🚨 Токсик түрээслэгч

POWERED BY

Hey! Эрхэм хүндэт нийслэлийн марафончуудаа, “Улаанбаатар марафон-2025” олон улсын гүйлтийн бүртгэл эхэлсэн байна шүү. Оролцох хүмүүс маань бүртгүүлээд, бэлтгэлээ ханган биз ээ. 🏃🏃‍♀️

MSE: Монголын Хөрөнгийн Бирж ХК-ийн гишүүнчлэлийн журам шинэчлэгдлээ. 

MNG: Хөх хот болон Улаанбаатар хотыг холбосон олон улсын автозамын ачаа тээврийн шинэ маршрут нээгдлээ.

^N225: Nikkei 225 (^N225) индекс он гарснаас хойш 8.8% унаад байна. 

👏 $QPAY-н жишиг

Хөрөнгийн зах зээлд сайн жишиг тогтоож байгаа Инновэйшн Инвестмент ХК (QPAY) энэ оны эхний хагаст хөрөнгө оруулагч хоорондын харилцаагаа яаж сайжруулж, тэднийг хэрхэн халамжлах гэж байна вэ?  

📌 Овоо хараанд оров

$QPAY-н хувьд 2023 оны сүүлээр IPO хийж байсан хэдий ч маш хурдтайгаар хувьцааны ангиллаа ахиулж, одоо бүр ТОП-20 индексийн сагсанд багтах болсон. Нэмээд ногдол ашгийн өгөөж, санхүүгийн үзүүлэлт нь ч сайн байгаа учир хөрөнгө оруулагчдын анхаарлыг татаж байна. Үүн дээрээ нэмээд IR (Investor Relations) буюу хөрөнгө оруулагчдын харилцаандаа ч анхаарч буй. Үүний хүрээнд  энэ оны эхний хагас жилийн IR Calendar-аа зарлалаа. 

• 📆 Тодорхой албан ажлууд: Тэд хувьцаа эзэмшигчдийн ээлжит хурал, ногдол ашиг тараах өдөр, жилийн санхүү, үйл ажиллагааны тайланг нийтлэх зэрэг ажлуудын хийгдэх өдрийг 4-р сард тодорхой зоосон байна. 

• 💪 Нэмэлт жишгийн ажлууд: Харин 5-8-р сард олон улсын жишгийн дагуу нээлттэй мэдээлэл хүргэх ажлууд хийгдэх нь. Тодруулбал, 5 сарын 26-нд Analyst day, 8 сарын 6-нд Earnings Call арга хэмжээг тус тус зохион байгуулна. Ингэснээр хөрөнгө оруулагчид дэлгэрэнгүй мэдээлэл авахаас гадна санал шүүмж хэлж, асуулт асуух замаар харилцаагаа бэхжүүлэх боломжтой.  

🧐 Бүхэл зургаараа… 

Компани “ХК” байхын утга учир, хариуцлагын хүрээнд хийвэл зохих ажлуудаа сайн биелүүлж байгаагийн сацуу, зах зээл дэх байр сууриа хадгалж, орлого ашгаа нэмсээр байгаа. Иймдээ ч 2024 оны байдлаар нийт QR кодоор уншуулсан төлбөрийн 90%-ийг зөвхөн QPay-р уншуулсан байгаа юм. Улмаар тэдний борлуулалтын орлого 98.16% өсөж ₮26.23 тэрбум, цэвэр ашиг нь 76.02% нэмэгдэж ₮10.03 тэрбумд хүрээд буй. 

• 🅰 Татагдах нөхцөл: Нэмээд $QPAY 2024 онд 2 удаагийн шийдвэрээр цэвэр ашгийнхаа 74% буюу ₮7.4 тэрбумыг ногдол ашиг болгон хуваарилсан. Тэгэхээр тэдний ногдол ашгаас л гэхэд жилийн 18%-ийн өгөөж хүртсэн хэрэг. Эргээгээд компанийн P/E харьцаа нь 3.85 байгаа нь анхаарал татахуйц хямд үнэлгээтэй байгааг нь харуулж буй.

