🤯 Бодолтой AI

POWERED BY

Morning! Хэдэн арван жил яригдаж байгаа метроны тухай шинэ мэдээлэл хүргэе. 😆 Улаанбаатар метро 1.3 км дундаж зайтай 15 өртөөтэй, цагт 17,200 зорчигч тээвэрлэх хүчин чадалтай байх юм гэнэ. Ер нь хот дотроо метронд суух өдөр ирэх нь үү? 🚇

MSE: Улсын Их Дэлгүүр (UID)-н хувьцаа эзэмшигчдийн ээлжит хурал 3 сарын 5-нд цахим хэлбэрээр зохион байгуулагдана. 

MNG: Монгол болон Лаос худалдаа, эдийн засгийн харилцан ашигтай хамтын ажиллагааг өргөжүүлэхээр тохиров.

UB: Улаанбаатарт баригдах 58.8 км урттай шинэ тойрог замын ТЭЗҮ энэ оны эхний хагас жилд дуусах төлөвтэй байна.

📃 Ариг Банк: Хөрөнгийн өсөлт 61.9%

Тайлангийн цуваа үргэлжилсээр. Энэ удаад Ариг Банкны 2024 оны аудитлагдаагүй тайлантай танилцъя. Тэдний нийт хөрөнгийн хэмжээ жилийн өмнөхөөсөө 61.9% буюу ₮274 тэрбумаар өсжээ. Энэ өсөлтийн цаана юу болов?

🚀 Хадгаламж пуужиндав

Аригтай хадгалаад ₮100 саяын эзэн болоорой гээд хөтөлбөрийг харсан л биз дээ? Үүний нөлөөгөөр тэдний харилцах хадгаламжийн нийлбэр дүн жилийн өмнөхөөсөө 116.2% өсөж ₮377.3 тэрбумд хүрсэн байгаа юм. Энэ дүнгийн 89.6% нь хадгаламж байгаа гэхээр хөтөлбөрийн нөлөө үнэхээр том байжээ. Эх үүсвэр нэмэгдсэн учраас цэвэр зээлийн хэмжээ ч 73.2% өсөж ₮332.8 тэрбум болсон аж.

• 🤔 Ашиг яав?: Ариг Банк тайлант онд ₮4.8 тэрбумын цэвэр ашигтай ажилласан байна. Ашгийн хэмжээ өмнөх жилээсээ буурсан нь үйл ажиллагааны тэлэлттэй холбоотой аж. 

📈 Оны тэлэлт

Ариг Банкны үйл ажиллагааны тэлэлтийг харвал 2024 онд шинээр 3 салбарыг нээснээс гадна Номин Холдинг ХХК-д түшиглэн анх удаа санхүүгийн нэг цэгийн үйлчилгээг нээж, 2 тооцооны төвийн үйл ажиллаагааг эхлүүлсэн аж. Ингэснээр харилцагчдад санхүүгийн үйлчилгээг  илүү ойртуулж буй. 

• ✨ Шинэ: Нэмээд зах зээлд шинээр өөрийн хөрөнгөөр санхүүжүүлэх болон ЗГ-аас хэрэгжүүлж буй төсөл, хөтөлбөрийн хүрээнд орлого барьцаалсан бизнесийн бичил зээл, ханган нийлүүлэгчийн шуурхай зээлийн шугам гэх мэт 10 орчим зээлийг шинээр нэвтрүүлсэн байна. Мэдүүштэй нь банкны харилцагчдын эрх ашгийг хамгаалах, мэдээллийн аюулгүй байдлын олон улсын ISO27001:2022 стандартыг нэвтрүүлсэн гэж байгаа. 

• 🗺️ Олон улсад: Түүнчлэн Ариг Банк Киргизийн Finance Credit Bank-тай корреспондент банкны харилцаатай болсноос гадна International Bank of Economic Co-Operation банкнаас банк хоорондын зээлийн эх үүсвэр болон Хонгконгийн China Trade Solution компаниас ч мөн эх үүсвэр татсан аж. 

Цаашлаад, тус банк 2025 оныг худалдааны салбарыг дэмжих жилээр зарлаж уг салбарт үйл ажиллагаа явуулдаг бизнес эрхлэгчдийг дэмжих шинэ бүтээгдэхүүн үйлчилгээ болон тогтвортой хөгжлийн зорилтуудыг дэмжих хүрээнд ногоон зээлийн бүтээгдэхүүнийг нэвтрүүлэхээр ажиллах нь ээ.

