🎉 $INV: Шинэ түүх бүтээлээ

POWERED BY

Шинэ 7 хоногийн мэнд! Алдарт хайрын баяр дуусаж, цагаан сар айсуй. Бууз, баншаа бэлдэж амжсан уу? 1 кг үхрийн ястай махны дундаж үнэ л гэхэд жилийн өмнөхөөсөө ₮2,448-өөр, өнгөрсөн сарынхаас ₮525-өөр өсөөд байна. Энэ жилийн цагаан сарын зардал өмнөх жилүүдээс нэлээд өндөр байх нь дээ. 🤓 

MSE: Монгол Шуудан ХК (MNP) нэгж хувьцаанд ₮1-ийн, Гермес центр ХК (HRM) нэгж хувьцаанд ₮9.6-ийн, Эм Жи Эл Акуа ХК (MGLA) нэгж хувьцаанд ₮7.31-ийн ногдол ашгийг тус тус хуваарилахаар болов. 

KHAN: ХААН Банк ХК (KHAN) Пүрэв гарагт ₮373.5 тэрбумын ногдол ашиг тараах шийдвэр гаргасны араас буюу Баасан гаргт хувьцааны үнэ нь 9.65% өсөж ₮1,330 боллоо. 

FRC: Өнгөрсөн онд ББСБ-уудын харилцагчдын тоо жилийн өмнөхөөсөө 18.9% нэмэгдэж 5.4 саяд хүрснээр нийт зээлийн хэмжээ нь 56.4% өсөж ₮5.8 их наяд болжээ.

OTC: Өнгөрсөн 7 хоногт биржийн бус зах зээлд ₮66.1 тэрбумын болон $1 саяын арилжаа хийгдэв. Нийт төгрөгийн арилжааны 40.9%-ийг анхдагч зах зээлийн арилжаа бүрдүүлэв.

 🎉 $INV: Шинэ түүх бүтээлээ 

Инвескор Санхүүгийн Групп Лондоны Хөрөнгийн Бирж (LSE)-д албан ёсоор бүртгэгдлээ. Ингэснээр тэд LSE-д бүртгэгдсэн Монголын анхны санхүүгийн компани болоод байна. 👏

✨ Тэлэлтийн он жилүүд

Инвескор Санхүүгийн Групп 2016 оноос хойш тэлсээр үндсэн чиглэл болох ББСБ-аасаа гадна андеррайтер, брокер, үл хөдлөх, хөрөнгө оруулалтын сангийн чиглэлд тэлсэн. Үүнээс гадна зөвхөн Монголд бус Төв Азийн санхүүгийн зах зээлд амжилттай өргөжиж одоогоор 8 улсад 14 охин компанитайгаар үйл ажиллагаа явуулж буй. 

• 💪 $INV-н амжилт: Инвескор ББСБ (INV)-ын хувьд л гэхэд 2019 онд нийт хувьцааныхаа 15%-ийг олон нийтэд санал болгож МХБ (MSE)-ийн түүхэн дэх хувийн хэвшлийн хамгийн том IPO-г хийж байв. Үүний дараа FPO ч хийж Монголд 16 салбар, Киргизэд 4 салбар, Казакстанд 1 салбартай болсон. $INV бол IPO-н дараа амжилттай явж буй цөөн компанийн нэг. Тэдний хувьцааны үнэ IPO үнээсээ 5.6 дахин өсөөд байна.  

• 🆕 Шинэ тавцан: Харин одоо тэд LSE-д албан ёсоор бүртгэгдсэнээр зөвхөн компанийн хувьд бус Монголын санхүүгийн салбарын хувьд ч томоохон ахиц гарлаа. Зүгээр нэг бирж биш 224 жилийн түүхт, дэлхийн хамгийн томд зүй ёсоор тооцогдох, 70 гаруй орны 2,700 гаруй компани хувьцаагаа арилжаалдаг Лондоны Хөрөнгийн Бирж шүү дээ. 

🧐 Ямар боломж үүсэх вэ? 

