⛔ Лиценз байхгүй!

POWERED BY

Өглөөний мэнд! Миний Монголын татвар төлөгчид өө, ХХОАТ-ыг 1% болгох өргөдлийг 100 мянган хүн дэмжжээ. Юутай ч ЭНД дарж дэлгэрэнгүй танилцаарай. 🍋

LEND: ЛэндМН ББСБ ХК Монголын Ногоон Санхүүгийн Корпораици ББСБ ХХК-ийн толгой компани болох Си Жи Эф ХХК-ийн энгийн хувьцааг худалдаж авна. 

MSE: Монголросцветмет ТӨҮГ-ын нэр Эрдэнэс Критикал Мениралс ТӨХК болж өөрчлөгдлөө. 

U.S.: Goldman Sachs (GS)-н шинжээчид Доналд Трампын тарифын нөлөөгөөр энэ оны инфляцын таамаглалаа 3.5%, ажилгүйдлийн түвшнийг 4.5% болгон өсгөж эдийн засаг ердөө 1% өснө гэв.

‼ Нийслэлийн аюул

Мега, метро, дүүжин гүүр, дэд төв гэсэн үгсээр тоноглогдсон нийслэл маань төсөвтөө тодотгол хийлээ. Нийслэл хотноо амьдардаг хэн бүхэн анхаарлаа хандуулна уу. Тодотголоор төсвийн алдагдал ₮1.6 их наяд болсон шүү. 

🫤 Трэнд: Жилдээ нэг тодотгодог юм аа, хө

Өнгөрсөн жил төсвийн жил эхлээд дөнгөж 51 хоногийн нүүрийг үзэж байхад тодотгол ярьж байв. Бүр тэрний өмнөх, түүний өмнөх жил ч нийслэлийн төсвийг тодотгож байсан. Хэдий ийм ч төсвийн алдагдал нь нэг их биш буюу өнгөрсөн жил л дээд хэмжээ болох ₮258 тэрбумд хүрч байв. Харин энэ жилийн тухайд төсвийн орлогоос зарлагыг хассан дүн бүхэл бүтэн ₮1.6 их наяд. Улс нь арай чүү алдагдалгүй төсөв баталж байхад нийслэл юу болоод байна аа?

• 💰 Тэнгэрлэг тодотгол: Тодотголоор нийслэлийн нийт орлого ₮4.1 их наяд байгаа. Үүний 85%-ийг татварын орлого бүрдүүлнэ. Тэр дундаа тал хувийг нь хувь хүний орлогын албан татвар бүрдүүлэх юм шүү. Харин нөгөө талд ₮5.7 их наядын зардал гаргана. Энэ том дүнгийн 67.4% нь барилга байгууламж шүү дээ, Цэндцэрэн минь. 

🧐 Хэр их мөнгө вэ? 

₮1.6 их наядын алдагдал гэдэг бол нийслэлийн өнгөрсөн жилийн төсвийн орлогын 51.6%, 2021 оны бүтэн жилийн төсвийн орлоготой нь тэнцэх дүн. Дөрөвхөн жилийн өмнө олдог байсан орлоготойгоо дүйх алдагдал. Системийн 5 банкийг оцойтлоо ашиг оллоо гэдэг. Тэд 2024 онд бөөндөө нийлж байж л энэ алдагдалтай дүйх буюу ₮1.7 их наядын цэвэр ашигтай ажилласан. Нэмээд энэ мөнгөөр 2 ширхэг Чингис хаан олон улсын нисэх буудал шиг буудалтай болж болох билээ.  

🔍 Юу хийх гээд байгаа юм бэ?

Өчигдөр л гэхэд нийслэлээс зогсоол барина гэж зарлав. Заа тэгээд зам, гүүр, метро гээд нийслэл шиг ажилтай, бүтээн байгуулалттай газар алга. Нэмээд $500 саяын бондынхоо санхүүжилтээр дэд төв барих гэж байгаа. Энэ бүхний цаана ажиллаж байгаа хүмүүсийн 2025 оны цалин, урамшуулал ₮227 тэрбум. Үүний ердөө 44% нь үндсэн цалин үлдсэн нь нэмэгдэл, урамшуулал. Үгүй бас болоогүй ₮3.4 тэрбумаар томилолтод явж, зочид авч ирэх нь. 

Эцэст нь… Хотын төсөв өндөр алдагдалтай байх нь бизнес, хөрөнгө оруулагчдад эрсдэлийн дохио болж, нийслэлд хийх хөрөнгө оруулалтаа хойшлуулах магадлалтай. Энэ эрсдэл дүүрч гэхэд ийм хэмжээний алдагдал хүлээчихээр дараа жилүүдэд төсвийн хуваарилалт, өнөө том төслүүд яах вэ, энэ алдагдлыг ямар эх үүсвэрээр аргацаах вэ.  

Трэнд 🆚 Үл хүндлэл

Сүүлийн хэд хоног ChatGPT-р бүтээсэн Ghibli Studio-г илэрхийлэм зургуудыг өхөөрдөх нь өхөөрдөж, эсрэг талд зохиогчийн эрх зөрчиж байгаа талаар бөөн л маргалдаж байна. 

⛔ Лиценз байхгүй! Роялти байхгүй! Хүлээн зөвшөөрөхгүй!

Яг үнэндээ энэ асуудалд Ghibli Studio-г хутгасан болохоор л AI болон зохиогчийн эрхийн асуудал хурцаар яригдаж байгаа. Тодруулбал, AI эрчийг авахаас ч өмнө буюу 2020 онд медиа болон технологийн конгломерат Thomson Reuters Enterprise, Ross Intelligence AI компанитай зохиогчийн эрхийн хэргээр шүүхдэж байсан. Тус хэрэг түүхэндээ AI зохиогчийн эрх зөрчсөн анхны нэхэмжлэл байсан бөгөөд саяхан Thomson Reuters-н талд шийдвэрлэгдсэн байна. Бүхэл бүтэн 5 жилийн дараа…

• 🚨 Тус хэрэгт Thomson Reuters ялалт байгуулсан үндэслэл нь Ross Intelligence тэдний бэлтгэсэн мэдээллийг өөрчлөөгүй шууд байдлаар ашигласан явдал. 

Тэгэхээр одоо мэдэгдэж буй OpenAI-н эсрэг гаргасан 4 зохиогчийн эрхийн зөрчлийн хэрэг ч тус хэрэгтэй ижил байвал зохиогч нар бүтээлээ хамгаалж ялалт байгуулах магадлал өндөр. 

🎨🖌️ Урлаг зөвхөн хүний бүтээл?

Ghibli Studio-н хамтран үүсгэн байгуулагч Хаяо Миязаки тэртээ 2016 онд AI-р бүтээсэн анимешнийг хараад ой гутаж буйгаа илэрхийлж байсан. Нөгөө талд OpenAI-н үүсгэн байгуулагч Сэм Алтман Ghibli Studio-н функцийг нэмэхийн өмнө нэлээн бодож нэвтрүүлсэн гэх юм билээ. Хэдий шууд зохиолчийн уран бүтээлийг тэр чигт нь хуулаагүй ч Ghibli Studio байгаагүй сэн бол ингэж алдарших байсан болов уу? 

Үүнээс нь гадна тус функцийг ашиглан Цагаан Ордон Х дээр хууль бусаар нэвтэрч фентаниль худалдсан эмэгтэйг баривчлах үеийн зургийг Ghibli Studio-н өнгө төрхтэйгөөр нийтэлсэн нь AI-н хэрэглээ, цензур тал дээр маргаан дауулж буй. 

• 🔻 Юутай ч Ghibli Studio функц ChatGPT-н серверүүдийг шатаах шахам, ажилчдыг нь унтаж амрах завгүй хэмжээнд эрэлттэй байгаа аж. Тус явдалтай холбоотойгоор ChatGPT Хаяо Миязакигийн оюуны өмчөөс бүдүүн бааргаар тооцоход ойролцоогоор $11 саятай дүйх соёлын капиталыг ашигласан байх магадлалтай гэх юм. 

Эцэст нь… ChatGPT Ghibli Studio-н үйл ажиллагаанд доголдол үүсгэж, ашгаас нь шууд зулгаасан асуудал байхгүй ч тус студи 2010 оноос хойш ердөө 2 л анимешн гаргаж ил, далд тус студид алтан үеийн түүхийг нь аваад явчих залгамж халаа байхгүй хямарч байгааг ярих болсон. Нөгөө талд домогт студийн уран бүтээлийг үгүйлэн санасан жинхэнэ фэнүүд нь тус функцийг ихэд эсэргүүцэж байгаа нь Ghibli-н уран бүтээлийг хэр хүндэлдгийг харуулах мэт.