🤯 Бодолтой AI

Цахиурын хөндийнхнийг сандаргаж байгаа Хятад AI-н талаар сонсоо л байлгүй. Олны үгээс сонсох нь ээ эцэст нь нэг юм ChatGPT жинхэнэ өрсөлдөгчтэй болох шив. 

❗Цахиурын хөндий дэх донсолгоон 

DeepSeek-г $6 саяар бүтээсэн гэх мэдээнээс болж Nvidia (NVDA)-д том гарз тохиож хувьцааны үнийг 1 өдрийн дотор 16.9% унан, зах зээлийн үнэлгээ нь $589 тэрбумаар агшив. $NVDA-с гадна AI-н томчуудын хувьцаа ч улаанаараа эргэлдэж Nasdaq (^IXIC) 3.1% унаад буй. DeepSeek шиг AI-г ийм бага зардлаар сургах боломжтой, боломжгүй гээд л бөөн хэрүүл болж байна даа. 

🤔 Яагаад сүржигнээд байгаа юм? 

Хүртээмж, хэрэглээ талаасаа өдийг хүртэл ChatGPT хамгийн шилдэг нь байсан хэдий ч ChatGPT-г 1 өдөр ажиллуулахын тулд $700,000 шаардлагатай гэхээр асар өндөр зардалтай AI. 

• 🐣 DeepSeek мэндэлсэн түүх: Гэтэл нөгөө талд нь Хятадын Хедж сангийн үүсгэн байгуулагч Лян Вэнфэн Nvidia-н 10,000 H100 чипээр 2 жилийн дотор DeepSeek-г бүтээсэн гээд байгаа. Ингэхдээ Nvidia шиг дэвшилтэт технологитой чипийг маш бага ашиглаж, өөрсдийн хөгжүүлсэн технологидоо ихэнх бооцоогоо тавьсан гэв. Юутай галзуурал вэ? 

⚙️ DeepSeek хэрхэн ажилладаг вэ? 

За тэгэхээр DeepSeek яагаад сүржигнэхээр AI вэ гэхээр, одоо бидний хэрэглэж буй хувилбар нь DeepSeek-V3 бөгөөд DeepThink (R1) функц нь хэрэглэгчийн асуултад хариулахын тулд AI-н хийдэг арын судалгаа, шинжилгээг бодлоо хуваалцаж байгаа мэт харуулдаг. Өөр нэг давуу тал нь бодит цагийн мэдээллээр хариулах чадвартай. ChatGPT-нх бол 2023 оноор хязгаарлагдаж байгаа.  

• 💡 DeepSeek гэлтгүй бүхий л AI-д арын шинжилгээ хийгдэж байгаа. Гол нь тэд үүнийг хэрэглэгчдэд харуулснаараа давуу. Эндээс технологийнхон минь санаа аваарай, багахан шийдэл хэрэглэгчийн туршлагыг яаж 10x, 100x өсгөж байгааг. 

Одоогоор, DeepSeek-г 51 оронд ашиглах боломжтой бөгөөд Америкийн App Store, Play Store-н хамгийн өндөр таталттай апп болсон л гэнэ. Хятадынх учраас Америк ном ёсоор хэрэглэгчийн мэдээллийн нууцлалаа ярьж эхэлсэн. Том зургаараа Америк Хятадад дэвшилтэт чипүүдээ нийлүүлэхгүй байгаа. Гэтэл Хятад AI ChatGPT-тэй өрсөлдөөд гараад ирлээ гэж. Ирэх саруудад бид гал гарсан галзуу AI шийдлүүд хүлээж байхад гэмгүй л юм байна. 

Бяцхан кейс задлан. 💡

• Асуудал: … компани хүүхдийн тоглоом зохион бүтээдэг. Тэдний тоглоомууд өнгө, үзэмжийн хувьд хөөрхөн ч, эцэг эхчүүд хүүхдүүддээ авч өгөхөөр сонгох нь цөөн байв. 

• Шийдэл: Компани тоглоомуудын зориулалтыг төрөлжүүлж, хүүхдийн нас тус бүрийн онцлогт тохирсон боловсрол, сэтгэл зүй, биеийн хөгжлийг дэмжих элементүүдийг нэмж, эцэг эхчүүдэд зориулсан тайлбар дэвтэр бүтээжээ.

