🗣️ PDAC-н попрол

Хятад импортын махаа жийв | $CUMN-н өнгөлөг жил | Зөвшөөрлийн тухай хуулийн өөрчлөлт

March 06, 2025

POWERED BY

Happy 1,000! Өнөөдөр манай товхимлын “Нэг мянга” дахь дугаар та бүхэнд хүрч байна. Энэ бүх дугаарын цаана бидний хөдөлмөр, сэтгэл, хөгжил, инновац шингэсэн билээ. Анх манай имэйл товхимол анхдагч байсан бол өдгөө бид хэдийн имэйл товхимлын соёлд суралцсан байна. Биднийг дэмжиж, хамт байдаг уншигч та бүхэндээ баярлалаа. 🍋

BOM: Монголбанкны энэ оны эхний 2 сард худалдаж авсан үнэт металлын биет хэмжээ өмнөх оны мөн үеэс 15.1% буурч 1.9 тн болсон бол алт худалдаж авах дундаж үнэ нь ₮321.5 мянга болжээ.

XAC: ХасБанк (XAC) өөрийн эрх бүхий албан тушаалтнуудын холбогдох этгээдүүдтэй нийт ₮66.8 саяын 4 хэлцэл байгуулсныг батламжиллаа. 

GOV: Зөвшөөрлийн тухай хуульд нэмэлт, өөрчлөлт оруулах тухай хуулийн төслийг УИХ-д өргөн барина. 

 📌 PDAC-н попрол 

Уул уурхайн салбарынхан жил бүр Торонто хотод дэлхийн хамгийн том уул уурхайн хайгуул, хөгжүүлэлтийн чуулган болох PDAC-д уулзацгаадаг. Монгол 2006 оноос хойш PDAC-д оролцож байна. Энэ жил оролцоод онгой попорчээ. 

⛏️ 10 мянган га-г хай! 

Уг арга хэмжээнд Монголоос хэд хэдэн төлөөлөл очсон. Үүнд Аж үйлдвэр, эрдэс баялгийн сайд гол үүргийг гүйцэтгэв. Тэрбээр, энэ сараас 10 мянган га талбайд хайгуулын лиценз олгохоо зарласан юм. Одоогоор манай нийт газар нутгийн 4.4%-д ашигт малтмалын тусгай зөвшөөрөл олгогдсон. Нийт зөвшөөрлийн ердөө 35.8%-ийг хайгуулын зөвшөөрөл эзэлж буй. 

  • 🌪️ Чиглэлийг дагая: Дэлхий нийт шинэ үеийн стратегийн ашигт малтмал, тэр дундаа газрын ховор элемент, зэс, никель зэрэг эрдэс баялгийн чиглэлд цахилж яваа, нүүрс биш. Монгол энэ чиг хандлагыг харгалзан хайгуулаа эрчимжүүлж, дэлхийн эрэлттэй нийцсэн чухал ашигт малтмалын шинэ ордуудыг илрүүлэх шаардлагатай.

📨 Нэмсэн мессеж

Түүнчлэн PDAC дээр яригдсанаар, зэсийн АМНАТ-ийг бууруулж шинэ зэсийн төслүүдийг дэмжих нь. Мөн нүүрсээ эрчимтэй буюу 2 дахин их хэмжээгээр экспортолж 2028 он гэхэд жилд 165 сая тн-г гаргадаг болох нь. Аминдаа л гаднын хөрөнгө оруулагчдын анхаарлыг татахуйц зүйлсийг ярьж ээ. Уг нь ажил хэрэг болоод дарга, сайдууд нь тогтвортой, шударгаар бодлого, зорилтоо биелүүлдэг бол сайхан сан. 

Эцэст нь… Энэ бүх мессеж хэрэгжих ёстой нь дээд зэрэг. Гэвч өмнөх, өмнөх PDAC-т ч ийм зүйлс яригдаж байсан ч хөрсөн дээр хөлөө олоогүй учир попрол уу, биелүүлэх зүйл үү гэдэг л байна. Манай уул уурхайн салбарын хөгжил чигчий хурууны дайтай байна, дэлхийн трэндээс хоцрохгүй гарын 5 хуруу шиг болгохын тулд хайгуулаа урагшлуулж, төслөө нэмэгдүүлэх нь чухал байна гэдгийг түмэн ч удаан ярьж, би ч олон бичиж байна даа. 

