзалсан нь тодорхойгүй л байна. 

🅰️ Цуутай 375

Одоог болтол олон нийтийн хувьд тус хэлэлцээрт талууд 375 бараа бүтээгдэхүүний гаалийн тарифыг “0” болгоно гэснээс өөр мэдээлэлгүй байна. Юутай ч тус холбоотой түр чөлөөт худалдааны хэлэлцээр байгуулснаар Монголын экспортын ердөө 9%-д л эерэг нөлөөтэй ч импортыг 25%-30% өсгөх магадлалтай байгаа. Харж байгаачлан хэлэлцээрийн дараах жилүүдэд худалдааны алдагдал өсөж, төлбөрийн тэнцэл алдагдалтай гарах эрсдэл өндөр. 

• ⬅️ Өнгөрсөн онд гадаад худалдааны эргэлт $25 тэрбумыг давж түүхэн дээд түвшинд хүрсэн. Нүүрсний экспорт сайн байсантай холбоотойгоор экспортын орлого $14 тэрбум болсон ч нөгөө талд импорт ч үлэмж нэмэгдэж $11 тэрбумд хүрчихсэн байгаа. 

• ➡️ Энэ онд гол зогоолго болох нүүрсээ төлөвлөсөн үнээрээ гаргаж чадахгүй нь дээр өдөр ирэх тусам үнэ нь унасаар байгаа энэ үед импорт нэмэгдээд ирвэл бөөн л асуудал болох байх даа. 

Эцэст нь… Одоо бидэнд нүүрснээс өөр улс оронд орлого оруулчихаар экспортын бүтээгдэхүүн хэрэгтэй байдаг. Уг нь ХАА-н дэвшилтэт орон болно гээд мах, ноолуур, газар тариалангийн чиглэлд өчнөөн хөтөлбөр хэрэгжүүлж, зээлийг баруун солгойгүй л цацсан, цаашид ч цацахаар байгаа. Хүнсний хувьсгал хөтөлбөрийн хүрээнд 2 жилд $1.2 тэрбумын зээлийг олгосон байх жишээний. Нэг л их хөнгөлөлттэй зээл ярьсан улс, үр шим хаана ч байгаа юм бүү мэд. Монгол импортлогч улсын статусаа сайхан цементэлж байна даа. 

Төр болон ААН-үүд 1 удаагийн нэвтрэх код, мэйл хаяг, гар утасны дугаар, тоон гарын үсэг тэргүүтэй янз янзын аргаар хэрэглэгчийн мэдээллийг баталгаажуулдаг. Эдгээрээс хамгийн найдвартай гэгдээд буй тоон гарын үсгийн статистик руу өнгийе. 

• Монгол Улс 2022 онд тоон гарын үсгийг иргэддээ 5 жилийн хугацаатай үнэгүй олгожээ.

• Одоогоор 1.3 сая иргэн тоон гарын үсэгтэй болсон ч хаана, юунд, ямар зориулалтаар ашиглах талаар ойлголтгүй гэнэ.

Түүнчлэн 155,074 ААН тоон гарын үсгийг тендерт оролцохдоо л ашигладаг байна. Угтаа энэ нь орон зай үл хамааран баримт бичгийг баталгаажуулж, бичиг хэрэг, шуудангийн зардлыг хэмнэдэг эд аж.

🍋 Замын хөдөлгөөний ачаалал ихтэй байршлуудад I эгнээг 2 үе шаттай өргөтгөнө. Энэ ажил  5 шар, III, IV хороолол, 7 буудал, Офицер, Шархад, Яармагийн авто замуудыг хамрах бөгөөд түүнчлэн гэр хорооллын нийтийн тээвэр хүртээмжгүй хэсэгт авто зам барих нь. За тэгээд авто замуудыг нийтийн тээвэр чөлөөтэй зорчих боломжтой байдлаар өргөтгөснөөр түгжрэл 31.7% буурах юм гэнэ дээ. 

🍋 Apple (AAPL)-н Apple TV+ өнгөрсөн онд $1 тэрбумын алдагдал хүлээв. Тэдний стриминг үйлчилгээний бизнес тэр чигтээ базаахгүй байгаа юм биш, Apple Music тэргүүтэй бусад үйлчилгээнүүд нь 2023 оноос 14% илүү буюу $26.3 тэрбумын орлого авчирсан. Асуудлын гол нь $AAPL шинэ iPhone, iPad эсвэл Mac худалдан авсан хэрэглэгчдэд 3 сарын Apple TV+ үнэ төлбөргүй санал болгодогт байгаа. 

🍋 AI үүлэн технологийн үйлчилгээ үзүүлдэг CoreWeave $2.7 тэрбумын IPO хийнэ. Ингэхдээ компани 47 сая ширхэг, одоогийн хувьцаа эзэмшигчдийн зүгээс 1.8 сая ширхэг хувьцааг $45-$55-ын хооронд санал болгож буй. Энэ үнийн дээд хязгаараар тооцвол CoreWeave-н зах зээлийн үнэлгээ $32 тэрбумд хүрэхээр байна. 

🍋 Дэлхий даяарх нийт өрийн хэмжээ $100 их наядыг давжээ. Тэр дундаа OECD-н гишүүнчлэлтэй 38 хөгжингүй орнуудын ЗГ-ын зээлийн хүүгийн төлбөр сүүлийн 3 жилд ДНБ-ийх нь 3.3%-д хүрсэн байна. Тэднээс гадна буурай хөгжилтэй орнуудын тал нь дараагийн 3 жилд, 20% гаруй нь энэ онд өрөө барагдуулах ёстой. Дайны хажуугаар дажин гэж энэ их өрийн хамт өнөө ногоон шилжилтээ яажшуухан хийх бол доо. 

• ☄️ Спортын салбарын түүхэн дэх хамгийн том хэлцэл. (ESPN)

• 💔 Пээш, хүний эрээн дотроо юм даа. (NYT)

• 🗺️ Монголын стартап экосистемийн энэ оны зураглал. (Start)

• 🕸️ Өмнөд Солонгос Хятадын жуулчдыг ямар аргаар татна гэнэ ээ? (CGTN)

• Даваа: Монголбанкны мөнгө, санхүүгийн статистиктай танилцана. 

• Мягмар: Монголын Программ Хангамж Үйлдвэрлэгчдийн Холбоо ТББ-ын гишүүдийн хурал болно. 

• Лхагва: Блюскай Секьюритиз ҮЦК ХК, Евроазиа Капитал Холдинг ҮЦК ХК, И Эс Жи файнас ХК нарын хувьцаа эзэмшигчдийн ээлжит хурал болно. 

• Пүрэв: Араас нь Мерикс ХК хувьцаа эзэмшигчдийн хурлаа хийх нь ээ. 

• Баасан: Аан бас Тээвэр Ачлал ХК-ийн хувьцаа эзэмшигчдийн хуралтай юм байна.  

• Бямба: Харин амралтын өдөр Дархан нэхий ХК болон ЛэндМН ББСБ ХК нар хувьцаа эзэмшигчдийн ээлжит хурлаа хийхээр төлөвлөсөн байна.

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