🇲🇳🇰🇷 Дотно харилцаа

POWERED BY

Өглөөний мэнд ээ! Өчигдөр ЗГ цаашид татвар нэмэхийг хориглож байгаагаа зарлалаа. Бид олны жишгийг дагаад уншигчдыгаа товхимлоо уншихгүй алгасгахыг хориглосон шийдвэр гаргаж буйгаа үүгээр мэдэгдэж байна. 😏 

MNG: ЗГ Эгийн голын УЦС-ын туслах далангийн ТЭЗҮ боловсруулах зардлыг баталлаа.

DBM: Хөгжлийн банкны эрхлэх ажил, үйлчилгээний хүрээг ЭКСИМ банкны шаардлагад нийцүүлж өргөжүүлнэ. 

MSE: Монголын Хөрөнгийн Бирж ХК-ийн ээлжит хувьцаа эзэмшигчдийг хурал 4 сарын 21-ний өдрийн 10 цагт болно.

 🇲🇳🇰🇷 Дотно харилцаа

Өмнөд Солонгос Монгол хоёр 1990 онд гар гараа барилцаж байсан. Харин сүүлийн жилүүдэд харилцаа нь дотносоод тэврэлдэх шахам харилцаатай болж байна даа. 

🍙 Япон дээр нэмэх нэг

Ивий Монгол минь ганц Японтой Эдийн засгийн түншлэлийн хэлэлцээр байгуулсан түүхтэй. Харин одоо энэ хэлэлцээрийг Өмнөд Солонгостой байгуулахаар 2 жил ажиллаж, одоо ид буцлаад хэлэлцээрийн төсөл нь гарчхаж. Олон түмэн энэ хэлэлцээрийн тухайд “Өмнөд Солонгос өрмийг нь аваад бид хусамтай үлдэх вий” гэж хардаастай. Тэгвэл хусам, өрөм нь юу байх юм бэ дээ? 

• 🤔 Өргөн бүдүүн: Өмнөд Солонгос бол биднийгээ бодоход 22 улстай чөлөөт худалдааны хэлэлцээр хийсэн улс. Бидэнтэй хэлэлцээр нь худалдаа, үйлчилгээ, хөрөнгө оруулалт зэргийг багтаасан 14 бүлэгтэй буюу зөвхөн худалдааны тарифын хөнгөлөлтөд бус, эдийн засгийн өргөн хүрээтэй хамтын ажиллагаанд чиглэж буй.  

• 📌 Тэгэхээр энэ хэлэлцээрийн хүрээнд харилцан импортын тарифын хөнгөлөлт үзүүлж, худалдааны саад тотгорыг бууруулах, хөрөнгө оруулалтын орчныг сайжруулах, худалдааны журмаа уялдуулж үйлчилгээний салбарт ч хамтын ажиллагааг өргөжүүлэх боломж бүрдэх учиртай. 

😞 Гэхдээ бид чинь… 

Манай дэд бүтэц, уул уурхай, соёлын салбарт ч Өмнөд Солонгосын зай тэлж байгаа. Тодруулбал, KT групп Монголоос газрын ховор элемент импортлохоор болж, метроноос гадна төмөр замын төслүүдэд ч Өмнөд Солонгос оролцож байна. Энэ ч утгаараа бид 2023 оноос хойш тус улсаас $956 саяын импорт хийсэн ч буцаагаад экспорт нь үүнээс 5 дахин бага. 

Эцэст нь… Энэ төрлийн хэлэлцээртэй ганц Япон минь биднийг буцалтгүй тусламжаар бөмбөгдөөд амьхандаа л дэмтэй. Харин Өмнөд Солонгосын хувьд харилцаагаа гүнзгийрүүлэх нь давуу ч манайд наалдах ашгийг ихэсгэмээр санагдаж байна даа. 

🇰🇿 ГХЭ-ийн хөгжил хурдны замаар

Казакстан газрын ховор элемент (ГХЭ)-ийг ирээдүйн технологийн дэвшилд чухал ач холбогдолтой “шинэ газрын тос” хэмээн тодорхойлж, өдгөө тогтоогдсон 15 ГХЭ-ийн ордуудынхаа нөөцийг батлах, олборлолтоо нэмэгдүүлэхээр эрчтэй ажиллаж байна. 

🗺️ Тархац: Өмнөд, хойд хэсэгт

Тус улсад одоогийн байдлаар ГХЭ-ийн 15 орд бүртгэгдсэн буюу Туркистан, Костанай, Мангыстау гэсэн 3 бүс нутагт ГХЭ өргөн тархацтай нь тогтогджээ. 

