💭 14 жилийн попрол

Азиудын Цагаан сар | Аваргуудын тайлан | 100 ажлын байр

January 30, 2025

POWERED BY

Hey! Улаанбаатарын утааг бууруулах төсөв 2019 оноос хойш пуужиндсан. Энэ жил ₮35.1 тэрбумыг зарцуулна. Энэ хугацаанд утаа ихэссэнээс буурсангүй дээ. Яана даа… 😖

FED: ХНС бодлогын хүүг 4.25%-4.5%-д хэвээр үлдээлээ. 

MSE: Тэнгэр Даатгал (TGI)-н анхны хувьцаа эзэмшигчдийн хурал 3 сарын 6-нд болно.

FRC: 2024 онд репо хэлцлийн дүн өмнөх оноосоо 19% өсөж ₮137 тэрбумд хүрэв.

 🚇 Метрог тойрсон асуулт, асуудал 

Автобусдах уу, таксидах уу, метродох уу? Бид 3 жилийн дараа ингэж ярих ёстой. Тэгвэл метроны эргэн тойронд юу болж байна вэ? 

💭 14 жилийн попрол

2011 оноос хойш дуншсан метроны төсөл одоо л нэг хөдлөх тийшээ хандаж буй. Олон янзын чиглэл сольж ярьж үзсэний эцэст Сонсголонгийн уулзвараас Амгалан зах хүртэл 17.7 км урттай байхаар тогтож ОУ-ын тендер зарлаж ТЭЗҮ-нд тусгах олон нийтийн санал авч байгаа. 

  • 📃 Чимх мэдээлэл: Одоогоор бол Улаанбаатарын метро 1.3 км дундаж зайтай 15 өртөөтэй, цагт 17,200 зорчигч тээвэрлэх хүчин чадалтай байна гэж ярьж буй. Нэмээд тасалбарын үнэ нь ₮1,000 байвал ашигтай гэж тооцсон. 

  • 🛣️ Метроноос гадна: Туулын хурдны зам, Шинэ тойрог замыг барьж түгжрэлийн асуудлыг бууруулах юм. Тодруулбал, Туулын хурдны зам баригдсанаар хотын баруун захаас зүүн зах хүрэх дундаж хугацааг 2 цаг 30 минутаас 25 минут болгож багасгах гэнэ. Улмаар замын хөдөлгөөний ачаалал 13.5% буурах аж. Харин Шинэ тойрог замын ТЭЗҮ 6-р сард дуусна. 

  • 💰 Төсөв мөнгө: Санаж байгаа бол нийслэл ₮500 тэрбум болон $500 саяын бонд гаргасан. Анхны ₮500 тэрбумын бондын ₮200 тэрбум нь 3 хэсэгт зарцуулагдаж байгаагийн 1 нь авто зам. Өмнөх жилүүдэд нийслэлийн зам засвар дээр жилд ₮40-₮50 тэрбумын төсөв оногддог байсан бол одоо бондын санхүүжилтийн тодорхой хэсэг нь шинэ зам болон засварт зарцуулагдаж буй. 

🤔 Том хэлэлцээр

Үүнээс гадна өмнөх хотын даргын үед нийтийн тээврийн төлбөрийн системийг хөгжүүлнэ гээд Өмнөд Солонгосын Tmoney компанитай уулзаж байсан. Тэгвэл нийслэл тэдний 55%-ийг $1 саяар худалдаж авахаар тохиролцсон гээд байгаа. Одоогоор Tmoney-н 36.16%-ийг Сөүлийн захиргаа, 32.91%-ийг LG CNS эзэмшиж байна. Гэхдээ үүнээс илүүтэйгээр төрийн үнийн тогтоолтоос үүдэн 10 гаран жил алдагдалтай ажиллаж байгаа Улаанбаатар смарт карт ХХК-иа тордох ёстой биш үү. 

Эцэст нь… Бидэнд түгжрэл асуудал болж байгаа нь үнэн. Үүнийг шийдэх гэж олон жил, их ч төсөв, хэдэн ч ЗГ-ын нүүрийг үзлээ. Одоо гол нь дэлхийд дунджаар 5-15 жилийг зарцуулж байж хийдэг метроны ажлыг 3-4 жилд багтаана гэж попролгүй яг бодитоор нь сайн судлаад үр дүнтэй ажил болгомоор байна даа. 

