🤑 ББСБ: Цэвэр ашгийн дундаж өсөлт 54%

POWERED BY

Эрхэм хүндэт нийслэлчүүд ээ! ​​Энэ сарын 22-27-ны өдрүүдэд тээврийн хэрэгслийн улсын дугаарыг тэгш, сондгойгоор ангилан хөдөлгөөнд оролцуулах нь ээ. Өмнө нь тэгш, сондгой хязгаарлалтын ачаар замын хөдөлгөөний ачаалал 32%-44% буурч байсан гэнэ дээ. 🧐

GOV: ЭТТ-н 1072 хувьцаатай иргэнд 2 сарын 28 болон 4-р сард 2024 оны ногдол ашиг болох ₮350 мянгын үлдэгдэл ₮220 мянгыг тэнцүү хувааж олгоно.   

MSE: БиДиСЕК ҮЦК (BDS) 2024 оны цэвэр ашгаасаа нэгж хувьцаанд ₮89.67-ийн ногдол ашиг, Монгол Базальт (MBW) ₮2.42, Улаанбаатар Хивс (UBH) ₮2,000-ийн ногдол ашиг тус тус олгоно. 

MNG: Шинэ Зеланд Улсын Шадар Сайд бөгөөд Гадаад хэргийн сайд Уинстон Питерс Монгол Улсад айлчилна.

🤑 ББСБ: Цэвэр ашгийн дундаж өсөлт 54%

Тайлангийн үе бараг шувтарч байна даа. Өнөөдөр нээлттэй ББСБ-уудын 2024 оны дүр зургийг харцгаая. Нэлээд өссөн байна шүү. 

📌 Том зураг: Олон зээлдэгч, их зээл

Одоогоор Монголд 573 ББСБ үйл ажиллагаа явуулж байна. Энэ тоо 2022 оныхоос 60-аар нэмэгджээ. Эдгээрт давхардсан тоогоор 5.4 сая харилцагч байгаа нь жилийн өмнөхөөсөө 18.9% өссөн хэрэг. Улмаар цэвэр зээлийн хэмжээ нь 80% нэмэгдэж ₮5.7 их наядад хүрээд байна. Өөрөөр хэлбэл, ББСБ-уудын цар хүрээ нэлээд тэлж байгаа гэсэн үг.

📈 Нээлттэй 5 = Салбарын 20%

Харин таван зуун ББСБ дундаас таван ББСБ хэдийн IPO хийж олон нийтэд нээлттэй болсон. Тэдний нийт хөрөнгийн хэмжээ өнгөрсөн онд дунджаар 61.8% өсөж ₮1.4 их наядад хүрсэн нь нийт ББСБ-ын салбарын нийт хөрөнгийн 19.7%-ийг эзэлж байна. Түүнчлэн тэдний хүүгийн орлого, харилцагчийн тоо нэмэгдсэнээр цэвэр ашгийн хэмжээ нь дунджаар 54% өсөж нийтдээ ₮135.9 тэрбумд хүрчээ.

• 💪 Санхүүжилтийн эрэлд: Үүнээс гадна ББСБ-ууд санхүүжилт, эх үүсвэр татах тал дээр чамгүй сайн ажиллаж байгаа. Санхүүгийн салбарын бондын 81.1%-ийг ББСБ-ууд гаргасан байгаагаас л харагдаж байгаа юм. Нэмээд МХБ (MSE) дээр байгаа 10 нээлттэй бандны 3 нь ББСБ-ынх аж. 

🔺🔻 Уналт, босолттой

Цаашлаад эдгээр 5 ББСБ-ын зах зээлийн үнэлгээг харвал, 2024 онд 3-ынх нь өсөж, 2-ынх нь буурсан байна. Энэ дундаас нийт хөрөнгө нь хамгийн ихээр өссөн ЛэндМН ББСБ (LEND)-ын зах зээлийн үнэлгээ хамгийн ихээр буюу 183.5% өссөн бол Сэндли ББСБ (SEND)-ынх хамгийн ихээр буюу 4.8% буурсан аж. 

• 💰 Ногдол ашиг: Түүнчлэн эдгээр ББСБ-уудаас одоогоор Ард Кредит (ADB)-ээс бусад нь 2024 оны цэвэр ашгаасаа нийт ₮19.5 тэрбумын ногдол ашиг хуваарилах шийдвэр гаргав. Эдгээрийн дундаж өгөөжийг хувьцаа тус бүрийн 2024 оны хаалтын үнээр тооцвол 4.9% болж байгаа юм. 

Эцэст нь… Монголчуудын амьдралын хэв маяг, санхүүгийн чадамжаас хамаарч ББСБ-ууд хурдацтай хөгжиж байна. Саяхан Инвескор ББСБ (INV) л гэхэд Лондоны хөрөнгийн биржид бүртгэгдсэн. Банк, санхүүгийн хэдэн компани л Монголын хөрөнгийн зах зээлийг өнгөлж байна даа.

🤔 Хар алт моодноос гарна гэж үү? 

Өдгөө дэлхий даяар 10,978 дата төвүүд байгаа бөгөөд нийт эрчим хүчний 2%-3%-ийг ашиглаж буй. Гэтэл 2030 он хүртэл дата төвүүдийн эрчим хүчний хэрэглээ жил бүр 10%-20% өсөх төлөвтэй байгаагаас харахад 5 жилийн дотор уг үзүүлэлт 4%-6%-д хүрэх төлөвтэй байгаа юм.  

🌉 Хуучин болон шинэ эриний уулзвар

AI шилжилтийн улмаас технологийн томчууд төдийгүй хөгжингүй орнууд дата төвийг хаа сайгүй барьж, эрчим хүчний асуудлыг нь шийдэхээр бага оврын цөмийн реакторуудыг ч давхар барьж байгаа. Гол нь шинээр барьж буй дийлэнх дата төвүүд нь AI буюу асар их эрчим хүч шаардагдах дата төвүүд юм. 

• 🪙 Нөгөө талд: Дональд Трамп тангараг өргөсөн өдрөө Америкт эрчим хүчний онц байдал зарлаж байв. Ингэхдээ Америкт бусдаас илүү байгаа газрын тос, байгалийн хий, нүүрсний нөөцийг ашиглан эрчим хүчээ дотоодоосоо хангах юм. Далд утга нь хүлэмжийн хийгээ бууруулахад бус нүүрс, газрын тосны хэрэглээгээ нэмнэ гэсэн үг. 

🤔 Яагаад нүүрс түлнэ гэж? 

Байгалийн хий, нүүрсний асар нөөцтэй Америк яах вэ гэхэд бусад улсын хувьд AI-н төлөө буцаад нүүрсээ их хэмжээгээр түлэх магадлал өндөр байгаа. Тухайлбал, Америк, Хятад, Герман, Энэтхэг тэргүүтэй орнуудад дата төвүүд хурдацтай баригдаж байгаа нь эдгээр орнууд эрчим хүчний нийлүүлэлтээ одоо байгаагаасаа хэд дахин нэмэх хэрэгцээг үүсгэж буй. Хамгийн ойрын шийдэл нь нүүрс түлэх. 

• ♟️ Бодлоготой нүүдэл: Жишээ нь, Microsoft (MSFT) гэхэд Германы Хамбачийн нүүрсний уурхайн ойролцоо дата төвийн хүчин чадлаа өргөтгөж буй.

🤖 Юм хөгжчихсөн цаг шүү! 

AI, дата төв гэлтгүй дийлэнх орнууд нүүрстэйгээ зууралдсаар л байгаа. Тиймээс ч хэрхэн нүүрсээ түлэнгээ CO2 ялгаруулалтаа бууруулах вэ гэдэгт анхаарах болж. Туршиж буй арга нь CO2-г хуримтлуулах, хадгалах (CCS) болон хүлэмжийн хий бага ялгаруулах HELE технологи. CSS нь гэхэд CO2 ялгаруулалтыг 90% хүртэл бууруулах чадалтай л гэнэ. Асуудалтай тал нь зардал өндөр учраас Америк, Их Британи, Норвег, Хятад, Япон зэрэг хөгжингүй орнууд л ашиглаж буй. 

Эцэст нь… Дата төвүүдийн эрчим хүчний эрэлт нүүрсийг хэсэгтээ моодонд байлгаж чадах ч энэ нь түр зуурын л шийдэл. Угтаа дата төвүүдэд нүүрснээс илүү байгалийн хий илүү сайн тохирдог гэнэ. Энэ ч яах вэ, харин бид энэ хугацаанд нүүрснээс өөр орлогын сувагтай болохгүй бол мэдсээр, таамагласаар байж заавал улс орнууд нүүрснээс бүрэн ангижирсан хойно одоо яах вэ гээд сууж байх вий.

💡 Таавар таацгаая. 

… нь хувь хүн болон хуулийн этгээдийн үйл ажиллагааны үнэлэмж, давуу тал, нэр хүндийн илэрхийлэл болох биет бус ашиг буюу тухайн этгээдийн өөрийн хөрөнгийн бодит үнэ ба худалдах үнийн зөрүү юм. Энэ нь брэндийн нэр хүнд, технологи, олон нийтэд танигдсан байдал, үйлчлүүлэгчдийн хүрээ, сайн менежмент зэрэг хүчин зүйлээс үүдэж бий болдог. Тэр юу вэ? Таасан бол хариултаа бидэнд илгээгээрэй. 😉

🍋 ОУ-ын Cadence консорциум $3.9 тэрбумаар Канадын анхны өндөр хурдны галт тэрэгний сүлжээг барина. Тус консорциумд багтсан Air Canada (AC.TO), AtkinsRéalis тэргүүтнүүд 6 жилийн дотор Квебек-Торонто чиглэлд 1,000 км сүлжээ барих бөгөөд аяллын хугацааг 2 дахин багасгаж 3 цаг болгох аж. Сонирхуулахад, энэ чиглэлд 18 сая хүн амьдарч, Канадын ДНБ-ий 40%-ийг бүрдүүлдэг.

🍋 Энэ онд Улаанбаатарт зам хариуцагчийн тогтолцоо нэвтрүүлнэ. Энэ хүрээнд төвийн 6 дүүргийн авто замыг 12 багц болгож, 1 дүүргийг 2 компанид хариуцуулах нь. Цаашлаад, замын эвдрэлийг хурдан засаж, чанар байдлын индексийг 80-ээс дээш байлгах, 10 байршилд шинэ зам барьж, 41 байршилд шинэчлэл хийхээр төлөвлөжээ.

🍋 Mitsui & Co (MITSY) Rio Tinto (RIO)-н “Rhodes Ridge” төмрийн хүдрийн төслийн 40%-ийг эзэмшинэ. Тус төслийн 60%-ийг $RIO эзэмшдэг бөгөөд Mitsui & Co $5.3 тэрбумаар VOC-н 25%, AMB-н 15%-ийг худалдан авчээ. “Rhodes Ridge” нь 6.8 тэрбум тн төмрийн хүдрийн нөөцтэй бөгөөд энэ оны сүүлээр ТЭЗҮ нь дуусаж жилд 40 сая тн-ыг олборлож эхлэх юм байна. 

🍋 Palantir (PLTR) зарах хувьцааны хэмжээгээ 5 дахин бууруулж $1.2 тэрбум болголоо. Компани өмнө нь $6 тэрбумаар 48.9 сая ширхэг хувьцаа зарахаар төлөвлөж байсан ч, сүүлийн 3 сард Wall Street-н 17 шинжээчдийн 10 нь барих, 5 нь зарах, үлдсэн нь худалдан авах үнэлгээ өгсөнтэй холбогдуулан стратегиа ийн өөрчлөв. Гэснээс Palantir-н хувьцааны үнэ сүүлийн 1 жилд 427% өсөж өдгөө $112 болжээ.

• 🕊️ Ковидын үеэр нас барсан 1.7 сая Америкчууд $294 тэрбумыг НДС-даа үлдээжээ. (Fortune)

• 🎠 Соёл, хэлээрээ ялгаатай нөхөрлөл хавьгүй амттай. (BBC)

• 🍿 Нэг сумаар 2 туулай: Кино үзэнгээ нухацтай сэтгэлгээгээ хөгжүүл. (Thinkers)

• 🎢 Америкийн Ерөнхийлөгчийн сонгуулиас хойш Илон Маскийн компаниудын нийт үнэлгээ 47% өсөв. (MorningBrew)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