🛢️ Гацаатай газрын тос

POWERED BY

Lemon Press-н үнэнч уншигчдадаа энэ өдрийн мэнд хүргэе!  Бид контент, нийтлэлийнхээ агуулгыг улам сайжруулж, шинэлэг, сонирхолтой контентуудыг бэлтгэх зорилгоор жил бүр уншигчдын судалгаа авдаг билээ. Доорх асуулгыг бөглөхөд ердөө 2-3 минут зарцуулах тул чин сэтгэлээсээ бөглөж, биднийг дэмжээрэй. Таны оролцоо үнэхээр чухал юм шүү!  🙆‍♀️

MRT: Ирэх 7 хоногт Гашуунсухайт-Ганцмодны төмөр замын хил холболтын хэлэлцээрийг эцэслэнэ.  

BOM: 2024 онд $5.5 тэрбумыг даваад байсан ГВУН өнгөрсөн сарын байдлаар $4.9 тэрбум болж 11% буурлаа. 

UID: Улсын Их Дэлгүүр ХК (UID) 2024 оны IV улиралд ₮3.7 тэрбумын орлоготой, ₮1.8 тэрбумын зардалтай, ₮1.9 тэрбумын ашигтай ажиллажээ. Тэдний түрээсийн орлого 2024 онд 10% нэмэгдсэн аж. 

OTC: Өнгөрсөн 7 хоногт биржийн бус зах зээлд ₮47.8 тэрбумын болон $961 мянгын арилжаа хийгдэв. Нийт төгрөгийн арилжааны 45.5%-ийг анхдагч зах зээлийн арилжаа бүрдүүлэв.

 🛢️ Гацаатай газрын тосны үйлдвэр

Засгийн газар 14 мега төсөл хэрэгжүүлнэ гэж яриад байгаа. Үүний хүрээнд газрын тос боловсруулах үйлдвэртэй холбоотойгоор Энэтхэгийн Megha Engineering & Infrastructures Limited (MEIL) компанитай гэрээ байгуулав. 

📃 Ямар учиртай гэрээ вэ? 

Монгол газрын тос боловсруулах үйлдвэртэй болно гэж 9 дэх жилийнхээ нүүрийг үзэж байна. Уг үйлдвэр нь нийт 12 технологийн байгууламжтай байхаар төлөвлөгдөж байгаагийн 7 нь гүн боловсруулалтын лицензтэй технологийн байгууламжууд аж. Иймээс энэ байгууламжийг MEIL компаниар гүйцэтгүүлэхийн тулд инженерчлэл, худалдан авалт, барилга угсралтын гэрээг байгуулсан хэрэг. 

• 🤔 Хэн гээч вэ? Технологийн байгууламжийн ажлыг гүйцэтгэх MEIL компани нь Энэтхэг төдийгүй олон улсад нефть-химийн болон дэд бүтцийн томоохон төслүүдийг хэрэгжүүлдэг бөгөөд 34 жилийн туршлагатай аж. Тэд манай газрын тосны үйлдвэрийн 7 байгууламжийг 36-38 сарын дараа барьж дуусгах гэнэ дээ. 

😓 Монголын гунигт он жил дуусах уу?

2016 онд ЗГ Энэтхэгийн Эксим банкнаас газрын тос боловсруулах үйлдвэр барих $1.2 тэрбумын зээл авсан бол үйлдвэрийн бүтээн байгуулалтыг 2019 оноос эхлүүлсэн. Уг бүтээн байгуулалт 4 багц ажилтай ч одоог хүртэл дуншсаар. MEIL компанийн ажил 4-р багцад хамаарах бөгөөд 36-38 сарын дараа дуусна гэхээр 2027 онд ашиглалтад орно гэсэн амлалт нь хумсын тоос боллоо хөөрхий. Уг нь бүр энэ онд ашиглалтад орох байсан юм. 

• 🤧 Урсгасаар: Уг нь бол газрын тосны үйлдвэр ашиглалтад орсноор хэрэгцээнийхээ 70%-ийг дотоодоосоо хангаж, валютын гарах урсгал 20%, долларын ханш 18%-25% тус тус буурах ёстой. Гэтэл урт настай удаан жаргалтай, хэт попролтой энэ ажил хойшилж байх хооронд бид нефтийн бүтээгдэхүүнээ импортолж зөөсөөр 2015 оноос хойш $12.2 тэрбумыг барав. 

Эцэст нь… Жилээс жилд улам олуулаа түгжирдэг манай улсын шатахуун, түлшний хэрэглээ ч тэлсээр байгаа. Энэ хооронд газрын тосны үйлдвэрээ хүлээсээр, дотоодоосоо хангачихна гэж горьдсоор. Бухын доодхыг харж үнэг турж үхнэ гэгчээр ашиглалтад орох хугацаа нь хойшлоод л. Мега энэ тэр гэж ярих яах вэ, ажлаа хэлсэн төлөвлөсөндөө хийдэг болъё оо, нөхөөд. 