🤑 Аваргуудын тайлан

Технологийн томчуудын IV улирлын тайланг ар араасаа гарсаар байна. Багцлан харцгаая. 

👎 Хүлээлтээс доогуур
Meta (META)-н IV улирлын орлого өнгөрсөн жилийн мөн үеэс 21% өсөж $48.3 тэрбумд хүрч төсөөлж байсан дүндээ хүрсэнгүй. Харин ашиг нь 49% өсөж $20.8 тэрбумд хүрэв. Түүнчлэн FB, IG-н идэвхтэй хэрэглэгчдийн тоо нь 5% өсөж 3.4 тэрбум болсон болон 1 сурталчилгааны үнэ 10% өссөн байна.      

Tesla (TSLA)-н орлого 2% өсөж $25.7 тэрбумд хүрсэн ч ашиг нь 71% унаж $2.3 тэрбум болов. Өнгөрсөн онд компани хүлээлтээс бага буюу 495,930 тээврийн хэрэгсэл борлуулсан болон Хятадад Tesla-н шинэ хувилбар гаргахаасаа өмнө Model Y-нхоо үнийг буулгасан нь ашиг буурахад голлон нөлөөлжээ. 

👍 Хүлээлтээс дээгүүр 
Microsoft (MSFT)-н хувьд орлого нь 12%-ийн өсөлттэйгөөр $69.6 тэрбум, ашиг нь 10%-ийн өсөлттэйгөөр $24.1 тэрбумд хүрч шинжээчдийн төсөөллөөс давсан амжилттайгаар ээлжит улирлаа өндөрлүүлжээ. Энэ дундаа Azure болон бусад үүлэн технологийнх нь орлого хамгийн өндөр буюу 31% өссөн байна. 

IBM (IBM) тус улиралд $17.5 тэрбумын орлого, $2.9 тэрбумын цэвэр ашигтай ажилласан. Хиймэл оюун ухааны эрэлт нэмэгдсэнтэй холбоотойгоор компанийн программ хангамжийн орлого 10% өсөж $7.9 тэрбумд хүрсэн нь ашигт ажиллагаанд нь нөлөөлжээ.

🌚 Азиудын Цагаан сар эхэллээ

Өнгөрсөн Лхагва гаргаас Хаврын баяр, Соллаль, Ошогацү, Тет буюу ихэнх Азийн орнуудын Цагаан сар эхэлж Модон могой жилийн шинэлгээ эхэллээ. 

☝️ Хятадын АМАРГҮЙ цагаан сар

Барууныхан Цагаан сарыг хаа сайгүй улаан чимэглэл зүүж, лууг дүрсэлсэн Хятадын Цагаан сараар төсөөлөх нь элбэг. Хятадын Хаврын баяр зүгээр ч нэг өв соёлын бэлгэдэл бус жинхэнэ утгаараа аяллын улирал гэхээр аргагүй ч юм шиг. Өнгөрсөн жилд л гэхэд 8 хоногийн дотор дотоодын аялал нь 474 саяд хүрсэн төдийгүй зах зээлд шингээсэн орлого нь $89 сая. Улмаар 40 хоногт дотоод гадаадын нийт 8.4 тэрбум зорчих хөдөлгөөн бүртгэгдэж байсан бол энэ жил 9 тэрбум буюу түүхэн дээд түвшинд хүрэх төлөвтэй байгаа аж. 

  • 🤑 Бодлогоор татъя: Хятадын эдийн засаг 2024 оны төсөөлөл болох 5%-ийн өсөлтдөө хүрч чадсан ч үйлдвэрлэл нь базаахгүй байгаа учраас эрх баригчид Хаврын баяраараа илүү олон жуулчин татахаар транзит буюу 3-6 өдөр визгүй зорчих орнуудын тоогоо нэмсэн. 

  • 🔮 Соёлын хөшүүрэг: Үүний сацуу өнгөрсөн 12-р сард Юнеско Хаврын баярыг соёлын биет бус өвдөө бүртгэсэн нь ч баярын үеэрх жуулчлалыг хөөрхөн дэмнээд өгөв.

  • 🎥 Харин энтертайнмент салбар дахь томоохон амжилтаас нь хуваалцахад өнгөрсөн Лхагва гарагт 35 сая хүн кино үзэж дотоодын Box Office-н орлого нь $249 саяд хүрчээ. 