Заа тэгээд, бүх ХК-иуд ил тод байх зарчмаа мөрдөж, ногдол ашгийн төлөлтийн өдрөө тодорхой зарлаж, жижиг хувьцаа эзэмшигчдэдээ жаргал, зовлонгоо нээлттэй хуваалцдаг болчихвол сайн байна даа. 

• 🔝 Монголын баг санхүүгийн шинжилгээгээр Ази, Номхон далайд хүч үзнэ. (МИСШН)

• 🍊 “When Life Gives You Tangerines”-н үзэгчдийг татах нууц увидас. (SCMP) 

• 🗣️ УИХ-ын гишүүд цалин урамшууллаа нэмүүлэхийн оронд зарцуулалтаа тайлагнах ёстой бус уу? (News)

• 🥊 Азийн барууд хамтдаа Америкийн татварын бодлогын эсрэг сөрөн зогсоно. (Reuters)

🚨 Токсик түрээслэгч

Мэдээллийн Технологийн Үндэсний Парк (iT park) болон Өргөө-2 кино театрыг өмчлөгч Нью тур сафарис ХХК-ийн хоорондох шүүхийн маргаан 3 жилийн дараа нэг талдаа гарлаа. 

• 🐍 Сунжрал: Тус шүүх хурал 3 жилийн дотор 9 удаа хойшлогдож 10 дахь удаадаа арай гэж хуралдав. Хойшлогдсон тохиолдлоороо бараг дээд амжилт эвдэх шахлаа. 

iT park 1️⃣ : Өргөө-2 0️⃣

2010 оноос хойш Өргөө театр-2 iT park-н 1 м.кв талбайг ₮8,000-өөр түрээсэлж, 2023 онд уг түрээсийн гэрээ дууссан байдаг. Ийм зах зээлд баймгүй үнэтэй түрээснээс үүдэж iT park-д 2010-2022 оны хооронд нийлбэр дүнгээр ₮11.5 тэрбум хохирол учирсны сацуу тус компанийн өмнөөс төлсөн үл хөдлөх, газар ашиглалтын татвар нь ₮161.5 сая. 

• 🤔 Хэр том талбай билээ? Гол агуулга нь Өргөө-2 кино театр нь iT park-н нийт талбайн 37% буюу 2,625 м² талбайг түрээсэлдэг байсан төдийгүй ₮8,000-өөр түрээсэлдэг талбайгаа цааш ₮100,000 болгон дамлан бусад түрээслэгчдэд түрээсэлдэг байжээ.  

Тус маргаан анхан шатны шүүхийн шийдвэрээр таслагдсан ч Өргөө-2 давж заалдвал ахиад сунжрах боломжтой. Гэсэн ч энэ хэрэгт iT park-р тогтохгүй бусад стартапын бүхэл бүтэн 14 жилийн хохирол, бизнесийн өсөлт, алдагдсан боломж яригдаж байгаа гэхээр үргэлжлэх үндэслэлгүйн сацуу тус хохирлыг хэрхэн барагдуулах талаар яримаар. 

🐣🐤 Стартап инкубатор

iT park нь нэг талдаа Монгол стартапуудыг бойжуулах хамгийн том инкубатор төв. Гэтэл уг асуудал зах зээлд стартапууд ид хөл тавьж байсан 2020-2021 оныг хамарч байсан нь туйлын харамсалтай. Өдгөө Төв Ази, Зүүн Өмнөд Ази руу амжилттай гарсан цөөн хэдэн технологийнхноос бусдаар гадагш бизнесээ тэлсэн стартап алга. 

• 💡 Сонирхуулахад, iT park-д одоогоор нийт 24 стартап бойжиж, үйл ажиллагаа явуулж буй инкубатор түрээсийн талбайн 80%-ийг бүрдүүлж буй. Цаашид Өргөө-2 кино театрын эзэмшиж буй талбай зориулалтаараа ашиглагдвал одоо бойжиж буй стартапын тоо 2-3 дахин нэмэгдэх, мөн судалгаа, хөгжүүлэлтийн R&D төв бий болох гэхчлэн томоохон м² бүхий талбай бий болох нь ээ. 