 🙈 Чамд итгэнэ, чамд бол үгүй!

Өнгөрсөн сарын байдлаар дэлхийн улс орнуудын удирдагчид иргэддээ хэр үнэлэгдэж, хүндлэгдэж байгааг танилцуулъя. 

😌 Дажгүй хэд

2024 онтой харьцуулахад эхний 5 эрх баригчдад иргэдийнх нь итгэх хувь 50% давсан нь хамгийн онцлог үзүүлэлт байлаа. Айргийн 5-аас Нарендра Моди 3 дахь удаагаа, Доналд Трамп 2 дахь удаагаа дахин сонгогдсон эрхмүүд байгаа бол Аргентин, Мексик, Швейцар гээд үлдсэн 3 нь шинэхэн Ерөнхийлөгч нар. 

• 🔎 Шалтгаан: Тэднээс хэний ч төсөөлөөгүй ялалтын эзэн Хавьер Милег онцлоход, Ерөнхийлөгч болсон эхний өдрөө яамдуудын тоог 18-аас 8 болгож, 1 жилийн дотор инфляцыг халуу дүүгсэн 211.4%-иас 117.8%-руу бууруулсан гэхчлэн төрийн зардлыг бууруулж, эдийн засгаа өсгөх шуурхай, бодит арга хэмжээг хэрэгжүүлж байгаа учраас иргэд нь түүнд найдлага тавьж буй. 

• ✋ Харин Швейцар, Мексикийн хувьд шинэ 2024 онд Ерөнхийлөгч нартай болсон ч өмнөх Ерөнхийлөгч нарынх нь үнэлгээ дутахгүй өндөр байснаас харахад тус улсын иргэд хүнд бус системдээ хэр итгэлтэй байдгийг харуулах шиг. 

😑 Бүтэхгүй хэд

Жагсаалтад сүүл мушгисан 5-аас Швед болон Их Британийн Ерөнхий сайд хасагдаж, Чехийн Ерөнхийлөгч нэмэгдсэнээс бусдаар өөрчлөлт байсангүй. Харин ч Франц, Өмнөд Солонгосын Ерөнхийлөгч, Канадын Ерөнхий сайд, Германы Канцлер Олаф Шолцын үнэлгээ улам доройтжээ. Дийлэнх нь том бодлогын асуудлуудыг дорвитой шийдэж чадахгүй байгаатай нь холбоотой ч удирдлагын арга барил, харизм, элдэв бусын скандал нь ч ихээхэн нөлөөлж буй. 

• 🔪 Хасагдсан 2: Улмаар өнгөрсөн 1-р сард Канадын Ерөнхий сайд Жастин Трюдо 9 жил хашсан үүрэгт албаасаа огцорч буйгаа зарласан бол засаглалын эрхийг атгах гээд бүтэлгүйтсэн болдоггүй өвгөн хочит Өмнөд Солонгосын Ерөнхийлөгч огцрох нь бараг л тодорхой байгаа. 

Эцэст нь… Уг санал асуулгад багтсан дийлэнх улс орнууд өндөр хөгжилтэй болон барууны улсууд гэдгийг анзаараарай. Хаалганы цаана тэднээс долоон дор эрх баригчидтай улсууд зөндөө л байгаа. Жишээ нь Монгол ч юм уу. 🙊 Мэдэхгүй юм даа, бүх зам Ром руу хөтөлдөг гэдэг шиг манай улсын эрх баригчдын шийдвэр яаж, ийж байгаад өнөө л үл бүтэх, хуураад өнгөрөх шийдвэр рүү явчих юм. 

Зам тээврийн яам болон харьяа 5 байгууллагын нийт 27 үйлчилгээг E-Mongolia-с авдаг болсноос хойш  нийт 3,686,495 үйлчлүүлжээ. Үүнийг задлан харвал, 

• Авто тээврийн хэрэгслийн торгуулийн мэдээллийг 2,952,156 удаа, хот хоорондын авто замын хураамжийн мэдэгдэл 4,685,647 удаа авсан байна. 

• Нэгэнт цахимжуулалт ийм үр дүнтэй явж буй хойно цаашид жуулчин тээврийн үйлчилгээ, тээврийн хэрэгслийн шилжилт хөдөлгөөн, тээврийн хэрэгслийн С зөвшөөрөл тэргүүтэй 7 үйлчилгээг цахимжуулах юм гэнэ. 

 💡🎧 Mzone-р ажлын бүтээмжээ хөглө 

Ажилтнуудаа бөөцийлж бөмбөрүүлэх шинэ арга байна! Pizza party-с ч үр дүнтэй шүү. 👇

Аудио ном болон дуу хөгжмийн стрийминг үйлчилгээ цогцлоосон Mbook + Mmusic = Mzone үйлчилгээ бий болжээ. Ид шид нь юу вэ?

• 👀 Нөхцөл байдал: Ажлын стресс болон байнга суралцаж чадахгүй байгаагаас ажилтнуудын 65%-ийн бүтээмж буурч, ажилдаа сэтгэл хангалуун бус болдог гэнэ. Иймд өдгөө компаниуд ажилчдынхаа оюун ухаанд нь хөрөнгө оруулдаг болж.

• 🥏 Трэндээ дага: Энэ дундаа аудио ном сонсохыг нь дэмжсэнээр ажлын бүтээмж нь 30% нэмэгдэж байгаа сурагтай. Гэхдээ Mzone-д тэрнээс ч олон шийдэл байгаа.

• 🌊 Баялаг шүү: Mzone 500 гаруй ном, 214 мянга гаруй дуу болон 4 мянга гаруй караоке дуутай. Тэдгээрийг QR код уншуулаад хүссэн газраасаа шууд ашиглах боломжтой нь гоё.

За тэгээд Mbook-н Mzone үйлчилгээг аваад ажилчдынхаа энтертайнмент хэрэглээг нь хэмнэлттэй зардлаар зохицуулаарай.

🍋 Amazon (AMZN) энэ онд AI салбартаа $100 тэрбумыг зарцуулна. Хөрөнгө оруулалтын гол урсгал AWS системд чиглэх бол цаашлаад цахим худалдаа, зар сурталчилгаа тэргүүтэй бүх үйл ажиллагааны салбартаа AI нэвтрүүлэх нь. Сониноос, Google (GOOG) энэ онд AI салбартаа $75 тэрбумыг зарцуулах бол Microsoft (MSFT) $80 тэрбумыг зарцуулахаар төсөвлөөд буй. 

🍋 Hunnu Air Embraer Е195-E2 загварын дунд оврын 2 агаарын хөлөг түрээсэлнэ. Хаанаас, хэдээр авах нь тодорхойгүй ч, компани тус агаарын хөлгүүдийг авснаар Хайнанийн хотууд болон Фукуокийн чиглэлд суудлын багтаамжаа нэмэгдүүлж, Япон, Хятад, Өмнөд Солонгос руу хуваарьт болон захиалгат нислэгүүдийн суудлын тоогоо өсгөх аж. Мөн шинээр Ташкентын чиглэлд тогтмол нислэг үйлдэж эхлэх сурагтай. 

🍋 TMK Energy (TMK.AX)-н “Гурвантэс XXXV” төслөөс олборлосон хийн хэмжээ өнгөрсөн сард 12-р сараас 300% нэмэгджээ. Тодруулбал, компани өнгөрсөн оны 12-р сард олборлолтын хүчин чадлаа 2 дахин нэмэгдүүлж 6 цооногоос нийт 8 мянган метр.куб хий олборлосон нь 12-р сарынхаас 40% илүү байгаа юм. Мөн тэд ирэх 4-р сараас Jens Energie-д өдөрт 5 мянгаас 15 мянган метр.куб хий худалдаж эхлэнэ. 

🍋 Улаанбаатарын газрын гүний дулааны нөөцийг судална. Энэ хүрээнд ШУ-ны академийн эрдэмтэн судлаачид Улаанбаатар газрын гүний дулааны нөөцийг тогтоон үнэлгээ хийж дулаан хангамжид хэрхэн ашиглах боломжийг судлах аж. Улмаар байгаль орчинд ээлтэй, ЭЗ-ийн хэмнэлттэй дулааны тогтвортой эх үүсвэрийг төсөл, хөтөлбөрүүдэд нэвтрүүлэхэд анхаарч эхлэх нь ээ. 

• 🧮 Цахилгааны төлбөрөө шинэ аргачлалаар нь тооцоод үзээрэй. (Tog)

• 🤡 Америкийн улс төрийг тойрсон сонин хачныг шог зургаар. (FoxNews)

• 🏗️ SnapChat $10 саяар Калифорнийг сэргээн босгох баг бүрдүүлнэ. (TechCrunch)

• 🧑‍🔬 Хятадын Сычуань их сургууль ШУ-ны судалгааны чанараараа Стэнфорд, Оксфордыг ардаа орхив. (SCMP)

• Даваа: Тэнцэх эсэх нь бэрх төлбөрийн тэнцлийн статистик гарах нь ээ.

• Мягмар: Дотооддоо хэр их худалдаа хийсэн бэ гэдэг тоо гарна.

• Лхагва: Шинэчилсэн сагстай 1-р сарын инфляцыг тольдоно.

• Пүрэв: Жилээс жилд, өдрөөс өдөрт өсөж яваа орон сууцны үнийн статистик гарна.

• Баасан: Манай товхимлын 988 дахь дугаар тохирсон цагтаа шинэ мэдээ, мэдээлэлтэйгээр та бүгдэд хүрнэ.

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