🤑 Гахайлдаг салбарууд

Цагаан сарын үеэр Азийн орнуудын худалдаа, аялал жуулчлал болон энтертайнмент салбарууд параболик хөдөлгөөнтэй өсдөг. Тиймээс ч Хятад гэлтгүй Өмнөд Солонгос ч баярын үеэрх жуулчлалыг өсгөхөөр хурдын галт тэрэгнийхээ үнийг 40% хямдруулж, дотоодын худалдан авалтыг нэмэгдүүлэхээр ₩5.5 их наядын “Оннури” бэлгийн картыг уламжлалт захуудад ашиглах боломжтойгоор гаргах гэхчлэн олон зохицуулалт хийв.    

Харин Монголд Цагаан сарын үеэр импорт нэмэгддэг, дотоодын бизнесүүд ч ялгаагүй амардаг гээд харахаар тэдэнд тохиодог эдийн засгийн ид шид бидэнд байхгүй. Хэцүү зүйл нь дундаж цалин нь ₮2.5 сая хэр нь доод тал нь ₮2 саяар цагаалдаг гэхээр бас л айхтар санхүүгийн дарамттай баярладаг байх нь дээ.

💡 Таавар таацгаая. 

… нь нэг удаагийн хэлцлээр их хэмжээний хувьцаа, бондыг худалдахыг хэлнэ. Үнэт цаасны үнэд үзүүлэх нөлөөллийг багасгахын тулд зарим тохиолдолд хөрөнгийн биржээс гадуур хувийн гэрээгээр хийгддэг. Тэр юу вэ? Таасан бол хариултаа бидэнд илгээгээрэй. 😉

The New York Times

🍋 Монгол Улс маргаашаас эхлэн 100% самнасан ноолуур экспортолно. Ингэснээр үндэсний үйлдвэрүүд $260 гаруй саяын нэмүү өртөг бий болгох боломжтой аж. Өнгөрсөн жилүүдэд бид нийт бэлтгэсэн ноолуурынхаа 20%-30%-ийг л самнаж экспортолдог байсан бол одоо угаасан ноолуураас 2-3 дахин өндөр үнээр ноолуураа зарах нь ээ.

🍋 Meta (META) 2021 оны Капитолын халдлагаар Дональд Трампын цахим хаягуудыг хаасныхаа хариуд $25 саяыг төлөхөөр тохиролцов. Уг нөхөн төлбөрийн 88%-иар Дональд Трампын Ерөнхийлөгчийн номын санг санхүүжүүлэх бол үлдсэнийг гомдол гаргасан хуулийн зардалд болон бусад нэхэмжлэгчдэд хуваарилах аж. 

🍋 СЗХ үл хөдлөх хөрөнгийн хөрөнгө оруулалтын итгэлцлийн сан байгуулна. Улмаар орон сууц, худалдааны төв, оффис зэрэг үл хөдлөх хөрөнгийг хөрөнгө оруулагчдад илүү хүртээмжтэй, эрсдэл багатай байдлаар санал болгох боломж бүрдэх юм. Мөн банкны салбарын ХЗЗ-д орох боломжийг нэмэгдүүлж хадгаламжийн сертификатыг ХЗЗ-д нэвтрүүлэх, стартап болон ЖДҮ дэмжсэн хувьцааны хамтын санхүүжилтийн тогтолцоог бий болгох нь.

🍋 Toyota (TM) өнгөрсөн жил 2023 оноос 3.7% бага буюу 10.8 сая автомашин борлуулсан ч автомашины салбарт 5 дахь жилдээ тэргүүлж байна. Харин Volkswagen (VWAGY) мөн хугацаанд 2023 оныхоос 2.3% бага буюу 9 сая орчим автомашин борлуулсан дүнгээр удаалж буй. Тэдний араас BYD өнгөрсөн жил 2023 оныхоос 41% их буюу 4.3 сая автомашины борлуулалттайгаар жагсаж байна даа.

  • 🤥 “Мөнгөө хурдан бөгөөд ихээр өсгөх” гэдэг нь залилах гэмт хэрэгт хамаарагдах ойлголт. (FRC)

  • 🐉 Alibaba-н Qwen 2.5 AI модель цахиурын хөндийг донсолгох уу? (FoxBusiness)

  • 💰 Норвегийн баялгийн сан өнгөрсөн жил $222.4 тэрбумын ашигтай ажиллаж рекорд тогтоов. (Reuters)

  • 👷 “Оюу толгой” ХХК 100 ажлын байр зарлажээ. (OTMongolia)

Reply

or to participate.