🤑 Битүү ногдол ашиг

POWERED BY

Morning! Өнөө инфляц маань өөдөө мацсаар л. Өнгөрсөн сарынх 9.6% болоодохжээ. 2024 оны эхний хагаст 5.1% болтлоо уруудаж байсан ч сонгуулийн дараанаас зогсолтгүй өсөж байна даа. Мөдгүй буцаад 2 оронтой тоо руу орох нь дээ. 😢   

MSE: Премиум Нэксус ХК (CUMN) болон Улаансан ХК (UNS) ногдол ашиг хуваарилахгүй байх шийдвэр гаргалаа. 

HSX: Хишиг-Уул ХК (HSX) хувьцаагаа эргүүлэн худалдаж авах тендер зарлалаа. Санал болгож буй үнэ нь ₮4,393.9 байгаа нь $HSX-н өчигдрийн үнээс ₮6.1-өөр доогуур аж. 

MNG: Fitch Ratings ЗГ-ын шинээр гаргах $-ын бондыг “B+/Тогтвортой” гэж үнэлэв.

🐫 Ногдол ашгийн цуваа

Зээ, сарын сайныг саатан хүлээж, өдрийн сайныг өнжин хүлээж МХБ (MSE) дээр бүртгэлтэй ХК-иуд ногдол ашиг тараах шийдвэрээ гаргаж эхэллээ. Хэн, хэн хэдийг тараах нь вэ? 

🗒️ Эхлэл = 8 

Одоогийн байдлаар он гарснаас хойш 8 ХК ногдол ашиг тараах шийдвэр гаргаад байна. Энэ дундаас АПУ ХК (APU)-ийн ногдол ашиг хамгийн өндөр буюу 2024 оны II хагас жилийн цэвэр ашгаас ₮69.2 тэрбум, 2024 онд нийт ₮127.6 тэрбумын ногдол ашиг тараах шийдвэр гаргаад буй. Тэдний II хагас жилийн ногдол ашгийн өгөөжийг өчигдрийн хувьцааны үнээр тооцвол 6.5% болж байгаа юм. Харин Эрдэнэт Суврага (SVR) болон Инвескор ББСБ (INV)-ын ногдол ашгийн өгөөж хамгийн бага, ЛэндМН ББСБ (LEND)-ынх хамгийн өндөр байна. 

• 📈 Сургаар өсөв: Харин Инвескор ББСБ ногдол ашиг тараах шийдвэр гаргасны дараа хувьцааны үнэ нь өчигдрийн байдлаар 4.62%, Монложистикс Холдинг (MLG) ногдол ашиг болон хувьцаа халааслах шийдвэр гаргаснаар хувьцааны үнэ нь 8.38% өслөө.

👏 Сайн жишгийг дагагсад

Авууштай нь тус 8 компанийн 4 нь ногдол ашгийн төлөлтийн өдрөө тодорхой зарлаад байна. ЛэндМН ББСБ л гэхэд ногдол ашгийн төлөлтийн өдрөө 2 дахь жилдээ тодорхой зарлаж байгаа буюу энэ жилийн хувьд 4 сарын 4-нд ногдол ашгаа тараах нь. Нээлттэй компаниуд ногдол ашгийн өдрөө тодорхой зарласнаар хөрөнгө оруулагчид ногдол ашиг авах өдрөө тодорхой мэдэж, өөрийн ногдол ашгийн өгөөжийг удирдах, төлөвлөх боломжтой болох юм. 

❌ Ногдол ашиг тараахгүй

Харин эсрэг талд одоогоор 6 компани ногдол ашиг тараахгүй байх шийдвэр гаргаад байна. Говь ХК (GOV) л гэхэд өнгөрсөн оны ТУЗ-ийн хурлаараа 2024 онд ашигтай ажиллахаар байгаа учраас ногдол ашиг хуваарилах болов уу гэсэн төсөөлөлтэй байгаагаа илэрхийлж байсан ч санхүүгийн үр дүн нь ногдол ашиг олгох нөхцөлийг хангаагүй тул ногдол ашиг хуваарилахгүй байх шийдвэр гаргасан. 

• Угаас зарим компаниудын хувьд алдагдал, өр төлбөр зэрэг санхүүгийн нөхцөл байдлаасаа хамаарч эсвэл үйл ажиллагаагаа тэлэх зорилгоор ашгаараа дахин хөрөнгө оруулалт хийж ногдол ашиг тараахгүй байх нь оновчтой шийдвэр болдог билээ. 

Эцэст нь… Одоо ч банкнуудын ногдол ашгийн шийдвэрийг хүлээж байна даа. Хүлээлт үүсгэж байгаа компаниуд шийдвэр гарсны дараа энэ тоймыг дахин хүргэе ээ. Stay tuned! 

😵‍💫 Гангийн салбарын чичирхийлэлт

Эртээ урдын цагт Орос, Хятад, Монгол гурвын онигоог сонсдог байсан бол орчин үед Америк, Хятад, Монгол гурвын онигоог сонсдог боллоо гэж.

✋ Трамп: Америк эн тэргүүнд

Трамп 7 хоног эхлэв үү, үгүй юу гаалийн тарифын бодлогоо өргөжүүлэн, ган болон хөнгөн цагааны татварыг 25% нэмэгдүүлж дотоодын ган үйлдвэрлэгч нараа баярлуулав. Улмаар ган болон автомашин үйлдвэрлэгчдийн хувьцааны үнэ ногоороод эхэллээ. Учир нь Америк гангийн эрэлтээ дотоодын үйлдвэрлэл болон импортоор хангаж ирсэн бөгөөд аандаа импортын ганг зах зээлээсээ шахаж дотоодын үйлдвэрлэлээ түшиглэх бололтой. 

• 📉 Гэтэл нөгөө талд Хятадын дотоод дахь гангийн эрэлт буурч үйлдвэрлэл нь илүүдээд байгаа учраас гадаад зах зээл рүү жинхэнэ утгаараа цутгаж, өнгөрсөн жилд 110.7 сая тн ган экспортолжээ. Тэр бүү хэл тэд ирэх жилүүдэд гадагш 100 сая тн ган экспортлох төсөөлөлтэй байгаа нь Америк төдийгүй бусад орны ган үйлдвэрлэгчдийг тэвдүүлэхээс аргагүй. 

• 🆙 100 сая тн гэдэг бол Америкийн жилд үйлдвэрлэдэг хэмжээнээс хэтийдсэн дүн тул дотоодын үйлдвэрлэгчид татварыг нь 25% биш 60% болго гэж шахаж буй. 

🙌 Тойруулаад хаа!

Америк хөрш орнууд болох Канад, Мексикээс хамгийн их ган импортолдог. Өнгөрсөн онд нийт импортын 40%-ийг тус 2 улс, Хятад ердөө 1.8%-ийг л бүрдүүлсэн байдаг. Гол агуулга нь Хятадаас Америк руу шууд импортолж буй ган маш бага харагдах ч Вьетнам, Тайвань, Япон, Өмнөд Солонгос гээд гуравдагч орнуудаар дамжин ирэхийг нь тэр чигт нь хааж, хавтгай татвар ногдуулж буй. 

• 🤔 Амиа бодсон шийдвэр: Трамп тангаргаа өргөснөөс хойш зөвхөн Америкийг бодсон маш түрэмгий шийдвэрүүдийг гаргаж түүнийг нь ч дэлхий нийтээрээ шүүмжилж байна. Гэхдээ тэрбээр анхнаасаа л Америкийг эн тэргүүнд тавина гэж гарч ирсэн гэхээр гайхах зүйлгүй. Айлын аав, ээж хүүхдүүдээ ингэж хамгаалж дэмждэг байх нь. Манайд бол арай өөр хууль л үйлчлээд байдаг даа. 🤕

Эцэст нь… Хятадын үл хөдлөх, ган гээд гол салбарууд нь сэргэхгүй байгаа учраас эдийн засаг нь ч дорвитой сэргэхгүй байна. Нэмээд нүүрсний үнэ 4 жилийн өмнөх буюу тн тутмын үнэ нь $104.5-руу уначихлаа. Монголын амь зуулгын орлого буурсаар л. Гэтэл бид өнгөрсөн 2 жилд түүхэн дээд хэмжээгээр нүүрсээ экспортоллоо гээд тэтгэвэр, цалин, халамжуудаа нэмчихсэн байдаг. Халамжаа даах нь уу? Хажуугаар мега төслүүдээ амжуулж чадах нь уу?  

0.3% их
Зам, тээврийн салбар сүүлийн 1 сард өмнөх оны мөн үеэс 0.3% их буюу 14.8 сая зорчигч тээвэрлэжээ.
178.1 мянга
Үүнээс агаарын тээврээр хамгийн их буюу 231.6 мянган хүн улс болон хот хооронд зорчсон бол төмөр замаар хамгийн бага буюу 178.1 мянган хүн зорчив. 
7.3 сая
Авто тээврийн ачаа хамгийн их буюу 7.3 сая тн байгаа бол төмөр замынх 4.6
сая тн, агаарын тээврийнх 0.8 мянган тн байна. 

🍋 Калифорнийн даатгалын комисс даатгалын компаниудаас FAIR төлөвлөгөөг нийт $1 тэрбумаар санхүүжүүлэхийг хүсэв. Тус төлөвлөгөө нь гамшгийн өндөр эрсдэлтэй бүсийн оршин суугчдын хохирлыг барагдуулах ЗГ-ын хөтөлбөр бөгөөд одоогоор $914 саяын тусламж үзүүлээд буй. Тэгвэл нэмэлт санхүүжилтээр FAIR төлөвлөгөөг хэрэгжүүлдэг байгууллагуудын хүний нөөцийг нэмэгдүүлж давхар даатгалын санхүүжилтийг өсгөх аж. 

🍋 Ашид Капитал ББСБ-ын 2024 оны ашгийн биелэлт 147%-тай гарлаа. Тодруулбал, компани өнгөрсөн онд Simple III, Simple IV, болон Simple V бондуудыг гаргаж бонд тус бүрээр ₮20 тэрбумын хөрөнгийг татан төвлөрүүлээд буй. Улмаар тэд ISO 27001: 2013 олон улсын стандартыг 2 дахь жилдээ батлуулан, Simple 3.0-г зах зээлд нэвтрүүлж, шинээр 6 салбар нээжээ. 

🍋 Хятад Лондоны хөрөнгийн бирж дээр анхны ОУ-ын ногоон юанийн бондоо гаргана. Тус улсын сүүлийн 10 жилд гаргасан нийт $540 тэрбумын ногоон бондын дийлэнх нь дотооддоо болон Хонконгийн хөрөнгийн бирж дээр, харин 1% нь бусад зах зээлд арилжаалагддаг аж. Нөгөө талд Дональд Трамп Парисын уур амьсгалын хэлэлцээрээс гарах шийдвэр гаргаад буй энэ үед Хятадын ногоон шилжилтийн шинэ алхам оновчтой болов уу? 

🍋 ГБХНХЯ хөдөлмөр эрхлэлтийг дэмжих “JobCenter” төвийг 21 аймагт нээнэ. Эхний ээлжид  Улаанбаатарын 4 цэгт нээсэн JobCenter-н үйл ажиллагааг нийгмийн хамгааллын үйлчилгээнүүд болон мэргэжлийн сургалтын байгууллагуудтай уялдуулан сайжруулах аж. Цаашлаад хүнсний эрхийн бичгээс татгалзаж хөдөлмөр эрхэлж буй зорилтот бүлгийг ажилд зуучлах, мэргэжлийн чиг баримжаа олгох сургалтад хамруулах юм гэнэ. 

• 🪺 Америкт сар бүр дунджаар 430 мянган стартап төрөн гардаг гэнэ ээ. (Forbes)

• 🎧 Apple-н зүрхний цохилт хэмжигч Powerbeats Pro 2 чихэвч худалдаалагдах нь. (TechCrunch) 

• 🎬 Холливудын блокбастерууд моодноос гарч, “Ne Zha 2” тэргүүтэй Хятадын бүтээлүүд гялалзаж эхлэв. (NYT)

• 💊 Сэтгэл гутралд өртөөд байвал Д амин дэмийн түвшнээ шалгуулаад үзээрэй. (EconomicTimes)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа 
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