• 👉🏻 Токаевын чиглэл: Казакстаны 2 жилийн өмнө Ерөнхийлөгчийн чиглэлээр 2026 он гэхэд геологи, геофизикийн хайгуулын талбайг дор хаяж 2.2 сая км2-д хүргэх, ордуудын нөөцийг тогтоох гэхчлэн Казакстаныг ГХЭ-ийн луугар нийлүүлэгч болох ажлаа эрчимжүүлж эхэлсэн. 

• 🙂‍↔️ Сав нь бэлэн: Хамгийн чухал нь тэд дэлхийд цөөн бэрилл, скандий, тантал, ниобиумыг боловсруулах үйлдвэртэй тул Европын Холбоо тус улс руу хөрөнгө оруулах гэж яарах нь аргагүй. 

💭 Тэд юу хийв? 

Казахстан хөрөнгө оруулалтын орчныг сайжруулж, хуулиа өөрчилснөөр гаднын компаниудыг хайгуул хийх, газар ашиглахад хялбар болгосон. Өдгөө Европын холбоо, Их Британи, Өмнөд Солонгос, Япон, Хятад зэрэг орнуудтай хөтлөлцөөд гүйж буй. ГХЭ-ээр тогтохгүй Германы HMS Bergbau компанитай Ахметкино талбайд литийн хайгуул хийж байгаа бөгөөд нөөц нь батлагдсан тохиолдолд $500 саяын хөрөнгө оруулалт татах ам авчхаад байна.

• 🪄 Гайхалтай нь тус талбайн одоогийн хөрөнгө оруулалтын үнэлгээ нь $8 сая буюу нөөцөө л тогтоочихвол хөрөнгө оруулалтаа 62.5 дахин нугална. 

Эцэст нь… Тэд хайгуулаа эрчимжүүлж байхад бид ГХЭ-ийн хайгуул нь эхэлсэн ганц төслөө хүчээр зогсоох гэж эсэргүүцэж, тэмцэлдээд л. Зөв, бурууг нь цаг хугацаа л дэнсэлдэг байх даа.  

14 мянга 
Өнөөгийн байдлаар Чех Улсад хөдөлмөр эрхэлж буй 14 мянган Монгол иргэн байна.
6.3%
Энэ нь гадаад улсад хөдөлмөр эрхэлж буй нийт Монголчуудын 6.3%-тай дүйнэ.
29 оюутан
Түүнчлэн 29 оюутан “Илгээлт-2100” тэтгэлэгт хөтөлбөрийн хүрээнд тэндхийн их, дээд сургуульд суралцаж байгаа аж.

💋 Дэлхийн брэнд Монголд

Premier Tailor дэлхийд алдартай тансаг үнэртний брэнд Jo Malone London-г Монголд албан ёсоор оруулж ирээд буй. Ингэснээр тус компанийн сагс үнэртний ертөнцөөр тэлж байна даа.

🔝 Хэр том тоглогч вэ?

Дэлхийн тансаг зэрэглэлийн брэндүүдийн ТОП-10-т толгой цохидог Estée Lauder (EL)-н 1999 оноос эзэмших болсон Jo Malone London нь өдгөө дэлхийн 80 гаруй улсад салбар дэлгүүртэй.

• Эдгээрээс Их Британид л гэхэд 2023 оны байдлаар 37 салбар дэлгүүртэй бөгөөд 2026 онд энэ тоог 1.3 дахин нугалж 51 болгох төлөвлөгөөтэй байна. Харин энэ тоо Америкт бол 6 нугарна.

🌬️ Танилцъя, талын цэцэг

Jo Malone London нийт 206 төрлийн сүрчигтэй бөгөөд тэр дундаас "Lime Basil & Mandarin", "Wood Sage & Sea Salt" төрлүүд нь ангидаа толгой цохидог гэнэ дээ.

• ✨ Төрөл бүр: Тус брэндийн сагс үнэртнээс гадна биеийн арьс арчилгааны бүтээгдэхүүн, тансаг үнэртэй лаа, орчны үнэртүүлэгч төдийгүй эрэгтэй, эмэгтэй бэлгийн багц болон хурим найр, төрсөн өдөр тэргүүтэй ёоз ёозын арга хэмжээнд зориулагдсан бэлгийн багцаас бүрддэг гэхээр догь л юм.

• 🎨 Хэрэглэгчдийг татах нууц: Jo Malone London-н өвөрмөц онцлог нь үнэртнүүдийг хооронд нь давхарлан хольж түрхээд шинэ үнэр бүтээж болдогт байгаа юм.