Эцэст нь… Монголд дураараа дургих асуудал ил, далд хязгаар давсаар. Дийлэнх хүмүүс хотын А бүсэд 1 м.кв-г ₮8,000-өөр түрээсэлье гэж бодох нь байтугай, ой тойнд нь ч буухгүй. Гэхдээ зарим эрх мэдэлтэй хүмүүст бол үүнийг бодол биш боломж болгож чадаж байна. Нөгөө талд стартапууд маань мөнчигрөөрөө мөлчийтлөө үзээд л байдаг…

Бяцхан кейс задлан 💡

• Асуудал: … компани гэр ахуйн жижиг сажиг тохижилтын хэрэгслүүд хийж борлуулдаг. Энэ чиглэлээрээ тэр хавьдаа хөөрхөн алдартай ч, зах зээлээ улам тэлэхийг хүсэж байв. 

• Шийдэл: Компани минималист, модерн гэхчлэн интерьерийн шийдэл тус бүрд тохирох гэр ахуйн тохижилтын хэрэгслүүдийг зоож харуулсан каталог гаргаж сошиал сувгууд дээрээ байрлуулав. 

Тус компанийн шийдэл бизнесийг нь өсгөж чадах болов уу? Санал бодлоо хуваалцаарай. 😉

🍋 Disney (DIS) Snow White киноноос $115 саяын алдагдал хүлээх төлөвтэй байна. Тодруулбал, тус кино нээлтээ хийсэн 2 дахь 7 хоногтоо эхний 7 хоногоос 66% бага буюу $14.2 саяын орлого олжээ. Эндээс 80-90 хоногт дэлхий даяар нийт $295 сая буюу бүтсэн зардлаасаа 1.8 дахин бага орлого олох тооцоо гарч. Санаж байвал, 2020 онд Mulan $69.9 саяын орлого олж $DIS-н нүүрийг түлж байсан даа.

🍋 Үндэсний брэнд ₮ картыг Хонконгийн төлбөр тооцоонд ашиглах боломжтой боллоо. Одоогоор тус картыг лого байршсан худалдаа, үйлчилгээний цэгт ашиглах боломжтой байгаа бол цаашид дэлгүүр, метро, такси гэхчлэн түргэн үйлчилгээний салбаруудад ашиглах боломжтой болох нь. Эргэн харвал, ₮ карт 2019 оноос EMV чип болон NFC зайнаас унших технологид, өнгөрсөн онд Apple Pay үйлчилгээнд холбогдоод буй.

🍋 Өмнөд Солонгосын шүүх энэ Баасан гарагт Ерөнхийлөгч Юн Сок Ёлийн импичментийн талаар шийдвэрээ зарлана. Хэрэв шүүх импичментийг хүлээн зөвшөөрвөл, Юн Сок Ёл тэр даруй ажлаасаа чөлөөлөгдөж, 60 өдрийн дотор шинэ Ерөнхийлөгчийн сонгууль болох юм. Тэгэхээр 4 сарын 4-өөс эхлэн  тоолбол сонгууль 5-р сарын сүүлийн 7 хоногоос 6-р сарын эхний 7 хоногийн хооронд болох магадлалтай. 

🍋 Хятадын Төв банк өнгөрсөн сард ¥800 тэрбумын репо гэрээ хийжээ. Үүний 62.5% буюу ¥500 тэрбум нь 3 сарын хугацаатай бол үлдсэн нь 6 сарын хугацаатай байна. Репо гэрээг тус банк өнгөрсөн оны 10-р сараас эхлэн системийн ликвидийг удирдах зорилгоор ашиглаж эхэлсэн бөгөөд сар бүр 1 удаа 1 жил хүртэлх хугацаатай хийх юм.

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