Улмаар эцэг эхчүүд тэдний тоглоомуудыг сонирхон шохоорхож, хүүхдүүддээ авч өгөх, цаашлаад бэлэг дурсгалын зориулалтаар ч худалдан авах болж. Тус компанийн ашигласан бүтээгдэхүүн хөгжүүлэлтийн стратеги хэр үр дүнтэй хэрэгжих бол? Санал, бодлоо хуваалцаарай! 😉

🥹💌 Bye Bye Lemonade in Korea 

Зиак, лимонууд аа! 2 сар гаруй хугацаанд сонорыг тань мялаасан Lemonade in Korea-н маань 10 дугаар цацагдаж дууслаа. 😎

• 📸 Аялна чиг, сурталчилна чиг: Бид сүүлийн дугаартаа 15 жил Монголоор аялж буй, “Хүргэлт ирлээ” нэвтрүүлгийн “Загалмайлсан эцэг”, мэргэжлийн зурагчин Seon Pyo-г урьж оролцуулсан юм. Тэрээр Монголын байгалийг тод томруунаар харуулсан фото зургийн ном хэвлүүлж, үзэсгэлэн гаргаж байсан удаатай.

• ✨ Салбарыг өнгөлөгч: Эргэн дурсахад, Lemonade in Korea-н маань эхний 9 дугаарт K-pop бүжигчин, найруулагч, эмч, инженер тэргүүтэй мэргэжлээрээ Өмнөд Солонгосын ТОП салбаруудад гялалзаж буй Монголчууд оролцож, санхүүгийн арвин туршлагаасаа хуваалцсан билээ.

За тэгээд хайрлан бүтээсэн контентыг маань шимтэн үзээрэй. Дэмжин ажиллагч болон хамтран бүтээгч байгууллагууддаа Lemon Press-н хамт олноос гүн талархал илэрхийлье!

🍋 Дани Арктикийн батлан хамгаалах зардалдаа $2 тэрбумыг төсөвлөв. Үүгээр Арктикийн тэнгисийн цэргийн 3 шинэ хөлөг онгоц болон алсын тусгалын 2 нисгэгчгүй онгоц авах, цаашлаад цэргийн анхан шатны сургалтад элсэх тоог нэмэгдүүлэхэд зарцуулах аж. ЕХ ч Гринландад цэрэг байрлуулах сонирхлоо илэрхийлсэн нь ЕХ-ны 34 төрлийн гол ашигт малтмалын 25 нь тэнд байдагтай холбоотой биз ээ. 

🍋 TMK Energy (TMK.AX) 2024 онд нийт A$7.44 саяын санхүүжилт татжээ. Үүнээс A$4.75 саяыг нь IV улиралд нэмэлт хувьцаа гаргаж төвлөрүүлсэн юм. Харин нийт санхүүжилтээс судалгаа, үнэлгээний ажилд A$4.25 сая, үйл ажиллагааны зардалд  A$3.85 саяыг зарцуулсан байна.

🍋 Дэлхийн Банк болон Африкийн Хөгжлийн Банк Африкийн цахилгаан эрчим хүч үйлдвэрлэлд $35 тэрбумын зээл олгоно. Одоогоор Африкийн нийт хүн амын ойролцоогоор 39% буюу 600 сая гаруй нь цахилгаан эрчим хүчгүй аж төрдөг бөгөөд санхүүжилтээр 6 жилийн дотор 300 сая иргэнийг цахилгаан эрчим хүчээр хангах аж.

🍋 Энэтхэг болон Хятад хооронд шууд нислэг үйлдэж эхэлнэ. Түүхийг сөхвөл, тэд 2020 оны Гималайн өндөрлөгийн хойд талд байрлах газрын маргаанаас болж шууд нислэгээ зогсоож байв. Сонирхуулахад, хилийн маргаанаас үүссэн мөргөлдөөнөөс болж Энэтхэг Хятадын цахим худалдааны апп-уудыг хориглож байсны дотор TikTok ч багтсан байдаг.

• 🗽 “Америк мөрөөдөл” бодит амьдрал дээр $4.4 саяын өртөгтэй. (Wealth)

• 🧧 Хятадын Хаврын баяраар 510 сая хүн төмөр замаар, 90 сая хүн онгоцоор зорчих төлөвтэй байна. (AlJazeera)

• 🎓 2026-2027 оны Fulbright-н гадаад оюутны хөтөлбөрт өргөдөл хүлээн авч эхэлжээ. (USEmbMongolia)

• 🌡️ 10 жил тасралтгүй дулаан ялгаруулах жижиг цөмийн реактор гэнэ үү? (StartupNews)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг