❤️‍🔥 Автомат засвар

POWERED BY

Шинэ 7 хоногийн мэнд ээ! Цагаан сар дуусангуут март угсраад, жоохон амсхийгээд цэргийн баяр айсуй. 3-р сар ч сарын цалингийн зардал ч товын тодорхой зурайдаг сар юм даа. 😅

BOM: Монголбанк бодлогын хүүг 2 нэгж хувиар нэмэгдүүлж 12%-д хүргэж, өр орлогын харьцааны дээд хязгаарыг 50% болголоо.

MSCC: Өнгөрсөн сард 351 гадаадын иргэн болон ААН арилжаанд оролцож ₮194 саяын арилжаа хийсэн нь нийт арилжааны ердөө 0.6%-ийг бүрдүүлэв.  

POL: Энэ Пүрэв гарагт Ерөнхийлөгч Чехийн айлчлалаа дуусгаж Польш Улсын айлчлалаа эхлүүлнэ. 

OTC: Өнгөрсөн 7 хоногт биржийн бус зах зээл дээр ₮18.8 тэрбумын арилжаа хийгдсэнээс ₮7.5 тэрбум нь анхдагч зах зээл дээр арилжаалагджээ.

👏 $KHAN: Эмэгтэйчүүдийг дэмжинэ

Мартын-8 сайхан болов уу? Эмэгтэйчүүдийн эрхийг хамгаалах эл өдрөөр тэгш бус байдал, нийгмийн оролцоо гээд олон сэдэв тогтмол хөндөгддөг. Тэгвэл банкны салбар энэ асуудал дээр ямар оролцоотой байна вэ? 

📌 Чиглэл: Дэмжье!

Сүүлийн үед банкнууд эмэгтэй өмчлөгчтэй жижиг дунд бизнес эрхлэгчдийг дэмжих, залуу үеийн боловсрол, эрүүл мэндийг дэмжих, хөдөө аж ахуйн бизнес эрхлэгчдийг дэмжих зэрэг нийгэмд ээлтэй төслүүдийг санхүүжүүлэхэд түлхүү анхаарч байна. Энэ ч утгаараа ХААН Банк (KHAN)-ны зээлийн багцын 50%-ийг эмэгтэй бизнес эрхлэгч нар эзэлж буй. 

• 💰 Бодит дэмжлэг: Учир нь тэд 2014 оноос ₮2.1 тэрбумын санхүүжилтийг 200 мянган эмэгтэй бизнес эрхлэгчид олгожээ. 

💿 Өөрчлөлт: Дижитал

Нөгөө талаас эмэгтэй бизнес эрхлэгчид дан ганц хөнгөлөлттэй, таатай нөхцөлөөр зээл авч бизнесээ өргөжүүлэхээс гадна Монголд бүтээгдэхүүн, үйлчилгээгээ цахимжуулснаар борлуулалт нь дунджаар 8% өсөх боломжтой аж. Нэмээд автоматжуулсан систем, хиймэл оюун ухаан ашигласнаар үйл ажиллагааны зардал 30% буурах, үүлэн технологи, дижитал шийдэл нэвтрүүлснээр 20%-40% илүү үр ашигтай ажиллах нөхцөл бүрдэх юм. 

🗒️ Нэгдэл: Бизнесээ цахимжуулах зээл

Тэгвэл ХААН Банк эмэгтэй бизнес эрхлэгчдийн цахим шилжилтийг дэмжих бизнесийн зээлийн дээд хэмжээгээ 2 дахин нэмэгдүүлж ₮1 тэрбумд хүргэжээ. Уг зээлийн бүтээгдэхүүн нь хүү багатайгаас гадна зээлийн дүнгийн 10%-тай тэнцэх мөнгөн дүн буюу хамгийн ихдээ $30,000-той тэнцэх хэмжээний урамшууллыг буцаан авах боломжтой гэдгээрээ онцлог юм. 

• Яаж? Бизнес эрхлэгч эмэгтэйчүүд Дижитал технологийн селектор (DTS) цахим хуудсанд байршсан компьютер, мобайл төхөөрөмж, үүлэн тооцоолол, сүлжээ, харилцаа холбооны тоног төхөөрөмж, хөдөө аж ахуйн тоног төхөөрөмж, үйлдвэрлэлийн технологи, программ хангамжийг бизнесийн үйл ажиллагаандаа зориулан худалдан авахдаа энэхүү зээлийг авах боломжтой юм байна шүү.

Эцэст нь… Монголын бизнесийн орчин тийм ч сайн биш буюу дунджаас доогуур, нэмээд бизнесүүдийн зогсолтын түвшин сүүлийн 5 жилийн дээд цэгтээ хүрсэн. Хэдий ийм ч банк, санхүүгийн байгууллагууд бизнес эрхлэгч, тэр дундаа эмэгтэйчүүдийг дэмжиж байгаа нь сайшаалтай байна даа. 

🤔 Сүлжээний тогтвортой байдлын нууц

Харилцаа холбооны салбарт 5G, хиймэл оюун ухаан эрчтэй нэвтрэхийн хэрээр оператор компаниуд үйлчилгээнийхээ найдвартай, тасралтгүй байдлыг сайжруулах шаардлага улам бүр нэмэгдсээр. 

• Энэ утгаараа дэлхий даяар операторууд ухаалаг хяналтын системийг үйл ажиллагаандаа нэвтрүүлж байгаагийн нэг жишээ нь AUTIN систем. 

🤖 Hey Siri: AUTIN гэж юу болохыг тайлбарла

AUTIN буюу Automation Intelligence System нь сүлжээний хяналт, удирдлага, доголдлын оношилгоо, засвар гэхчлэн ярвигтай процессуудыг бүрэн автоматжуулах зориулалттай систем. Энэ нь олон улсын eTOM, ITIL тэргүүтэй процессын стандартуудад суурилж бүтээгдсэн бөгөөд өдгөө дэлхийн 50 гаруй улсад 100 гаруй оператор үйл ажиллагаандаа ашиглах болов.

• 🤔 Жаахан газардуулж тайлбарлавал, сүлжээнд гэмтэл доголдол гарах үед автоматаар илрүүлж, оношилгоо, шинжилгээг нь AI-р хийх боломж. 

🧑‍🤝‍🧑 AUTIN-тай учрахаас өмнө…

Өмнө нь оператор компаниуд сүлжээний доголдлоо хүнээр, гар аргаар хянаж, доголдол гарсан тохиолдолд олон шат дамжлага дамжиж шийддэг байв. Харин AUTIN системийн тусламжтайгаар, 

• ✅ Гялс илрүүлэг: 5 минутад илрүүлдэг байсан доголдлыг 5 секундэд илрүүлэх буюу асуудлаа таних хугацаа минутаас секунд руу, 

• ❤️‍🔥 Автомат засвар: Гэмтэл засварлах явцыг автоматжуулснаар засварын хугацааг 60% бууруулах гэхчлэн хүний нөөцийн хувьд ч техникийн ажилтнууд илүү оновчтой, хурдтай ажиллах боломжийг бүрдүүлэх болжээ.

🏃🏻‍➡️ Монголд нэвтэрсэн юм уу? 

Уг системийг Юнител Групп өнгөрсөн онд нэвтрүүлж, Монголд төдийгүй Төв Азид AUTIN-тай болсон анхны оператор компани болсон. Ингэхдээ шууд хэрэглэлгүй сайжруулалт, өөрчлөлт хийн 200 гаруй шинэчлэл нэмж нэвтрүүлсэн байна. Өөрөөр бол Монголд тохирох өөрсдийн системийг угсарсан гэсэн үг. 

• 🏆 Сонордуулахад, компани AUTIN системийг амжилттай нэвтрүүлсэн жишиг болж өнгөрсөн оны "Digital Transformation Innovation Contest" арга хэмжээний "AUTIN-Outstanding Network Operations Award"-г авсан гэж байгаа. 

Эцэст нь… Өнөө цагт 5 минут л сүлжээгүй болоход ямар олон асуудал үүсэх билээ гээд бодохоор бидний амьдарч байгаа дижитал эринд автоматжилт, тэр тусмаа AI шийдлүүд хурдацтай нэвтрэхээс аргагүй. Дэлхий даяар шаагилдаад байгаа юмсын интернэт (IoT), 5G нэвтрүүлэхийн тулд найдвартай, хүчтэй сүлжээ хэрэг болно. Монголын юмсын интернэттэй болох мөрөөдөл хажууханд байгаа л юм байна. 

Өнгөрсөн оны байдлаар 2023 оноос 1.3% олон буюу нийт 312 үл хөдлөх эд хөрөнгө зуучлалын байгууллага СЗХ-ны тусгай зөвшөөрөлтэй үйл ажиллагаа явуулж байна. Үүнтэй холбоотой зарим тоо баримтуудтай танилцацгаая. 👇🏻

• Хөрөнгө: Тэдний нийт хөрөнгө ₮224.6 тэрбум байгаагаас 75.6% нь эргэлтийн, 24.4% нь эргэлтийн бус хөрөнгө байна. 

