⚖️ Өвчтэй | Чөлөөтэй | Тас

POWERED BY

Өглөөний мэнд ээ! Энэ жилийн Цагаан сараар золгох хугацаа богино байна гэж үзэн ЗГ-аас бүх нийтээрээ олон хоног амрах хуулийн төслийг боловсруулж байгаа сурагтай. 🤔

JIF: Үндэсний Хувьчлалын Сан Хамтын ХОС ХХК өнгөрсөн оны эхний хагас жилд ₮386.6 саяын алдагдалтай ажиллажээ. 

UB: Шинэ төв цэвэрлэх байгууламж 8-р сард ашиглалтад орно. 

OIL: Түүхий нефтийн үнэ 1-р сарын оргил үнээсээ 6.8% унаж нэг баррель нь $74.9 боллоо.

🏛️ Том тоглогчийн том тоо

Орон сууц худалдаж авах, хөрөнгө оруулахаар төлөвлөж байгаа хүмүүс байна уу? Монголын үл хөдлөх зуучлалын салбарын хамгийн том тоглогч RE/MAX-н 2024 онд 12.3 мянган үл хөдлөх борлуулж ₮1.5 их наядын борлуулалт хийжээ. 2023 онд тогтоосон амжилтаа 50% давуулжээ. Яаж вэ? 

🔥 Гал асаасан жил

RE/MAX нийт хугацаанд ₮5.3 их наядын борлуулалт хийсэн байдаг. Тэгэхээр зөвхөн 2024 онд нийт борлуулалтынхаа 28.3%-ийг хийсэн хэрэг. Улмаар RE/MAX-н тайлант жилийн шимтгэлийн орлого жилийн өмнөхөөсөө 55.3% өсөж ₮52.7 тэрбумд хүрчээ. Уг орлогын дийлэнх хэсэг буюу 65.3%-ийг орон сууц, зогсоолын шимтгэлийн орлого бүрдүүлсэн аж. 

📈 Зах зээлийн трэнд: Илүү дээшээ

Том зургаар нь харвал өнгөрсөн онд нийт 43,822 айлын ашиглалтад орон сууц худалдаалагдсаны 9.6% нь RE/MAX-р худалдагдсан гэсэн үг. Энэ дундаа 2021-2023 онд ашиглалтад орсон орон сууц хамгийн их борлуулагдсан аж. Түүнчлэн Хан-Уул дүүрэг болон өрөөний тоогоороо 2 өрөө орон сууц хамгийн халуухан сонголт байжээ. 

• Тэргүүлэл: Үнэ 🆚 Эрэлт: Борлуулсан орон сууцууд дундаас үнэ нь хамгийн их өссөн нь Цэнгэлдэх хотхон, Хүннү 2222 хороолол байсан аж. Угаас Цэнгэлдэх хотхоны үнэ сүүлийн 4 жилд 134.5%, 1 жилд 22.1% өссөн байгаа юм. Харин Өрнөх хороолол хамгийн өндөр борлуулалттай 10 хотхоны жагсаалтыг тэргүүлэв.

• 💰 Дундаж үнэ: Түүнчлэн RE/MAX-р түрээслэгдсэн 2 өрөө орон сууцны үнэ өнгөрсөн оны эцсийн байдлаар сарын ₮1.77 сая байгаа нь жилийн өмнөхөөсөө 11% өссөн дүн аж. Мэдээж Сүхбаатар дүүрэг дэх түрээсийн орон сууцны дундаж үнэ хамгийн өндөр буюу Сонгинохайрханыхаас 98.3% дээгүүр байна. 

🤔 Яаж борлуулалт хийгээд байна вэ? 

RE/MAX-г маш хурдан буюу дунджаар 15 минут тутамд нэг үл хөдлөх хөрөнгө худалддаг гэдгийг мэднэ биз дээ? Учир нь СЗХ-нд бүртгэлтэй нийт агентуудын 85% буюу 1,300 орчим нь RE/MAX-д ажиллаж буй. Иймдээ ч тэд өнгөрсөн онд 2 сая км-г туулж, 1 агентын утсаар ярьсан минут дунджаар 10 өдөртэй тэнцэж, 59.4 мянган харилцагчтай болж байж Төв цэнгэлдэх хүрээлэнг 28 нугалсантай тэнцэх талбайг борлуулсан байна. 

• ⏳ 18 /8: Гэснээс тэдний орон сууц худалдах дундаж хугацаа 18 хоног, түрээслэх нь 8 хоног байдаг аж. Нэмээд RE/MAX-тай гэрээлсэн харилцагчдын 3 үл хөдлөх хөрөнгө тутмын 1-ийг RE/MAX амжилттай борлуулж буй. 

Эцэст нь… RE/MAX-н хувьд хамгийн том үл хөдлөх хөрөнгийн мэдээлэл бүхий сантай, хамгийн их агенттай учраас энэ зах зээлд байр сууриа тэлж, үл хөдлөх хөрөнгө авах зорилготой хүмүүсийн сонирхлыг ч өдөөж үүнийгээ дагаад ашиг, орлогоо ч өсгөж байна даа.

📝 Шинэ УИХ-ын ирц 

Зээ, намрын чуулган хаасантай холбоотойгоор өвлийн адаг сарын улаагчин тахиа өдөр түүхэн олуулаа болсон УИХ-ын гишүүдийнхээ ирцийг бүртгэчихье. 

🔢Тооллого

Энэ удаагийн УИХ-ын намрын чуулган нийт 81 өдөр үргэлжилсэн бөгөөд 10-12-р сарын ирцийн мэдээллийг харахад 27 удаа хуралдсанаас 12-р сард хамгийн олон буюу 11 удаа хуралджээ. Ирцийн хувьд шинэ гишүүдтэй парламент гэсэндээ харьцангуй сайн буюу 93 гишүүн 74%-иас дээш ирцтэй оролцсон байна. Мөн 9 гишүүн 100%-ийн ирцтэй оролцов.

• ✌️ VIP: Ерөнхий сайд өнгөрсөн намрын чуулганы амжилтаа давтаж энэ удаад 27 чуулганаас 5-д нь оролцож хамгийн бага ирцтэй гишүүнээр тодроод буй. Үүний 52% буюу 14 удаад нь чөлөөтэй, 7 удаад нь гадаадад, 1 удаа нь өвчтэй байсан аж. Гэснээс Ерөнхий сайд чуулганд оролцох хэрэгтэй, хэрэггүй гэдэг маргаанд та ямар байр суурьтай байдаг вэ?   

• 🥶 Луугар таслалт: Цаашлаад намрын чуулганы онцлох таслалтын эзнээр Х.Баттулга гишүүн 13 таслалттайгаар тэргүүлж буй. Ерөнхий сайд болон түүний муу ирц бусад гишүүдийнхээс хол тасархай байна лээ. 

• Шинэ хуучны ялгаа: Өөр нэгэн сонирхолтой зүйл нь чуулганд цөөн оролцсон ТОП-10 гишүүний 6 нь өмнө нь УИХ гишүүн байсан эрхмүүд байсан бол 4 нь шинээр сонгогдсон гишүүд байв. Эргэн сануулахад уг парламентын 65%-ийг шинэ гишүүд бүрдүүлж байгаа. 

🤔 Тэд юу хийв? 

Цаашлаад, өнгөрсөн чуулганаар УИХ 8 бие даасан хууль, 29 хуульд өөрчлөлт оруулах тухай, 8 хуулийг хүчингүй болсонд тооцох тухай гэхчлэн нийт 52 хууль, 57 тогтоолыг эцэслэн баталжээ. Тус чуулганы онцлох ажил нь $5.2 тэрбумын Ураны хөрөнгө оруулалтын гэрээ, ДЦС III-н өргөтгөл гэхчлэн эрчим хүчний өргөтгөл, шинэчлэлтийн шийдвэрүүд байсан билээ. 

🫡 Бидний анхаарах асуудал

Одоо харин ирэх Хаврын чуулганаар хэлэлцэх Гашуунсухайт-Ганцмодны хил холболтын гэрээ, Татварын болон эрүүгийн багц хуулиуд, Энэтхэгийн Эксим банкнаас нэмэлт зээл авах тухай, одоо боловсруулж буй хэвлэл мэдээллийн эрх чөлөө, төрийн компаниудыг хувьчлах гэхчлэн олон хуулийн хэлэлцүүлэгт анхаарал хандуулах ажил үлдэж байна. Гишүүд хэр их идэвх, ирцтэй оролцох бол доо?

Excel дээрх 1 баганад байгаа өгөгдлийг хэд хэдэн баганад хуваах хялбар аргуудыг хуваалцъя. Жишээлбэл: 1 баганад байгаа Овог, нэрийг 2 тусдаа баганад хуваах бол эхлээд тэднийг идэвхжүүлээд Data➡️Text to Columns цэсийг сонгоно. Ингэснээр Delimited болон Fixed width цэсүүд гарч ирэх юм. 

• Хэрэв баганад байгаа өгөгдлүүдийг хоорондох, цэг, таслал зайгаар нь хуваах бол Delimited➡️Delimiters-с тохирох сонголтыг хийнэ. Жишээ нь “Lemon, Press” өгөгдлийн хувьд “Comma” цэсийг сонгох юм.

• Харин өгөгдлүүдийн урт, өргөнийг тохируулж хуваах бол Fixed width цэсийг ашиглах нь. Жишээ нь “LemonPress” өгөгдлийн хувьд тохируулахдаа өргөнийг “Lemon”-р хязгаарлах нь. Тогтоогоод аваарай. Хэрэг болох ч юм бил үү. 📝

🍋 Туулын хурдны замын олон улсын нээлттэй тендер зарлагдав. Тус тендер нь ойролцоогоор нийт ₮1.96 их наядын төсөвт өртөг, үүнээс энэ онд санхүүжих ₮538 тэрбумын төсөвт өртөгтэй байх аж. Бүтээн байгуулалтын ажлыг 4-р сарын сүүлээр эхлүүлж, 2027 оны 5-р сард ашиглалтад оруулах нь. Энэ хугацаанд ямар ч зам, гүүр хаахгүй гэнэ дээ. 

🍋 НДС Капитал банк болон Чингис Хаан Банкнаас нийт ₮161 тэрбумын авлагын үлдэгдэлтэй байна. Тодруулбал, НДС Чингис Хаан Банкны ₮103.57 тэрбумын авлагаас ₮8.64 тэрбумыг нөхөн төлүүлж, ажилгүйдлийн болон тэтгэмжийн даатгалын сан руу хуваарилсан бол Капитал банкнаас мөнгөн хөрөнгөөр ₮13 тэрбум, хөрөнгөөр ₮25 тэрбумыг төлүүлсэн гэнэ. 

🍋 Монголын зөвлөх агентлаг Trillex Beijing Trans FinTech-с байгаль орчин, нийгмийн засаглал (ESG)-н туршлага нутагшуулна. Энэ хүрээнд ESG-н эрсдэлийн үнэлгээний загварчлал гаргах, нүүрстөрөгчийн ялгарал тооцооллын аргачлалуудыг боловсруулах болон ногоон төслүүдийн хэрэгжилт болон үр дүнг AI ашиглан үнэлэхэд туршлага судлах нь. Улмаар Монголын бизнесүүдийн үйл ажиллагаа дахь ESG хэрэгжилтийг сайжруулахад дэм болох аж.

🍋 Гурилын импортын татварыг тэглэсэн хуулийг хүчингүй болгоно. Гурилын импортын татварыг тэглэснээр 2024 онд Оросоос 64.2 мян.тн улаанбуудайн гурил импортолсон аж. Улмаар улаанбуудай болон гурилын үйлдвэрлэл, нийлүүлэлтийн сүлжээнд бизнесүүдийн оролцоог тогтворгүй болгож, цаашлаад тус салбарт хийгдсэн хөрөнгө оруулалтын үр өгөөж үнэгүйдэх нөхцөл үүсээд буй.

• 🤒 Германчууд жилд дунджаар 15 удаа өвчтэй өдрийн чөлөө авдаг нь дэлхийн дунджаас 50%-иар их. (Economist) 

• 🔝 ChatGPT-н сүүлийн загварыг бут цохин гарч ирж буй Хятадын AI стартап DeepSeek. (AsiaTechReview)

• 🌠 Энэ онд болох 15 томоохон одон орны тохиол. (StarWalk)

• 🔮 Өнөө Tik Tok-н Америк дахь бизнесийн 50%-ийг Oracle авах өндөр магадлалтай байна. (NPR)

Хамтран ажиллах | Ажлын байр | Редакцын бодлого

Publisher: Ц.Анхбаяр
Editor: С.Ангирмаа
Writers: М.Хулан, Б.Эмүжин
Graphics by: Ц. Цэлмэг, А.Бат-Эрдэнэ