 🌈 $CUMN-н өнгөлөг жил 

CUMN: Өчигдөр Премиум Нэксус ХК “Earnings call” зохион байгуулж 2024 оны IV улирлын үйл ажиллагаа, санхүүгийн үр дүнгээ танилцууллаа. Компани жилийн эцэст ₮48.4 тэрбумын цэвэр ашигтай буюу 8.1%-ийн цэвэр ашгийн маржинд хүрсэн нь жилийн өмнөхөөсөө 16.5 нэгж хувиар сайжирсан үзүүлэлт билээ. Одоогоор Премиум Нэксус ХК 7 охин компанитай болсон бөгөөд нийт цэвэр ашгийн 90%+ хэсгийг CU-н цэвэр ашиг дангаараа бүрдүүлсэн аж. Сонирхуулахад, CU-н нийт дэлгүүрийн өдрийн дундаж борлуулалт 21.9% өссөн байна.

❓ Импортын үхрийн мах яасан гэнэ ээ? 

Хятад энэ 7 хоногт нэр бүхий улсуудын үхрийн махны импортыг түр зогсоохоор болсноо мэдэгдэв.

🗣️ Илүүдэл + Баталгаагүй

Энэ сарын 3-наас эхлэн Хятад Бразил, Аргентин, Уругвай, Монголын нийт 7 мах нийлүүлэгчдийн үхрийн махны импортыг түр зогсоож буйгаа зарлалаа. Монголын хувьд 22 ААН үхрийн мах экспортлох эрхтэй гэхээр 1-ийнх нь нийлүүлэлтийг түр зогсоосон бололтой. 

  • 🥩 Махны мангас: Үүнийг өнгөрсөн онд Хятад түүхэнд өндөр буюу 2.8 сая тн үхрийн мах импортолсон нь дотоодын үхрийн махны үнэд сөргөөр нөлөөлсөн төдийгүй Худалдааны яамны эхлүүлсэн импортын махны дотоодын бизнес эрхлэгчдэд үзүүлэх нөлөөллийн шалгалттай холбож болох юм.

  • 🙄 Айн? Хачирхалтай нь Хятад махны гол импортлогч болох Бразил, Аргентин, Уругвайн импортыг түр зогсоосон нь ойлгож болох зүйл ч тоож авдаггүй Монголын үхрийн махны импортыг хавчуулсан нь анхаарал хандуулах асуудал шүү. 

😒 Загасчны морь усгүй

Бидний тухайд өнгөрсөн жил $173 саяын дүн бүхий 68.4 тн мах экспортолсон. Үүний дийлэнх буюу 53.7% нь Хятад руу гаргасан лаазалсан махан бүтээгдэхүүн, 45.9% нь мөн тус улсад нийлүүлсэн адууны мах бүрдүүлжээ. 2023 онд тус харьцаа эсрэгээрээ буюу 82.1%-ийг адууны мах эзэлж байв.  

  • 📍 Экспортын чиглэл: Тус онд бид хонь, ямааны махаа Иран, Ирак, Азербайжан, Катар, АНЭУ руу, адууны махаа Хятад, Казахстан, Узбекстан, Орос руу, үхрийн махыг зөвхөн Узбекстан руу экспортолсон. Мах гаргах сувгууд 2, 3-аараа овоо нэмэгдсэн гэсэн үг. 

  • 📢 Хэнийх нь асуудал юм? Гэсэн ч нөгөө талд 2 хөрш маань махаа хаа холоос авсаар. Хятад бол импортын махны мангас. Энэ дундаа гахайн мах, араас нь иргэд нь хөлжихийн хэрээр Европ маягаар хооллохыг илүүд таашаах болсноор үхрийн махны эрэлт ч нэмэгдэж байгаа.  