• Цаашлаад, эх үүсвэрийн ₮181.2 тэрбумын хөрөнгөөс 80.7%-ийг өр төлбөр, 19.3%-ийг эздийн өмч эзэлж буй. 

Үүнд ₮1 тэрбумаас дээш хөрөнгөтэй 29, ₮500 саяас ₮1 тэрбум хүртэл  хөрөнгөтэй 11, ₮100 саяас ₮500 саяын хөрөнгөтэй 68, ₮100 сая хүртэлх хөрөнгөтэй 204 компани байдаг аж.

🍋 ЛэндМН ББСБ ХК (LEND) “Харилцагчийг Хамгаалах Сертификат”-тай дэлхийн анхны финтек компани боллоо. Тэд уг стандартын Мөнгөн түвшний (SILVER) шалгуурыг хангажээ. Үүгээр $LEND харилцагчийн эрх ашгийг хамгаалж, санхүүгийн хүртээмжийг нэмэгдүүлж, санхүүгийн боловсролыг дэмжиж ажилладгаа баталгаажуулав. Финтек салбарт харилцагчийн эрхийг хамгаалах асуудал хурц болж буй энэ үед чухал жишгийг тогтоолоо.

🍋 Хятадын гадаад худалдааны ашиг өнгөрсөн 2 сард өмнөх оны мөн үеэс 27% өсөж $171 тэрбумд хүрч рекорд тогтоов. Үүнд экспорт 2.3%-иар өсөж $540 тэрбум, харин импорт нь 8.4%-иар буурч, $369 тэрбум болж. Гэсэн ч Америкийн 20%-ийн худалдааны татвар бүрэн нөлөөлөөд эхэлбэл энэ дүн орвонгоороо эргэх төлөвтэй. Нөгөө талд Тайванийн Америк руу хийсэн экспорт 66% өсөж $11.8 тэрбум болсон байна.

🍋 Улаанбаатар энэ онд авто зам, инженерийн шугам сүлжээ, тохижилтын чиглэлээр нийт 682 ажил гүйцэтгэнэ. Энэ хүрээнд инженерийн шугам сүлжээг шинээр 21 байршилд угсарч, 143 байршилд өргөтгөж шинэчлэх аж. Онцолбол, авто замын бүтээн байгуулалтын ажилтай холбоотой дулаан хангамжийн гол шугамын өөрчлөлтийг дулааны шугам 13 км, үүнээс гол шугам 8.7 км байхаар 11 байршилд хийх нь.

🍋 Тээвэр хөгжлийн банк Хятадын хил дамнасан ¥-н төлбөр тооцооны систем CIPS-д шууд оролцогчоор нэгджээ. Улмаар тус банк энэ хэлцлийг хийсэн төв Ази дахь анхны арилжааны банк болж Монголоос ¥-н төлбөр тооцоог бодит цагийн горимд гүйцэтгэх боломжтой болов. Сонирхуулахад, CIPS-н шууд оролцогч нь төлбөр тооцоог дундын банкаар дамжуулахгүйгээр гүйцэтгэх эрхтэй байдгаараа онцлог. 

• 📭 Захаасаа эхлээд цаасан захиа илгээхээ больж байна даа. (BBC)

• 🕸️ Дональд Трампын татварын бодлого Илон Маскийн хөрөнгийг 30% багасгаж. (Forbes)

• 📥 Хөгжлийн банкны тухай хуулийн шинэчилсэн найруулгын төсөлд санал авч байгаа гэнэ. (MongolChamber)

• 💡 Ажлын ярилцлагад бэлдэхдээ STAR арга барилыг ашиглаад үзээрэй. (HBR)

• Даваа: Монголбанк банкнуудын салбар нэгжийн мэдээллийг тархаах юм байна.

• Мягмар: Гадаад худалдааны нөхцөлийн индекс гарна. 

• Лхагва: Америкийн өнгөрсөн сарын инфляц зарлагдана.

• Пүрэв: Үргэлжлээд орон сууцны үнийн болон барилгын өртгийн индекстэй танилцана. 

• Баасан: Оны эхний 2 сард мөнгө, зээл яав, ийв? 

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц.Цэлмэг, А.Бат-Эрдэнэ