👀 Анхаарал татах тоо: Сонирхуулахад, тус брэндийн хэрэглэгчдийн 68% эмэгтэй, 32% нь эрэгтэй байгаа юм. Тэгвэл компани 2020 оноос хойш эрэгтэй үнэртний цуглуулгаа 3 дахин нэмэгдүүлснээр тус ангиллын борлуулалтын орлого нь 2023-2024 онд 399% өссөн аж.

Эцэст нь… Ийнхүү Монголд тансаг зэрэглэлийн брэнд нийлүүлдэг цөөн хэдэн компанийн тоо нэгээр нэмэгдэж байна. Сүүлийн жилүүдэд Монгол дахь тансаг брэндүүдийн тоо нэмэгдэж байх чинь ээ. Юутай ч дотнын нэгэнд өгөх бэлгийн сонголт арвижиж байна даа.

🚀📶 Өндөр хурдны интернэт ирлээ! 

Гацаад л байна уу? Хэдий болтол муу интернэтээр сажлуулж ажлаа хийх вэ дээ. Kewiko-н өндөр хурдны интернэтийг сонирхож үзэх үү? 👇️ 

Яадаг эд гэнэ ээ?

• 😎 Цогц: Тэд байгууллагын онцлогт тохируулан шилэн кабель татах, гадна, дотор орчинд утасгүй интернэтийн сүлжээ үүсгэн холбож өгдөг гэнэ.

• ✨ Факт: Сонирхуулахад, Улаанбаатарын 1,500 гаруй цэгт Kewiko Wi-Fi сүлжээ цацагдсан байгаагаас 500 гаруйд нь иргэд үнэ төлбөргүй холбогдон интернэтийн хэрэгцээгээ хангадаг шүү.

За тэгээд интернетийн зардлаа нэмэлгүйгээр илүү хурдан интернеттэй болоод авна биз ээ.

🍋 Manchester United (MANU) 5 жилийн дараа 100 мянган хүний суудалтай нүсэр цэнгэлдэх хүрээлэнтэй болно. Үүнийг $2.6 тэрбумаар босгох бөгөөд $MANU-н хамтран эзэмшигч, тэрбумтан Жим Рэтклифф бүрэн хариуцаж санхүүжүүлэх юм. Цаад санаа нь Эйфелийн цамхаг жуулчдыг татдаг шиг Манчестер хотыг аялал жуулчлалын төв болгоно оо гэж байгаа.

🍋 Монгол Улс ОУ-ын татварын стандартыг хэрэгжүүлж, шударга татварын тогтолцоог бүрдүүлнэ. Үүний хүрээнд CRS MCAA зэрэг хэд хэдэн хэлэлцээрт нэгдээд буй. Ингэснээр татвар төлөлтөөс зайлсхийх явдал багасаж, улс орнуудтай банкны данс, санхүүгийн хөрөнгийн талаарх мэдээллийг солилцох бүрэн боломжтой болж байгаа гэнэ.

🍋 Хангайн бүсийн ЭЗ-ийг аж үйлдвэрлэл, аялал жуулчлал, үйлчилгээний салбарын бүтээмжид тулгуурлан хөгжүүлнэ. Учир нь Архангайн ЭЗ-ийн бүтцийн 57%-ийг ХАА, 26%-ийг үйлчилгээ, 17%-ийг аж үйлдвэрийн салбар тус тус эзэлдэг гэнэ. Түүнчлэн энэ онд Архангайд сургуулийн өмнөх боловсролын хүртээмжийг дээшлүүлэхийн тулд хэд хэдэн суманд цэцэрлэгүүдийг ашиглалтад оруулах аж. 

🍋 Украйн Америкийн батлан хамгаалахын тусламжийн сургаар 30 хоног гал зогсоохоо мэдэгдэв. Нэг талд мэдэгдээд байгаа ч Орос зөвшөөрөх эсэх нь эргэлзээтэй. Америк ч тэдний дайныг зогсоох гэж үзэж байснаа арга тасрав бололтой дог шүү. Одоогоор энэ дайн 1,113 дахь өдрөө үргэлжилж, 2 талд ойролцоогоор 1 саяар тоологдох хүн амь үрэгдээд байгаа. 

• 🏝️ Макаод тэтгэлэгтэй суралцах боломжтой болжээ. (БоловсролынЯам)

• 📍 Юутай ч, Монгол Улсын AI хөгжүүлэх тэргүүлэх чиглэлүүдээ тодорхой болгож. (ЦХИХХЯ)

• 🔍 Disney-н залуу үеийн үзэгчдийг татах шинэ стратеги. (Axios)

• ✈️ Korean Air болон Asiana Airlines нэгдсэний дараах шинэ өнгө төрхөө тодорхойлов. (Reuters)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