Excel дээр хүснэгт доторх ижилхэн өгөгдлүүдийг хялбархан мөр, баганаар бүлэглэж шинэ хүснэгт үүсгэх “PivotBY” функцийг хэрэглэж сурцгаая. 👇🏻

• Эхлээд B4:E17 хүснэгт өгөгдсөн байя. Эндээс B баганад хотуудын нэр байя гэвэл B5-B8 хүртэл “Улаанбаатар” , B9-B12 хүртэл “Москва”, B13-B17 “Бээжин” гэхчлэн байна. Цаашлаад C, D, E багануудад эдгээр ижилхэн утгад харьяалагдах тоон өгөгдлүүд байгаа.

Иймд, шинэ нүдэн дээр дараад =PIVOTBY(B5:B17, C5:C17, D5:D17, SUM)-г идэвхжүүлснээр ижилхэн өгөгдлүүдийг автоматаар бүлэглэж, харьяалагдах тоон өгөгдлийн нийлбэрийг нэгтгэсэн хүснэгт үүсгэх нь. ЭНД дарж бичлэгээр үзээрэй.

🍋 Улаанбаатарын 90 байршилд гаднын франчайз үйлчилгээтэй авто зогсоол барина. Энэ нь нийт хэрэгцээг бүрэн хангахад шаардлагатай авто зогсоолын 57% буюу 68.9 мянгатай дүйх аж. Түүнчлэн 120 мянгат орчимд нийт 7,000 зогсоолыг далд хэлбэрээр барих нь. Сонирхуулахад, авто зогсоолын эрэлт Бага тойрууд хамгийн өндөр байдаг бөгөөд 1 жолооч зогсоол олоход 26 минутыг зарцуулдаг байна.

🍋 Хятадын төрийн өмчит 4 банк үндсэн хөрөнгөө нэмэгдүүлэх зорилгоор ¥520 тэрбумыг төвлөрүүлнэ. Үүнд CCB (0939.HK) ¥105 тэрбум, Bank of China (3988.HK) ¥165 тэрбум, Bocom (3328.HK) ¥120 тэрбум, PSBC (1658.HK) ¥130 тэрбумыг тус тус татан төвлөрүүлэх бол Хятадын Сангийн яам тусгай бондоор нийт санхүүжилтийн 96% буюу ¥500 тэрбумыг гаргах нь. Энэ нь тус банкнуудын зээлийн хэмжээг нэмэгдүүлж, алсдаа ЭЗ-аа дэмнэх зорилготой.

🍋 ЭЗХЯ “Өндөр хүчин чадалтай супер компьютерын тооцоолох төв” барина. Үүнийг Америк, Өмнөд Солонгост буй Монголын эрдэмтэн, судлаачидтай хамтран хэрэгжүүлэх бөгөөд тус тооцоолох төв байгуулагдсанаар шинэ материал, ашигт малтмал, эрдсийн нарийвчилсан судалгаа, AI, машин сургалтын судалгаа хийх гэхчлэн даацтай судалгаануудыг хийж эхлэх нь ээ.

🍋 OpenAI-н орлого энэ жил өнгөрсөн оноос 3 нугарч $12.7 тэрбум болох төлөвтэй. Шинжээчдийн тооцооллоор энэ тоо дараа жил харин 2.3 нугарч $29.4 тэрбум, цаашлаад 2029 онд $125 тэрбумд хүрэх ч магадлалтай гэнэ. Харин OpenAI-н зүгээс компани одоог хүртэл чип, дата төв, мэргэжлийн боловсон хүчинтэй болох гэхчлэн өндөр зардал гаргаж буй тул 2029 он хүртэл ашигтай ажиллахгүй гэж үзээд буй.

• 🌀 Цаг хугацаагаар аялах боломжтой… (LADBible)

• 🥰 Үгээр илэрхийлэмгүй өхөөрдөх мэдрэмжийг Oxford-н тольд юу гэж нэрлэв? (OED)

• 🎯 Төвлөрч чадахгүй байгаа гол шалтгаан гар утас биш. (NeuroScienceNews)

• 🎈 Япон газар хөдлөх үед байшинг дээш хөөргөх технологитой болох уу? (USAToday)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: А.Бат-Эрдэнэ