Эцэст нь…  Бид өөрсдийгөө хамгийн эрүүл мах иддэг гэлцдэг. Магад тэгж итгэхийг хүсдэг байх. Гэхдээ үүнийгээ дэлхийд нотолж чадаж байгаа юм алга. Өөр нэг гачлан нь жилдээ хэр их мах бэлтгээд гаргах хүчин чадалтай вэ, гэдэг. ХАА-г дэмжинэ гээд баахан хөнгөлөлттэй зээл олгоод л байдаг. Байгаа онож байгаа эсэх нь тодорхойгүй. Том зургаар нь харвал махны экспорт өмнөх жилүүдийг бодоход өсөж яваа. Гэсэн ч ЗГ дотоодын махны үнийг бууруулахаар экспортоо хязгаарлана гэх юм. Махаа экспортлох юм уу яах юм? Тэд авдаггүй, бид гаргадаггүй таарч дээ.  

 💡 Таавар таацгаая

… нь өгөгдcөн хувьcагчид боломжит янз бүрийн утга өгөхөд компанийн өгөөж хэрхэн мэдэрч өөрчлөгдөхийг үнэлдэг зан төлөвийн арга юм. Тэр юу вэ? Таасан бол хариултаа бидэнд илгээгээрэй. 😉

Tenor

🍋 Монголын Татварын Алба “Cloudera” ашигласнаар үйл ажиллагааны үр ашгаа сайжруулсан гэнэ. Өөрөөр бол Cloudera-н дата, аналитик, AI шийдлийг нэвтрүүлж, хуучирсан, тархмал системээс төвлөрсөн өгөгдлийн менежментийн платформ руу шилжжээ. Улмаар МТА-ны татвараас зайлсхийхтэй холбоотой шалгалтын хурд нь 8 дахин өссөн байна. 

🍋 BYD (BYDDF) шинээр 129.8 сая ширхэг хувьцаа гаргаж $5.6 тэрбумыг татан төвлөрүүлнэ. Шинээр гаргах хувьцааны нэгж үнэ нь HK$335.2 байх буюу хаалтын үнээс 11.8% доогуур үнэ санал болгож байгаа аж. Тэд тус санхүүжилтээ бүтээгдэхүүн хөгжүүлэлт, ОУ-ын зах зээл тэлэх чиглэлд зарцуулах нь ээ.

🍋 CallPro болон  Viber-н Ази, Номхон далайн бүс нутаг хариуцсан захирал Анубхав Найярын Зүүн өмнөд Азийн зах зээл дэх хамтын ажиллагаа эхэллээ. Тэрбээр Viber-т 7 жил, Snapchat (SNAP)-д 2 жил харилцаа холбоо, стартап экосистемийн чиглэлээр бүс нутаг хариуцсан захирлаар ажиллаж байсан нэгэн. Тус мэдэгдлийг тэд Mobile World Congress-н үеэр зарласан төдийгүй AI-д суурилсан виртуал туслагч “AI Agent-аа танилцуулаад амжив.

🍋 Монгол Улсын Ерөнхийлөгч Чех Улсад төрийн айлчлал хийнэ. Энэ жил 2 орны дипломат харилцаа тогтоосны 75 жилийн ой тохиож байгаа бөгөөд үүнийг угтан Монгол Улс Төрийн тэргүүний түвшинд 10 жилийн дараа тус улсад айлчлах гэж байгаа билээ.

  • 🍁 Канад дэлхийн худалдааны байгууллагад алтан хошуу хүргэв. (CNBC)

  • 🪺 MWC 2025 дээр зарлагдсан тун дажгүй бизнесийн мэдээнүүд. (TechRadar)

  • 👔 Хог хаягдлаас эрчим хүч гаргах үйлдвэр байгуулах төсөлд хараат бус зөвлөх гишүүн шалгаруулна гэнэ ээ. (Ulaanbaatar)

  • 🔭 Ангараг гарагийг байж болох хамгийн тунгалгаар харуулж. (Wealth)

Reply

or to participate.