Инвескор Санхүүгийн Групп LSE-д бүртгэгдсэнээр гаднын хөрөнгө оруулагчид Монголын санхүүгийн салбарт илүү анхаарал хандуул эхлэхээс гадна компанийн хөрвөх чадвар сайжирч, капиталын хүртээмж нэмэгдэнэ. Нэмээд LSE ОУ-ын санхүүгийн тайлагналын стандарт (IFRS), засаглалын дүрмийн хатуу журамтай тул ил тод байдал, засаглал сайжрах юм. Үүнийг дагаад өрсөлдөх чадвар сайжрах, нэр хүнд өсөх, хувьцааны үнэ цэн нэмэгдэх гээд нэмэгдэх бонус их. 

🌌 Цаашид… 

Инвескор Санхүүгийн Групп Монголын санхүүгийн салбарыг ОУ-ын тавцанд гаргах томоохон үүрэг гүйцэтгэлээ. Тэд цаашид ч гадаадын хөрөнгө оруулагчдыг татах, Монголын санхүүгийн экосистемийг хөгжүүлэх чиглэлд ажиллаж Азийн санхүүгийн салбарын томоохон тоглогчдын нэг болохоор зорьж буй. Ямартай ч манай зах зээлд дэвшил гарч ахисаар л байна. Илүү олон компани энэ жишгийг дагах болтугай. 

🥊 Татварын маргаан 

SouthGobi (1878.HK) болон Татварын Ерөнхий Газрын хоорондох татварын маргааныг компанид ногдуулсан татварын хэмжээг багасгаж шийдвэрлэв.

🫣 Асуудал эндээс эхлэв

2023 онд ТЕГ компанийн Монголд 100% эзэмшдэг охин компани болох SouthGobi Sands-н 2017-2020 оны хоорондох татварын аудитын үр дүнд үнэлгээ хийн $75 сая татварын торгууль ногдуулж, 2024 онд торгуулиа хоцроосон шалтгаанаар $85 сая болгон нэмэгдүүлж байв. Компани тус шийдвэрийг эсэргүүцэн давж заалдахаа мэдэгдэж байсан. Улмаар өнгөрсөн 7 хоногт Татварын маргаан таслах зөвлөлөөс ногдуулсан $80 саяын татвараа $25 болгон бууруулж, талууд тохиролцсон байна. 

• 🐦‍⬛ Хар түүх: Одоогоос 9 жилийн өмнө буюу 2015 онд SouthGobi Resource $18 саяын татвараас зайлсхийсэн хэрэгт холбогдож, удирдлагууд нь 5 жилийн хорих ял авч байсан түүхтэй. 

• 🛑 Эрчилж, орооцолдсон татварын маргаанаасаа болж тэд 2023 оны II улиралд $40.5 саяын алдагдал хүлээж, татварын маргаанаа шийдэж чадахгүй бол дампуурах эрсдэлтэй байгаагаа мэдэгдэж байв.  

🔜 Цаашид яах вэ? 

2023 оны хагас жилд $40.5 саяын алдагдал хүлээж байсан тэд өнгөрсөн оны хагас жилд $15 саяын ашигтай ажилласнаа мэдээлж байсан. Тус хугацаанд нүүрний борлуулалт нь ч 33% өсөж 1.2 сая тн-д хүрсэн байдаг. 

• 📝 Цаашлаад, Овоот толгойн уурхайд нүүрсийг хуурай аргаар ялгах шинэ системийг Tangshan Shenzhou Manufacturing Group-тэй хамтран байгуулахаар болсон гэдэг. 

Эцэст нь… SouthGobi Resources урт хугацаандаа Хятадаас 40 км-ийн зайд байрших Овоот толгой уурхайн үйл ажиллагаандаа голлон төвлөрөх төдийгүй 2 гол хувьцаа эзэмшигчтэйгээ стратегийн түвшинд хамтран ажиллахаа мэдэгдэж байсан. Юутай ч татварын маргаан дууслаа. Цаашид татварын маргаан үүсэж буй шалтгаан, зохицуулалтын орчноо цэгцлэхгүй бол аль аль талдаа хохиролтой яваад л байх уу?

Улсын төсвөөс бүтээн байгуулалтын ажлуудад ₮3 их наядыг зарцуулж байгаа. Гэвч эцсийн дүндээ стандарт, нормын шаардлага хангаагүй дөмөгхөн барилгууд босох үе цөөнгүй. Энэ асуудлыг хэрхэн шийдэж байгаатай цухас танилцъя. 👇

• Норм, дүрмийн стандартыг шинэчилнэ: Энэ хүрээнд өнгөрсөн оноос 97 суурь норм дүрмийн стандартыг шинэчилж яваа аж. 

• Яагаад?: Чухамдаа аливаа улсад тухайн цаг үеийн шаардлагад нийцүүлэн барилгын норм, дүрмээ шинэчилдэг. Гэтэл Монголд 1990 оноос өмнөх стандарт, 1990-2000 оны дүрэм, 2000-2012 оны төсвийн суурь нормууд гээд талын нэг тарсан 400 гаруй дүрэм журмууд буй. Үүнийг багц хэлбэрт оруулснаар төсвийн зарцуулалт үр ашигтай болох нь ээ. 

🍋 Европын батлан хамгаалах салбарын стартапууд өнгөрсөн онд нийт $5.2 тэрбумын санхүүжилт татав. Нэр дурдвал AI программ хангамж боловсруулдаг Helsing $466.3 сая, квант компьютерын стартап Quantinuum $300 сая гэхчлэн хөрөнгө оруулалт татжээ. Нийт дүнгээр Германы Мюнхен хамгийн их буюу $996 саяын санхүүжилт татсан бол Их Британид хамгийн олон буюу 10 стартапын 5 нь том дүнгээр санхүүжсэн байна. 

🍋 “Эрдэнэт Машин” цогцолбор үйлдвэр байгуулагдсанаар 2,500 орчим ажлын байр шинээр бий болно. Түүнчлэн жилд 500 ш ачааны хагас вагон, бүрэн угсрах загвараа 500 ш төрөл бүрийн автобус, 1-10 тн даацтай 10,000 ш ачааны автомашин үйлдвэрлэх аж. Тэдгээр нь байгаль орчинд сөрөг нөлөө багатай, аюулгүй, дэвшилтэт технологи, тоног төхөөрөмжөөр бүтээгдэх нь ээ. 

🍋 Америкчуудын зээлийн картын өр ₮1.21 их наяд болж шинэ рекорд тогтоов. Үүнийг оролцуулаад тэдний нийт өр буюу орон сууцны зээл, авто зээл, оюутны зээл тэргүүтэй өрийн хэмжээ сүүлийн 3 сард $93 тэрбумаар өсөж $18 их наяд болжээ. Нью-Йоркийн Холбооны Нөөцийн Банкны судлаачдын үзэж буйгаар жилийн эцэст баярын худалдан авалтын үеэр зээлийн картын өр ихсэж оны эхэн үед буурах хандлагатай байдаг аж. 

🍋 Худалдааны салбарын борлуулалтын орлого өнгөрсөн онд ₮67.8 их наяд болж 2023 оноос 13.4% өсжээ. Дан ганц өнгөрсөн 12-р сарынх л гэхэд ₮8.4 их наяд болжээ. Нийт борлуулалтын 20.8%-ийг эзэлдэг хүнсний бүтээгдэхүүний борлуулалт өнгөрсөн онд 2023 оноос 15.8% өсөж ₮14.1 их наядад хүрсэн бол 79.2%-ийг эзэлдэг хүнсний бус бүтээгдэхүүний борлуулалт 12.8% өсөж ₮53.7 их наяд болжээ. 

• 🤫 Энэ онд 8 компани нийт $238.8 тэрбумын IPO хийх төлөвтэй. (Yahoo!Finance)

• 🏀 NBA-н бүх оддын тоглолтын тасалбарын үнэ 50% өсөж дунджаар $3,989 болов. (Axios)

• ✂️ Зөвшөөрлийн тухай хуульд нийцүүлэн хүчингүй болгосон тушаалууд. (ГБХНХЯ)

• 🥤 Дахиж лаазтай Coca-Cola харахгүй нь дээ. (BBC) 

• Даваа: Үнэт цаас болон даатгалын салбарынхны 1-р сарын өнгө. 

• Мягмар: Хятадад 1-р сард үл хөдлөх хөрөнгийн үнэ хэр хэлбэлзэв? 

• Лхагва: Өмнөд Солонгосын хэрэглэгчийн итгэлийн индекс зарлагдах нь ээ. 

• Пүрэв: Walmart, Alibaba-н ээлжит улирлын тайлан гарна. 

• Баасан: Хятад руу урссан гадаадын шууд хөрөнгө оруулалтын дүнтэй танилцана.

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